Wednesday, December 25, 2013

ang wali

ang wali kaganiha ni fr. b.
kabahin sa usa ka byuda nga
nagmiwang ug nag-ampo
nga unta magpakita si Lord
niya kay gimingaw na siya
unya wa jud siya ka-feel ni
Lord
nagluhod siya sa atubangan
sa dakong krus diin gilansang
si Lord
kalit nga mi-promise si Lord nga
ugma bisitahan siya sa iyang
panimalay
nanglimpyo ang byuda
nag-andam og lamiang pagkaon
dayog pagwapa
unya siging gapaabot sa
pultahan
miabot ang alas nyebe sa buntag
miabot ang usa ka tigulang nga
makililimos
nangayo unta ug gamayng
mainom og makaon
giabog sa byuda kay duna siya'y
mas importanting bisita
pagkaudto naguol ang byuda
kay wa man miabot si Lord
pagka-alas tres sa hapon
dunay nanaygon nga batang
bulingiton
nangayog pinaskohan
giabog kini sa byuda kay
disturbo lang kini kaniya
gabii na lang wa man jud
miabot si Lord
ug busa miluhod ang byuda
ug nagpakitag kahiubos ni Lord
kay wa mituman sa sabot
unya miingon si Lord, "ako
kadtong tigulang ug bata,
wa man gani ko nimo
paimna, pakan-a, wa gani
ko nimo tagaig gamayng
pinaskohan,
imo mang kong giabog!!"
naulaw ang byuda sa iyang
gibuhat.
wa niya matugkad ang pagkayano
ni Lord.

ANG IMONG PAGLINGO


kay di mo man makita
ang akong pagbati kay nahisama kini sa hangin
nagsabwag kog layang dahon
sa imong atubangan
gidakop nako ang kalapati ug ako
kining gibuhian

tungod kay ang tanan gusto nakong
imong mahikap
nangita kog hikot
ug sudlanan
hikot sa tiil sa kalapati
sudlanan sa mga layang dahon
gisakit mo gayod ako pag-ayo
sa imong pagpanglingo

PANAGTAPOK SA WA NIMO GIPILI


makighinabi tas
di ta ganahan unya
sayod tang
wa say gana nato
ang akong tupad
gigil-asan
morag gibutangan ug
baga sa oling ang
iyang sampot

mopahiyom ta sa usa
ka pagdapit sa iyang pagkuha
ug hulagway
liwat sa kaliwatan
anak sa anak sa anak
gipangita nato ang
kanhiay ug kaniadto
makaguol kay
wala na man diha

MANAGLAHI USAHAY


gituparan mo lamang
ang usa ka dakong lechon
nagpahulagway ka
lang
apan ang wa nila
mahibaw-i nga ikaw
wa gayod mikaon niini

lahi baya ang hulagway
kaysa sa binuhatan
dili pod buot ipasabot
nga kadtong naghubog
ug misayaw ug mikuracha
sa musika sa pasko
nga kini silang tanan
masadyaon
kay pati baya ang sayaw
ang mga kanta ug ang
mga kisaw
mahimo man usab nga
magbudhi sa tinood nga
kasubo nga anaa
kanunayng gakulikot
sud sa imong dughan
lahi baya usab ang
binuhatan kaysa sa
giluom nga pagbati
usahay ang kadaghan
sa mga pagkaon sa lamesa
manghimakak baya usab
sa tinood nga
kapobrehon sa kalag ug
kasingkasing

ikaw ra may nalipay

kon mosulod kos imong
balay
mamati lang ko nimo
ug kon imo kong pasultihon
ang imong gustong madungog
mao ra say akong
yubiton

ikaw lang ang nalipay busa
sa akong paggawas
nakasaad kos akong kaugalingon
nga di na ko
bisa kausa pa mobalik

sa among pasko didtong dapita

sa pasko namo
anaa pa gihapon ang pasongan
ang mga kanding, karnero, baka,
ug ang mga uhot ug dayami

atua pa gihapon si Jose og
Maria nga gaatong
ug ang tulo ka hari nga
nagyampungad

wa kaagwanta si elvi
sa pagpangutana kon asa na
ba ang bata nga
natawo

sa among pasko wala
na ang maong bata


Saturday, December 21, 2013

sa una

sa una
sayon rang makigsulti ang anghel
sa tawo

sama kang maria nga gikahinabi
ni gabriel

ug kang elizabeth ug sarah
apil pa gani si abraham ug jacok

karon wala na
kon duna man gani anghel kadto na lang
mga karton ug papel

nga bisan unsaon natog pagilak sa
mga peke nga kahayag

di man gani kamaong molupad
di sab kamaong motabi

kon naunsa na kining atong pasko
nganong di man kaayo bibo

pahupay sa kalaay

sa dihang kami na lang duha
ang nahibilin sa balay
tungod kay ang duha ka sulugoon
nanguli man sab sa ilang
mga panimalay
kay lagi makigsandurot sab
sa ilang mga minahal

siya milantaw ug teleserye
unya ako
ania nagsigig himog mga balak

pahupay sa kalaay
gihinay hinay ug hapnig ang
mga pagmahay
gipilopilo
aron hiposon ug
balik
sa karaang kaban

miabot ang daghang mga kaguol

karong tuiga
miabot ang daghang mga kaguol

morag pongpong
sa lanzones nga wa tagad kahinog

naghinayhinay ug pangahulog
nga ambot di masabot kon unsang sakita

hangtod nga walay nabilin
gani ang mga dahon kalit man sang nangalaya

unya ang tibook nga kahoy
mga sanga na lang ang nangabilin

nga morag mga tudlo sa usa ka patay
nga mitiurok sa kilid sa pangpang

anad na anang pasko nga mingaw

ako sab
anad na anang pasko nga mingaw

matag tuig wa na nako ambata
ang ilang kabibo

anad na sab ko sa kalinaw
nga ug kon dunay mga kahugyaw

og paboto ug buhakhak
morag mas ganahan na man hinoon kong

mosulod sa akong lawak
dayog bukot sa habol ug katulog

anad na siya sa kamingaw

anad na kuno siyang
walay uyab

anad na pod kaha
siya nga mahigugma unya
dili higugmaon?

anad na siya sa kamingaw
gianad niya ang kaugalingon
sa bisan asa ug unsang
kamingaw

wa pa niya sugdi ang
paglantaw sa langit
diin naa ang mga maanyag
nga mga bitoon

anad na siyang mahigugma
nila
apan sila wala sugod
mahigugma kaniya

ang iyang gihigugma mao
ang kahilom
tupad ang bintana
nga naghandom sa
siging labay labay
nga bulan

bulawanong tambag



be a turtle in the river
be a kettle on the fire
be a teaspoon of coffee
on a hot water
be the fume of a jasmine
tea brimming on
a white porcelain cup

kay di jud ka kakaon kon
di ka moadto sa kusina
di ka katilaw ug init nga
sabaw kon di ka mangulipad
sa tinabonang tinola

doul sa dapog, bahalag mapaso
tilawi ang kalayo, lami ang kainit
ug kon mapaso man, ayaw kabalaka
lantawa lang ang samad, paabota
ang pagkaulat, ug didto sa ulat
baliki ang natagamtam nga
kalipay kanhiay, ang pagkapaso
diha sa tinagoang kalipay.

Friday, December 20, 2013

haskang layoa sa kamot sa akong kasingkasing


ingon ana ang Ginoo
bisan kapila ka kasala
mas labaw pa ang pasaylo

ang tawo sab bisag tualihon
mamakak,
kanunayng magpakasala
siging hangyo
bisag dili gayod angayang
itugot

si tony napandol
apan mibangon
si johnny nangilog sa iyang
hinuktang manok
busa iyang gidukong ang
iyang ulo
silot sa pagpangahok

ako namati
nangagho
nagpasalig nga ang Ginoo
kanunayng nagpasaylo
ug mopasaylo

daghan kog wa gisugid
nga nagpabiling mga tunok sa akong tilaok
di na kamaong motug-an ang akong baba sa tinood
hagbay ra kining nanglood

si tony
nagsigig kapandol
ug ako usab kanunayng
moagak

andam na kuno siyang
mapiang pag-usab

pasayloa, wa na koy nasabtan
naglutaw ko sa hangin
nagyamyam ug mga pangadye
nga haskang layoa sa
kamot sa akong kasingkasing

Thursday, December 19, 2013

security reasons daw

wa abrihi

tulo ka tawong
wa mailhi

nanaygon

pasko

hisgot hisgot
bahin sa pagmabdos
hangtod
sa pagpanganak
ni maria

ug ang kabahin
sa milagro kang
sarah.

Wednesday, December 18, 2013

daling

mingaw nga kagabhion
mabati mo ang hinanok sa dahon

wala mo gipatay ang suga sa pultahan
sa pamason nga ang kahayag adunay gitagoan nga tingog

bisan na lang ug hunghong sa malipayong kagahapon
bisan na lang ug agik-ik sa kawayan

gamingaw nga kasingkasing
sa kanunay nangitag daling

atong tagay

mga bay, miinom ko aron dili makalimot
kay hadlok kog makalimot
basig aduna koy mabuhat diha sa silong sa gahom sa kalimot

miinom ko ug pipila ka tagay aron lang kaninyo makighugoyhugoy
tawo ko
nga kamao sang mobati ug kamingaw
apil na kamo,

karong gabii, magtagay na usab kitang tanan
ikaw, ang unang mopaambit sa imong kasubo,
siya, ang sunod nga mohisgot sa iyang kasuko,
ang sunod, maghisgot sa iyang kahiubos
ug daghan pa, ug lain lain pa gayod,
hangtod nga ako na usab
ang moyubit

apan aron malahi ako,
sulayan ko paghisgot ang dili laay,
ang dili las-ay,
ang dili subo, ang dili kasuko,

sulayan kog bali ang bukog sa kamingaw
ug gikan sa mga bali nga mga bukog
ako kining tagkoson
aron mamahimong mga pako

ug dayon hagiton ko kamo
diha sa usa ka paglupad
gamit ang ispiritu sa bino

adtoon tag sulay ang langit
kon kini anaa pa ba dinhi
sa atong gipili nga kangitngit.

kon ngano

kahinumdom ka ba
ag didto tas sagada?

nga sa matag sayo
sa kaadlawon migawas ako
sa lawak ug
mibaktas sa dalan

natulog ka pa
kay lagi haskang bugnawa
sa panahon
nagloko ka sa baga nga habol
ug mikorog ang imong
mga kiting

ako naglibog
kay wala ko madutli sa kabugnaw
bisan ug ang mga gapnod
nangumbitay pa sa aping sa
mga bungtod
bisan ug ang mga yamog
gahi pa nga nanggunit
sa mga dahon

duha ang akong duda
kon ngano

basin init lang gayod
kaayo ang akong gugma diha kanimo

apan basin pod
ug sa akong mga kasubo nga gikan
sa akong kagahapon
nga hangtod karon
dili ko pa matukib ang kalalom
sa bisan unsang kabugnaw
dili gayod
mabahaw

nasayod ka ba
nga ag didto ta sa Sagada

nga sa akong pagbaktas
wa sad ko kabalo
kon asa ako gihatod sa
akong mga tunob?
ang kahaponon
samtang nagkaanam og tago ang adlaw
mga morag misalom ug hinayhinay
diha sa tumoy sa dagat
usahay
naghatag kanako ug mga kabalaka

lain na usab nga kataposan
sa usa ka adlaw

hangtod kanus-a pa kaha?

ayaw kabalaka
kay ang pulong dili gayod matapos

dili gayod. dili gayod.
balik-balika kana sa paglitok.
ANG PULTAHAN NGA NAGBILANGKAD

sa akong pagbalik
naghisgot siyag pultahan
nga andam
modawat, nagbilangkad

wala mitubod ang akong
laway

bugnaw lang ako nga
hangin
nga molabay
lapos sa mga bintana
KITA

namasiyo lamang
sa dakong hawanan sa usa ka plaza

makighinabi, magtabi, mangatawa
suroy-suroy
hagwa-hagwa, unya pagkahuman

manamilit, kay aduna man kita'y
tagsa-tagsa ka panimalay diin silang atong
minahal
kanunay nga nagpaabot
sa atong pagdungan ug pangaon
sa usa ka panihapon.
ANG DAKONG ULAT SA IMONG APING

sayo kaayo nimong
gidawat ang kamatooran sa ulat sa imong aping

isog ang imong kasingkasing
ug matag adlaw sa imong pagpanamin
gitun-an mo pagdayeg ang maong ulat

gipakisama mo kining bulak sa imong
kapalaran

giamumahan mo kini
gipahumutan, gipasinawan

usahay biaybiayon ang maong ulat
sa imong silingan
gikataw-an ka, ug mikatawa ka usab

malipayon ang imong kinabuhi
diha sa ulat nga wala nimo gipili

kay gihigugma mo man kini
nan, kinsa ba ang matawag tang gaantos niini?
PAYONG NGA ITOM

ANG gugma
mamulak, simhoton,
humot, gisaringsaringan sa
hangin nga
lumalabay,
namunga,
ug sa pipila ka pagsalop
ug pagsubang
mahinog,
mahulog,

ayaw kog ingna
kabahin anang
mga dili molubad
ug walay kataposan

kay sama sa tanan
magugma ka man ug
kasilag
makalinaw ka man
ug kasamok

ang tanan adunay
kataposan

ugma puhon
lantawa ang akong
gugmang
nadugta

gani, nakita ko man
usab ang imong
gugmang
nauga
nahimong abog
dayon
nangapalid

sama sa tanan
walay nangabilin
bisan na lang
ug tunob nga
gipapas lang usab
sa usa ka pagtikyop
sa usa ka itom nga
payong.
PAMALANDONG KABAHIN NI DARNA
(halad ni Ting nga siging panampiling)

Mas ganahan siyang
magpabilin nga batang babaye
nga gidaug-daog
kaysa mahimo siyang gamhanang
Darna nga molupad
ug isog kaayong makigbisog
sa tanang mga daotan ning
kalibotan

ang iyang kasakit mao diha
sa pagpunay ug tulon ug bato
nga usahay baya
mosabod sa iyang tilaok ug
bisan ug maglisod siyag tulon
niini
iya na lang kining giantos

aron kamong mahilig motan-aw
kaniya sa sine
mahingpit ang kalipay

ang wala ninyo mahibal-i
nga adunay mga panahon nga
siya mayabag sa iyang
pagsyagit og
Darnaaaaaaaa!
ANG PULTAHAN NGA NAGBILANGKAD

sa akong pagbalik
naghisgot siyag pultahan
nga andam
modawat, nagbilangkad

wala mitubod ang akong
laway

bugnaw lang ako nga
hangin
nga molabay
lapos sa mga bintana
KITA

namasiyo lamang
sa dakong hawanan sa usa ka plaza

makighinabi, magtabi, mangatawa
suroy-suroy
hagwa-hagwa, unya pagkahuman

manamilit, kay aduna man kita'y
tagsa-tagsa ka panimalay diin silang atong
minahal
kanunay nga nagpaabot
sa atong pagdungan ug pangaon
sa usa ka panihapon.

haiku-bol



gugmang mikubol
lagtong,
bisan pag atsahon
lisod sabton

haiku-pas


kanhing pantalon
sus, kupas na intawon
gisi, mantsado

sa usa ka itom nga payong.

ANG gugma
mamulak, simhoton,
humot, gisaringsaringan sa
hangin nga
lumalabay,
namunga,
ug sa pipila ka pagsalop
ug pagsubang
mahinog,
mahulog,

ayaw kog ingna
kabahin anang
mga dili molubad
ug walay kataposan

kay sama sa tanan
magugma ka man ug
kasilag
makalinaw ka man
ug kasamok

ang tanan adunay
kataposan

ugma puhon
lantawa ang akong
gugmang
nadugta

gani, nakita ko man
usab ang imong
gugmang
nauga
nahimong abog
dayon
nangapalid

sama sa tanan
walay nangabilin
bisan na lang
ug tunob nga
gipapas lang usab
sa usa ka pagtikyop
sa usa ka itom nga
payong.
PAMASIN

niining ting-ulan ang mga tiil
sa mga saad
nalapokan,
pasayloa nga ang imong
limpyo nga kiting
akong natumban.

kon nasakitan man ang
mga buwak sa imong dughan
ug kon nangahulog man ang
mga dahon sa imong
mga paglaum

ayaw kabalaka kay ang
akong mga pangagho unya
mao ray
manilhig niini diha sa
mga lapa-lapa sa
mga pagmahay

sa dili pa ako molakaw
palihog
pahagka ako sa agtang
sa imong mga pagmahay
sa pamasin nga
ang imong mga kasuko
mahimong
mga takulahaw

Tuesday, December 10, 2013

pagpaabot sa kahumot sa imong mga buwak

gipaabot baya gayod
ang imong pagpamulak

bisag wala pa diha
gidumdom na ang imong alimyon

sakto ang pagpisik sa ulan
ug ang kahayag sa mga adlaw

gilumutan na ang mga bato
natay-an na ang mga lansang

diri sa duha ko ka mga palad

gikan ba god sa akong kasingkasing
ang mga balak?
dili sa tanang higayon

kasagaran gikan kini kanimo
samtang nagtukaw kita sa mga
sugilanon
kabahin kanato

ang balak mga buwak gikan sa
atong mga baba
pipila na ba ka kagabhion kadto?

nangahulog lang sa atong tiilan
og wala gayod nimo tagai ug pagtagad
bisan na lang sa paghatag ug dangga niini

nalooy ako, ug ako kadtong tigpamunit
nagduko, nag-amuma sa mga gihay
nga humot gayod kaayo

nga sa pipila ka oras lamang
mao ray dangatan ang ilang pagkalaya
diri sa duha ko ka mga palad

cualasino

bisan unsa ka
pula ang lubot
sa imong baso
ning atong tagay

sa akong atubangan
usa lang gihapon
ang iyang gibilin
nga lama
ning walay hapin
tang pagpangga

iktsuarpok

ning payag
sa pag-inosara
gipadaghan ko
ang nga bintana
aron dili ako
magpunay ug gawas
saka kanaog
sa hagdang
gubaon
aron lang paglantaw
sa unahan
kon ikaw na ba kana
ang mogawas
gikan sa
mga gapnod

sobremesa

lami ang
init nga kan-on
sabaw sa
manok bisayang
tinolang gisagolan
ug hilaw nga
inabis nga kapayas
nga atong gisilian
ug kadto gayong
hinog

pagkahuman
nagpaaso kita
sa atong mga
balak ug sugilanon
samtang
nanilip kanato
ang bulan
sa kilid sa bintana

panapo'o

bisag walay
katol ang pahak
hala kalot

gustong
lukaton ang
nakalimtan
diha sa lubnganan
mong
utok

MANGATA

subayon
mo ang agianan
sa doña susana
diha sa dagat
nga gidayandayanan
sa bulawanong
 dayandayan sa bulan
ning bugnaw 
tang kagabhion

komoreb

mga kuko
sa kahayag
mga taas nga
giway
sa adlaw
nga nanuot suot
sa
mga dahon sa
birhen nga
kagwangan

waldeinsamkiet

si samson
nawala sa kaugalingon
misulod sa
kakahoyan
sa iyang mga
kahigwaos ug
kalibog
siging panawag
sa ngalan
sa iyang inahan
nga hagbay ng
gisalohan sa mga
ulod didto
sa iyang lubnganan

pochemuchka

haskang samoka
gisapot ang yaya
sa batang di
mahutdan ug
mga pangutana

werdemon?
watismon?
wermaderis?
werpapayaya?

pochemuchka

haskang samoka
gisapot ang yaya
sa batang di
mahutdan ug
mga pangutana

werdemon?
watismon?
wermaderis?
werpapayaya?

jayus

dili kaayo
ayos nga pagkatustos
maong
makatawa ka sa
tambaluslos

depaysement

kana bang pagbati
nga dia kos France
wakos pinas

goya

mas nindot
man gyod pamation
ang sugilanon
diin hangtod sa
imong pagkalibang
diha sa kabuntagon
di pa nimo
matukib ug matudlo
kon kinsa gayod
ang tinood
nga nagpatay
sa biktima sa usa
ka gugma

kon asa atong duha
ka amang
ang nagsulti sa matood

kon asa atong tulo
ka buta ang
nakakita sa tinood
nga nahigugma
sa babayeng hangtod
karon wa na igkita

kon asa sa upat ka
bungol ang
nakadungog sa pila
ka buto sa gaalburoto
nimong rebolber
diin ang mga simod
sa bala
anaa sa salog
nangalumping



kon asa sa lima ka
piang ang angayan
pa gayod nga
piangan aron dili na kini
makadagan
aron gukdon ang
gipatubo mong elepante
nga walay klaro
kon asa ang likod
ug atubangan

Monday, December 9, 2013

unong

akong gilantaw kon
giunsa niya paglangoy ang
kasakit

tanan anaa niana
maoy iyang ingon
samtang naghugas siya
sa plato

ug pagkahuman
iya kining gitrapohan
tagsa-tagsa
aron mauga og dayon
hiposon na usab
pagbalik
sa mga gansang-gansang
nga butanganan
diin ang hangin
maglaposlapos
sama sa naandan

sinaw na ang
mga plato
diha sa kauga
nindot pa gihapon
lantawon

o kaha ba gamiton
sama sa
among duha ka
kinabuhi

Sunday, December 8, 2013

paranoia

ang iyang inahan
namisita kaniya
gikan mipalit ug
isda sa merkado
aron ilang isud-an
ug pamahaw sa
iyang tatay, unya
dugay silang
hinagpanay hisgot
hisgot sa nanglabay
ug sa dihang
taas na kaayo ang
lakat sa orasan,
gipahimangnoan niya
ang iyang nanay kabahin
sa iyang tatay nga
nagtagad sa isda
aron ipanud-an sa
pamahaw
ug dayog iyak sa iyang
nanay kay ngano
kunong giabog siya
pauli sa ilaha.

palami

nindot ang bulok sa yuta
nga abohon diha sa iyang
dughan, humot ang abo niini
init ang iyang inalisngaw nga
karon mihapohap sa imong
aping, milit-ad diha sa
gabasa mo usab nga ngabil,
sa kagilok nga gitunol sab
sa taas og lab-as mo nga
 dila.

pag-amuma

isulti ang imong
kahiubos samtang
mamati ko,
ako ang imong
trapo,
ako ang tigpauga
sa gabasa mo
nga hunahuna,
isulti pa ang tanan,
aron ka
mahuwasan,
malimpyo,
samtang ako
ang bag-ong
hugaw, ang basa
diha sa
kilid sa lamesa
diin ikaw
mangalisngaw
sama sa usa ka
baga sa oling,
dili ko masunog,
wa na sab ko
magdamgo nga
ako imong luwason
diha sa kalimpyo.

si juan ug si san pedro didto sa langit

kinsay imong ngan?
ako si juan
taga-dis-a?
taga katipunan,
pilay edad?
trantay dos
unsay gikamatyan?
dengue
nganong wala mag-amping?
mora gihapon di na sab
ko ganahang mabuhi
ngano man?
wa koy kalipay?
nganong wala  sumpua nimo ang mga lamok?
ako silang mga amigo
ug aduna sab silay katungod nga mabuhi
wa ka bay gikawilihan?
wa
ang imong asawa?
bahala na siya
ang imong mga anak?
wa koy anak.
pasudlon mo na ba ako sa langit?
tagai kog panahon, ako pang hunahunaon.

malipayon na kaha kining iroa?

kining ako iro
dili kamaong mopatotoy sa iyang itoy

usa lang
usa lang gayod unta

gahapon mitikig ang
iyang usa ka itoy
kay dili gyod siya mopatotoy

karong buntag
iyang gipatong ang iyang suwang
sa akong tiilan
samtang gasulat ko kabahin
sa iyang kahimtang

malipayon na kaha kining
iroa?

mao kuno kana ang tinood nga kalipay (alang kang J. nga naghisgot sa iyang pagkapraning gahapon)

mipaspas kog
sulat
adunay nagsunod kanako
gusto kong
magpalayo
kanang dili na gayod
nila ako maabot
bisan
lang gani
sa ilang pagbasa

namula ang akong mga mata
nangahulog ang akong buhok
nanginit ang akong lawas
ug dunay nangutana kanako kon
gusto ko na bang mamatay

gusto kong magpalayo
kanang dili na ako makita ug madungog

kamong nangabuang
palihog, hunong na kamo sa paggukod kanako

nasamad na ang akong tiil
nagdugo na ang akong kasingkasing

unsa ba ang gusto ninyong madungog kanako?
unsa ba ang ania kanako nga inyong kuhaon?

usa lamang ako ka hangin
usa lamang ako ka panganod

kon mokuyog kamo kanako
kon mosunod kamo

usa lamang ang atong padulngan
ang akong gihandom
usab kabahin kaninyo

mangawala ta ug dili na kita makabalik
ingon sila, kadtong gikan dinhi,
mao kuno kana ang tinood nga kalipay

mosutoy tang tanan bisag asa.

ok lang
ayaw kabalaka
nagyamayama ka
atubangan sa dili
mo mga kaila,

ang bongbong,
ang pader,
ang salog, ang
batohong agianan

sabta nga
ikaw dili malipayon

sabta nga ako
magul-anon

sa lainlaing mga
katarungan

mosutoy tang tanan
bisag asa.

didto sa tokador sa imong mama

mahikugang ka
sa nabuak

morag mabati
mo nga basin og
ikaw

napulpog
sa kagahi sa salog

sa kataas sa imong
gihulgan

sama sa pipila
ka tuig nimong tinago

sa usa ka
porselana nga
prinsesa

didto sa tokador
sa imong mama

SA KALISANG

aduna siyay
tinagoan sud sa
iyang dughan

pipila na ka tuig
gitagoan kini niya
giampingan sama
sa usa ka
kristal nga baso

sa kusina
nanghugas siya
sa mga basiyo
sa mga baso
ug mga plato

dunay nahulog
nabuak

ug ang iyang
ispiritu milupad

sa kalisang.

Saturday, December 7, 2013

paslot sa akong kamot

kadtong gadilaab
ang dughan
akong kuyog kaniadto
sud sa sinehan

dugay na
dies anyos na
dili kaayo nako
kaila
wa gani nako
kaayo maaninaw ang
iyang buhok
ug iyang mata

tupad mi
samtang ang akong usa ka
kamot naghawid
sa popcorn

gikuha niya akong
kamot
ug gipakuot sa iyang
dugha
ug sa uban

kabuang lang

piskot hangtod karon
naa pa gihapon ang
paslot sa akong
kamot


Thursday, December 5, 2013

sa usa ka panihapon

sa milabay nga pulo ka
tuig
magkita mong duha

walay ipakita nga kahiubos
nalubong na ang mga patay
ang mga kasakit abog na nga
gipalid sa hangin
dili na makita kon asa
ang mga baho
mawagtang mapulihan sa kahumot
sa rosa
sa kilid sa iyang bulsa diha sa
walang bahin sa iyang dughan

milagro nga
ang pahak sa likod sa iyang
ulo tupad sa duha ka ayoyok
natuboan na ug buhok

ang ulat sa toong bagtak
nga morag kadako sa
tambis
nahamis, napapas
ug ang samad nga kaniadto
nagngotngot
dili na gayod mahinumduman

maayong pagkahulip ang
pulo ka tuig
ang mga gisi
naayo, sa hinay hinay
sa matag gabii
gisulsihan kini sa tumang
pagpailob

nagkitasilang duha
naglamanohay
lahi na usab ang
ilang  mga ngalan
diha sa pagtawag
sa usa ka panihapon

kon asa ang nalarag

kon ikaw na
ang mokanta
walay mamati
sama sa kon ikaw
ang moantog
sa usa ka kataw-anan
wa say mokatawa

bisag unsaon mog
gimik wa may moiwik
bisan unsaon mong
paningkamot
walay mitapot

sulayi ang pagbiya
pagbilin ug kahilom
sulayi ang pagpalayo
kanang wala na sila
masayod ko asa ka
nagpuyo

bisan sa imong kayabag
pwera buyag
pag-abot sa buntag
adunay mangutana kon
asa ang nalarag

looy sab

nalooy ko sa
balak nga
way bisag usa
man lang ka"Like"

pagkawalay puangod
sa
katawhan

mas nalooy ko sa
nalooy unya
nag"like"

bisag wa man gani
mibasa.

sa matag unya

human sa usa ka
halok
palihog ayaw na
ug hisgot
kabahin sa kainit
ug katam-is

igo na kanato ang
usa ka higayon
kalimti ang pagbudhi
malubong ra kini
sa dili kadugayan
diha sa kalami
sa halok nga
akong gikawat
diha kanimo

ayaw katingala
ang kinabuhi adunay
hagwa

hagwa sa hawla
kahingawa sa
gusto natong
hikalimtan apan
nindot natong
handumon sa
matag unya

Tuesday, December 3, 2013

Ang kagubot

ang mga nangahulog nga
dahon
nagpasad sa nataran sa
karaang balay

tungod sa kagubot (nga
gikaulaw ug dili na
masulti) giabogan na ang
mga lingkoranan sa
talad-kan-anan

sa likod atua pa gihapon
ang punoan sa mangga ug
sa iyang mga gamot anaa
ang mga pulak

sa una ang mga bata
malipayong namunit niini
sa kaadlawon

Monday, December 2, 2013

sa usa ka nagtinga

sa dihang nagtinga na
siya ug hapit na mamatay
sa dihang nanangpit na siya
sa iyang hagbay rang
namatay nga amahan

mipalayo ka, gibati mo ang
kahadlok

mikurog ang imong mga tudlo
diha sa pagpangurus.

ikaw man diay kadto

ang dalagang ulay nga misulod
sa lawak unya durong gakos sa
kamingaw

akong gisundan.Misaka ko sa atop
sa iyang balay, ako siyang gisilip sa
kisaming akong gibuhuan.

Sa hinay hinay gikuha niya ang iyang
buhok, ang iyang ngipon, ang iyang
antipara,

gihubo niya ang iyang uniporme sa
eskwelahan, ang iyang kamison,
ang iyang bra, ang iyang pantilet,
ug dayon ang iyang puti
nga panty,

wa gyod diay ko masayop sa akong
pagduda,

ikaw gyod diay siya,
walay tuli, kunot ug
itlog ug adunay dakong
alom
dapit sa walang kandiis
sa lubot..

ang gugmang dili makaon

si petra nga mamaligyayg kamote
gimingaw ni pedro nga manuroyay og
ice candy

kon magkita silang duha matag
domingo lang didto sa taboan

si pedro nahigugma kang petra
apan dili kaingon
kay si petra mag-unauna mag
ingon nga ang gugma dili makaon

si petra usahay sa kagabhion
magbasol sa kahait sa iyang dila
ug sa kaadlawon misaad nga kon
magkita sila usab ni pedro
siya na mismo ang mopadayag
sa iyang tinood nga gibati

niadtong domingo nagkita silang
duha ug miingon si petra nga mopalit
siya sa ice candy ni pedro

gitagaan siya ni pedro ug dayog ingon
ganahan ka ba niini nga hilis na man kini?
ug si petra mitubag
wala na bay gahi diha?

wala na, wala na gayod, ug si pedro
milakaw palayo kang petra
kay alang kang pedro ang iyang
gugmang hilis sumala sa pulong ni
petra, dili, sama sa gugma,
kini makaon.

tambag sa dili kaayo taas ug dila

patas-i
pa
patas-i pa
gayod ang
imong dila

unsaon mo
man
pagtila ang
atay sa
gayaka nga
bata?

 

kabahin sa tubag-tubag

kon mibalak ka
unya gitubag ka
maayo
nakadulot ka
ug karon
gibaslan ka

ako, di ganahan
motubag
di na sab ko ganahan
tubagon

wala'y daog
ang mga wakwak
ang mga ungo
diha sa paglupad
lupad
sa tungang
kagabhion

kon magtagbo ta
moingon ko
"labay ra ko"
ug unta motubag
sab kag
"ako sab
labay ra"

kay ug magtinubagay
pa tang duha
basin ug sa kaadlawon
mazero ta.

Saturday, November 30, 2013

anaa ang kananam diha sa hinayhay

tan-awa
sa kadaghan sa imong
gimugna

ikaw nahisama na
lamang sa mga balas
sa baybayon

nahimo kang ulan
nga mikatap sa atop
sa balay
sa kagabhion

bisan ug nagsiga
pa ang imong kalayo
bisan ug nangalimyon
pa ang imong
kahumot

wala na nila makita
ang imong kahayag
wala ka na mahisama
sa bulan ug
sa mga aninipot

giisogan na sila
sa imong kahumot
ug ang ilang mga
ilong
gisumhan

unta hinay hinay lang
inanay
sama sa paghikap mo
sa paa ni
neneng
sama sa paghalok mo
sa iyang mga
ngabil

anaa ang kahinam
diha sa kahinay
anaa ang kananam
diha sa hinayhay

ikaw man unta ang gisaligan

dili ka bukag
nga daghang buho
nga pwedeng
sudlan bisag asa
ug pwede
gawsan
hangtod kanus-a

ambot ug ngano
ambot ug unsa

dili ka man unta
bukag
ug nganong
nalisngag dayog
kabungkag

Friday, November 29, 2013

magkita ra gihapon

ayaw
kabalaka
kay puhon puhon
magkita ra
gihapon ang
luwag ug
ang kasili.

sulod sa
kolon.

kay ang tanan aduna baya gayoy nilugdangan

adunay katungod
mangyam-id ang gamhanan

ang walay gahom
usahay kon magtan-aw kanila
nga morag
wala nay kamatayon kon
manulti
og kon molihok morag
nakatag-iya ug kawanangan

sa tinood lang morag
mahadlok kon unsa ang
mahitabo sa katapusan

kay ang tanan
aduna baya gayoy
nilugdangan

Thursday, November 28, 2013

pito ka lawod nga kasakit.

pagkabug-at ba sa imong
nawong?
unsa ba ang imong gihambin?
nganong dili ko man
kini makita? dili mabati

pagkalalom mo, pagkahilom
pito ka lawod nga kasakit.

Wednesday, November 27, 2013

MALIPAYONG MAGTIAYON

nagkita kita nga lig-on
na ang mga bukog

balikog ang uban ug
dili na gayod matul-id

gitagbo kitang duha
diha sa dalan sa kaulag

ang gipasikad sa atong
mga ngabil, gugma

gilabang ta ang dugay
nga panahon, walay laktaw

sa kadugayan ang
atong mga sampot nagkaila

ang atong mga kasingkasing
tagsa-tagsa na ug damgo

ang atong kataposan
gitagna na diha sa panaghigala

ugma damlag sa atong
kataposang ginhawa

nga kita nagmalipayon
nga kita nagmalamposon

wala nila makita ang
mga bukog nga balikog

wala gayod sila kamatikod
sa daghang bun-og sa atong likod.

kabahin sa hilig, sa gugma, sa pagpakahilom

wala ako midaog
kay wala ako miapil

wala usab ako mapildi
kay wala ako mitampo

miingon ka pagkaniwang
sa sulat kabahin sa akong kaugalingon

mihukom ka nga
ako dili katuhuan

kon nganong misayaw
ako sa silong sa ulan

kon nganong gikatkat
ko ang kabukiran

kon nganong gilangoy
ko ang lalom nga suba

kon nganong gipatay ko
ang mga oras

kon nganong gisunog ko
ang akong mga kilay

kon nganong gihagkan ko
ang akong ilok

kon nganong giputol ko
ang akong mga pilok

kon nganong gilabay ko
ang akong sapatos

kon nganong gikalimtan
ko ang gidalit nga panihapon

kon nganong gihiklad ko ang
ubang balaod

kon nganong gibalibaran ko
ang gugma

kon nganong gisirad-an ko
ang pultahan sa kabuntagon

tungod kini kay aduna akoy
gihigugma

dili kini sugal, dili kini sukod,
dili kini  pataasay ug shagit


paghinuklog kini sa pagpakabuhi
pagpista kini sa akong kahilom.

awit sa duha ka tigulang nga nagluko sa ilang higdaanan

sayod kamo sa hugot namong
pag-ampo

sayod kamo sa among mga
pagmahay

nganong ang among mga pag-ampo
hangtod karon wala dungga

nganong hangtod karon wala gihapon
gihatag ang among kamatayon

kadtong iyang kataposang larawan

nindot ang iyang mga mata
kon gitutukan mo lang unta pag-ayo
morag mga mata sa bag-o
pang nadalaga

iyang gidap-ig ang iyang likod
sa kilid sa bongbong unya ang iyang
mga tiil morag hinapnig nga
sako sa harina diha sa salog

ang iyang tuong kamot gitungtong
sa iyang tuhod
unya ang usa mipatong sa ibabaw
sa iyang abaga

ang iyang mga tudlo wala manirado
morag mga salingsing sa batong diha
kilid sa ang-ang nga kawayan

ang iyang pahiyom dili man pinugos
apan dunay tinagoang kahigwaos

Tuesday, November 26, 2013

tulo ka pagtoo

i

lisod ikasulti kadtong
tawong moingon nga ako
ako gayod
ayaw ako usba kay kon imo
akong usbon
ako dili na ako

ii

nindot ikasinati ang
abli ug dughan
kanunayng magpadayag
kon unsa ang naa
sa sulod

unya kon imong sulayan
ug hikap
idlas kini nga manatad
ug dayog lupad
palayo kanimo

iii

kon magkita ta
hisgotan nato ang wala nato mausob
kamingawan nato
ang mga idlas

gusto natong balikan ug
hawid ang
mga nanglupad
kay bisan kanus-a
wala nato mabati ang
kainit
sa ilang mga palad

DUHA KA PAHINUMDOM



UNA: kadtong nasakpan mo
ang nangawat sa inyong lanzones
nga tua sa taas mitago sa mga
dahon

imong gipaasohan ug wala
kaginhawa
ug midali-dalig kanaog ug
dayon dagan
kay naulaw

IKADUHA: kadtong mibisita ka
sa inyong kalubinhan unya dunay
nangahoy sa palwa ug takong unya
imong gipangutana kon kinsay
gasugo niya ug nganong ania siya
ug kon kinsay iyang gipananghiran
unya wala siya katubag sa tumang
kahadlok
unya ulahi na nimong nabantayan
nga kadtong tawhana
duna diay gamay
sa ilok.

kadtong mga panahon nga imong
giingnan ang imong kayutaan nga ikaw
ang hari dinhi ug ikaw ang magbuot nga morag
nakalimot ka nga ang kamatayon
anaa ra diay nagtindog sa imong kiliran
unya nagpakahilom lamang

KITA

buslot ang atop
nagtulo na ang balay
wala kita maghisgot
kabahin niini

nabasa na ang salog
milanab sa lawak
mibalhin tag gilingkoran
milantaw lang
wala kita maghisgot
kabahin niini

gipalid na ang atop
sa kusog nga hangin
nanggawas ta
milayas
nag-iyahay ta ug luwas
sa atong mga kaugalingon
wala kita maghisgot kabahin niini
kay unsa pa bay pulos?
dili makaluwas nato ang mga
pulong niining higayona

sila,sila ang nagsigig kahugyaw
sila nga naglantaw kanato
sud sa ilang mga balay nga
dagkong mga bintana

sila nga naghigop sa ilang sikwate
ug naghinayhinay ug hiwa sa
ilang lamian nga puto maya
sila ang nagsiging hisgot bahin kanato
bisag wala na kita nila makita

kutob lamang sa paghisgot
wala na silay laing gibuhat
kita ang ilang literatura
ang ilang mga bag-ong mugna

Monday, November 25, 2013

adlaw, langit, buwan ug mga bitoon

kon makita ko na gani
siya

mora kog langit nga
gidayo sa daghang mga bitoon

mora kog bulan nga sa kahilom
midan-ag sa kangitngit
sa dakong bukid

pagkahuman sa akong
pagkahupong diha sa pagtutok

nahisama ako sa adlaw sa
udtong tutok

init, isog, gipangita ko
ang saktong mapaslot

ang akong sunugon apil
na gani ang akong kaugalingon

ANG MGA PULONG WALA NAKO MAHUMAN PAGLITOK

gisulayan ko
paglitok ang dili nako malitok

mikurog ang akong
ngabil

lumping ang mga pulong
bugnaw kaayo ang mga silaba

gusto nakong isulti ang
tanan kana bang mora kog hubog
nga haskang busoga
unya nagsuka
sa katre og sa
salog

apan mitak-om ang akong baba
morag inahan nga nagdalag bunal
giisa ug
andam na nga ibukbok
kanako ang
dakong putol nga sanga
sa bayabas

karon ania pa gihapon ang mga
pulong
migamot sa akong dila

mikamang kini sa akong
kasingkasing
og ang akong utok nagsalimuang
nagsipok nabuang

Sunday, November 24, 2013

kabahin sa akong amiga nga ulay

sa dihang
gipagawas na niya ang
iyang mga
tinagoan nga mga
pagbati

mora siyag
mga bulingon nga
nalabhan

nasabonan, nawaswasan
napug-an

paghuman niyag
panghayhay
mibalik siya sa iyang
lawak
ug didto gipamilo
niya pag-usab ang
mga ukay-ukay

kini mobuswak

nasayod ka ba
nga bisan sa pagkalayo sa atong panaw

bisan ug ako usab nahadlok
kon asa ang atong padulngan

bisan ug gitiman-an ko ang
bitoon sa kagabhion

ang akong mga mata
anaa lang gihapon sa imong dughan?

tungod kay ako nahimo
mang usa ka lalom nga lawod sa dagat

bisan kausa
wala gayod ako mangutana kanimo

kon ang gugma anaa ba
sa imong hardin, ug kon kini aduna

bay panahon sa ting-init nga
kini mobuswak

dakong lawod kini nga pagkalalom

ang gipakita
mao lamang ang maanindot

gipahimuslan mo kini
sa pipila ka higayon

ug ikaw nalingla
nawala

karon lisod na nga ikaw
mahikaplagan

hinoon, dili ba mao
man kini ang imong gipangandoy?

nga ikaw usa ka isla
nga papason sa dakong balod sa dagat

unya sila nga mga mananagat
mobalik

ug mangutana, dili ba aduna may
usa ka isla dinhi?


ug ang usa aron mahupay
ang iyang kaguol moingon

wala, wala'y usa ka isla dinhi
dakong lawod kini nga pagkalalom

dili na unta kita mag-ilhanay

kalimtan sa makadyot
sa pipila ka adlaw nahisama ako sa layaw nga langgam

pagkaanindot sa isla
pagkalamian sa mga hinog nga bayabas
pagkatam-is sa mga kapayas
pagkabugnaw sa tubig sa sapa

dayon balikan ko ikaw
sa usa ka pagkahinam

bisan sa makausa kon mangutana lang unta sila
ikaw ug ikaw lang gihapon ang wala ko sugod mahikap

ang akong mga halok nahisama lang gihapon sa mga tabanog sa mga panganod
ang akong mga pag-antos nagpatongpatong sama sa mga bulingon didto sa akong lawak

pagkaanindot sa mga pagbati
kadtong walay katumanan
magpabilin lang gihapon kini sa usa ka kulbahinam

hangtod nga ang usa kanato mamatay
hangtod nga ako usab mopanaw

ikalipay ko nga kon moabot na kita didto
dili na unta kita  mag-ilhanay

sa atong mga hawla

bisan kaniadto pa
nasayran mo na

ayaw na pangutana
kay dili usab ako motubag pa

napuno na ang kasingkasing
ug wala na'y kabutangan pa sa bisan unsa

ang atong mga mata
wala mamilok niining mga kamatooran

sa usa ka siplat lamang
sayod na ako kon unsa ang tumong mo kanako

subo nga paminawon nga kita mismo
ang nagsulti nga hayahay kita sa atong mga hawla

Saturday, November 23, 2013

ang dili paghikalimot

naabtan na nato ang atong mga adtoan
nahuman na ang mga katuyoan
plantsado na man unta ang mga nalum-it
diha human sa usa ka paghisgot ug
dayon pagbiya

ngano ba kaha nga sud niining sakyanan
sa dihang layo na kaayo ako gikan kanimo
mabati ko pa man gihapon ang imong pag-iyak
ang imong pagpamugnaw

ako lang usa dinhi, apan pagkaguot gayod
sulod dinhi
makita ko pa gihapon ang imong panagway
sa gilabyan kong mga kabalayan
sa mga kakahoyan
ug bisan gani didto sa sapa nga akong
gitalikdan
atua pa man gihapon ang imong sayal nga
gilatag sa kabatoan

Friday, November 22, 2013

bakwit

kagabii
midako ang tubig
sa san antonio

karong buntaga
wa matuyo nga
nagkatinan-away

ako ug ang bata nga
gitungtong sa atop
sa dumptruck

daghang mga kamot
ang namabay
balik sa ilang gigikanan
didto sa baybay.

Monday, November 18, 2013

walay mahasol

usa ka tibugol nga
kapait

lahi kini sa usa ka
tibugol nga imong gidumtan

ang tibugol sa kamay diha
sa sulod sa siradong garapon

kining nia, lahi,
gintang, anaa sa kilid sa

kamot sa komidor
unya mahibaw-an mo kon

nganong ang mga hulmigas
wala gayod mahisalaag

dinhi. Ako lang, ako lang
ang ania dinhi

hilom, hapdos ang kasingkasing
pait ang alingagngag

apan wala, wala gayod
ako magsuka

naandan ko na, sayran taka,
ang pagtulon ning kapait

nga bisag usa kaninyo
sa inyong mga katawa

wala gayoy makaatik
walay mahasol, wala.

ang panganod isip kaugalingon

lutaw
lutaw panganod

lutaw
lutaw hala lutaw
kaugalingon

dili ka mahisama
sa usa ka tabanog
nga adunay
hikot

abta ang kinatumyan sa
kawanangan

hangtod sa imong
gihandom nga pagkawagtang

Tuesday, November 12, 2013

mahitungod kanako ug sa atong katalagman

kini ang akong tagoanan
dinhi ko isulti ang dili ko masulti sa
akong mga suod nga
higala

dinhi ko mapahungaw ang
wala nako mahatod sa akong inahan
ug amahan

dinhi ko iladlad ang mga bulingon
nga gilabhan, gikusokuso ug giwaswasan
dinhi ang akong sablawanan

wala ang adlaw dinhi, apan ania
ang kagabhion
dala sa pipila ka mga bitoon

unta dili ka makatultol dinhi
unta dili mo kini mabasa

alang kini sa tanan,  basahon nila
magpabilin silang walay mahibaw-an
dili kini alang kanimo
kay ikaw nasayod na man kabahin
sa tanan
mahitungod kanako ug sa atong
katalagman

sa tulo ka adlaw way gikaon.

sa dihang nakita mo ang tawong
nagbitbit sa electric fan, meat grinder,
frying pan,
chitchiriya,
mishagit ka, "mga kawatan!
mga unggoy sa lasang!"

"sus, tan-awa pagkabaga sa
nawong
walay kaulaw
gadiwalwal ang dila
sa mga kawatan!"

naghilom lang ko
kay bisan ug ikaw nga morag sa
akong lantaw
dakong sayop
wala usab ako'y katungod moingon
kanimo
nga

"bogo!!!!"

kay hangtod karon wala ka pa
gayod gihapon
makakat-on kon unsa ang tinood nga
kagutom, ang kauhaw, ang
pagkawagtang sa paglaom
ug ang mga sunod
pa nga mga pag-antos

og kon unsay angayng buhaton
sa mga tawong sa tulo ka adlaw
way gikaon.

Monday, November 11, 2013

MGA PANGUTANA

matudloan pa kaha
nato ang mga iring
kon unsay kasakit
sa mga bagtok?

matudloan pa ba
usab nato ang mga
iro kon unsa ang
mga kasakit sa
iring?

kon matudloan
unsa kaha ang mga
pamaagi?
ug kon anaa ang
mga pamaagi
kanus-a pa kaha?


padayon ang panaw paingon sa laing hudyaka.

"sana, tigilan na nila ang pagpost ng mga pictures ng mga namatay...
para kasing nasasalaula na ang mga bangkay..." (komentaryo sa usa ka magsusulat sa Facebook)

padayon lang gyod daw
ang salu-salo ug kanta-kanta
ug sayaw-sayaw sa imong adlawan
kay kuno ang mga
patay, patay na,
ug silang tanan
ipanglubong na
sa atong mga hunahuna

kita kunong mga nahibilin
utangan sa kalipay, sa katawa, sa sayaw
padayon ang
panaw paingon sa laing
hudyaka.

ang ksubo kuno
usa lamang ka lat-ang
sa usa ka hagdang
napiangan

ugma, ato gayod kuno kining
dali-dalion
sa paghulip
aron kadtong dili makabantay
dili sab
mangahulog ug
matikay-ang

makasubo nga sugilanon

nabati na nato
ang kisaw sa atong
kalag

wa kini magpakahilom
sa usa ka bagyo

nakita ko ang
lintunganay diha
sa buwak sa kahilom

dugay na kita dinhi
nasaulo na nato
ang mga labat

nakita nato ang
pagtubo niini
nga miabot na
sa panganod


walay makabiya
sud ning atong
bilanggoannga
atong gihimong
usa ka panimalay

hadlok ka nga
ugma
pangulitawhan ka
ug laing
makasubo nga
sugilanon

mangita sab ug duyog.

kon kamao pa lang
unta akong mokuskos ug
gitara

bisan kadyot lang
akong pakantahon ang mga
kwerdas
sa pinakasubo nga
kutingkuting

ihalad ko kini sa mga
nahibiling tunob
ni yolanda

aron kon imo kining madungog
mohalad ka usab
ug pipila ka
luha

ang subo nga awit
diha sa iyang kamingaw
sama kanimo
mangita sab ug duyog.

Sunday, November 10, 2013

chat sa duha ka babayeng huwes kabahin sa mga biktima ni yolanda

same here
kahilakon kong nagtan-aw
langga

gahuot akong dughan
pangga

ayaw'g huot huot diha langga 
kay ang atong emosyon
 mapaingon nya sa ato health,

 aw eh! huh! 

seriously my heart goes out
 for the victims of
 manay yolanda


bagsik!!

Saturday, November 9, 2013

pila pa kaha ka tuig ang pagkawingig?

naglingkod ka
sa bangko sud

sa starbucks cafe
dunay gipaabot

dunay misulod
milingkod sab

mitan-aw nimo
kabantay ka

mitan-aw sab ka
mipilit mong duha

mipahiyom siya
mipahiyom sab ka

gikapoy ka na
aning mga butanga

magbinotbot mong duha
ikaw ug siya

minyo ka ug minyo
sab siya

iphon lang sa inyong
mga tudlo

ang kalipay sa mga
gutlo

pila pa kaha ka tuig
ang pagkawingig?

Friday, November 8, 2013

PHILIPPINE SENATE


wa ka ba kahinumdom sa
giingon ni Jose?

kabahin atong barkong lingin
unya tanan mibugsay sa hangin

naglibot-libot sa dakong lanaw
ug ang tanang damgo nangahanaw
ANG WALI NI PADRE SA SAYONG BUNTAG

lahi na ang panahon karon
maoy unang bungat ni padre

ang bagyo, normal
abnormal, kon walay bagyo

abnormal ang kalinaw
normal ang kagubot

kita sab kon moreak, abnormal,
sa abnormal nga panghitabo

busa, bay, ayawg kabalaka
normal pa diay gihapon ta.

WALAY LINGAW



nanudlay ra ko

nag-ilis ug karsones

nanaghoy gamay

wa koy lakaw

GANA-GANA LANG, BASTA LANG GOD


gikan sa tumoy sa imong buhok
hangtod na sa tumoy sa imong pilok
hangtod na sa tumoy sa imong mga kuyamoy
sa imong kuko hangtod na sa matag
tumoy sa imong balahibo
ganahan ko nimo.

pangutan-a kog ngano.
ambot, wa ko kabalo.

MISTER SWABE



Bahalag mabyaan ang kolon ang sugnod
ug bugas ug posporo ug tubig ilimnon

bahalag malimtan ang bulad, ang
nodols, og de latang sardinas

di lang gyod ang sudlay,
pomada ug pahumot

ang di niya ganahan nga mahitabo
sa iyang kinabuhi

kanang mabugkag ang iyang
humot nga pinahapay.

this time you begin to like what inefficiency is all about

nagdrive kas imong car
sa unahan sa may junction adunay
nagbangga nga easyride ug
truck

maayong pagkaturnturtle ang easyride
kay dako man lagi ang truck
nga walay bisag usa man lang gani
ka garas ang
side

di ka kaagi sa karsada kay gababag ang duha
miabot ang pulis nga nag-interrogate
nagdalag sukod
nagsukodsukod sa gilay-on ug nag estimate
sa damage

gikapoy kag pinaabot
very inefficient ang police
hapit ka na gisapot

sa unahan dunay minaog
pareho sab nimong gisapot

taas, gwapa, hamis ug panit,
in short barogan

nakaingon kag, "hala pulis
dugaya pa gyod
ang imong imbestigasyon,

this time
you begin to like
what inefficiency is all about

samtang mi fashion show si
sexy
sa tunga sa highway
silong sa init na
kaayong adlaw

sama sa adobong lambay

sa imong pagsigig ingon
nga mahimong ihikyad una ang mga
pagtagad diha sa kilid sa
pultahan
kay kini siya dili man lagi
dinalian

nan, naunsa ba,
o dalagang hamis ug aping
nabiyaan ka naman hinoon
sa tren

o, dalagang ulay
walay pulos ang imong pagbudlay
kinsa pa bay
ganahang mopalit
sa imong bingkang
nanimahong
pan-os nga
tinughong

bisan pag bas-on nimo
pag-usab ang nauga nga
laway
mabasa man
apan di na gyod
sama sa adobong
lambay

sun flower seeds

pagkahuman
sa bagyo

ato nang isabwag
ang mga
sun

flower seeds
aron magsugod na
ug tubo ang
atong mga
paglaum

sa pipila ka adlaw
mamulak na usab
kini sila

pagkaanindot gayod!!!

picture picture dayon
kay daghang
taym.

sa kanunay mobalak gyod tag ginagmay.

samtang naa pay
kaasgad ang dagat
samtang naa pay
hangin ang kalibotan
samtang mosubang
pa ang adlaw
samtang manahon
pa ang kamunggay
samtang naa pay
tubod ang atabay
samtang tam-is
pa ang kamay
samtang ginantang

sa kanunay mobalak
gyod tag ginagmay.

Thursday, November 7, 2013

ang dila sumala sa balak ni narcissus

isdang
walay bukog
walay silik
basa
lami kaayong
tam-osan

usahay maoy
akong
himoong
sud-an

mao kini ang
kinalamiang
karne sa
akong
alingagngag

romansa brutal

gipatong ko ang akong mga kamot
sa imong abaga

ang akong sampot sa imong duha
ka paa

ang akong dila sa imong baba
ug uban pa, ug uban pa.....

pagbati

mas ganahan ko anang
walay hapnig

mas lami ang walay
putos

ang walay hikot
ang walay pugong

walay makalupig sa
natural lang nga kalipay

ang tanang mabati
mabati gayod

panagduyog

maayong pagkahulma ang
akong mga tiil diha sa balas sa baybayon

ang imo sang mga kuko nagbilin
ug pulo ka kawras sa akong likod

manggiulawon ang atong mga dila
walay gibilin nga timailhan sa atong mga ngabil


PAGPAABOT SA USA KA KATALAGMAN


gihungihong ang imong pag-abot
gikan pa gahapon

gipasabot nila nga dili ka basta-basta
sa kakusog, sa kabangis,

gidungog nga kon malabyan nimo
ang balay, ang kabaw, ang kabayo,
ang sakayan, apil na ang mga kaldero
og mga punoan sa lubi
imo gyod ko nong dalhon
walay pasayloon

ang mga mananagna nag-ampo nga
kini matinood
kay ug dili
maulawan silang tanan
unya kinsa pa man unya'y ganahan mobayad
ug motoo nila?

giampo nila ang pag-abot sa katalagman ug
kamatayon

kami nga mahadlokon sa mga panghitabo unya
nag-ampo
nga unta dili madayon
nga unta mosimang
paingon sa laing dalan

ang mga bata nga walay kalibotan kon
unsa ang mahitabo
nangatulog
sa ilang mga tiilan atua ang ilang
mga paboritong dulaanan

sa kilid sa balay atua ang duha ka iro
nagduladula sa ilang mga ikog.

kita usahay simang,
sila usab simang,
kasagaran dili magtakdo ang atong mga
pag-ampo,
mga kabalaka, ug mga paglaom,

ang uban kanato, usahay bisag kita usab,
usahay gustong
matulog na lamang

Dili sayon ang pagmahal. Obligasyon sab kini.



dunay gipakatawong bogo
sakit. ang eskwelahan morag
ihawanan ug mga baboy,
pait. ang mga libro morag
gabukal nga tubig. Hapdos
gyos sa mata. walay ganahan
sa iyang kasipat. Ginganlag
maldito. Likayi, likayi.
ang mga anak kanunayng
nagpahimangno sa ilang mga
anak. Ayaw awata.

bogoy. Gwapo unta kaniadto.
apan sa kabogoy, daghang
ulat ang nawong ang kamot
ug ang mga tiil.
bisag unsang negosyo,
palpak. ambot ug unsa kahay
kapalaran ani niya.

dili angay patulan. Dili angay
pauyonan. Ang inahan inahan
gayod, sa paglaban.

Kon dili nako ni mahalon,
kinsa pa may magmahal kaniya?

maoy iyang pangutana kanako
ako, nga iyang igsoon.

hapit ko malumos. Makalumos
sad diay ning kaulaw sa atong
kaugalingon.

Mitamark ko. Sakto baya pod
siya. Dili sayon ang pagmahal.
Dili kini pilipilian, ug ihatag lamang
sa mga angayan, sa barogan,
sa utokan, sa kugihan, ug sa mga
boutan.

Obligasyon kini.

Tuesday, November 5, 2013

makasasala (alang kang F. nga nangyam-id sa gugma)


gisulayan ko ug lanaw ang akong
kagahapon ug gipangutana ko kini
kon unsa  ba gayod ang akong gibuhat
sa gugma?

usa lang ako ka tigpamati nga
naglingkod sa kilid sa usa ka
abli nga pultahan

ang uban miadto na dapit sa dapogan
ug napaslot sa mga baga

wa makat-on misaka ug milingkod
sa tulo ka bato diin kusog ang kalayo
nasunog

apan bisag napaslot ug nasunog o
di ba namatay
didto sa ilang lungon gipakita ang
usa ka pahiyom
nga nagtug-an nga kuno sila
namatay nga malipayon

ako, kon nagtinood pa unta,
mas labaw pa ang akong mabuhat
kay sa pagpapaslot, pagpasunog
og pagkamatay

labaw pa sa pahiyom nga malipayon
ang akong ipakita sa akong nawong

kon mitoo pa ako nila, mas labaw pa
unta ang akong testimonya kabahin
sa gugma
sa gugmang labaw pa sa tinood

kay sa akong tan-aw ug pagtoo
ang gugma man god usa ka balaan
ug ang pagkabalaan mao man
ang pagkabathala

ug ang pagkabathala labaw sa tanan
makamao man kining mobalik gikan
sa lubnganan sa mga patay ug dayon
sa ikatulo ka adlaw mabanhaw

sa akong pagtoo, mabuhat ko usab
kini
kay ako, kon sa gugma na misunod,
usa man gayod unta ka bathala
alang sa nahigugma usab kanako

apan unsa ba ang akong gibuhat
sa gugma? ako kining gipatay
kanapulo ko kining gibangkaw
kanapulo ko kining gilansang
sa iyang krus

abi mo ug ako usa ka hilomon nga
tawo nga karon naglingkod sa kilid
sa pultahan ug usa ka tigpamati lamang?

dili kana tinood, wala ka lang gayod
masayod. wala na bisag usa ka gugma
ang mabuhi pa sa akong kasingkasing.

dili ako gugma. Dili ako bathala.
Tawo lamang ako. Makasasala.

ug siya, ug siya lang gayod ang gitumbok nga sad-an


kon magsulat ka
hunahunaa nga adunay mobasa niini

wa ka lang masayod
adunay mibasa nga atoa nagtindog
sa ikawalong balay
himabaw sa usa ka habog nga
bungtod

nagtinood kinig sabot sa imong
gisulat
nga nakapatandog kaniya
ug pagkahuman niini
tungod sa pagbati nga imong
gipamulong diha sa napulo mo
ka mga linya

gibuhat niya ang gikalisangan
sa katilingban

miambak kini
sa taas niyang nahimutangan
nag-una ang ulo
nga maayong pagkabuak
diha sa
nagpasad nga mga
bato

wala kini manamilit kanimo
kay dili kamo kaila

misyagit ang mga tawong
nakakita
nalisang sa kadaghan
sa dugo nga miagas
gikan sa iyang buak
nga agtang

nakapanghesus
nakapangsantissima inahan
silang tanan

ug siya, ug siya lang gayod
ang gitumbok nga sad-an

ang gianod, ug ang galutaw


didto sa suba nakita nato ang duha ka patayng kahoy nga
gianod

naglagyo ta sama kanila
nagpakahilom ta sama kanila

nindot ang duha ka kahoy nga patay
nga gianod sa sulog sa suba
diha sa lubog nga tubig

pareho ang ilang dereksyon
paingon sa dagat
pareho ang ilang kapaingnan


mao kini ang atong kalainan
wala kita gianod sa tubig apang naglutaw kita sa hangin
ako ang itom nga uwak paingon sa bungtod
ikaw ang puti nga  tulabong paingon sa dagat

nakapangutana ko, nganong karon man lang nato
nasakpan ang maong tanghaga?
nakapanghupaw ko, nganong kaniadto wala ka
man nagsaba?

pipila ba ka tuig nga kitang duha nagpaaron-aron?
ako ang hangin ug ikaw ang akong dagat
ako ang imong adlaw ug ikaw ang buwak?

dili pa man seguro ulahi ang tanan
iuli ko ang imong sapatos, ambi ang akong tsinelas

daghang salamat.

bangag, pangag

ingon ka
gihigugma mo kaayo ang kalayo

ang kapula ang kainit
ang kahayag

busa kanunay mong
higala ang usa ka palito nga posporo

kon wala ang kainit
sa posporo ka moduslit

sahay wala ang bisag usa
ka palito

ug busa mikuha ka ug
duha na nawong sa
usa ka bato

gikagis mo aron
matawo ang kalayo

di man ugaling mahurot
ang bato

apan usahay wala kini
diha para nimo

busa gibuhat mo ang
sagad gibuhat sa uban

gikagot mo ang imong
ngipon

ug tuod man miaso ang
imong baba

ug dayog buga ug kalayo
ang imong dila

ikaw, ikaw  na karon
ang nakaangkon sa
masipang pakpak
ang tinood nga
magbabalak

bangag, pangag.

Sunday, November 3, 2013

hangyo sa usa ka higala nga laog sa tam-is nga kapayas

kon imong pikason ang
usa ka kapayas nga hinog
na kaayo
nga ang iyang katam-is
mamahimo unya
natong lantugian ug
awayan
bisan pa sa atong
dugayng panaghigala
usa lang ang akong hangyo
nga unta ang
kataposang hungit maoy
maako.

ang amahan nga nangita sa anak nga iyang gibiyaan

dunay nangutana kon naunsa na kuno kadtong batang misakay sa kangga
nga nahulog sa suba kay wala kahawid sa pisi nga mibunal sa kabaw nga misutoy ug dagan
nga gikasab-an sa iyang amahan ug gibiyaan


naunsa na ba kadtong bataa?

mitubag ang wala untay labot
ah, midako na ang maong bata nga nahimo na nga sirkador sa bisan asang pista
sukad gipalayas sa iyang papa

maayong motambling nga morag langgam nga galupad sa hangin
kon mahulog siya mora siyag iring nga way tingog ang mga tunob nga modapat sa yuta


kusog na sab kaayong molangoy nga morag isdang espada sa tampi
idlas ug dili makuha sa mga inilang manikopay


sumala sa iyang asoy gipalit kuno niya ang mga kasakit sa miabot nga mga panahon
ug wala na kini mangayo pa ug sukli sa nanindang madaogdaogon



asa na kaha  nako makita ang maong bata? aduna ka bay kasayoran kon asa?

ako ang iyang amahan.

ah, dili mo na siya makita labi na kon magpaila ka nga ikaw ang
iyang amahan

kay sumala pa sa asoy sa iyang bag-ong mugna
siya usa na man ka tagolilong.







Saturday, November 2, 2013

ang mangingilad ug ang dakong kabaw


sa tumoy sa pisi sa imong
pagpakaron-ingnon
imong gitaral ang dakong
kabaw
nga unta sungayan man

nagpaguyod
intawon bahalag ihawon
puhon

matilapan lang ang mong
asgad nga
aping.

pamati zarathustra


zarathustra
sakit ang akong
abaga

masahii na

zarathustra
kay wa pa man kita

nila pamatya
despwes
pamatia!

Friday, November 1, 2013

ning sayong kabuntagon

balik-balikon kog piyong ang
akong mga mata

bisan sa kataas sa mga oras
antoson ko kini sa makadaghan

hangtod nga wala na ako'y makita
diha sa itom nga tilon

nindot pamation ang tingog
sa mga piso nga gitawag sa inaan
humot ang inaso sa kan-on nga
bag-on gihaon

sa dili ko na makita
bawion ko kini sa akong madungog
ug masimhot
ning sayong kabuntagon

malinawon na

ang kagabhion
lahi na gikan
dili ko makatulog 

kaniadto sa kakulba

apan bisan haw-ang 
ang alugnan
salamat nga ikaw

karon wala na

Thursday, October 31, 2013

ang pag-una ug dagkot sa mga patay


gauna kog
dagkot sa akong
tulo ka kandila
alang kang tatay
nanay og
lolo,

gibutang ko ang
buwak sa kilid sa
ilang mga
lapida

maglibog kog
unsay buhaton kon
matagboan ko ang
mga buhi
nga hagbay ko rang
gipatay
sa akong
panumduman

karong mga orasaha
nahikatulog pa sila
sa ilang
kahubog
ug kalaog
kagabii.

sa mga lubnganan


wala na ang
mga puting alibangbang
patay na usab ang mga
pulang buwak nga
nag-alirong
ning mga lubnganan
sa akong
gihigugma ug gikamingawan

matag kilid
ang atubangan ug ang
mga tiilan

pulos na man
mga batong
gilumutan.

Wednesday, October 30, 2013

pagpangabre sa duha ka kamot


hinay nga moabre ang mga tudlo sa palad
kay pipila usab kini ka tuig nga nanirado diha sa duha ka kumo
sakit ang kahayag
giangkon kini sa mga mata gikan sa iyang kagabhion
ayaw una ablihi ug dako ang mga bintana
kay ang kasakit nagpaniid pa lamang

huwata nga ang baybayon moawit diha sa iyang pino nga hangin
gikinahanglan sa palad ang kabugnaw
aron ang buwak diha sa sulod sa iyang lawak
dili daling malaya.

ang amahan ug anak


sa matag sugilanon
sa matag kita sa duha ka gusto unta magsuod
diha sa tunga-tunga sa panghangpanay
kamao ang hunahuna kon kanus-a kini niya putlon
bisag ang kasingkasing
molumpat nga morag batang patulugon sa kaudtohon

ania ang hunahuna nga nagbarog nga usa ka amahan
sa kasingkasing nga nagpabiling bata nga walay buot

gahi ang ulo sa maong bata
busa mikuha ang amahan sa sanga sa bayabas ug
iya kining gilatos

misyagit ang bata nga morag kanding nga gipatay
giantos kini pagpamati sa amahan
gialsa kini niya ug gidala sa iyang higdaanan ug gipakatulog
nalabhag ang paa, naglanab ang luha sa iyang aping
hangtod nga nakatulog kini sa kahiubos ug kakapoy

disir  milakaw ang amahan
kay gaulan man ang langit ug bugnaw man ang panahon
gihabolan ang bata
ug gihagkan ang iyang duha ka aping.

ANG ITOY NGA NAHINANGOP SA IMONG PAG-ABOT


gahalhal ang dila sa itoy nga nagpaabot kanimo
diha sa kilid sa labat nga kaways  sa imong balay nga bungalow

sa kiwil sa iyang ikog ( kay wala na man kini inahan nga gihimong sumsuman
sa mga palahubog sa itago tang ngalang barangay dapit  sa bukana)
morag ang kamingaw niya diha kanimo daw labaw pas hilabihan

layo ka pa morag pulo pa ka dupa o kinse ba kaha
midagan kini paingon kanimo aron iya  kang hangpon sama sa usa
ka amo nga wala makauli sud usa ka semana

pagkaanindot sa maong itoy: puti ug hamis ug baga ang balahibo, 
lingin ang lawas nga morag nangka, dagko ang mga tiil nga morag palwa sa lubi,
gabitay ang duha ka dalunggan mga morag duha ka dahong laya  sa saging kadisnon
taas ang dila nga morag paypay nga dahon sa lantipay,
kusog kining miaw-aw nga morag nanghambog sa silingan nga siya na ang
pinakaswerteng itoy sa kalibotan sa mga iro

ikaw nga hubog sa imong pagkaikaw
dako ang ulo ug ang sulod gitahapan nga puros bakukang
mga kamot nga ang nakat-unan mao lamang ang paghawid sa hait nga itilikbas nga sundang
matang talinis ug tinan-awan samasusa ka bangkaw

naglibog ko, nganong diha sa usa ka nindot nga itoy nga mihangop kanimo
gibalosan mo man sa usa ka dakong sipa sa imong tiil nga morag dagkong pala

pagkalooy sa itoy, nalabay nalabay intawon gikan sa kalsada paingon sa labat nga kawayan
misyagit sa kasakit, mibahag ang kiwil nga ikog,  ug ang lingin nga lawas
maayong pagkabun-og

sakit nga pamation nga kini karon
atua sa ilalom sa dapog sa kusina
nagkurog, gigakos ang kaugalingon,
 nagtago
morag nagpalaban sa mga uga
nga sugnod
diha sa giluom nga
kahilom.