SI KINSA BA AKO?
si kinsa ba ako? dili ako ang akong ngalan.
unsa ba ako? dili ako ang akong unod ug bukog, dili ako ang akong nawong, dili ako ang akong mga kamot, dili ako ang akong mga tiil, dili gani ako ang akong kasingkasing ug kalag (kon aduna man ugaling, palihug pakit-a ako sa akong ginhawa sa akong pangagho, unsa ba ang bulok sa
pangagho, unsa ba ang baho niini, sama ba kini sa akong nabaho nga tinan-ugan nga mangga nga
nalata sa akong maleta?)
asa ba ako paingon? naa ba ako'y tuyo dinhi? taga-dinhi ba ako? dili ba ako taga-didto?
unsa ba diay ang didto nga akong padulngan?
kanus-a ba ako mogikan? ang akong nahibaw-an lamang nga ako miabot diha tupad kanimo.
nga kita nagkahigugmaay, nga ang akong mga tiil nga walay sapatos ug medyas imong gisapatosan ug imong gimedyasan, nga ang akong mga tiil imong gipalakaw ug imong gihatod
didto sa ilang balay, nga ako gipainom ug gipakaon, nga ako gipapuyo, gialimahan ug gihigugma.
sakto na kana alang kanako. nga ako imong gihigugma.
kanus-a ba ako mogikan? sultihi ako, kay gusto akong makigkuyow gihapon kanimo.
sultihi ako, akong kapalaran.
No comments:
Post a Comment