Wednesday, May 28, 2014

ang kaalam ni tiya tutay


kon dunay mangayog
dahon sa
kamunggay
pakapinan gayod niyang
dakong sanga

kon mobalik
pakapinan na gyod
niyag litaniya
sa pagpamoyboy ug
pangasaba
" kay ngano kanang
inyong tugkaran
bato?"

ang gaba


...maayo mag sili
nga mohalang dayon
...kon unsa ang imong
gitanom
na mao ra pod ang imong
anihon
....dili jud magsaba.

si ervin pordoy.

si ervin
hadlok mahugawan ang iyang duha ka kamot
sa yuta,
"yaks, daghang kagaw!"
maoy iyang panaway sa akong duha ka kamot
nga mihabok sa daghan kaayog bunga nga
punoan sa kamatis
duha lang ka kagaw, ang kagaw sa hunahuna
ug ang kagaw nga naa lang sa libro.

ang milalin ug ang nahibilin


dili nako ipakita kanimo ang
dayag.
ania ako sa imong atubangan
kunuhay namati, apan ang sulod sa akong kasingkasing
humana nangabri unya ang akong mga pagbati diha kanimo
hagbay rang migawas
paingon sa laing balay, nga miabli sa laing pultahan,
unya atua na ako didto, nakighinabi sa makalipay kanako
atua na ako, mihigop sa iyang usa ka tasa nga
init nga kape.
samtang ikaw siging gayawyaw, unya ako
usa na lamang ka patay nga kahoy,
wala nay dahon
wala nay bulak.

Sunday, May 25, 2014

disesais ang iyang anak
unom ang patay pulo ang buhi
lima ka bulan pa lamang
namatay ang iyang bana
unya sa hinay hinay gipang-apod
apod niya ang iyang mga anak
sa lain laing panimalay
dili aron siya malipay apan
aron silang tanan mabuhi.

karon nga siya na lang usa
atubangan sa iyang dapog
sa nagbukal nga nilung-ag sa
gamayng kaldero
gipaaso niya ang sugnod nga
basa aron unta madungog sa
ginoo ang iyang mga pag-ampo.

ako ang nalooy kanimo

adunay bata nga walay purol
unya hirig ang iyang nilakwan nga
mora ba ug dili tupong ang salog
sa dalan
dili iyaha ang iyang gisuot
luag kini ug taas sangko sa
kumagko sa iyang tiil,
nangita kini siya sa iyang
inahan
balikon ko aron unta nimo
masabtan,
nangita kini siya ug inahan,
nadungog mo apan milingi ka
paingon sa wala
unya layo na kaayo ang imong
tinan-awan
lapos pa gani sa pikas
tampi.

usa ka lumalabay

kinahanglang hugot ang atong
pagsalig sa nakita
kinahanglang walay kapin
walay kulang

kadtong tamsi nga mibatog
sa sanga sa bayabas nga
wala na mamunga unya ang
mga dahon nangahulog sa
sapa sa kilid sa dalan diin
ang iro nga puti nga puntik
ug itom nga nagsigig paghot
sa bulan nga nagpadulong
na sa iyang kadulom,

ayaw na ingna nga ang tamsi
nagmasulub-on nga ang bayabas
aslom nga ang mga dahon nahutdan
na sa paglaum og busa nangahulog
nga ang sapa nalanag sa mga dahon
nga nangalata nga ang iro nabuang
ug busa siging gipaghot ang bulan
nga anaa nagbakho sa hilom sa
taas kaayong kangitngit sa
kagabhion,

ayaw na dugangi o kulangi ang
imong nakita
naghatag lang kana ug kasakit
kanimo nga usa lamang ka
lumalabay.

Monday, May 19, 2014

pagkanindot sa imong
pagkabuwak
wa kong kaantos
gikutlo ka nako
gikan sa imong
sanga

gisulod ka nako
sa akong palad
gidala ka nako sa
akong lawak

gihipos
unya nakatulog ko sa akong mga damgo
bahin kanimo

pagkaugma
nalaya ka na
ako nagpabilin
sa patay nga
pagtoo

kon ako pa unta ang
sundon
kahagbay ra unta ipiyong
ang gasulirat
nga mata ning
kalibotan
nagpadaplin ka
ang nagsunod kanimo karon sila na ang gauna
milingkod ka
ug ang gipasunod nimo kanila mao na lamang ang imong panglantaw
kutod ka ra dinhi
niining imong pahulayan
lapos na ang tanan
galaposlapos mora balay nga
puros bintana
puros pultahan

walay atop unya giganahan ka
kay sa kagabhion
kita na gyod tanang mga bitoon
dayon
nabihag ka
napriso,
 milugnot
apan wa ka lusot
pila na ba ka tuig?
abli na ang
pultahan
apan dili ka na
ganahan
pa nga mogawas

dayon ang prisohan
dili na prisohan
pila na ba ka tuig?
anaa na kini
bag-ong ngalan

puloy-anan
pahulayan
panimuyo

dili diay
rehas ang prisohan

Friday, May 9, 2014

matingala ako kon ang saad
imong tumanon
sayod ka nga ako naanad na nianang
imong mga gihukot nga timailhan
diha sa lawod sa
dagat
sa imong mga pisi nga balas
sa imong mga
bula nga ginganlag mo'g
pulong

sakto ka
maayo man god kon ang pulong
magdayon

wala mo bayri ang matag silaba
busa
imo kining giusiusikan  ug ako misabot
kabahin niini

ugma ako na  usab ang maghimo ug mga
yugo nga bonbon

kinsa ba ang magtamod niining matang
sa kabug-aton?

ikaw.

Tuesday, May 6, 2014

hilom lamang

ang mga sama

dili ko usahay madakpan

baldado ang akong mga
tudlo

ang mga sama daghan

sama sa kaputi ug kahumok

sa doldol

sama sa kahadlok sa mga

samin nga mabuak

sama sa kahadlok sa mga bato

nga mahulog

sama sa mga langgam nga nabalian

ug mga pako

sama sa mga kasingkasing nga haskang buaka na

apan anaa mihatag gihapon ug saktong pagbomba alang kanimo

sama sa kauhaw sa gripo sa kahaw-ang sa palanggana

sama sa kakapoy sa mga tiki ug tukob sa mga lamok diha sa imong kisame

sama sa kamingaw sa mga iro nga nahikatulog sa kilid sa imong pultahan

nagpaabot kanimo nga unta ikaw moabot na

daghang sama

kanimo daghang sama sa usa ka bulan

hilom lamang

daghang sama kahilom sa kahilom

sama sa usa ka kinason nga sa kilid sa

dahon sa nipa

nagpahipi lamang.

ang dili pa malitok

dili sa ingon nga walay
lami
kon deretsohon mo paglitok

dili sa ingon nga mawad-an
kag pailob sa
tumang pagpaabot

naa lang gyo'y mga butang
nga dili pa malitok

dili tungod kay wala pa
kini masabti

apan tungod kay wala pa'y
pulong nga angayan niini

good night, good luck

kon ang kahoy
imong putlan ug sanga
dili kini mamatay

kon kuhaan mo kini
sa iyang tanang mga dahon
andam na usab kini
pagdaghan
human sa usa ka ulan

kon imong lukaton
maglisod ka
lalom ang mga gamot niini
sa dughan
sa iyang inahan

ug kon lukaton mo man gayod
gamit ang tanang gahom
diha kanimo
daghan ang mamatay sa umaabot
nga adlaw

apil ka
ang imong asawa ug ang imong
upat ka anak.

revolutionary road

anak:
nay, ang kahaw-ang
anaa sa tanan
kaila nila
apan wa lang gyo'y
ganahan molitok
sa iyang ngalan

inahan:
tan-awa anak ang
gawas
namuswak na ang
mga bulak
pagkalunhaw sa
kabukiran
pagkaasul-s sa mga
panganod

anak:
nay, kadtong atong silingan
nga nanghambog nga malipayon
mohawa na dinhi
ibaligya na ang ilang balay
ug kabtangan

inahan:
 anaay usa ka tamsi
nindot kaayo ang iyang awit
samtang nagbalhin balhin
sa sanga sa kahoy
sa kaimito

anak:
daghan na ang wala ganahi
sa lakaw sa kinabuhi
pila na ba ang gustong magpakamatay?
natuman na ni jojo
ang iyang gusto
ilubong na siya ugma sa udto

inahan:
kaniadto sa gamay ka pa
pagkalami sa imong agik-ik
unya tupad kanako
pagkainit sa imong abaga
pagkahumot sa imong buhok
pagkahamis sa imong aping

anak:
nay, sakto na
dili na ako madutlan niana
human na nay
natapos na.


Monday, May 5, 2014

ganahan ko dinhi
gamay lang ang tawo

gani, usa lang
ang nahisalaag dinhi

gani, morag ako man
lang ug

ikaw nga ambot ug nganong
kanunay ka mang

nagsunod kanako, unya
ako wala mangambat

ganahan ko dinhi
kitang duha wala mag-ambat

sa atong tagsa-tagsa ka
kalinaw

ikaw bato, mora sag
ako.
kon ang imong gugma
usa ka tuba
diha lang sa pagsugod
ang pagpabula

daghan ang gustong
moinom sa kalami
ug gamayng katam-is

manggawas ang mga awit
ug mga pasalig
ang tanan hari ug
rayna
sa gamayng gingharian
sa tersena

sa dihang miabot na
ang kabahal
ug ang kaaslom

suka ka man
lami ka pa gihapon sa kinaham nga
kinilaw

Sunday, May 4, 2014

dayag ang mga bitoon


ang sipat
mitubag sa dihang giingnan nga
dili moulan kay ang langit
puno man sa mga bitoon
dili balaknon ang moingon
nga ang mga bitoon trapal
apan lahi ang panglantaw
sa nagpabiling naghandom
wala ang dakong dag-om
busa dayag kaayo ang mga bitoon
ug kon dayag kaayo ang mga bitoon
nan, ang imong mga mata dili subo
kay kini wala may mga luha
wala ang gabon sa nahigugma.
pasinaha


kanang imong gihawiran
mao ang imong kinabuhi.
hawid gayod. Ayaw pagbuhi.
ayaw pamati kanako. Anaay
tingog ang imong kinabuhi.
Pamatia kini. Ayaw anang
kabalaka. Sayop kana.
Paglipay, pildiha ang kamatayon
diha sa gihawira mong kinabuhi.
Ang mga kahoy nga dili kadagan
nga dili kasulti, nasina kanimo.
ang banog diha sa taas nga naglupad
gustong magpahawid kanimo.
Init man ang imong palad.
Unya ang suba sa kinabuhi
anaa mipadayon pag-agas.
Libot sa imong lawas balik
sa imong kamot.
Matag adlaw paglipay.
Kon mahimo, pasinaha ang
mga hagbay nang patay.
sa pagpakahilom


ang nawong sa dimalas
(ayaw og kasuko) anaa nimo
(di sab ko masuko) anaa sab
nako ug ang tanan maglipay
kay ang suod nga higala sa
dimalas, mao ang pagmahay
angay tang magsadya ang
nawong niining tanan nga
akong gihisgotan, anaa kanato
ug kita nga nagkuyog sa merkado
ug gani sa simbahan usab,
pulos mga subo, pulos mga
dimalas, pulos nagmahay.
apan kinsa bay ganahan manugilon
kabahin niini? bisan gani ang mga
patay, kalit man o dili,
gipili na man lamang ang
pagpakahilom.
sa hinapos


mao.
wa ko madawat.
ikaw sab, wa mo makuha ang gusto mo ning
kalibotana.
hinapos sa adlaw, mitutok ka sa adlaw.
wa matuman ang damgo.
ang gitagna
nalata.

apan bisan pa ning tanan,
malipayon lang kita gihapon.
ako imong gitawag nga
Hinigugma.
nakadungog, di ko motoo nga wala.
wa lang gayod gihatag.
wa ko maghambin ug katarungan.
nagpasalamat lang gihapon.
mao kana ang
atong hinapos.
pispis pa lang siya nga imong gikuha gikan sa salag sa iyang inahan nga imong gitirador ug namatay.
karon nga sakto na kabag-on ang iyang balahibo
imo na siyang gitagaan ug kagawasan sa paglupad
bisag asa
apan sayop ka kay ang iyang mga kamot maoy iyang gipakisama nga inahan
ug busa mobalik gayod kini siya diha
kay mao na may iyang panimalay.

unsaon mo kaha paghikalimot ang dako mong sayop nga
nabuhat mo sa iyang
kaniadto?
lisod dawaton nga
mas maayo pa siya nimo.
nagpasug-o ka sa kinabuhi.
gikaon mo ang tanan
gitulon apil na kadtong lisod
nimong dawaton nga mas
maayo pa siya nimo.
dili ko mahimo ang imong
gibuhat. Unsa kaha ang
imong gibasa nga karon
imong nasulat? dili ko
mabasa ang imong gibasa.
lahi ka, lahi sab ko.
ang panahon mao ang
hukom. wa na ako magdahom
nga ako mamunga.
nagsulat ka lang
sulat sulat lang
wa ka miundang
sa pagsulatsulat
nagpunay ka lang
ug sulat hangtod
nga ikaw nahimong
usa ka manunulat.

kadtong nibasa lang
nahimong basahero.
kadtong misakay lang
usa lang ka pasahero.
kadtong milantaw lang
mao ang lakwatsero.
mga kukabildo


unsaon na man nato kining
nabilin? kining iyang sapot
kinsa ba ang mosuot niini?
sunugon na lang kaha dala
ang lawas? abono pa ang abo.

duha sila niining lawak.
naghawiray sa kamot sa
dihang nahitabo kini.
nagbula pa ang baba,
naghilo ba? kinsa ang
unang mitungab? basin
og gipugos lamang ang
usa. Apan nganong aduna
may marka sa ngabil ang
dughan? nagsabot kaha
silang duha? ang salog,
han-ay man usab ang sapatos
tupad ang medyas. Hapsay
man. Unsa kaha ang imong
isulat bahin niining duha
ka mga lalaki nga karon
wala nay mga ngalan.
sugod


dili mahimong sayon-sayonon ang tanan.
dili patag ang kalibotan, sayod ka, daghang bukid nga bato
daghang dagkong balod sa unahan,
ang mga balili anaa ang mga halas nagtakuban.
naay mga dalan nga gisabwagan ug mga bildo.
anaay mga hikot nga dili mo mabadbad.
ayaw kog pasaligi anang gugmang dili molubad.
kanang pagsabot nga lalom. mga bulatik sa bulad.
Asgad na. Makasakit na kana sa kasingkasing.
Gusto nako nga motipon na ako sa mga balas.
Gikan sa imong palad.
Buang sab ko kaniadto. Di sab makaon ang
akong pamatasan sa irong gikagid.
Dili ta magkasinabot.

 Mao kana ang sugod.
Dungan
ning adlaw nga
init kaayo, dinhi sa akong lawak,
gipakatawo nako ang akong
mga awit, nga miawit usab
alang kanako
kay kinsa pa
ba ang moawit kanako?
Ikaw?
wala na may awit sa imong
dughan. Ang imong lawak
hagbay mo ra usang gibiyaan.
Ako lamang usa dinhi apan
daghan ang akong mga awit.
Kinsa pa ba ang moingon
nga mingaw dinhing lugara?
Ikaw? Wala mo mabuhat ang
angayan buhaton. Miikyas
ka sa lawak. Giwaldas mo
ang ato untang kalibotan.
karong gabii, dili ko matulog.
maghimo ko ug gugma
ako sa ako, dughan sa akong
dughan. Ipahimutang ko
pag-ayo ang akong kalag sa
akong lawas. Ug sa hinanok
mangatulog ming duha.
Walay mauna. Dungan.
ang imong gugma
migamot
lalom na kaayo
mas lalom pa sa lalom
kon moabot na
ang hulaw
ang makamatay
dili na niya gayod mabati pa
gugma kining
gibati ko

ako lang ang
mibalak og
ikaw lang ang
namati

sulod sa
sakyanan daplin
sa ngitngit nga
dalan


Friday, May 2, 2014

ilusyon sa baybayon

pagkaanindot pamation
kon ang dagat ug ang imong mga
hunghong sa akong dunggan
uban sa kagilok magdungog
sa akong kamingaw

tiunay ug makanunayon ang
dagat
ang imoha kadyot lamang
dayon natog biya niining
panagtagbo sa mga gibati

ako balik sa akong pinuy-anan
ikaw ang mawala isip hangin lamang
sa akong panumduman

ang ikaw

abrihan mo na ang bintana
lantaw kas kalibotan
ug gilantaw ka usab nilang tanan
dili man kaayo habog ang
imong ambakanan
dili ra mabali ang imong tuhod niini

ug miambak ka
midagan
gigukod mo ang imong kaugalinon
nga daghan kaayog mga dahon sa anino
gikutlo mo kini
gipanglabay

sa usa ka pagtoo nga karon
sa kataposan magmalipayon
na gayod ang gihandmo mo
nga ikaw

prelude

gihalokan ang ngabil
panaog sa kilid sa dunggan
paingon sa liog
dapit sa ilok paus-os
ngadto sa dughan
paubos, paubos pa gayod
hangtod nga imo siyang
giludhan

human sa paglatag

human sa paglatag
ug diha sa usa ka adlaw nga
pagbulad
kon mauga na
pwes huklason na
hiposon na ang mga
tipasi
ug ang mga banig
pil-on na pagbalik
likiton ug itago
ipon sa mga abog didto
sa kamalig

ang paghikalimot

dili ta matingala niini
kay sama sa hukot bisan
unsa ka hugo
moabot lang gayod
gihapon ang
paghiplos ang
paghubad.

Thursday, May 1, 2014

gihakop niya ang tanan
walay gibilin ug ang nagtan-aw
nga walay yamo bisag katunga man lang
mihangad na lang sa langit
nga unta kon unsa ang iyang kalaog
mao usab ka lalom sa iyang lubnganan.
sa kadugayan
nagustuhan na gayod nimo
ang akong
pagka-isla: kanang di ko mohikap
ug di sab ko hikapon
kanang ang labat sa akong palibot
mao ang lapad ug lalom nga
dagat

dili man sa ingon nga
giganahan ko aning akong kahimtang
apan
kinahanglan lang gayod
kapoy baya ang kamatayon nga walay hunong
ang kahapdos nga walay pagkahupas
og kanang saad nga pagkabanhaw nga
kanunay mong gipanghupaw
ako isla, dugay ra.
ikaw, karon, isla na usab.
ugma, basin, og moabot na ang
sakayan
nga walay katig
nindot usab damgohon ang tulay
apan, para unsa pa man?
sama nimo
limtanon na usab ako
ang antipara nga gisablay
sa dunggan gipangita sa
lamesa

dili na sab ko tigsuot ug
medyas
usahay dili pareho ang
kolor
aduna koy adtoan
unya sigi kong kalapas
kon akong balikan
sigi lang malimtan
wa ko na gihandom pa
nga moabot ka
balik kanako isip usa ka
tigpahinumdom
ning puntoha
kulang pa gani kanako
ang usa ka gatos ka
kalimot