mY secreT ponD

Sa gamay pa ako

Sa gamay pa ako kuyugon mo ako
Nga manginhas sa bukana, didto diin

Nagtagbo ang suba ug dagat, didto
Diin nangamang ang mga kinason

Ang balat, ang mga gagmayng kasag
Ug mga kogita, ug ako nga dili pa

Kaayo suheto sa atong panginabuhi
Isip inahan ug anak, sa imong pagpa

Ngita ug sud-an sa atong panihapon
Ako intawon magkadam-ag dam-ag

Sa danlog nga mga bato, sa mga
Lumot sa kilid sa atong kinhasan

Mosyagit ako sa kasakit sa dihang
Natunok ako sa tuyom nga nahisalaag

Imo akong gipaihi ug gihidhiran mo
Ang akong lapa-lapa, duha na ang

Imong gipas-an sa akong katapulan
Basket sa atubangan ug ako sa imong

Likoran. Ngitngit na. Aduna ka nay
Kuha. Aduna na kitay sud-an sa atong

Panihapon. Sa tunga sa lampara
Naglugit kita sa mga unod ginamit

Ang alpirel samtang namati kita
Sa drama kabahin sa mga sirena.

Dugay na kadto. Karong dako na
Ako, ikaw na usab ang magkapandol

Pandol sa atong nataran ug sa atong
Karaan nga kusina ug sa atong talad

Kan-anan. Dili na lampara ang atong
Kahayag. Dili ko ikaw biyaan, Nay.

Dili ko ikaw pasagdan. Sa imong
Pagkapandol, andam na usab ako sa

Pag-agak kanimo. Gani sa pagkugos
Gani sa pagpahinumdum kanimo

Nga kita baya kaniadto nanginhas
Nga ako miiyak ug imong gikugos.