Saturday, August 30, 2014

ang makililimos

gikamingawan mo sila
matag gabii gihandom mo ang
sunod nga panagkita

malipayon ang mga umaabot
nga adlaw
midungaw kas bintana
mihangad sa langit matag
gabii nga puno sa
mga bitoon

miabot ang adlaw sa panagkita
sila lang ang nagkasinabot sa
ilang pinulungan sama sa mga
tamsi og ikaw ang tikarol nga
nag-inosara sa sanga atubang
sa lim-aw samtang gilantaw ka
sa isdang puyo nga naghipos
sa iyang katawa diha sa bula
sa iyang gininhawa

kon makasulti pa lang unta
siya mao kini ang iyang gustong
ipasabot kanimo: ikaw lang ang
gimingaw ug ikaw lang ang
gihimong tanga

hadlok ka man god nga
mabyaan
sa urog sa panahon
nahimo kang makililimos
sa tagsa ka dako nilang
pangambat

nasayop ka karon sulsihan mo na ang nagising sinina

gipauyonan ka lang
gisakyan

gikuyugan ka
sa imong gustong
adtoan

pag-abot sa unahan
iya kang giatubang
ug gikataw-an

nasayop ka
karon sulsihan mo
na ang
nagising sinina

gisagol mo man god ang kagalot ug ang botbot

sa pagpangita sa
kinalamian
wa noon kay
bisag usa
nga natilawan

sa paghandom
mo sa kinakusgang
balak
wa ka na man hinoo'y
bisag usa nga
nasulat

gisagol mo man
god ang kagalot ug
ang botbot

Friday, August 15, 2014

ayaw palabi anang
kasubo

nga kanunay mong
gisukod matag
gabii unya imong isulat
ug isangyaw nga kini

mas bug-at
mas lapad
mas taas kaysa uban

wa ko maghisgot sa
ako
usa ka dakong kamalig
unya ikaw
naa sulod didto

ang akong kasubo
ako lamang
dili ko na kini
isugid kanimo

gisulat ko kini
og nanghinaut ako nga unta
dili mo kini mabasa

Thursday, August 14, 2014

ang kalipay
lahi ang bunga

dili tam-is
dili sab mabulukon
nga mga buwak
sa kilid
sa dalan

gani dili na kini
makaon

buyagon ko unta
ikaw sa paghambin
sa daghang
kalipay

mangausik lang kini
kay dili mo man kini
tanan magakos o
gani mahawiran

hangin ang kalipay
lumalabay
bation mo ang kabugnaw
sa giigang mong
kagaw

pagkahuman sa pipila
lamang ka gutlo
biyaan ka niini

kon dili mo kini sayo
dawaton
kwidaw, hilantan ka
og ikaw magsalimuang
sa pagpunay ug damgo
sa dili angay kanimo

ang kalipay kon moabot
usa lamang ka alibangbang
nga mibatog sa imong
palad

ayaw hawiri
mabali ang iyang pako
ayaw ilabay
kay basin unya ug mapiang

pasagdi lang
dawata ang iyang pag-abot
unya kon mopahawa na siya
pabaloni ug gamayng
pahiyom
igong pasalamat sa iyang
pagtugdong

hatod kawat

gihatod sa hangin ang
pulong
nga gibilin diha sa kilid
sa imong dalunggan
nahikatulog ka
sa tumang kakapoy
ug wala mo maambat
ang kahigwaos
sa nagpaabot

gisapot ang kabuntagon
kay wala na ang
pulong

gikawat sa kaadlawon
nga naghibulos intawon
gasakit ang tiyan sa
tumang kaaslom

ang artist

kay artist lagi kuno siya
gibutangan niyag dakong oten sa igorot
ang ubos sa pus-on sa santo kristo
og iya kining gibitay sa kilid sa
ilang pultahan aron makita gayod
sa bisan kinsang mosulod
nga bisita sa iyang panimalay

ang iyang mga lingkoranan sa
sala puros mga driftwood nga iyang
gipamutol, gilansang, gisilakan,
og gisumpay-sumpay nga morag
mga tawong nanggiluko,
nagbuyon, nanghinambid
og kon molingkod ka mora kag
batang gamay nga iyang gisapupo
sa iyang bilahan

daghan pa siyag mugna nga kon
dili ka maanad
muigking gayod ang imong dunggan
o dili ba mamula ang imong nawong
o dili ba morag gipabugnawan pag-ayo
ang imong itlog hangtod nga kini
mokulo nga morag limatok nga wala
pa kasupsop ug dugo sa bitiis sa
way alamag nga naligo sa
suba nga lubog kaayo

ang akong mga mata naglirawliraw
samtang iyang gipasabot kanako nganong
siya mahimong usa ka respetadong
pintor, iskultor og manunulat

gusto niyang basahon kanako ang balak
nga iyang gisulat kagabii samtang
siya nag-inosara nga galingkod sa iyang
veranda sumad sa paglayas sa iyang
anak nga adoy-adoy

og sa iyang pagkahibalo  nga gikalingawan
sa iyang asawa ang ilang sulugoon nga
suban-on hangtod nga milayas kini
ug wala na mibalik

mingaw ang iyang kinabuhi nga giduyugan
sa pagbudhi, sa kalisod, sa mga panghitabo
nga dili pa niya madawat

ingon siya, kon mahimo unta
mamati ako samtang basahon niya ang
maong balak kabahin sa kasakit

apan akong gipasgang ang iyang
pangamuyo
gibalhin ko ang hisgotanan,

" bugnaw kaayo ang panahon dinhi
mahimo bang manginom una kita ug kape?"

busa kaming duha nanglingkod
sa iyang driftwood nga lingkoranan
nanginom ug kape
nahisgot sa mga kaagi namo sa gagmay pa kami

kadtong namasol kami sa suba
dayong pangaligo
kadtong namupo kami ug manggang hinog
sa bungtod
kadtong nanakay kami ug kabaw
balik sa among balay gikan sa basakan

og ako siyang gidagit gikan sa islang mamingaw
gikan sa subo nga suba
ngadto sa kabulakan, ngadto sa naglupad nga kalamgaman

nangandoy ako nga unta ang kristo nga iyang gihuboan
ug gibutangan ug dakong oten sa igorot ang atubangan
butangan unta niya ug bisag bahag na lang
aron matabunan ang kangil-ad sa atong mga kaulag

kay alang kanako ang matuod nga artist
maoy maghulip sa maot nga realidad
maoy tighapsay sa dalan nga tunukon
maoy tighipos sa mga basurahan aron dili na kini
masimhot ug makita sa mga lumalabay
maoy tigpamilo sa mga habol matag buntag sa atong pagmata
pagpahaluna sa banig
paghapsay sa mga kum-ot nga alugnan
paghipos sa mga bulingon ngadto sa bukag nga uway
pagtrapo sa mga abog
pagpangluwa didto sa gawas sa bintana


pagpainom ug kape sa mga gitugnaw
pagdalit ug maayong hisgotanan sa mga nagmingaw
pagpakatawa sa mga nagsubo
tighatag ug panyo sa mga nag-iyak

tighupay sa kasakit
tigpakatulog sa bata nga gihadla sa kahadlok sa mga dili ingon nato

ang nanay nga naghawid sa kamot ni neneng
samtang silang duha molabang sa usa ka karsada nga gidagandaganan
sa mga sakyanan nga naglumba kon kinsa'y unang makaligis
sa dangag nga pedestrian....

Tuesday, August 12, 2014

gisunod sunod kos
akong mga tunob

milingkod ko sa
makadyot sa kakapoy

mihunog usab kini
ug mitutok kanako

gusto unta nakong
ilailahon pag-ayo

apan mora kinig
nasuko ug wala mitingog

ako sab nga taas ug
garbo, nanglood

ug sa akong kaugalingon
miingon: dili ko kamo angkonon
ang gipangandoy mong
bitoon
karon nasikop mo na
ug imong gihipos sa imong
palad
gikumkom mo kini
ug gibati ang kainit
sa kadugay sa panahon
sayran taka
kon dili mo kini buhian
sa langit nga angayan niyang puy-an
mapaslot ang imong palad
ug kon dili gihapon nimo kini buhian
masunog ang imong kamot
ug kon gahi gayod kaayo ang imong ulo
masunog ang imong lawas
magdilaab ang imong kalag
kay ang bitoon dili kini para kanato
para lang gayod kini sa langit
ug kita igo lang gayod sa paglantaw
sa iyang kaanyag: gawasnon diha sa pagilak

Friday, August 1, 2014

nakatawa ko
abi kog kinsa kining gasunod sunod kanako

anino ko ra man diay

abi kog kinsa na gayod akong sikata
nga sunodsunoron

haskang sipyata
anino ko ra man diay

abi kog kinsa kadtong tunob nga
kanunay misunod kanako


sa akong tsinelas ra man diay