DIDTO SA DAKUNG SYUDAD DIIN AKO KANIADTO NAGPUYO
Didto sa dakong syudad didto ako kaniadto nagpuyo
nga nag-inusara
nakita ko ang tag-as nga mga panglantaw
hangad doul sa mga bitoon ug bulan
didto nakita ko ang dakong sunog sa mga damgo
ug didto nabati ko ang pagkapago sa mga laraw
ug didto napriso ang akong mga pangandoy sa usa ka lawak nga gamay
diin ang akong mga pangagko lamang ang nanagmata
didto nasunog ako
didto napago ako
napaig, naitom
ug didto natun-an ko kon unsaon ba pagbanhaw ang mga patay
nga pagsalig
ug didto nasayran ko nga kon dili nako itugot ang kamatayon sa akong kaugalingon nga pangandoy
dili kini mahitabo
dili gani kini kahawid sa akong mga bukton
bisag napaig bisag napago
kay sa tanan diayng panghitabo didto sa dakong sunog sa dakong syudad
ang tanan
nagkinahanglan diay gihapon sa akong pagtugot
didto nakat-onan ko ang pagpatubo sa akong mga pako ug mga tag-as nga mga kuko
makalupad, makakawras
mao na kini ako pagkahuman sa dakong sunog didto sa dakong syudad
wala na ang kakurat wala na ang kahadlok
tagamtamon ko ang akong kahilom
tagamtamon ko ang akong pagkaako
ang akong pagkabanhaw
sa tumang kaisog sa tumang pagpaubos.
No comments:
Post a Comment