sa kilid sa simbahan anaa nimo diha makita
ang karaang kumbento sa katipunan
daghang pari ang nakapuyo diha kaniadto
ang uban gani diha lang usab namatay
dili sa kagutom, dili sa sakit, dili sa kauhaw
wala gidungog nga dunay namatay sa maong hinungdan
dinhing dapita. Nasunog ang maong kumbento.
Gihungihong nga gisunog ug tuyo sa bag-ong pari.
kay sa diha kuno nga iyang giukab ang karaang kaban
didto niya nakita ang mga ngalan sa mga anak sa mga
pari, taas-taas baya nga listahan
nga gitago sa usa ka kleriko, apil na ang galastohan sa
pagpabunyag, sa pag-eskwela, sa pagkasal, sa adlawan
ambot ba kaha ug tinood, apan ang bag-ong pari wala na
malipay sa maong naugkat. Wala siya makauyon sa ilang
mga binuhatan. Apan kwidaw ka, kay sa iyang kwarto
adunay dalaga nga magsige ug pamisita.
Giingnan niya ang kleriko
nga kining bayhana iyang bisita, ug suod nga higala
ug siya ra gayod ang makamaong
mopilo sa iyang mga habol, ug mipili sa kolor sa iyang
mga ponda ug sa kadak-on sa iyang alugnan
siya lang ang makamaong manaod sa iyang kurtina,
ang mopahaluna sa iyang sabon ug tualya,
ang manirado sa iyang pultahan ug sa mga bintana,
inig-abot sa bugnaw nga hangin gikan sa baybayon
inig ulan, inig kuso-kuso sa iyang atop
sa usa ka gamug-ot nga panahon.
No comments:
Post a Comment