mY secreT ponD

Pag-awat sa balak ni Langston nga “Dreams Deferred” ug ang Pag-bugalbugal Niini

i
Nagkahimamat mi ni Langston Hughes
Karon lang jud nga buntag. Nadungog ko ang iyang
Mga pangutana: kon unsa kunoy dangatan sa mga
Damgo nga imong ipadaplin una?

Mauga ba nga morag pasas?
O magngotngot nga morag kabahong?

Dili ba kaha kini manimahong patay nga morag
Karneng nalata?
Dili ba kaha kini matikig nga morag
Tira-tira diha sa dahon sa saging
Nga hinalob ni Nanay?
Basin ug mora kinig kahoy
Nga nabiyaan sa daplin sa dalan
Tungod sa iyang kabug-at?

Pero ang kurat, kon dili ba kini
Mahimong bomba ug kalit
Lang mobuto?

Patay tang tanan nga balakero.

Ii

Milakaw si Langston paingon
Sa kusina.
Miinom ug bugnaw nga tubig.
Dunay miabot nga bayot
Nga manikurista nga
Nangita sa akong asawa
Kay schedule nga kuno
Sa beauty rituals niya.

Gipangutana ko ang bayot
Kon unsa bay dangatan sa mga
Damgo nga imong ipadaplin
Una diha sa kilid sa imong
Bag nga gibutangan sa kutex
Nipper, gunting, nailcutter ug cuticle remover

Merespetar ang bayot nga
second year college sa
St. Vincent’s college nga nagkuha
Ug secretarial course

Kon ang mga damgo imong ipadaplin
Sa kilid sa akong beauty box
Ayaw kabalaka
Kay dili kana mataral sa lain
Dili kana makawat kay ako maayong mamantay

Dili kana mauga nga morag
Panit sa babayeng wala mabisibisihi
Sa agua de bendeta ni Kumareng Tikoy

Dili kana mahimong pasas
Dili kana maalaan nga mga kogmong nilikit ni Momoy
Dili kana malata og manimahong
Patay nga morag bagtok nga
Nahiloan sa kisame ni Tatay
Dili kana motikig ug labi nga
Dili kana moboto nga morag
Bomba sud sa galupad nga Cebu Pacific

Kay kanang mga damgo nga imong
Gipadaplin sa kilid sa akong bag diin nahipos ang
Mga paraphernalia sa kulong.manicure
Ug pedicure, dala na ang tina sa buhok
Aron mahimong chestnut brown


Kanang imong mga damgo nga
Imong gikahadlokan nga mawagtang
Ayaw kabalaka senyores, kay
Ako kanang supsupon
Ug akong hiposon, ihikyad sa kilid
Sa akong alingagngag
Ako kanang pagilokan ug tabonan sa
Akong taas ug lapad nga dila

Ayaw kabalaka senyor
Kay dili ko kana tunlon

Kay kanang imong mga
Damgo nga imported nga
Dala ni Langston Hughes
Ako kanang iluwa kon
Gusto na nimong ipalugwa

Ikaw lang ang makatulon niana.