Tuesday, October 21, 2008

ang bokon (the clown)


ang katawa lamang ang imong gusto
nga mahinagboan nianang payaso,
kadtong bokon sa adlawan sa imong pag-umangkon
kadtong inyong gibayran aron ipabukadbukad
niya ang iyang ilong nga morag kamatis

kadtong iyang mga ngabil
nga dagko kaayong miporma sa buak nga katawa
kadtong nagkalo ug dako nga itom ug
giribitan sa asul nga lapad nga ribbon
kadtong kulungon ug buhok kadtong
bukad ug karsones nga maayong
mokiay, mosayaw, moontol-ontol, mopakibot-kibot
sa iyang lubot ug nagpunay ug babay kanimo aron ka malingaw
ug ang tanan nimong mga bisita

kon imo pa lamang untang masulod
ang mga lawak sa iyang hunahuna
imo untang makita ang iyang anak
nga tua sa ospital nagtinga
nagkinahanglan sa presko nga dugo nga iabono
aron lang unta kini mabuhi ug dugay.


pagkahuman niining birthday party sa imong pag-umangkon
magdalidali ang payaso ug langkat sa iyang make-up
ug ilis sa iyang karsones ug sapatos
aron pagbisita sa iyang anak


didto siya sa ospital magbakho,
didto siya mag-iyak

kay ang sunod mao na ang haya
sa iyang bugtong nga pinangga.

No comments: