Wednesday, December 31, 2008

dawata ang tanan


dawaton nato ang tanan sa walay pagpihig
gihukad na ang nilung-ag sa Diyos sa atong atubangan
init nga luto sa pagbati humot nga inaso sa kinabuhi

dawaton nato ang tanan walay tipasi kay disir gilung-ag
gipilian na kana
ni Bathala

mangaon ta niining grasya
himaya, kalipay, bug-os, putli

sa walay pagpihig sa walay pilipili

ang pagbatog sa mga salapati


ang pagbatog sa mga salapati
wala na nako madayeg


og ang paglupad nila palayo
kanako
wala na nako matagad
pa

kay ako usab naa sa akong pagpanaw
paingon sa dapit nga wala pay ngalan

ang pagkalaya


ang pagkalaya sa bulak sa gapas
og sa mga doldol
mao ang gipaabot
og gipangandoy
sa imong mga alugnan
og mga dalunggan

kabahin sa gapas

nga imong gilikit
sa gungi
og imong gikolikot
sa atuli sa imong dunggan
bation mo gayod ang kagilok sa imong kagahapon

og kabahin usad sa mga doldol
nga nangahulog
kay gihangin
dili nimo kapugngan
ang gibati nimong
kahumok
og
kabugnaw sa imong mga katulogon

ako nga nagtindog sa likod sa imong balay
nagtan-aw sa mga punoan sa doldol
nga nahimong mga ginit lamang

og sa mga sanga sa mga gapas
nga
nangatikig pagkahuman sa ilang pagpamulak
alang kanimo


ambot ba ngano nga sukwahi
man
gayod ako kaayo

ang akong nakita mao man ang pangpanglaya sa mga dahon
ang pagpangtikig sa mga
sanga
ang pagpanghulog sa tanan nga nangahinog
ang mga nangabilin sa mga gipanguha
ang pagkadunot
ang paglabay sa
panahon
og ang mga
kunot nga iyang gipakita kanako
nga
lisod kaayo nimong dawaton.

sa dihang gipakita ko na ang imong hulagway
paghuman nako og click
sa kamera
nakita nimo ang pagkatigulang
sa usa ka panahon


pati ang hangin nagpanglingo
sa kakunot sa agtang sa langit.

kabahin sa pag-abot og pagpahawa og pagpanaw


karon
nangabot ang mga nangabot
nga wala gani nako imbitaha

wala ako kahinumdum nga ako
silang gidapit kaniadto
og kanus-a

nangabot sila nga wala usay
dala bisan na lang og mga sako
sa kamote
o bisan na lang og usa ka puntil
nga humay

wala nako agdaha nga mosaka
sa akong hagdanan
misaka lang
ako, nga buotan, mipasaka kanila

wala sila mangutana sa akong
ngalan apan sa ilang mga pahiyom
morag nakaila sila kanako

mipahiyom usab ako
og akong giagda og pamahaw
sa usa ka kaldero nga luto
og tulo ka buok bulad
anaa ang kapeng init
og wala nay lain

makita ko sa abog sa ilang mga
tsinelas nga sila gikan pa sa halayong dapit
wala silay kaligo
medyo nanimahong uga nga singot
ang ilang mga lawas

pagkahuman og kaon og inom sa kape
nanamilit sila kay layo pa kaayo ang ilang panaw
gikan dinhi
kon asa sila wala sila magsulti kanako

naglantaw ako sa bintana nakita ko sila nga nagpalayo
minaog ako sa hagdan nagtindog sa gawas sa akong pultahan
didto sa among nataran silong sa init nga adlaw

nawala sila daw sama sa mga abog
nahimong mga tigmo kanako nga hangtod karon wala pa gayoy
sakto nga mga tubag

sa unang adlaw sa bag-ong tuig


kay bilar man
tulog pa silang tanan sa dihang mimata
ko sa sayong kaadlawon
nagtikawtikaw sa kusina
nangita og tsa og bisan
usa lang ka pan

ako ang wala magpatonto
sa mga rebentador og sa mga lihi
sama anang mga linginlingin
wala ako motoo niana

kay kon unsa ang naa diha
mao lang gayod kana ang akong kuhaon
ang akong dawaton
kay kon unsa ang itunol sa mga umaabot
mao lang gayod kana ang mamahimong nakong gakson

gikan pa sa gamay pa ako
wala sugod nga mangita ako anang wala diha
maghatag lang og sakit sa akong dughan ang mga butang
nga wala kanako og dili nako makab-ot

sama sa mga bitoon nga haskang laayo sa akong mga kamot
wala ako sugod magdamgo nga mahawiran ko sila
wala ako sugod mangandoy nga mapak-an ang akong mga kamot og tiil
aron ako silang adtoon og hagkan

makahugno lang kana
sa akong mga abaga

ang akong naandan
mao lamang ang pagtan-aw og ang pagpakahilom og ang pagpaabot
wala kanako ang pagpamugos

sa pagpatubo sa mga humay sa pag-inat sa ilang mga dahon
sa pagpugos sa pagpabunga og pagpahinog sa mga bayabas didto sa bukid sus lamang sa hamubong panahon

ang akong naandan
mao lamang ang paglingkod sa daplin og paglantaw kon kanus-a
ako angay nga motindog og molakaw

nga kon ihatag akong dawaton
nga og kon balibaran akong balosan og pahiyom

usahay gani sa tinood lang
kong masugdan ko na ang paglakaw
dili na ako makahunahuna pagbalik
kay gusto ko nang biyaan sa hangtod

ang kamingaw nga naglutawlutaw kanunay
sa mga lugar nga akong gipuy-an

sukwahi ako og wala na akoy mahimo niana
salamat na lang sa tanan
kay ako dili ikaw og ikaw dili ako
gikalipay ko kana pag-ayo

ang akong nakita sa akong kasingkasing


giingnan na ka nako
nga usa ka adlaw niana
mipiyong ko sa akong mga mata
aron nako makita
ang wala pa nako makita sukad

gisulayan nako og pangita ang
imong dagway didto
wala man
gisulayan nako og pangita ang
ako usab nga dagway
wala man usab gihapon
gisulayan nako og tan-aw
ang atong dagway
kay basin lang og nalingat ako
wala man gihapon

ang akong nakita usa ka dakong
lawod sa dagat
walay adlaw walay bulan
walay barko walay salbabida

usa ka dakong lawod nga
puno kaayo sa kahilom

mingaw kaayo, lalom kaayo
dili gayod nato matugkad
adunay tingog nga akong nadungog
nga mihunghong kanako

mao kuno kana ang atong langoyan.

lanog


adunay tingog
akong gipalanog
sa kilid sa bungtod
misabat ang bukid
gibalik kanako
ang akong gipanugid
gitusok ang akong
kasingkasing
sa punyal sa akong
mga pulong
ang akong giingon
nga tiaw-tiaw
kanako mitiaw
og ako nakapanghupaw
midugo ang akong
baba sa mga pulong
mga misumbalik
kanako og gani
hapit ako mamatay
sa kasakit

karon wala nay
surasura sa akong
kapalaran
kay di malalim
kon sa akong pangagho
mosumbalik ang
dakong bagyo.

Tuesday, December 30, 2008

pangpanghupaw ni dodong ranulfo



sa bukid sa sigpao si dodong ranulfo nanghupaw
ang iyang ulo intawon hapit na naupaw

sa kabilin sa iyang tatay nga ang nabilin pagkagamay
basakan nga gipahakpahakan
sa prenda
sa kataposang pagbaligya


una, si editha nga iyang igsoon

cancer of the breast
ikaduha si julieta
cancer of the throat

ikatulo si marcelo
cancer of the prostate

ang ikatulo namatay na

gasto usab ang paghaya
didto na sa manila

ang upat ka hektarya nga basakan
nahimong tunga na lang
ang gamayng tugkaran
usa na lang ka punoan sa marang
nga sa miaging tuig
wala pod gani mamunga

paghuman og tanom
sa pagpaabot sa ani

atua si dodong ranulfo
namingwit sa sapa

nagpaabot sa kubit
sa morag palad kadak-a

nga isdang karpa


naghawid sa bingwit nga kawayan
mitutok sa kasadpan
naghunahuna
sa uyab
nga dugay ra
siyang
gibiyaan

usa ka palad
sa usa ka
mangkoy nakong ig-agaw

karong adlaw
walay kubit ang iyang
bingwit

siya mitaghoy og
awit nga makalolooy
kinabuhing pordoy
oten nga galoyloy.

eternidad



gisulayan nato ang balaang pagsumpay sa atong mga unod
ako ang kuhit nga misulay og sungkit sa kalalom sa imong mga dagat
gusto natong makab-ot ang tunhay nga pagbati sa kahangtoran
sayod ta nga dili kawang ang tanan
bisan og sa makadyot lamang
nakita nato ang dagway sa Diyos
nga mipahiyom kanato

kalit nga nawala
og ania ato na usab nga gipangita

sa matag gabii
sa matag adlaw
sa matag buntag
sa matag udto
sa matag hapon

hangtod na seguro
sa atong ikamatay
sa nagpilit nga ibabaw
sa usa ka bagol nga kalamay.

kawang


ang pagpasupot sa akong mga damgo
paingon sa kinatas-an sa langit

ang pagpangahulog sa akong kasakit
didto sa kinalawman sa dagat

mao kana ang haw-ang sa akong kinabuhi
ang kahangtoran nga walay katunghayan

sa kaadlawon



sa kaadlawon pagkahuman natong jerjer
nakatulog ko sa kakapoy. mora ba og napaknit ang akong
mga panit sa kahugot sa atong mga pag-agulo
sa tumang kalipay.
kalalom ba sa atong gilangoyan
daghang mga isdang lainlaing og mga bulok,
pula,asul, itom, pink, rainbow

og dunay miboto nga mga fireworks
nga pagkanindot sa mga binothan rainbow lang gihapon
apan walay tingog mga madungog sa atong mga panumduman.

hayy, ang gamhanang jerjer, dili ikapanangpit sa atong mga silingan.
nahinanok ko, nalubong sa mga blanko nga damgo
nga dili na nako mapudyot kay haskang daghana kaayo.
pagkahuman nakamata ko.
mihapla akong kamot sa usa ka wa jamo
kay walay tawo sa akong kiliran.
mipanic ang akong mga tudlo nangutana kon asa na ang akong kadulog.

gipasiga ang lampshade. walay tawo sa kwarto kondili ako lang nga naughan og laway.

walay brief misud ko sa CR
wala say tawo.
nanamin ko basin og gadamgo lang ko.akong gikusi ang akong aping.
ako jud ni gihapon
akong gihikap ang akong buhi.
ako jud gihapon ni. sure na ko.
giabrihan nako ang pultahan paingon sa kitchen.
didto ang usa ka isla nga kahayag
dunay anino nga nagtalikod.
tua ka.
naghay-a sa D-bed nga narra,
nga hubo atubangan sa dako nga flat tv.
nagcoffee.
walay lihok.
nagtukar ang tv.
HBO movie.
Natulog man diay ka.

karaan nga sofa


karaan nga sofa giabogan na
walay ganahan
nga molingkod
walay ganahan molabay
kay
sayang pod kuno

diha milingkod ang lolo ni lolo
ang akong papa
og karon ako na kuno

trono sa pamilya
giabogan
basin sa panahon
makalimtan

walay nabitas
walay natastas
kay
walay itoy
nga
mokitkit.

dili jud papiri


dili jud papiri
kini si rosemarie,
edad 46
trabaho beautician
taga argao
status single
EQ grade 4
tatay demetrio kargador sa pier
nanay narcisa plain housewife
brothers demetrio jr., narciso, gorgonio
sisters juliana, narcisa, desideria, francisca

travel light karong new year pauli sa ilang balay
manicure bag ray dala
sud ang usa ka pula nga panty og itom nga hair brush

naka sunglass heavy ang tint
bahala na og last trip basta front seat.


ang larawan nga iyang giganahan


daplin sa baybay naghalok silang duha
naghigda, ibabaw ang babaye sa lalake

ang kamot sa lalaki mihakop sa nawong sa babaye
gihagkan ang ngabil
og mipiyong sa iyang mga mata

ang kamot sa babaye mihawid sa balas
gikawras ang kalami sa iyang gibati

samtang ang mga kamot sa dagat
nagpunay og
hapohap kanilang duha

nagpaabot kon kanus-sa
silang duha
matagbaw, mahupay, magawsan

nag-ingon siya nako nga
mao kana ang larawan sa iyang hunahuna
nga gusto niyang mahimong tinood namong duha

puhon. puhon. puhon.
basin pod puhon kon magkita
mi sa usa ka bugnaw nga kabuntagon
daplin sa among mga baybayon

RESTAWRAN



Sayop ka
Ang tanan mahimong
Maanyag kon tuyoan jud

Labi na sa tingpaniudto
Sa
usa ka nagkatawang
Restawran

Og sila nadalahig
Sa ilang kaugalingong
Kaanyag

Og sila ra poy mag-iyak
Sud sa taxi pauli sa ilang
balay



(hubad sa balak ni Harold Pinter)

Kon giganahan ka sa akong mga balak pasagdi lang



Kon giganahan ka sa akong mga balak sagdi nga

Manglakaw sila sa gabii, duol duol sa imong luyo,


Dayon ang mga tawo moingon

“ Ining dalana nakita namo ang prinsesa nga milabay

padulong didto

aron tagboon ang iyang hinigugma

(dapit na sa paghulog sa kagabhion) kuyog ang iyang mga tag-as

og ignoy nga mga alalay.


(hubad sa balak ni e.e. cummings)

GRASYA



Ang hangin mibaha diha niya. Mibalik ako pagkabata, kami ni nanay naglubog sa basa nga mga sagbot, nangatawa. Napugwat siya, nahimong ahito sa

Akong kiliran, naghisgot og kaanyag, og akong nakita ang mga pulahon nga anaa diha

Kanila.

Sa dihang nahulog siya sa iyang mga nahinumduman, among gipangita kon unsa kadtong

Nakapasamok niya

diha kanamo.


Nawagtang na usab ang akong inahan, kalit kaayo sama kaniadto, og pito ka bulan ang milabay

Gikan sa iyang paglubong, misayaw ko.


Mapasalamaton ko

Miginhawa, naghunahuna, og mga ahito.


(hubad sa balak ni Forrest Hamer)

Monday, December 29, 2008

maayong bag-ong tuig diha kaninyo


bag-ong tuig
laing na sab nga mga saad
lain na sab nga paglaum

naa ra sa sud sa baso
nga atong ibangga karong gabii
sa tumang pag-amping
nga walay mabuak

ang mga kisdap
sa atong umaabot

ang mga kipat-kipat
sa atong mga mata

morag bag-ong
pagmata sa usa ka masaaron
nga kabuntagon
alang kanatong tanan

unsay binisaya sa fetus?


kini laging dili kaayo ta kabalo mobinisaya
akong gisulayan og tan-aw kon
unsay binisaya sa fetus

og kalooy sa juice
mao kini ang akong nakit-an:

No results found for the English word fetus!
Suggested spelling:

fatigue footwash fetch

nag-suggest baya
nga ang spelling sayop kay basin og
fetish,
mas paet
kon footwash na lang
ang fetus...

daghang fetus and nausik didto sa kanal
giputos na lang og cellophane
og dayon og labay sa suba nga morag tae.

samtang kami dinhi
nangita og fetus
sila nanglabay na lang man hinoon...

saon na lang kaha no?
ikaw kabalo ka kon unsay
binisaya anang
fetus?

palihog lang sultihi ko bi
kay gusto ko mohimo
og balak pahinungod
anang word
nga fetus

morag pit-os.

sa kalihokan


sa usa ka kalihokan
imong mahinumduman
ang
paghay-ad kaniadto sa usa ka tawo
nga walay nawong

og ang tawong nagtindog
tapad kaniya

wala na usab siyay nawong


sa kadugayan
sa atong katilingban
wala nay nawong ang tanan

mga tsinelas na lang

mga tiil

sapatos nga lisod tangtangon
ang liston
mga kamot
og kuko

nga morag naghangad
sa langit
abri
dili na kamaong mokumkom

ang laylay ni nanay mao ang iyang awit sa kahilom
aron ikaw iyang dapiton sa katulugon

nahihumduman mo pa
ba ang iyang mga uyayi?
nabati pa ba nimo ang
agas sa iyang gatas
diha sa iyang dughan
paingon sa imong ngabil?
Add Image
gilingawlingaw ka ni nanay
gipabati niya kanimo
ang kaharuhay

wala na nako kalimti
ang mga anino sa pagduyan
naglagiit gihapon sa kilid
sa akong mga dingding

batilaab


wala nako hikapa ang imong panit
natulog ko
wala ko mangambat sa
mga gihay sa kahayag nga nanglusot
sa mga buslot sa akong bintana

mitindog ka nag-ilis og dayon abre sa pultahan
wala ka magpabilin og mga pulong
aron ako untang mabati ang gamay
nga kainit
sa imong mga litok

gibalitok ko
namugnaw ang akong ngabil
nabitas ang akong kandiis


wala na ang batilaab
gamay rag pabilo ang akong mga balak
kon nakita mo lang ang pagkapalong
nindot nga sumbingay
sa kamatayon

basiyo


basiyo sa pepsi cola
aduna gihapon kanay gamit

kay mao kana ang imong gamiton sa pagpalit og laing pepsicola
og kon imong iuli bayaran ka
o imo bang ibaligya hinoon

pwede sab butangan nimog tubig
og imong bagtingon ang usa ka nota
sa imong kinabuhi

sharp o flat?

basiyo ka?


usahay sa atong paglakaw sa pantalan
labi na og bag-ong nahuman ang ulan
og aduna pay mga yamog sa unahan


dili ta kabalo kon asa ang utlanan
kon asa matapos ang atong lakwan

og asa magsugod ang mga asul nga panganod
sa atong unahan

apan sa dugay masabtan ra nato

kon asa ta magsugod
og asa ta muhonong


lakat lang sa unahan
ginadili gihapon ang pag-ambak didto


dili na kinahanglan pa ang mga sumbingay

aron atong mahibaw-an
nga ang kinabuhi
adunay bili sa uban

bisan og kita na mismo ang gustong mawad-an

bagolbol sa usa ka macho dancer nga tagabukid


kon nganong gusto nilang tanan nga ako huboan
og tan-awon nga
mosayaw didto sa tunga sa dance floor,
wala ako kasabot.

Kon nganong
gusto nila nga maligo ako didto sa tubig
og manabon,

wala ako kasabot.

pagkabogo ko gayod.

Ako nga
ilang gisapotan
ila ako karon nga huboan.
wala ako kasabot
kon ngano
nga bisan sa katugnaw
sa akong
gituntungan,
ngano nga ilang
gusto nga ako mabasa sa tubig.

dili na ako mokuyog kanila
karong bag-ong tuig.
wala ako kasabot.

Haskang bogoa
jud nako.
Wala nako makita ang gusto

nilang makita sa akong lawas.

Ang ako man god nga gituhoan
mao
lamang ang kalag
ang kaputli sa akong mga tinguha.

ang duha ka managlaing supa


ang supa sa puya sa dughan sa inahan
malimtan kaha?

ang supa sa uyab nga giganahan
malimtan ba usab kaha?

duha ka managlaing supa

mas lami pa sa tam-is nga tubo
og sa gahi nga adobo

mikalit siyag butho


dugay siyang nawala og nalimtan na namo
sa bag-o pa, medyo sakit, apan sa naanad
na
wala na ang sakit og ang kahapdos
nalimtan na ang tanan,


og kalit siyang mibutho sa among pultahan

wala gani nanuktok,
og misulod nga morag
siya gihapon
ang tag-iya sa mga hagdan

mitan-aw sa kangitngit sa among lawak

sa mga itom nga kurtina
sa mga bintana


og hawod nga miingon
nga alisdan na ang
tanan,
kay dili bagay ang kangitngit dinhi

ang mga itom nga kurtina nga
alang lang
sa mga patay.

Giatubang siya sa usa ka
kamatooran,
dugay na siyang giisip nga patay
dinhing lugara.

Siya ang hinungdan anang
mga itom nga kurtina.
Siya ang kangitngit
nga mibatog sa among mga lawak
og dili
na siya apil sa ihap aning balaya.

"Kinsa ba
ang imong ngalan?" gipangutana siya sa usa sa mga nagpuyo didto.

"Palihog lang pahawa", mao kana ang hangyo. Ang mando.kon ayohon lang gayod niya pagsabot.

ikaw nga usa ka ilusyon


ikaw nga usa ka ilusyon
gusto ko nga magpabilin nga ilusyon lamang
sama nianang katam-is sa cotton candy nga
nalanay sa akong mga tudlo og akong
gitam-osan
sa akong dila


dili ko buot nga ikaw mamahimong tinood
mopait lang ang tanan sama sa nilugdangan
sa apdo sa bangos
nga wala makuha og
natugdong sa tunga
sa akong alingagngag
nga didto mibuto og nasaag

mas tam-is ka nga ilusyon
pait kaayo ka kon tinud-on

Sunday, December 28, 2008

advertisement


usa ka bata
nagtagad sa mga awto nga
iyang trapohan
daplin sa karsada
atbang sa Max Chicken
pila na lang ka sinsilyo
bag-ong tuig na

samtang sa sulod
sa Max Chicken
dunay duha ka bata
nga buhong sa fried chicken
kuyog sa ilang mama og papa

ang ilang utlanan mao
ang glass wall

nagtinan-away sila

nagpalit ang duha ka bata
og usa ka box nga chicken wings

gitunol sa bata
nga naghipos sa iyang sinsilyo sa bulsa sa iyang
gisi nga karsones

dayon og tukar ang background music
nga merry christmas and a happy new year

"The Hand of Fate is an all-seeing, all-knowing entity.
It's always on the periphery--waiting to swing into action.
It might safely lift you away from danger,
or reach out and slap you.
It's part of life, part of living, and part of learning. "

da, tinood jud lagi
ang hapuhap sa mga kamot sa kapalaran

da,tinood pud lagi
ang sakit nga sagpa sa mga kamot sa kapalaran

hala, tuon jud, anang
lakat og sayaw sa kinabuhi

ayaw og kasapat.


ayaw kabalak-i kadtong nagpaingon pa kanato


kadtong nagpaingon pa kanato
nga dili pa makakita kay wala pay mga mata

kadtong nagsayaw nga aduna pay gatas
sa ilang mga dila


kadtong imong gikabalak-an nga basin
og sayop ang tanan


nangatawa padulong kanato
gidala sila sa ilang kapalaran

aduna usab silay mga luna
kon asa sila magdula
kon asa sila matulog


kita gipahaluna na
dugay ra
og walay igong rason nga sila
dili usab
ipahaluna sa kapalaran
nga mat-an

ang magbuot sa tanantanan

makaingon ta
wala na kitay mahimo niana

samtang nagsulat ko og mga balak


samtang nagsulat ko sa akong mga
balak nga mibutho sayo sa kabuntagon

mibutho ka usab
nag-chat ta samtang naglalik ko og mga pulong
para sa akong mga balak

keep on going
ang akong dialogue

namati ko nimo
tubag anang mga mugbo nga cliche

sa kadugayan nakong tinubag
naunsa ba

nga mibutho man usab ang mga balak
gikan sa unod sa atong chat

kabahin sa inahan nga gisakit
kabahin anang mga exploited women

namati ko og dugay
gisunod ko ang imong mga monologues

ako ang palanggana
ikaw ang ulan

daghan kog nasalod nga luha
mas nindot ang akong mga balak karong buntaga

kaysa gabii diin ako lang ang nag-inusara
samtang hilom kaayo ang tv nga akong gipalong
samtang naghigda ko og naghinos
sa samad sa akong kasingkasing

sumala sa iyang balak


sumala sa iyang balak namatay ang iyang inahan sa tumang kasakit
wala siya didto
wala usab ako didto
wala ka didto


mamasin lang kita nga dili kadto niya inahan
basin inahan sa laing anak
basin inahan lang sa usa ka mugna
sa hunahuna
sumala sa balak

apan akong gibasa balikbalik
tinood man kaayo ang maong kasakit
basin pod og iyang inahan kadto

basin pod


kay dulot og surop man ang mga kasakit
nga napatik sa matag usa ka litok sa mga pulong


basin pod tood og iya gayod kadtong inahan

og siya ang anak nga nagsulat kabahin kaniya
sumala sa iyang balak
sa tumang pagbasol nga wala siya didto
sa dihang namatay na ang iyang inahan
sa tumang kasakit og kamingaw

ang samad


sa dinangag nga paghiwa sa nagsinaw nga pulang mansanas
sa hait kaayo nga solingen nga kutsilyo
naapil og abis ang akong kumagko nga midugo pag-ayo

og akong gidali-dali og
bobo sa alcohol og tagkos sa puti nga bandage

nahunong ang pag-agas
sa dugo

lahi ang samad
sa atong kasingkasing
kay kon kini na gani ang masamdan
bisag
gamay lang
magpusotpusot ang imong balak kada gabii
kon ikaw na lang usa sa imong katre
morag walay hunong ang pag-agas sa dugo
mobanaw morag
baha sa usa ka dakong suba
gikan sa dakong bukid sa kasakit

kon makita lang nimo ang akong mga damgo


kon makita lang nimo
ang akong mga
damgo

og kon imo kining
sulayan
pagdebuho

basin masabtan mo ngano
nga bug-at ang akong giaswat
nahapla ang akong mga buhok
nawingig ang akong
apapangig
naabli ang akong baba.

mamahimong


mamahimong
ako
magpakabutabungol

og moingon ako
nga
ikaw dili na maambat

dili ako
ang masakitan
niana
basin ikaw.
basin.

ug sa pag-abot sa kabuntagon


ug sa pag-abot sa kabuntagon
gitagbo ko ang adlaw
midan-ag sa akong aping
ang bag-ong
kainit

nasabtan ko
ang
imong
kamingaw

dili ko ganahan anang kabibo


tug-anan ka nako nga ako dili ganahan
og
kabibo sa atong balay
og busa sa tunga-tunga sa imong pagkanta

ako minaog
og naglingkod ako
sa usa
ka bungtod nga giputos sa mga balili
og milantaw
ako sa langit

namati ako sa mga bitoon.

sa guba nga gitara


sa guba nga gitara
mibatog ang uwak
nangita
sa usa
ka awit
nga
dili alang
kaniya.

dili masayon


dili masayon
ang pagpangita
sa atong
kaugalingon

mora kag
nangalap
og mga
meta4
sa imong
mga balak
alang sa
mga patay.

videoke sa alas onse sa gabii


ikaw ang mabasol
nganong dugay
nanguli ang mga
bisita karong
gabhiona,
katulgon na ko
kaayo apan
saon na lang
sige pa man
gihapon mo
og sing-al anang
videoke

tan-awa
namuno na
og bato ang
atong mga
silingan!

Saturday, December 27, 2008

ang panahon sa pakighinabi og pagpamati


mabungat sa baba ang wala nimo madungog sukadsukad
ang iyang mga mata molihay sa kilid
walay kaisog kini nga motutok kanimo

adunay gipangita nga kagahapon
mga tunod nga napapas na sa kadugayon
apan dili gayod makalimtan
ang iyang buhok modagayday sa kilid sa iyang liog
og dili na molihok
dili na matandog sa hangin

hinay ang pagsulti
dili kaayo mabuka ang iyang
mga ngabil
sa mga maampingon nga mga pulong

madungog mo ang sugilanon

daghan kaayong mga ngalan ang mayubit
sagol sa luha,
sa kapungot og pagbasol,
sa kahilom
sa tunga-tunga nga pagbatbat
mahunong panalagsa
kay moinom sa tubig

og dayon og bakho


dili na kini ginagmay
busa pagmatngon, busa pamatia gayod pag-ayo
ikaw nga iyang gipiyalan
sa iyang kasakit

sa panahon nga mopakita siya pag-usob kanimo


sa panahon nga mopakita siya kanimo
ang ungo,
ang kalag,
ang multo


ayaw kahadlok salig sa kahayag nga midan-ag sa iyang likod
pangutan-a kon unsa ang iyang gusto
kon unsa ang iyang gibalikan dinhing lugara

pakighinabi niya
sultihi siya nga adunay nahitabo kaniya
og dili na siya angayan dinhing lugara
ayaw kahadlok kay sama kanimo

siya usab nagpangita
sa dalan nga iyang paga-adtoan
pakisulti kaniya kay nawala kana siya sa dalan
og nangayo kana
siya sa imong mga giya.

ang hamugaway nga banhod


mil
ingkod sa pula nga sakyanan
didto sa sulod ang usa ka puti nga tawo
abli ang bintana og misulod ang hangin

mikalkag ang iyang buhok nga morag
bungot sa mais nga anagon
kusog ang pag-usab-usab sa talan-awon sa gawas sa sakyanan
nga gipaturatoy og dagan
sa iyang driver sumala sa iyang mando

giablihan ang iyang kamot gipakitoykitoy ang iyang
mga tudlo
nga banhod aron matambalan sa hangin nga presko


namanhod ang kinabuhi sa usa ka dato nga
wala kabalo kon asa siya karon paingon

ang kalibotanhon og ang enkantohanon


siya ang kalibotanhon
nga mihikap sa dahon
og nakabati sa kabugnaw sa tanan dinhi
apil na ang kalunhaw og kalab-as sa iyang giatubang


siya
ang enkantohanon
mipasalipod sa usa ka kahoy
mihikap sa kahayag nga milapos sa iyang kamot

mga milapos sa iyang agtang nga mibatog didto sa sanga sa kamanyan

mitan-aw ko sa dakong samin sa linaw og tin-aw nga sapa
apan wala ka gayod didto.

pssst! ikaw na ang sunod.


gisitsitan ka
ikaw na ang sunod
nga mobalak sa entablado

unsay imong gibati? sayod ko nakulbaan ka.
apan kay dugay ka namang nangandam
abtik kang misulod sa entablado og mipasupot
sa imong balak og silang tanan namakpak sa kabilib nimo.

pssst! ikaw na ang sunod
nga mamatay karong adlawa.

unsay imong gibati?

ikaw lang ang makatubag niana.

ESPISO NGA SEKWATI


usa
ka tasa
nga puno sa
espiso nga sekwati

usa
ka likit
nga budbod pilit

usa
ka kutsara
nga asukal centripugal

usa
ka adlip
sa hinog nga mangga

higop sa
sekwati tusnob
sa budbod nga pilit
dayon tam-os sa usa ka adlip sa hinog nga mangga

hayyy!
kalami sa kinabuhi!

himoa ayaw


himoa ayaw nga kining atong kalibotan
mahimong usa ka
lusok sa luha
asgad nga makalumos
sa atong paningoha,


mas maayo pa nga kini mamahimong
usa
ka dakong bungtod nga atong katkaton
og didto sa tumoy
og kinatas-an
adto kita didto
matulog tupad
sa daghan
kaayong mga bitoon

ayaw


ayaw pabuntog anang kamingaw ayaw pagpaanod sa baha sa kaguol ayaw pagpaanod sa kusog nga bulhot sa hangin sa kapildihon

ayaw og tungtong sa bungtod sa kahambog nga kayahon nimo ang tanan. Kanaog nianang bungtod sa garbo, dulhog sa patag og pangitaa sila nga maghatag kanimo og kalipay sa panagsandurot sapagkamagsoon.

Pangitaa didto ang
bulawan nianang pagpaubos.Sa kilid sa maong bukid
anaa didto ang mga kabulakan.Wala ang mga bulak sa mga gapnod og
kapanganoran.

kwadro


kwadro kwadrado kwadra
mao kana
ang hulma sa
atong
kinabuhi

diin gisulod
nako ang akong
nawong
og didto ako nimo
makita isip naa sa
sulod
nga usa ka
ideya sulod sa
usa ka
kontexto og kon imo

akong pangitaon makaplagan
ako nimo sa
daling higayon nga
dili ka na maglisod og ako usab
mopa
hiyom sa dakong kasayon

morag wala
nay bisag gamay
nga
kabalaka o kahadlok

kabayo sa kwadra

nawong sa kwadro
kinabuhing kwadrado.