mY secreT ponD

Ikaw ug ako, Kitang duha ka karaang Amigo


Sa atong grupo ikaw ang akong
Tawgon nga purdoy kay wa gyoy
Ikaestorya. Kon pangayoan ug joke
Mobabay dayon. Balibad ray imong
Nahibaw-an. Kon pangotan-on ug
Naunsa ka sud sa pipila ka tuig
Nga wala kita magkita, dayog ingon

Please, let us not talk about myself.

Kon ako na gani ang mosugod ug
Estorya dayon nimog panghinambid
Ug pamati. Interesado ka gayod sa
Akong kinabuhi. Magpakatok ko
Bahin sa mga panghitabo nga ang
Mga spring beds lang ang maka
Sabot, ug dayon nimog agik-ik
Ug katawa. Ganahan ka atong
Kabahin sa mga panty nga nanga
Hulog didto sa likod sa kusina.
Morag mga hinog nga mangga
Nga napulak sa punoan niini.
Kadtong mga buho nga gagmay sa
Banyo.Morag mga bintana diin
Lantawon nato ang mga bitoon.
Kadtong mga gipangwilik
Nga kaulag sa bongbong didto
Sa ladies dorm. Morag mga ulan
Nga nakabasa sa atong dughan.
Kadtong mga palad nga napaknit
sa ngitngit nga sinehan. Mga
baratohon nga kalipay nga kamot
lang ang puhunan.
Ganahan ka anang mga estorya
Sa kaigat sa mga paigot sa sampot.
Kabahin sa mga babayeng morag
Mga irong buang
Kon imong patungan sa imong
Mga baligkawang. Kon muondang
Na gani ko, moingon ka, morag judge:

Please proceed. You’re doing just fine.

Ako kang gitan-aw. Dagko nga
Diamante ang imong singsing
Sa imong mga tudlo.
Morag mga kumo sa bata
Bug-at ang imong mga singsing ug
Bracelet, 24 karat nga gold.
Dunay nanglibak nga kon ikaw
Ang kidnapon dili na mangayo
Ug ransom si Kumander Robot
Kay igo na ang imong mga singsing
Ug bracelet nga ipatimbang
Bayad sa board and lodging.
Florsheim imong sapatos.
King’s Men ang Imong amerkana.
Bag-o ang imong Pajero nga giparking sa
Café Laguna diin kita nangaon karon.
Ikaw ang mobayad sa atong dinner.
Dako pa jud ug tip ang waiter.
Ako lang ang bangkero
Sa estorya sa atong mga kalihokan
Kaniadtong college pa kita.
Ako lang ang balakero
Nga imong imbitahon isip
Hulip sa imong mga kalaay.
Nadato ka sa imong mga
Kahilom apan lalom ug dulot
Ang imong mga tinagoan.
Pila na kaha ang imong gipapatay?
Pila na kaha ka tawo ang naputo
Sa imong katuso? Pila na kaha
Kababaye ang miiyak sa imong
Pagkapalakero? Pila na kaha
Ang imong mga anak sa gawas?
Pila na kaha ang nagdumot nga
Makabalos diha kanimo? Maiihap
Ko kana sa kadaghan sa imong
Bodyguard nga nag-alalay kanimo
Didto sa gawas?

Hilom kaayo ka. Morag lalom nga
Suba diin didto imong gibuhi
Ang daghang mga buaya ug
Mga piranha. Daghang tanga ang
Imong dila. Daghang bitin ang imong
Mga tudlo. Kwarta ang imong
Gihimong diyos. Ug wala sa imong
Utok ang pagpasensya ug pagpasaylo.
Dili ka anang pagpahayag. Dili ka mamati
Sa sihagsihag sa katarungan.
Aksyon Agad. Patay kong patay.

Sa sulod sa akong dughan
Pordoy ka lang gihapon.
Walay nahibaw-an sa
Tinood nga katuyoan niining
Atong pagpakinabuhi ug
Pakigdait sa atong mga kauban.

Oo, amigo kitang duha. Apan
Dili ako kaako pagsulti kanimo.
Maglisod ako ug tultul asa ang
Imong purtahan aron isulod ko
Ang ginagmayng kahayag.
Ngitnit kaayo ang imong kalibotan.
Ug hadlok ako nga ako mawala
Sa pasikot sikot sa imong galamhan
Basin unya ug ako mapaakan
Sa bitin diha sa imong pahiran.

Gabii na. Nahuman na ang bangka.
Ug miingon ka,

It is time to go. If you need something
I am just a text away. Take care.