sa unang pagbuka sa imong mata
mao kana ang imong makita
imong lugodlugoron ang imong mga pilok
aron siya mohawa
daghan ang dili gusto kaniya
kay dili klaro ang iyang kalibotan
naanad siya anang sihagsihag lang
morag mga palotpot sa dagat
nga nangita sa kahayag daplin sa sakayan
usahay manawag siya kanimo
diha sa usa ka itlog sa manok
makita didto ang iyang panagway
nga wala pay mata,ilong ug baba
mora ka usahay ug mabuang sa
paghunahuna nganong ingon ani man
nganong dili man klarohon ang tanan
arong matunob ang saktong tiil sa agianan
ang kinabuhi diha sa kilomkilom
diha sa kaadlawaon ug sa kahaponon
sa unang pagmata ug sa imong katulugon
diha ang kahanap, diha ang pagdamgo.
No comments:
Post a Comment