mY secreT ponD

ANG DUMOT SA MANGHOD UG MAGULANG DIHA SA LARAWAN

ang manghod nagbitbit sa iyang gamay nga monyeka
ug ang magulang usab
kay gipamalitan sa ilang mama

sa black ang white nga larawan
makita mo silang duha
kanhiay pa.

Dugay na nga panahon.
Nangaminyo na sila.

tagsa-tagsa na silag dala sa ilang kinabuhi.
apan balikan
ta sila.
sa ilang mga barog ug panagway.

diin ang manghod
naglantaw baya sa monyeka
sa iyang magulang.
kay kuno
mas nindot.
mas dako ug ulo.
mas dako ug ribbon,
mas nindot ang bulok sa sanina,
kay kuno mas mahalon ang monyeka sa iyang magulang

nga durong tan-aw sa kamera, ug pag-click,
kuha kaayo ang dako niyang katawa.
samtang ang manghod,
tua, klaro kaayo ang pagselos.

ayoha paghunahuna ang tanan,
nganong samok kaayo ang ilang kinabuhi
hangtod karon, gabungol, gadomot,

didto sa karaang larawan makita ang hinungdan kadtong
black and white, kadtong usa ga-side view nga gamug-ot
kadtong usa gakatawa. tibook, wala mabungkag,
kay wala didto ang kasina.