mY secreT ponD

NGANO BA NGA SA TAGO NAG-IYAK KA MAN?

ngano ba nga sa tago nag-iyak ka man

nga anaa man unta ang tumang kahayag nga andam mohatag ug gilak

sa imong mga luha aron kini mamahimong mga perlas

ngano ba? nganong imong gibungat sa kahilom ang imong mga kasakit?

aduna ka bay pagmahay sa dihang nagkita kita?

aduna ka bay gitago nga kapungot kanako kay ako sa imong tan-aw dili

kahibalo nga mamati sa imong mga bakho? sa imong mga rason nga nagpuas diha sulod sa mgalawak sa imong bug-os nga kasingkasing?

ngano ba nga mohilak ka man sa tago? nganong dili mo man ako

sultihan sa matood nga hinungdan sa pagpunay mog hilak diha sa gamayng walog sa imong luhaan?

sultihi ako ayaw. sayod na ako kon ngano. gisultihan ako sa imong

kasubo nga mitagbo kanako diha sa hagdanan.

gihigugma mo ako. gihigugma ko ikaw. apan adunay usa kanato ang

mopanaw sa dili sakto nga higayon. adunay usa nga molakaw nga dili na mobalik sa pag-abot sa panahon nga imong gikasilagan. mando kana sa mga bitoon sa langit.

sugo kana sa badlis sa akong kapalaran.

ayaw paghilak. walay gahom ang imong mga luha.sa tunga sa lawod sa

gugma malunod ang tanan. ibilin ko ikaw sa isla aron pagmatood kanila.

ikaw ang akong baba.

ikaw ang mosugid sa tanan, nga ang gugma diay dunay kinutuban.

nga ang gugma usab mapanaw. mogikan. molalin sa dili saktong higayon

apan sa imong dughan ug sa akong palad, bisan wala na ako,

kining gugma aduna gihapoy gahom nga magpabilin.magpatigkong.