mY secreT ponD

DIDTO SA BUNTOD ANG MGA MANGGA

WALAY TAG-IYA

Kaniadto walay mga labat ang mga balay
Pati na ang mga bungtod sa atong balangay

Kaniadto magsabot kita nga manglakaw paingon
Sa mga bungtod diin ang mga punoan sa kamanggahan

Walay mga tag-iya, diin didto kusog kaayo ang hangin
Ug ang mga hinog nga mangga nga talumtumon na

Sa katam-is mangahulog ug wala gani mamunit sa kadaghan
Nagdala kita ug sako, wala kita magdali, nagpadidit kita sa

Mga palwa, nagdula sa taas sa bungtod sa bugnaw kaayo
Mga mga sagbot ilalom sa mga asul nga mga panganod

Manaka kita sa mga punoan sa mangga didto sa bungtod
Ug didto ang mga mangga atong giduladulaan gipahalok

Sa atong mga aping. Kaanindot sa mga bungtod. Kalami
Sa mga hinog nga mangga. Walay mga tag-iya nga mamadlong

Nga dili pakuhaan ang mga punoan. Tam-is kaayo sa atong
Panumduman nga manguli na kita sa sinako natong mga mangga.

Magkanta kanta kita sa silong sa takdol nga bulan sa gamay
Tang agi-anan pauli sa atong balay. Halok sa kamot ni nanay ug tatay.

Bag-o lang akong nakauli sa atong balangay. Sakit sa akong dughan
Ang bag-ong kasayoran. Wala na ang mga kamanggahan ug ang

Mga bungtod gipanglabat na. Wala na ang gagmayng agianan.
Wala na ang mga bata. Ug si Nanay ug Tatay mga patay na.