karong kalag-kalag

akong nabasa ang imbitasyon alang kanako karong kalagkalag

nga aduna kunoy dakong hugpong sa mga mambabalak aron

basahon ang ilang mga mugna didto gayod sa

nataran sa mga lubnganan isip paghinumdum sa mga patay,

gusto unta nako nga moduyog sa maong kalihokan

ug gani duna nako'y giandam nga pipila ka mga balak

pahinungod sa mga kalag ni Francisca, Gregorio,

Domingo, Paciencia, Josefa, Jose, Cresencia ug

Ni Francisco ug uban pang mga kalag nga mga

paryente, mga amigo, mga silingan, ug bisan mga

kaila lamang nga bag-o pang milalin sa laing kalibotan

kay abi god nimo ako usab mitoo nga ang mga

kalag aduna pa gihapoy dakong kalabutan sa atong tagsa-tagsa ka

kinabuhi

nga kon dili nimo sila hinumduman pag-ayo pinaagi sa

halad sa mga bulak ug mga prutas, ug mga biko ug budbud, ug

mga tuba, pepsi ba o coke,

(depende sa paborito ug hilig sa imong kalag nga gihalaran)

ug dagkot sa mga kandila

ug pagpamisa pahinungod kanila

apil na ang paglimos ug kwarta sud sa puti nga sobre diin gisulat

ang tanan nilang mga ngalan

nga dili ra ba pod paapelyidohan sa pari sa among parokya diri sa

lungsod sa Katipunan

kini sila kuno aduna pa gihapoy gahum sa pagpanimalos

hangpon ka kuno ug mamugnaw ka

magkurog kada alas tres sa hapon hangtod na sa

gabii

ug wala baya kunoy tambal niana

nga ug kon balihon nato nga kon sila tagbaw sa imong

paghinumdum kanila

sa kaputi ug kasinaw sa pintal sa ilang pantyon ug sa kaanindot sa

mahalon nga mga pula nga anthurium

ug orchids nga imong giputongputong sa ilang mga tiilan

tabangan ka usab nila nga ang imong lawas mapiskay

ug ang imong panginabuhi maasenso

lamdagan ka usab kuno kon unsay angay buhaton kon adunay

problema o katalagman nga moabot sa imong paglawig

niining walog nga luhaan

apan sa paghuman nako ug pagtimbangtimbang

nakahukom ako nga dili na lang mokuyog sa

grupo ug motambong sa maong kalihokan sa mga balakero ug

balakera diha sa menteryo karong kalag-kalag

nahadlok ko nga unya ug basahon na nako ang akong mga

mugna sa oras sa tigpahulay

ang kaparat, ug manghuyab lang hinoon ang mga kalag didto

sa tumang kalaay