mY secreT ponD

Ang mga bulak sa kanipaan

Kon nakita mo ang mga bulak
Sa atong kanipaan
Dali mo masabtan nganong giawat
Nila ang bulok sa lubog nga mga sapa

Ug kon imong hikapon sa imong
Mga palad
Mas dali usab nimong hisabtan
Nganong bus-ok kini

Kay sila baya ang mga bunga
Sa latagaw nga mga sapa
Sama sa imong gabaha nga hunahuna
Nga midagayday sa imong
Mga buhok ug abaga
Labay sa imong bagolbagol

Apan ayaw dayon ug kahiubos
Kay kadtong mangutana pa ug
Lalomlalom aron matugkad ang
Kinatumyan nga pusod sa
Mga tubag sa salog sa atong
Panumduman

Manglimbasog gayod sa pagbuak bisan
Ug usa na lamang ka kumo
Sa bulak sa nipa
Kay sa ilalom sa mga baga nga panit niini
Gitagoan didto ang
Tam-is nga mga lusok sa
Iyang mga pangandoy, paglaum og kalipay.