UNSA BA ANG IMONG GIBATI SA DIHANG MITANDAY AKO KANIMO?
Sa dihang mitanday ako kanimo sa kangitngit
sa humok nga alugnan sa atong mga sampot
sa puti ug bugnaw nga mga habol ug sa haw-ang
nga katre nga dugay na nimong gikatulgan
unsa ba ang imong gibati mangutana ako kanimo karon?
gibati mo ba ang kainit sa akong mga paa? ang akong mga balahibo
sa akong mga bitiis? nabati mo ba ang pag-ambak sa mga baki didto
sa suba sa dihang miulan ug kusog, kalit, ug dayon mibaha
ang mga tampi sa imong bilahan? gibati mo ba ang nagdilaab
nga sunog sa mga kakugnan, ang gaagiik nga mga tingog
sa mga panganod nga nakasud-ong kon unsaon paghimo
ang mga kalipay diha sa nag-abre mo nga mga bintana?
nabati ba sa imong aping ang paghaplos sa mga kamot sa
bulan diha sa imong nawong nga malipayon? unsa ba ang
imong nasimhot? nasimhotan mo ba ang mga ilang-ilang
nga namuswak diha daplin sa inyong nataran? nasimhotan mo
ba ang mga nangalimyon nga mga puting champaca nga nanayaw
kuyog sa mga dahon ug mga alibangbang ug mga buyog bisan ug ngitngit
na kuyog sa mga aninipot nga nagrayaraya libot sa dakong kahoy
sa tambis didto dapit sa imong pultahan nga nanirado na kay
kini naghinamhinam na sa kaanindot sa mga bitoon sa langit
diha sa imong mga buhok sa imong uluhan. Hagki ako. Gaksa ako.
ato ang kagabhion karon. wala na ang mga pulong. ania na ang langit.
No comments:
Post a Comment