Wednesday, August 31, 2011

panagtagbo sa damgo og kamatooran


nakita ko ang mata
nga milabay sud sa ilalom sa tubig

sud usab ako sa ilalom sa tubig
submarino ba ang gisakyan ko nga damgo?

mitutok ang mata kanako
morag nagdumot

dakong isda nga dili maklaro kon unsa ang iyang lawas
kon aduna ba siya'y ikog o baba

mata lang ang akong nakita
kalit lamang

ug nahigmata ako sa damgo
midali ako og inom sa bugnaw nga tubig

miadto kita sa usa ka lugar
kitang duha

wala mo makita ang akong nakita
nanglimbawot ang akong mga balahibo

nakita ko ang akong damgo
dakong isda,

ang iyang mga mata mitutok kanako
kalit lang ako milabay

nagpabilin siya sud sa maong suba
sa among tunga mao ang samin

Sunday, August 28, 2011

kalamidad....

nahitabo ang nahitabo
bisan pa ug giayo kini ug hunahuna nga unta
dili mahitabo

ang mga laraw nabaraw
ang mga adlaw nagsubo nagmingaw

nahitabo ang mga nahitabo
walay nahimo ang utok
pildi ang mga kamot
lawlaw ang mga tiil
hoyhoy ang mga abaga

mora bag miabot ang dakong baha
og kitang tanan nga nagtungtong sa usa ka bungtod
nanglantaw lamang
samtang gianod ang usa ka balay
ang mga baboy
ang usa ka bata nga nagpangayo og panabang
kuyog sa iyang inahan nga dili kamaong molangoy
hangtod nga sila nangawala
nalugdang
sama sa mga bato nga natiglom ug dayon
gibanos kita sa
tumang kahilom

kagawasan sa usa ka langgam

ang bato nga akong gipunit
sa dalan
akong gitagoan sa akong
palad

init ang bato sa init kong
palad

ang bato nahimong
bulak ug ang akong palad
mibukhad

humot ang bulak sama
sa kahumot usab sa akong
palad

ang bulak nahimong langgam
og sa iyang pako
milupad kini palayo kanako

dala ang kagawasan
nga sa kadugay nga panahon
gikumkom sa akong
palad

ang kahaw-ang mao na lamang
ang gihawiran karon
ning akong palad
nga bugnaw

Wednesday, August 17, 2011

ikaw lang kuno gihapon

ang hisgot mamunga kana og
hatsing,

pagkahinog niini mahimo kining
handomanan

sa pagkadugay sa panahon
dili na mahinumduman
morag dahon nga
nahulog
gianod sa kusog nga bulhog sa tubig
naunlod
nalata
nahimong lapok


apan adunay nahigugma nga
mitaak sa lapok
naghubo
naligo
mihilog sa lapok sa iyang tibuok
nga lawas
aron ka mamahimong
iyaha,

unya ang patay nga hatsing
madungog mo pagbalik
morag
imong tingog kaniadto

hinoon
hagawhaw na kini
apan
siya moinsister nga kini
ikaw lang gihapon
tiunay
tibuok
bug-os.

salimuang...

blanco.

giatubang ko ang dakong pader.
dili nako makita ang pikas.

blanco ko.

nablanko ko.
wa koy masulti nga adunay kabug-aton
dili nako makita ang tipasi sa humay diha sa
usa ka yahong nga lubog nga mga perlas.

dili ko makamao kon asa nako sugdan
kadtong gihandom ko nga
kataposan

dili na nako maila kon unsa ang
sinugdanan og unsa ang kataposan.

blanko ko
gidawat ko ang akong pagkablanko.

dili ni tabula rasa.
puno, puno na kining tasaa
og wala nay kabutangan sa bugnaw na kaayong kape
nga wala nako matilawa ganihang buntag

papel hapon kining nagisi kay nawiriswirisan sa usa ka
hait nga lapis.

grade one nga papel
nga napuno sa iring og iro.

wala nay kabutangan sa payag
og sa kabaw og sa daro
og sa suba nga diin unta mamasol
si pepe.

nablanko ko.
wala na akoy masulat nga adunay kabug-aton sa ankla sa usa ka barko.
gaan ang ania dinhi
sama sa usa ka nabali nga pako sa alindanaw nga gitabangan og bitbit sa
naputlo ka lamigas.

ania ang lawas
nga nawad-an sa pako
ang ikog nga naputol
ang mga tiil nga
nagtibulaag.

gusto ko nga mubongat kanimo
apan wala na ang akong mga pulong
nahimo na kining
mga bato nga wala nay kasinaw
sa daplin sa
sapa sa
damak nga
yuta

adunay bonhok sa akong dalunggan
pulgas sa akong buhok
kigwa sa akong lubot
katol ang akong itlog

hapdos ang akong mga mata
gilok ang akong ilok og lapalapa
wala pa maulat ang akong
samad sa akong kumagko

sa kanunay gihandom ko ang dili mahatag kanako
sa kapalaran
gipangita ang wala dinhi
ug kon pangatan-on gani ko ug unsa
ang akong tubag
ambot
wala na ako masayod.


Thursday, August 11, 2011

modernong balak

sa pag
gaid mo sa baki
ni lao
tze

mahimong
dili na kini
makakokakokak
sa ting-ulan

apan sud sa
iyang batikon
(kon wala man
ugaling kini
kasingkasing)

anaa pa gihapon
ang
pangandoy sa
pagsalom balik
sa linaw nga
sapa

aron ipadungog
kanimo ang
karaang

plok!

pangutana sa usa ka pamilyang kokon

kung magtapot
tang tanan
sama sa usa ka
pamilya

mag-unsa na lang
kaha ang
akong
pagkagawasnon?

peke



ingon ni paul mccarthy
wala kay
angay nga kahadlokan
niining mga
mugna nga peke:

ang dugo
catsup lang

sa tinood kinsa
bay naputlan
og kinsa
bay ganahan
moputol niana?

wala.

CYCLOP

KON moabot
na gani ang
cyclop nga
nangita ning
antiojos
palihog ihatag
sa walay
daghang pangutana

kabahin sa RH BILL


giduladulaan sa usa
ka bata
ugang lapok ang
usa ka kondom
daw bula sa sabon
nga iyang gihunghong
sa langit

sementado ang
luha
dili kaayo klaro
ang iyang mga
tudlo ug
kumagko

gibalikan ko ang
akong
gitindigon

dili ako supak
sa sulog
sa hangyo sa
daghang
katawhan

ang mga balak isip....

mga listahan sa utang
nga dili na bayaran, ang

mga laraw nga
kanunayng mabaraw, ang

mga pangandoy nga
mga abagang nangahoyhoy, ang

mga gikan nga walay
larga, ang

mga pulong nga gisulti apan
dili mo mayubit sa imong tupad

matag gabii, matag adlaw,
motungha aron

pagpaningil sa imong mga saad
nga naghikot sa ilang mga liog

sa mubo lamang nga mga pisi
naglutok ang mga mata

kanunayng nagpaabot...

Wednesday, August 10, 2011

duha ka dila...

gikumpisal nako sa
kagabhion ang akong duha
ka dila
nga akong gihipos sud sa
akong baba....

ang usa
nitibo, abtik apan mubo
og manggiulawon
apan ang usa taas ang
panglasa
gustong motilaw sa bisan unsa
bisan pa
ug kanunay kining maulawan

usa lang ang akong nawong
ug busa ako
kining gipangga
gihigugma

usa lang ang akong ispiritu
ug wala pa kini matagbaw sa iyang
kalaagan

pak-an kini og naglupad
paingon sa kawanangan
gustong makigsandurot sa mga
bitoon ug bulan

ug sama kanila nga walay
katagbawan
nawala kini
sa walay katapusang
kawanangan


paghinumdum kang Alfredo

wala niya gipinta ang ulan
iya kining gisulat
kami nga misulod sa
lawak
diin ang kahayag mibaha diha
sa iyang buhok og liog
nakabati kon unsa ang katugnaw
kon unsa ang tingog sa ulan
kon kini mahulog na sa atop
og modagayday sa
sandayong paingon
sa sagbot surop sa yuta

malinawon ang iyang mga mata
ang kamingaw kon imong tutukan
gihipos niya sa iyang
apapangig
labi na kon mokanaas ang
kagis sa iyang ngipon
diha sa iyang alingagngag

dili kaayo siya tiglakaw
ang kalay-on wala makadani kaniya
ang iyang mga tiil nagpunay og
supak sa iyang mga kamot
og mga mata

wala kaayo'y nasayod nga ang iyang
gipaabot
sa kadugay sa paglatas sa panahon
usa lamang
ug mao kana ang iyang
hinanaling
kamatayon....