Monday, June 23, 2014

pahimangno lamang
(alang kang R)
Ikaw man god
nagpasagad, sa buhi pa siya, imong gihatag tanan,
iyaha ang tanang
kasakit, kahago, pagbago ug ikaw atua naglingkod
naglantaw
nagsugo kon unsa ang sunod buhaton

iyang ngalan kanunay mong gitawag
kini, kana, kadto, didto,
ora mismo,
ug sali mog katawa, sa rason nga ikaw ra gayod
ang iyang gihigugma
nan, karon, kalit lang siyang nawala kanimo
wala na ang kini, kana, kadto, didto
ora mismo,
og dili mo pa gayod kini madawat
ug nag-ingon ka nga ikaw nagpakalig-on samtang gibalikbalik mo og kanta ang inyong
lovesong
naunsa ba ang imong buhok
pagkakalit ba nga naputi? ang imong aping maayong pagkalubong
ang imong mata misamot kalalom
unya pagkalayo na ba sa imong tinan-awan
abot na man gani ang
gihandom mong kalangitan gikan sa
payag mong pagkamingaw
balikan ta ang kini, kana, kadto, didto
pahiyom usab gamay
kami ang magsugilon kanimo sa imong gikalimtan
basin unta ug mabalik pa nato ang atong mga kanhiay
basin pa unta ug mabuhi pa ang dugo nga patay
ang samad nga way pagkaalim
basin ug kini mauwat
balikan ka namo
dayon maghisgot na usab kita bahin kaniya
balhinon ta ang langit
balik sa imong payag
balikon ta pag-usab
ang imong kinabuhi
nagsabod kita
sa mga lugas sa matag
dalan nga
atong giamoma
nanglakaw kita sa
walay paghandom kon
asa ang atong
maabtan
kon asa kita makatulog
sa matag
kangitngit sa atong
kagabhion
sa matag hatag
aduna usa'y gustong kuhaon
sa matag tulod
aduna usa'y gustong kabigon
sa laing bahin
kadtong imong natulon
gusto mo pa bang
iluwa dayon?
maong di ko matingala
kay wa ka ma'y makuha
mitalikod ka ug kay wa
ka ma'y makita
mipahawa ka og dayon
usab nawala
adunay tawo nga mihatag
unya dayon gikalimtan ang tanan
ingon siya, "unsaon ko man ang
imong pasalamat? layo pa baya ang
akong panaw. Unya wala ako'y
sudlanan niini. Og kon aduna man
pabug-at lamang kini sa akong
padulngan"
siya ang nakakita sa tinood
dili siya tagadinhi, ug bisan unsay
iyang gibuhat nga maanindot
ug makaayo, wala kini bili kaniya.

SA BUKID SA MARUPAY


Hilom kaming nanglingkod
sa salog sa imong payag
samtang gilantaw namo
ang gapaatbang nga dagkong
mga bungtod unya usahay ang
among kalinaw tuslakon sa
awit sa usa ka langgam nga
nangita sa iyang kauban.

ANG SAYAW SA ELEPANTE


misayaw ug gangnam
ang duha ka elepante
samtang gahawid ug
dakong bunal ang
kinagusgang trinor.

Friday, June 20, 2014

sayod ka nga ang
samin mabuak
apan imo kining
gitungtungan
ug busa nabuak
gayod kini unya
sa imong pagdawat
sa mga bildo niini
miingon ka
ako kining sala
apan dili ko kini
pagabasulan.
kon sa panahon sa
imong pagkabuhi
wala ka midapig
kanamo
patas lamang
nga sa imong
haya unya puhon
dili usab kami
modapig kanimo.
sama sa usa ka ba balahibo sa manok gipadpad ka sa halayong lugar
pagtugdong mo sa usa ka aping gipappad ka na usab sa
laing aping
unya ang imong gibati walay lain kon dili mao lamang ang
wa mo hisabti nga pagkagaan
sama sa usa ka balahibo sa manok dapit sa iyang dapidapi
gaan, nindot ug angayang balikbalikan
ang nagkagidlay sa gugma sama sa babayeng nabug-atan
sa usa ka bukag nga hinog na kaayong mangga,
gasangkiig siya sa kahumot ug katam-is
gadimdim siya sa pahalipay sa kangitngit sa kagabhion
ug gidimdim siya sa kabugnaw niini
siya ang kainit sa mabugnaw nga kagabhion
tupad sa usa ka bukag nga mangga nga sa kanunay
hangtod sa kaadlawon
nangalimyon
pahimangno lamang
(alang kang R)
Ikaw man god
nagpasagad, sa buhi pa siya, imong gihatag tanan,
iyaha ang tanang
kasakit, kahago, pagbago ug ikaw atua naglingkod
naglantaw
nagsugo kon unsa ang sunod buhaton

iyang ngalan kanunay mong gitawag
kini, kana, kadto, didto,
ora mismo,
ug sali mog katawa, sa rason nga ikaw ra gayod
ang iyang gihigugma
nan, karon, kalit lang siyang nawala kanimo
wala na ang kini, kana, kadto, didto
ora mismo,
og dili mo pa gayod kini madawat
ug nag-ingon ka nga ikaw nagpakalig-on samtang gibalikbalik mo og kanta ang inyong
lovesong
naunsa ba ang imong buhok
pagkakalit ba nga naputi? ang imong aping maayong pagkalubong
ang imong mata misamot kalalom
unya pagkalayo na ba sa imong tinan-awan
abot na man gani ang
gihandom mong kalangitan gikan sa
payag mong pagkamingaw
balikan ta ang kini, kana, kadto, didto
pahiyom usab gamay
kami ang magsugilon kanimo sa imong gikalimtan
basin unta ug mabalik pa nato ang atong mga kanhiay
basin pa unta ug mabuhi pa ang dugo nga patay
ang samad nga way pagkaalim
basin ug kini mauwat
balikan ka namo
dayon maghisgot na usab kita bahin kaniya
balhinon ta ang langit
balik sa imong payag
balikon ta pag-usab
ang imong kinabuhi

Thursday, June 12, 2014

dili baya sayon ang pagbiya
kay kon mobiya ka na paingon sa layo
lisod na baya usab ang pagbalik
nagkinahanglan kinig panahon
ayoha ug hunahuna kay usahay pagbalik mo
dili mo na mailhan ang mga tawong imong
matagboan ug sila usab matingala kon kinsa
kining nagpaingon kanila
dayon ug mangutana ka kon naa pa
ba ang imong gibiyaan
magpanglingo sila
kay wala na usab sila makaila
kanila....
kon mobalak na gani kini siya
wala baya siya maghunahuna ug hangin
wala nako makita ang iyang hunahuna
apan adunay mga miagas gikan kaniya
anaa ang balas sa iyang mga tudlo
sa iyang dughan miagas ang ulan nga morag
gikan sa usa ka buslot nga atop
dili mo matawag nga luha ang naa sa iyang mga mata
kay ang iyang mga ngabil mibuhi man usab ug usa ka
tam-is kaayong pahiyom
gisulayan ko pagtiglom sa iyang lawod
dugay
hapit kong malumos unya sa akong pagtunga
nakita ko ang bulan
diha sa iyang kagabhion
gusto mo ba siya nga sabton pag-ayo?
ah, mahimo lang kini kon dili mo siya hunahunaon
ug mahitabo lamang kini kon moingon ka
nga ang hangin dili baya hangin
ug ang balas bisan sa iyang kabalas
naa sab diay gitagong kabililhon
galagot jud siya kay naalaan siya nga
serbidora sa usa ka haponesa nga
turista nga nagpatutoy sa iyang puya didto's
Kamayan
ug giingnan siya nga ipapalong ang ceiling fan
ug sa walay pagduhuduha mituman siya
sa mandar sa usa ka
sakang

wala siya kareklamo unya
miadto siya sa pikas
lawak diin atua ang samin:
"serbidora ba gayod ang akong arayb?
o nalooy lang gayod ako sa puya nga morag gipanuhot
sa kusog nga hangin?"
ang iyang tubag diha sa ikaduha ug busa
mipahiyom siya
sa samin
ug iyang giingnan, " ok lang"
SA USA KA HISGOT-HISGOT
(unedited)
Tinood baya bisag mag meeting ug religious,
apil gyod ang libak and hisgot,
ha ha ha...

kapoy talk about ideas.
..kay mao nan na kada adlaw
sa classroom og sa
sessions
mas kapoy kon we talk about diseases
and medicine,
which means tiguwang na jud
Basta tinood lang walay problema,
enjoy man gyod kaayo nga
maghisgot ug tawo,
especially ang topic about kabit,
new gf,
new bf,
kinsay nangilug og uban pa,
ha ha ha....
Mga bayot nga palaaway,
mga tomboy nga nagcamrasay,,,
ha ha ha
haha all too human
colorful diay
Kinsay sigi nga naah sa gym pero wala ma slim,
kinsay na addict na, pastilan....
Lain lain nga topic,
but you know what?
inig naay mamatyan
daghan man gyoyng motambong bisag
contra,
moaanha gyod ug moamot,
he he he
pinoy gyod
duyog sa kamatayon
kataposang hatod ug lantaw
he he he
katig daw ang asawa
sa sakayan nga kusog ang dagan
nindot unta lantawon
ang sirit nga dagan sa usa ka sakayan nga duhay katig
bisan asa ta padulong walay kahadlok nga malunod
kay lagi duha man ka lig-on nga katig unya giduyugan pa gyod sa saktong kayab sa baga nga layag
labi na kon nindot kaayo ang panahon
hay, pagkahayahay gayod sa dagan sa kinabuhi
suroy suroy lang
bitbit ang binukag nga kalipay
apan, dili diay ingon ana
ilusyon lang kana
morag lipat lipat sa kinabuhi
kay kasagaran
usa na lang ang katig
unya gabok pa gyod
unya ang layag buslot
na diay
unya ang panahon
gausab-usab
bagyo diri bagyo didto
unya sa tunga sa lawod
ganganga ang mga iho
andam na kaayong
motukob nimo
ning bugnaw nga kagabhion
kitang duha
magdaub, magkalayo
ihatag ta ang tanang kainit ug kahayag
ugma sila ang maghisgot kabahin sa
abo nga nahibilin
sila nga talawan nga mohambin ug
kalipay
silang hadlokan masunog ug maugdaw
kutob lang sila sa hisgot
kakabildo ug mga pangagpas
ug mga panaghap

Saturday, June 7, 2014

ang gamhanang tapulan

ang usa ka hari
minaog sa iyang trono
migawas sa iyang palasyo
aron lang
dampasan ang sagbot
sa imong nataran

unsa kaha'y naa kanimo
nga isog ka mang miingon

"senyor hari
daghan pang sagbot
sa likod sa among
balay", dayon nimog
sulod sa imong lawak
kay lagi
kulang kas tulog

ISNORKEL

didto sud sa dagat
kita kaayo nako ang
alimango nga nagtangag
ug katunga nga lawas sa
bulinaw

sa dihang duol na ako niya
mihunong siya og
mitutok kanako

gihawiran pag-ayo ang
iyang tangag
ug giisa ang iyang
toong paak

unsa kaha'y iyang
pagtoo
mangilog kog katunga
nga lawas
sa usa ka bulinaw?

Friday, June 6, 2014

ang pagtubag sa pangutana daghang pamaagi

ang pagtubag sa pangutana
daghang pamaagi: una

unsa ba ang imong gustong madungog?
ikaduha

gusto mo bang madungog ang tinood?
ikatulo

nakaatik ka ba nga ang pangutana
mas nindot nga tubagon usab ug laing pangutana?

dili ba nga nindot kini kay walay kataposan
ang atong mga iskrima?

ang akong tubag mao ra usab ang tubag nila

sa akong gusto nga mailhan ka
gisugdan ko kini sa pag-awat sa imong tingog

gibansay ko ang akong mga kamot ug tiil
sa imong sayaw

gibasa ko ang imong mga gisulat
ug gidapion ko kini sa akong dughan

sa dihang nagkita ka
managsoon na kitang duha

ang akong kamot usa na ka pinuy-anan
sa imong kamot

sa pamasin nga makaplagan ko usab
ang akong gipangita

namati lamang ako ug kon mangutana ka
ang akong tubag mao ra usab ang tubag nila

sa tinood lang ako usab malipayon

kon magkita pa kitag usab
hutdon ko ug tubag ang imong mga pangutana
apan ayaw ug saligi ang akong mga tubag
sayod ka na kon unsa
ang akong mga plastada

sa makadyot
kita lang duha ang ania sa kalibotan

kon moabot na ang imong pinalanggang anak nga lalaki
ihulog mo ang imong gigunitan dayon nimog biya sa lingkoranan
sa walay pananghid

magtupad kamong duha
balikbalikon ninyo ang mga nangagi ug sugdan mo na usab pagtukod
ang usa ka balay nga sa kanunay wala gayoy atop

karon kamo na lang usab kamo lang duha sa usa
ka gamay nga kalibotan

lantawon ko kamo dayon nakog pagpanakla
ihulog ko usab ang akong gigunitan unya motindog ako
molakaw palayo kaninyo


sama kang langling wala'y ugma ang akong kalibotan
apan ang akong balay sakto na sa atop
lig-on na ang mga haligi
unya ang mga bintana kununay nga mangabri

wala nako kini gipanugilon
sa tinood lang ako usab malipayon

ang lingla ug lilang

ipatik ko ang imong
gisulat sa dagat

wala'y tinood nga
gugma

gusto mo ang halok
nga pilit

unya ang sukli niini
usa lamang ka mubo nga pasalamat

sa imong kalibotan wala ang ugma
ang giatubang puros karon lamang

naputos sa itom nga balas ang
akong lawas
samtang ang imong mata puros
pak-an

galupad
layo kaayo ang lupad, habog

gikuha ko ang patay ug uga nga butete
ug gipatong ko kini sa patay nga liso sa pitogo

sa akong kaugmaon
anaa ang saad sa pagbalik

lain na usab nga kagwangan sa pitogo ug talisay
alang sa mga umaabot


kon mangaligo na sila dinhi
dili ko ganahan nga hisgotan pa nila ang atong duha ka ngalan


adtong ginganlag Cris

sa usa ka selfie
niadtong adlaw ang ginganlag cris
nagpakita sa iyang
lingin nga dila
nga gabasa unya sa iyang likod
mao ang lalaking gakalo
hamis ug aping unya balhiboon kaayog
dughan

ang iyang pahiyom haskang
taasa
miabot sa likod sa iyang abaga

sa usa ka panagtipon

kon magkita na gani ang
mga wakwak ug kikik
dili baya sila maghisgot
kabahin sa ilang pagkawakwak
ug pagkakikik

morag sila mismo wa ganahi
sa ilang pagkawakwak ug
pagkakikik

apan unsa ba'y ilang mahimo
bahin niini?

ug unsa ba ang ilang gihisgotan
sa ilang panagtipon?

makurat ka
kay kabahin kini sa mga tawo

"unsaon ba nato nga kita mahimong
tawo pag-usab?"
maoy ilang gihisgotan gikan sa
sinugdanan hangtod sa kataposan

sa ilang kataposang panihapon
nag-inom silag dugo
ug gipistahan ang mga inatay
sa kinuhang mga bata

dayon nilag panglupad balik
sa ilang mga tinipigang kangitngit

Tuesday, June 3, 2014

ug didto sa sulod sa langob
nakita ko ang ilang gipangita

adunay upat ka tutoy
usa lang ang iyang kamot
duha ang iyang ikog
sa likod ang usa
ug ang ikaduha sa iyang atubangan
taas ang iyang kilay
nga morag sasing
lihok dili kamaong magpuyo diha
sa iyang agtang
ang iyang usa ka tutok nagkiblat
kiblat sa kahayag

siya ang pinakasikat nga manunulat
sa ilang panahon
duha ang iyang nawong unya
 giputol nila ang iyang pula nga
dila.
kon gikan sa gawas ang kahayag
sama sa usa ka pagbuswak sa buntag
bisan pag manirado ang imong bintana
mosulod kini
moipsot
mosungsong

pareho ra gihapon kon ang kahayag anaa
sa imong sulod
mogawas kini mosungsong, moipsot,
molusot
wala man goy kahayag nga dili mogawas
walay kahayag nga mopalpak hinunoa ang
tinood nga kahayag mopakpak
ug kon imong badlongon, mamaak
kadtong imong gisulat sa gapanuigon ka pag 16
hiposa.
Hiposang dalidali basin
naay makabasa.
gibasa ko ganiha. naulaw ko sa kamabaw. gilood ko sa pagkatab-ang kay kulang jud sa kaaslom.
bisan gani sa kaasgad, haskang kulanga.
gisulat mo ang unang halok didto's silong sa punoan sa mangga, kilid sa kamalig diin daghang pugaran sa manok
nga nangitlog.
usa lang ka halok. ingon ka nagawsan ka dayon. Medyo dili katuohan. Pero miingon ka, kon mahigugma labi na ug dulot sa utok sa bukog, bisag masaghid lang sa kamison, siplit man dayon.
karon 56 ka na. Walay salag ang imong pagkatikarol.
Walay nadungog nga iyak sa pispis.
Gipanghambog mo nga karon ikaw dili na mahigugma.
Gisulat mo kini. Mao kini ang gihanyag mo kanila nga
nagpunay og inom nagpunay og tagay sa pipila ka baso
sa paglaum.
Kini ang giingon mo nga angay basahon.
Mas klaro, mas tiunay, mas tinood man god kaha.
Ang angayan ba mao kadtong kulang sa katam-is?
naghimo ka ug tigmo
nga walay tubag
ug kadtong bata nga
tininood nga namati
wa katulog pipila na
kagabii
wa pa maanad sa
imong kalaki apan
duna kay punto
samtang sayo pa
ang bata kinahanglang
makahibalo na nga
dunay mga tigmo nga
walay tubag
ug dunay mga pangutana
nga mas nindot
pamation
hangtod sa atong
ikamatay

Sunday, June 1, 2014

gibalikbalikan ang
sala sa kaniadto
ug gihandom ang
katam-is sagol sa
kaaslom sagol sa
kapait unya pagka
human balik na usab
sa gibiyaan apan
dunay gamayng
kinabuhi nga nadugang
kadtong sapa ng nauga
naulanan nabasa unya
ang yamog sa kabuntagon
lab-as na usab
bugnaw nga hayahay
pila ka ba ka tuig nga siging
panghipos
pamilo siging pamilo
hapnig sa mga limpyo
sud sa aparador dayon
ug sira niini
ayka, aykayabag,
moabot ang panahon sa pagpanglabay
pangabre, panghayhay,
pagsukod,
dayon nimo ug talikod ining
tanan
wala na'y gamit ug wala ka
na maghandom pa kon kinsa ang
sunod nga manununod
kay ang tanan, ang tanan gayod
wala na'y pulos.
ang pintor kuno
nga magpinta na sa iyang
kaugalingong nawong
andam na kuno sa iyang
kamatayon.
ngano kaha?
ang usa miingon
dili niya gustong hikalimtan
ang iyang nawong
gusto niya nga kini ibutang
sa usa ka larawan
isip walay kamatayon
ang ikaduha miingon,
nawili siya busa iyang
gitutukan, gipinta,
gisubay ang matag linya
sa iyang kalipay ug
kasakit
gipatik sa kanbas
sa eternidad
ang ikatulo miingon
wala na siya'y nakita pa
kondili ang iyang kaugalingon
nga iyang gihigugma
ug sa matag pinta niya
gilatid niya ang panamilit
ang pasalamat nga sa makausa
sila sa usa ka panahon
nagkauban
nagsandurot
nagkahinigugmaay.
nakakita ko's
unano nga dako na
kaayog ulo
migamay ang
mata
napilot ang dunggan
mikipot ang kamot
natiltil ang tiil

sa kadako sa
iyang ulo
milutaw siya
gisuyop sa
panganod
nawala sa kawanangan
ug hangtod karon
wa pa gyod napalgan
nahanaw
way kinutuban nga kamingaw
disir gilabhan
( di nako isulti kon unsa man)
iya unang gisimhotan
gidapion sa iyang
dughan

dugay
gipatong mo ang
imong suwang
sa imong kumo
unya nanirado ang
imong baba
apan ang imong mga
mata
mitutok sa usa ka
lalom kaayong
hunahuna

dayon mangabli
ang duha ka kamot
mokitoy ang napulo
ka tudlo
wala ang piano
apan misugod na ug gawas
ang gikuyomkuyom mo nga
musika
dayog sayaw sa imong kalag
sulod sa imong
lawas
ang pultahan
migawas sa laing duha ka pultahan
nga misulod sa laing pultahan
ang duha ka tigulang nga babaye
wala maningog
nanambid
kanunayng malipayon diha sa
pagpaabot

sa lain na usab nga pultahan
nga moabre nga manirado
nga sa pagbalikbalik sa maong
hitabo
wala na gani nila maambat
pag-ayo
dunay mga butang nga dili na kinahanglang
hikapon
o bisan lantawon man lang
apan mahimong bation nimo
gikan karon, hangtod sa kahangtoran

dili mo man gani malitok
kay balaan
wa nako pangitaa ang
langit diri sa nagkatuiris nga
mga linya sa akong
palad
o diha ba sa akong gipanghatag sa
mga wala
wa nako pangitaa ang langit
diha kanimo
wa na nako pangitaa ang langit
sud sa akong kasingkasing
hadlok ko nga akong makit-an kay basin
unya ug dili ko motoo
napadpad ka ning akong isla
lantawa ang kalapad ug kataas sa akong baybayon
batia ang kaputi sa balas
napadpad ka sama sa usa ka balahibo sa pati
sa imong kagaan giduladulaan ka sa dila sa hangin

salamat sa imong pag-abot
karon nadungog na sa mga kahoy ang mong sugilanon
ug walay usa sa ilang sanga ang nahimong mga kamot
aron mamakpak sa kalipay
andama ang imong kaugalingon
sa pipila ka adlaw madugangan ang imong timbang
sa kabug-at unya sa imong atubangon
ang mga bato dinhi mas tig-a pa sa kasingkasing
ang ilang kahait tugbangan ta gayod sa kahait usab sa atong mga hunahuna
kay kon dili madugangan ang lubong sa mga wala kasugakod
sa lisod nga tigmo sa atong kinabuhi