mY secreT ponD

HAPON, ALAS 5:10 SA GAMAY NGA DALAN

Daghang sagbot

Gamay rang molabay sa maong dalan

(mao kana ang akong ganahan nga padulngan

Kanang wa pa ko sukad kaagi)

Nagtagbo ta. Dili ko kaayo maklaro

Ang imong panagway. Daot na ang akong mga mata.

Sa dihang nagdug-ol na gyod kita

Ang akong naaninag mao ang imong pahiyom

Wala ka motingog.

Milabay lang kita. Nagsugat. Morag hangin

Sa usa ka alibangbang. Sugat. Supak.

Layo ka na. Apan ang imong kahumot

Misurop sa akong ilong. Mipuyo sa akong

Kasingkasing.

Mipadayon ako sa paglakaw sud sa kakugnan.

Wala ako makaila kanimo.

Gusto ko nga moulan. Uga ang yuta nga akong

Gilakwan. Init ang akong dughan. Gusto ko nga

Mabasa ako sa daghan nga ulan. Gusto ko nga

Maghubo. Gusto ko nga modagan.Bisan asa lang.

Gusto ko nga ilabay ang akong kalo.

Gusto ko nga ilabay kining libro sa mga balak

Nga akong gitangkil sa akong bukton.

Gusto ko nga mawala. Dili na ko gustong

Mobalik sa akong giagian.

Pagkahumot mo gayod gihapon.

Nagkisikisi ang akong kasingkasing.

Gusto.Nagpanilap ang dila.

Ikaw kadtong milabay. Sugat. Supak.

Ngil-ad nga handumon.Lami.

Dili na ko. Unsa kahay iyang ngalan?

Asa kaha siya nagpuyo?

Ambot ba. Pagkawalay bout gayod kining akong gugma.Sugat Supak...