mY secreT ponD

SA DULA NGA BALAYBALAY

sa gagmay pa kita, nagdula ta ug balay balay
si Junior ang Tatay Si Inday ang Nanay
ako ang inyong anak-anak didto sa atong gamay
nga balaybalay: palwa sa lubi ang salog, lukay sa
lubi ang bongbong, kawayan ang haligi ug duna
say dapog dapit sa tumoy. Maglung-ag ug balas
sud sa lata sa gatas, ug dayon kita magkaonkaon
pagduladula sa dila ug ngipon, dayon magharay
haray, dayon magdula ug raya-raya, tago-tago,
dakop-dakop, ug sa moabot na ang kahaponon
manguli sa atong mga balay kay manawag na
si Nanay kay miabot na si Tatay kay manghugas
pa, manihapon, mamati sa drama, mangadye,
dayong katulog.

Sa pag-abot ni Tatay nga hubog sa Tanduay
ug sa dihang nagyawyaw si Nanay ug silang
duha nanggi-away, sa dihang gilabay na ni
Tatay ang Petromax ug naigo si Nanay, sa
dihang mingitngit ang kagabhion sa among
balay, sa dihang misyagit si Nanay nga gitook
ni Tatay, sa dihang naigo si Manang sa bildo
sa Petromax, sa dihang midugo ang iyang agtang
ug sa dihang ako mitago sa ilalom sa lamesa,
sa dihang nanglupad ang mga plato ug baso
sa gawas sa bintana nga morag mga giluwa
sa balay, sa dihang mibuto ang pusil, sa dihang
duna nay nasamdan, sa dihang duna nay misyagit
ug tabang dalhon nato siya sa hospital, sa dihang
duna nay mga pulis nga midakop niadtong sad-an

nakaingon ko, sa pagmatngon kos panimoot,
dili na balaybalay ang nahitabo, tinood na gyod,
sa dihang mibanaw ang dugo ug walay nanarapo.