Thursday, June 23, 2011

cold war

karong gabhiona
ang akong sampot
makigbungol sa imong
sampot
nga bisag mag-abot ang
ilang nawong
magpabiling bugnaw
kaayo ang ilang
mga simod

ang akong mga kamot
mangita og laing habol
og dayog bukot
og talikod

pagkaoran-oran
madungog ko ang bakho
nga nabasa na og luha
diha sa ponda sa
alugnan


pagkahasol ba gayod
niining
akong tanlag
nagsigig pangusi
sa panit sa akong
lawas og kalag

Wednesday, June 22, 2011

ang babayeng tigulang sa laing lamesa nga nag-inosara

siya lang usa ang naglingkod
sa Chow King

iyang order: tofu, chinese
chicken, plain rice,
coke, og halo-halo

iyang edad mga 70 na
makita sa kunot sa iyang
agtang og
siging galihok ang
alingagngag kay
lagi hilang na ang
mga ngipon

daghang tawo
yagaw ning tingpaniudto
ang iyang gilantaw mao
ang samin nga bongbong
og samin nga
pultahan nga kita
tanan ang
karsada nga atbang

daghang sikad
motorcab, dunay trak de
carga nga puno og
hollow blocks
dunay mga bata nga
mao pay pagpangawas
sa kindergarten school
gahawid sa kamot
sa ilang mga inahan
ang uban
sulugoon

kon molantaw ko sa
iyaha og dugay
di na nako madungog
ang mga yagaw
ang mga kasikas
ang mga taginting og
pingki sa mga baso
og kutsara
ang mga gaestoryahay
morag sine-sine na lang
walay sound

mora bag miapil ko
sa paglubong sa
kalibotan
unya wa nay nabilin
nga nangiyak
kay atua silang tanan
ganiha rang
migikan og seguro
karon
nangatulog na sa
ilang tagsatagsa
ka mga balay

patay na ang tanang suga
og didto sa langit
pagkadanghang mga
bitoon

og dawon
nahug ang kusog
kaayong ulan

gibalhin nako ang
akong mga mata
sa akong
wanton mami
init kaayo og
misinyas ko nimo
nga okey na ko

gibalikan ko ang yagaw
mas at home
ko dinhi

in fairness
ang iyang nawong morag
sa akong mama
nga dugay na nga
patay

gugmang patay...

kon molingkod ikaw sa akong paa
nganong balibaran ko man ikaw?
hala lingkod og atubanga ako
tan-awa ang akong mga mata og
sukda ang gibati sa akong kasingkasing
mahimong hagkan mo ako
mahimong pang-iton mo ang akong ngabil
magdakpanay sa laway ang atong mga dila
mahimong ang imong bus-ok nga dughan
iparok mo sa akong dughan
aron pamation mo ang mga hunghong sa
akong kalag

pangitaon mo ang nawong sa gugma sud
sa akong kasingkasing
pasayloa, apan hagbay rang putol ang liog
niini
kon makita mo ang mga mata sa kamatayon
ayaw kahadlok

kay mao kana ang tinood
og ang tinood kon imo lang kanang dawaton
mao usab kana ang laing dagway
sa gugma

andam ka na ba
pagdawat sa usa ka lawas nga hagbay rang
nahutdan og ginhawa
sa kalag?

ang idlas mong kapalaran

kon imong dumtan
idlas na hinoon og di mo gayod madakpan
kon imong pasagdan
nga molabay lang og di mo tagaan og buot
mohunong hinoon kini
og molingi kanimo og mabalaka nganong
nausob ka
og wa na mangambat og ikaw nga hagbay rang nahiubos
molakaw palayo
og tipas sa bagakayan
og sa imong katingala misunod na man hinoon siya
og nagpakalooy nga imong
hangpon
apan natugkad mo na siya
og busa gibabagan mo
og imong giingnan

yawa ka!
pahawa!

da.....

ingon si albert
ang daotan kuno nga hunahuna
kinahanglang
mangumpisal,

kitang balakero
sigeg pangumpisal

balak sa chat, gikuha ang ngalan sa ka chat kay basig naay makaila

unsaon ba pag-uli ang halok?6:21 PM

unsaon ba pagtingil ang dila6:21 PM




Me






lisod gani tangtangon iuli pa kaha6:21 PM










unsaon ba pagtakos ang laway6:21 PM




Me





grrrr6:22 PM










unsaon ba pag tugbang ang kagilok6:22 PM

mabalik pa kaha ang pagkurog sa mga ngabil?6:22 PM




Me






apil d ay gitik huh6:22 PM










mauli pa kaha ang langit6:22 PM




Me






mao na ron6:22 PM










pila ka panganod ang hapnigon6:23 PM

aron mabalik ang 6:23 PM




Me





as sus naka balak na6:23 PM










kainit?6:23 PM




Me





iuli man gani6:23 PM










kon dili mo kini mauli6:23 PM




Me





kay wa nay init6:23 PM










matakos6:23 PM

matugbangan6:23 PM

nan,6:24 PM

ayaw na lang iuli6:24 PM

hinonoa6:24 PM

dugangi na lang6:24 PM

ug laing halok6:24 PM




Me





hahahaha6:24 PM










nga mas init pa sa6:24 PM




Me






kananga may bayad6:24 PM

hahahah6:24 PM










nilung-ag nga saging 6:24 PM

bwahahaha6:24 PM




Me






way makatupong sa nilung-ag nga saging hahahaha6:25 PM

i mean ?6:25 PM

real saging huh6:25 PM

hahahah6:25 PM










pwede pod tong peke nga saging6:25 PM

nga giawayan sa mga 6:26 PM




Me





hahahaha6:26 PM










gwapang unggoy6:26 PM

ha ha

Monday, June 20, 2011

molabay lang ako
giingna ta ka,
wa akoy dalhon
bisag usa
gaan ako nga miabot
og gaan ako
nga mopahawa

nindot, lamdag ako
sama sa kahayag,
gaan ako
sama sa kaawaaw
mora ako og
spider nga nag
weave
og mga stories alang kanimo,
og namati ka
pag-ayo
gisulti ko lang ang gusto nimong
madungog
aron mawala ang imong mga kahadlok
gani
gipatas-an ko pa ang estorya kabahin
sa banog
og sa piso didto sa tiilan sa bukid
aron dili mo na
mahunahunaan pa ang kabahin sa
kamatayon didto sa
pangpang

og karon nahikatulog ka na
og ako
nagpabilin dinhi

sa oran oran
mogawas ako ning lawak
adtoon ko ang silong sa langit

mamati usab ako
sa mga sugilanon nga yubiton kanako
sa mga bitoon
nga nangumpayot diha sa mga buhok
sa
kagabhion...

ang mabudhion...

gihagkan mo ang akong
buhok
gidani mo ako sa atong lawak
gihawiran mo
ang akong kamot

humot ka kaayo
mas humot ka pa sa dama de noche
karong gabhiona


gihapuhap mo ang akong dughan
lapos sa akong paa


miingon ko
kadyot na lang
kay wa pa mahuman kining
akong
balak

alang kaniya....
miabot ang panahon
nga wala na akoy gipaabot
og wala usab akoy
adtoan...

dinhi niining dapita
nagmalipayon ako,

ang akong hunahuna anaa
hinay nga nagpapas
sa mga anino,

gustong humanon ang
makita

ania nagpondo ang kalibotan
walay gustong isulti...
pagkapaspas modagan
ang mga kamot sa orasan
kanunayng mabilin
ang mga tiil sa katapol....

Friday, June 17, 2011

balak alang kang papa nga akong nahikalimtan....

wa kong kasulat og balak kabahin ni papa
sa iyang adlaw

seguro tungod kay dugay na siyang patay
og ang mga patay maingon niana ra gayod: mahikalimtan

apan ang tingog sa ilalom sa kasingkasing
nagpabiling buhi bisan og ang lungon nga iyang gilubngan nadugta na

moawit kini bisan og nahuman na ang kawras sa kinabuhi
bisan og nahimo ng abo ang mga bukog sa kagahapon

og busa nadungog ko lang gihapon
ang akong hagbay ra unta nga gikalimtan

og kadtong naglantaw kanako sa layo
natingala nganong kalit lang akong mipahiyom

diha sa katawa nga morag
giluomluom....

ang imong mga sugilanon

daghan ko ug matun-an sa akong madungog kanimo
bisan pa ug: way hugas ang mga plato og baso sa kusina
og gisungkab na sa iring ang akong piniritong pirit
milagapak ang taklob sa kaldero nga
gidam-agan sa dakong bagtok nga gigukod sa akong iro
nga angkan,

namati ko, milapad ang akong kalibotan
milalom ang akong kalimotaw
namyahok ang akong aping

ang akong pangag nakataghoy
daghan kog napupo nga bunga sa punoan sa imong kahoy

og kining tanan
bisag nabali na ang akong kalibotan
wa ko ambata
kay ikaw

karong buntaga nakahatag kanako og kalipay
ning gaungot ko nga dughan

ang iyang gibuhat....

kinahanglan niyang motingog
aron makalimtan niya ang
bagotbot sa iyang
konsyensya

gikapoyan siyag pamati sa
mga yubit sa kamatooran nga
gibalik-balik

kinahanglan niyang mokatawa og kusog
aron masumpo ang mga kahadlok

usahay motaghoy siya
aron lingayon ang suko nga kahilom

kinahanglan niyang modagan
aron ang tanan mosibog

kinahanglan niya ang tagay og agiik sa mga baso
kauban sa iyang mga amigo

aron mabuntog niya ang yawyaw
sa pag-inosara

kinahanglan niyang moawit, mosayaw
mokuskos sa gitara aron mailad niya ang
gaung-ong nga bahad
sa kamatayon

mga tanghaga sa pagpaabot


paspas kaayong
nangatagak ang mga dahon sa
katuigan

naupaw na ang mga sanga niini
og ang hangin mikatawa
nagbiaybiay

makamaong mosabot ang
mga nangaugang gamot
sa mala nga yuta

gipaabot ang ting-ulan
sa nalooy nga mga panganod

Wednesday, June 8, 2011

hulip sa kalaay lamang

sa una
gamay ko lang nga tingog
sama kagamay sa
kuting og timos
madungog mo
og motubag ka dayon

og sige kang pangutana
kon naunsa ko
sa pipila ka adlaw nga
wala mo ako
makita

nasaypan nako nga
imo kong gihigugma

wa ko gipakasamang
dakong sayop nga ikaw
akong higugmaon sa
kanunay

karon

bisan unsaon nako og
pagawas sa akong tingog
di ka na man matandog

ingon ka, drama!

kay di ka man mamati
unsa pa may pulos sa akong tingog?

ayaw pagmahay
kay wa ka nay madungog pa kanako

sa akong pagpalayo
tungod nimo
mas gamiton ko na ang
pagpamati

walay pulos ang akong tingog
wala nay gamit ang kasingkasing

nangayo na ako og
pasaylo sa akong kaugalingon
nga akong gilutos

ambot og ngano
ikaw man lang gayod gihapon

kining kasingkasing kong
bugo
kining gugma kong
gahian og ulo

gisugid ko
na lang sa lilo nga hangin

mga balod sa dagat sa akong pagkabata

kanunay nakong mahinumdoman

didto sa Laoy
samtang si Papa nagpalawod
kuyog sa mga bosero
nga iyang gidudahan
nga siya
giilad sa iyang atubangan

nagpunay sab kog sulat gamit
sa akong tudlo
didto sa balas nga sa matag unya
papason sa
mga balod sa dagat

daghan ko ug gibutyag
sa mga balas
nga basin og gikaulaw sa
mga balod sa dagat
busa kanunay usab kini
niyag giapas-apas
og papas