mga tagok sa nangka nga hinog

ang nangka mao ang gidanggaan ug
baboy nga dili moagiik...kahinumdum
ka nianang tigmo sa gagmay pa kita.
nangka ang tubag.

karong adlawa, sa dihang magsulat
na unta ko ug laing balak, nakahinumdum
ko ni Genica, ang babayeng gustong
mahimong writer, bisan ug nahuman
na sa nursing.

nagsulat siyag balak nga gilansang sa
krus sa mga kritiko nga iya usab
nga giaway.Da katilaw ug tagam ang mangkay
nga kritiko. Nausob gyod ang round table.
Nahimong sinug-ang na lang.Ako na ning version.
Gidanggaan lagi siya kuno
ug reklamador(a) didto sa Faigao.

Ako siyang gitambagan nga kadtong
Pier Tres, nindot baya. Pwera buyag.
Feel sab nako. Gikan sa iyang kasing-kasing.
Gibalosan ko niya nga ako kuno
naghatag kaniyag Epiphany.Lamdag.
Nalipay sab ko. Medyo nagkadugtong,
nagkasumpaysumpay ang among
mga psychic (connections).

Apan balik ta sa nangka. Abi nimo
ug walay koneksyon ang nangka
kang Genica. Duna. Labi na ang mga
tagok sa nangka human kini giabis
sa punoan sa likod sa among kusina.

Abi god nimo, nahinog ang among nangka
sa likod sa among kusina diri sa Katipunan.
Nahibaw-an nga
hinog kay nanghumot man. Nagpaibog.
Nagpahibalo nga ana ra diay siya.
Ug andam na sa iyang pagpahawa.

Gipakatkat namo sa among working.
Giaabis ang tumoy sa nangka. Ang pusod.
Pwede pod ang iyang kuyamoy nga
naghawid sa punoan, sa sanga, aron
makuha ang hinog nga nangka.

Nagtan-aw ko. Nagtulo ang mga puti
nga tagok, murag nag-iyak ang punoan.
Pero dili dapat tagaan ug laing kahulugan
sama sa kasub-anan kay hinog na ang
nangka ug angay na gayod kining pupuon.
Dapat pista ang effect. Celebration sa
kahinog, sa paghatag.

Gisimhotsimhot ang nangka.Mora kamig mga itoy
nga nagsimhot sa bag-ong dalan.
Ang nangka dako. Tugsoy.Yellow na.
Morag baboy nga largewhite. Gihikaphikap.
Gidadpidagpi. Hagawhaw ang tingog sa iyang
tiyan. Bout ipasabot bus-ok gayod ang mga
unod sa sulod. Gipikas ang nangka ug nakita
ang iyang mga lusok. Mikuha ako ug usa.
Gihungit sa akong baba.
Gitam-osan, tam-is ug dili hagkot. Crispy.

Naghunahuna ko. Ang pagbalak ug ang
pagkabalakero sama baya sa nangka.
Moabot ra ang saktong higayon. Ang pagkahinog
sa tanan. Pupuon kon mangalimyon na.
Manghumot ang hinog nga balakero.
Ug dayon abison sa sundang ang iyang liog.
Ug didto dayon modagayday ang daghang mga puti
nga tagok. Motapot ra ba sa imong mga tudlo ug kuko
kada kuha sa lusok ug kada pang-it og tam-os.

Sama sa balak. Kon hinog na ang hunahuna sa
balakero, mangalimyon siya. Mahibaw-an niya
ang iyang pagkahinog. Ug dayon, abrihan ang
putos sa diwa. Pikason ang nangka. Abison sa
iyang punoan. Sal-on siya. Hagkanhagkan. Ug
dayon tam-oson siya sa iyang mga mambabasa.
Siya mismo ang halad sa punuan sa diwa.
Ang iyang mga balak motapot morag tagok.
Ang iyang balak mao ang mga tam-is nga lusok.
Ug ang iyang liso nga sinaw kaayo, pwede pa
gani lung-agon. Apan adunay pwedeng itisok
aron na usab mahimong punoan sa nangka.
Para ugma puhon sa mga bata.

Pagkadaghan sa tagok. Modagayday. Sama sa
mga balak unya nimo puhon, Genica.
Ma tam-is, mas dagko pa gani seguro ang
imong mga lusok. Ug mas sinaw pa gani seguro
ang imong mga liso.