mY secreT ponD

Ang mga haligi sa atong katilingban

Sila ang mga haligi. Dagko,lapad,
Habog nga dili na nato magakos

O makab-ot, ato silang hangdon,
Kay sila ang mga halangdon

Naa ang dakong haligi sa simbahan
Ang haligi sa kapitolyo ug munisipyo

Naa ang haligi sa korte, ang haligi
Sa Universidad, naa ang haligi sa

Panimalay. Hikapa ang maong mga
Haligi, sandig ka didto, dap-ig ug

Hunahunaa kuno, hikapa pag-usab
Sa imong mga pagduda ug kabalaka

Tan-awa pag-ayo sulod sa lawak sa
Imong kasing-kasing, tusuka sa imong

Mga pangutana. Sa hilom naghinayhinay
Silang pangatumpag diha sa imong atubangan.

Ang mga haligi nga giabogan na, nangaabo.
Tindog. Hikapa ang imong dughan kay sa

Pagkatinood lang, ikaw lang ang mas lig-on
Nga haligi nga gitukod sa imong mga tiil.