duha ka magsoon

sila lang duha

lalaki og babaye

nga magsoon

sa dihang

gipanganak

na sila

nalipay ang

amahan og inahan

kay kumpleto na

ang usa ka

parisan

nangadagko

sila sa tunga sa

dakong gubat

sa ilang panimalay

ang tatay nga kanhian

maestro nahimong

palahubog

ug ang nanay nga

mananabang nahimong

witwitan sa tanang

mga butang og

mga panghitabo sa ilang

pamuyo

ang mga plato

nanglupad

ug ang mga pultahan

nanyagit sa matag

lamba niini

ang mga trangka

sa bintana

gialisdan og mga

lansang

ang mga baso

nangaboak

ug ang mga samin

gipaabogan

ang pamahaw sa

lamesa mao ang

mga kasaba

og ang panihapon

mao ang

pagbinasolay

ang pagpasapasa

sa pangutana

kon kinsa ba

ang tinood

nga sad-an

sa ilang kahimtang

ang sagpa

kanunay og nahimong

morag duladula na lang

ang lalaki nahimong

drug addict

milayas

nagpuyo kuno sa usa

ka isla nga

walay ngalan

walay address

walay sulat

wala na gani igdungog

kon buhi pa ba

ang tatay namatay

sa tumang kahubog

nahubag ang atay

nagsuka ug dugo

ang nanay nakakat-on

pagdala sa iyang

kaugalingon nga

paningkamot nga

dili mahisama sa

iyang bana og anak

nga lalaki

ang igsoong babaye

nahimong hilomon

nagsigig lantaw

sa layo

naglingkod

sa taas nga bangko

tapad sa bintana

nangandoy og kalinaw

og katin-awan sa

tanang lubog

gitutukan niya ang

taas nga karsada

mitan-aw basin og

mobalik ra ang iyang

igsoong lalaki

natumba na ang

kahoy nga narra

atbang sa ilang

balay nga migabok na

ang ilang iro nga

si ekyong

kadtong gihiktan

og wala pakan-a

sa pipila ka adlaw

kadtong nagkalibang

na gani og dugo

gibuhian na

nagdula sa nataran

nga haskang

mingawa

sa pikas kwarto ang

iyang nanay nga

tigulang na

nagdagkot ug

kandila alang

sa mga patay

adunay lalaki nga

misulod sa kwarto

sa babaye ug

gihawiran ang

iyang mga kamot

ug gipahiran ang

iyang mga luha

nga midagayday

sa iyang aping

naghalok silang

duha, dugay,

naghangopay

ako kadto, nga

iyang bana.