mY secreT ponD

Ang Fire and Ice ni Robert Frost

Ingon si Robert nga ang kalibotan matapos
Pinaagi sa kalayo
Pwede pod kuno sa ice

Sumala sa iyang natilawan nga kalami
Sa kinabuhi dinhi niining kalibotana
Posible nga sa kalayo matapos kini

Pwede pa gani nga kaduhang taposon
Sa kainit
Kong kainit man lang gani ang hisgotan
Hanyag sa pagdilaab sa kainit sa
Kaulag sa unod ug sa pagsikad sa
Iyang mga bitiis.

Apan kadto kunong daghan ug kasilag
Kadtong daghang gihiposhipos nga
Kasuko ug kapungot
Mas maayo pud kuno nga ang pagtapos
Pinaagi na lang sa ice

Dili lisod sabton
Nga ang kasilag matapos
Kon bubuan ug daghang ice
Segurado jud kining mapalong
Sama sa tuliunon nga
Nagpautog
Segurado jud kining kalit maloyloy


Dili lisod sabton
Nga ang kalayo nga nagdilaab
Sa kaulag
Matapos sa pag-ugdaw
Pagkahuman sa tumang pagpalami
Sa ibabaw sa katam-is sa kamay

Kon ang kataposan lami
Nganong gud nga dili balik-balikon?

Dili baya lalim kon
Magsugod ka sa cake ug motapos
Ka sa hungit nga kamoteng kahoy

Dili baya lalim nga sugdan
Mo ang imong kinabuhi sa usa ta tam-is nga mangga
Unya sa kataposan daot nga manggang aslom ug giulod
Ang imong matam-osan

Apan alang kanako
Sumala usab sa gisulti sa palahubog ug tuba
Didto sa tersena ni Hulia
Dili ang kalibotan ang matapos
Dili gani ang sugong nga gisudlan sa tuba
Bisan pa kini ug mahulog sa sanggotan
Ug mabuak sa gahi nga kabatoan

Pangutan-a ang wati nga maoy
Katapusang mopirma sa imong clearance
Dili kalayo dili ice ang katapusan.