sa misa ni Fr. Roman

SA MISA NI FR. ROMAN

Sa pag-isa nimo sa

Kopa diin

Giipis ang mompo

Sa pag-hawid

Nimo sa puti nga ostia

Sa imong

Duha ka Kamot

Sa paglitok mo

Nga mao kini

Ang lawas

Ug Dugo ni

Hesukristo

Miduko ako

Ug sama kanila

Miluhod dungan sa

Pagkiling-kiling

Sa gagmay

Nga bagting

Gipiyong ko ang

Akong mga

Mata.

Pasayloa ako

Fr. Roman

Kay wala akoy

Nakita nga

Hesukristo sud sa akong

Dughan

Wala akoy

Nabati nga kinaadman

Ug diha sa akong

Silingan

Wala akoy

Nakita nga

Kalainan

Ug diha kanimo

Nga nagwali

Sa akong

Atubangan

Wala akoy

Nakitang

timailhan

Ngitngit jud

Lagi Fr. Roman

Bisag lamdag

Kaayo ang

Simbahan

Saba jud kaayo

Fr. Roman

Bisag hilom

Kaayo ang

Nga lingkoranan

Ug mga haligi

Ug bongbong

Samok jud gihapon

bisag ang mga

Katawhan

Nangahimo nga

Amang ug buta

Ug bungol

Pasayloa ako

Fr. Roman

Kay mao kana

Ang nakita kong

Kamatuoran

Ako ang imo nga

Gitawag nga

Makasasala

Tungod ba kay

Gibuka ko ang

Akong mga

Mata ug

Gihalhal ko ang akong

Dila?

Og gitago ko ang akong

Duha

Ka mga kamot

Sa akong mga

Bulsa?

Gitaktak ko ang

Mga abog sa

Akong sapatos

Atubangan sa

Pultahan sa

Imong

Balay.

Wala didto ang

Tinood nga

Simbahan.