Sunday, May 31, 2009

kon ako ang maulahi

kon ako ang maulahi
sumala sa sabot
sa naandan
ako ang mamilo sa
habol
og manghipos sa mga
alugnan

ikaw kay nauna ka man
unsa ba ang imong
gikatabang?

igo ka man lang diay nga
nangihi og nalibang.

kitang duha my pren

mitaas na ang akong buhok
og ang akong bungot

kadali ba nga nahuman sa mga
adlaw og bulan
lain na usab nga tuig

mihawid ka sa imong suwang
giinat-inat ang imong alom nga
pirming giagian sa imong mga luha
mas taas ang imong bungot

kita ania naglingkod sa lamesa
atubangan sa dako kaayong
hunas sa dagat

misalop ang adlaw
nabugnaw ang laing tasa sa kape
nga wala na nato mainom

ato na usab nga hisgotan ang
taas og dili mahuman nga mga sugilanon
sa atong mga kapakyasan

unya dapit human
bisag walay panihapon
sugdan nato ang mas lami nga tagay
anang long neck nga tanduay
pawala sa atong kalaay
padugang og lami gamay
sa atong kalas-ay

panamilit sa usa ka higala nga gustong maghikog

ugma
miingon siya
dili na siya makita nga buhi
kay siya
magpakamatay pinaagi
sa paghigot
sa punoan sa mangga
didto sa kilid sa ilang
karaan nga balay

mibakho ang karaho
samtang siging yarok
sa akong pinalit
nga tanduay
og mipunit sa sinugbang
baboy nga
akong dalit kaniya
isip pulutan

namati mi
ni pink floyd
anang Shine on You
Crazy Diamond
apan bisag akong
pakusgan
naghisgot gihapon siya
anang paghikog

hinubog nga estorya
sa tawong
wala sugod nga wala mahubog
nga ang giginhawa
mao ang kalipay
sa alcohol

sa akong sulod
unsa bay ako kon maghikog siya?
natig-a ang akong
kasingkasing
gikapoy na ko og pamati
anang panghupaw
sa nagpahipi nga baba
sa kamatayon

nga pirming bad news
kay wala madayon

kapoy na handomon
yano lang man unta ang equation
kon dili ganahan
unsay goy dugayan?

akong mga pangutana sa anak og inahan

lahi ang imong inahan
wala ako sukad
makatagbo og sama kaniya
nakapangutana ko
basin og dili ka niya
anak

makakaon ka lang
sa iyang bugas
makahigda ka lang
sa iyang balay
makaukab ka lang
sa iyang kaban
kon siya patay na

gisultihan nimo ako
sa unod sa imong pangadyeon
matag gabii---

nga ikaw gigutom
giuhaw og wala makatulog

og nakapangutana usab ako
kon siya imo bang
tinood nga inahan


ako og ang akong tobol

(kay naghisgot ka man god
og inodoro)

mitan-aw ko sa akong tobol
nga nahulog sa inodoro
human sa akong
kusog kaayong pag-unto

mitan-aw usab siya kanako
og dayon nangutana
nganong ang akong
nawong
morag sag
tobol

nganong ang akong
nilihokan morag tobol
nganong ang akong
panglantaw sa akong
kinabuhi
morag tobol
nganong ang akong
balak kobol nga morag
tobol

wa ko motubag
giinsulto ko sa akong
kinaon
wa sukad nga ang akong
gipakaon
ako sayon-sayonon

og ako siyang
gi-flush dayon

da! maoy ija!

kabahin nianang pagkalibang

paglingkod sa inodoro ayoha
kay ikaw ang halangdon dihang parteha


ikaw ang permanenting hari
sa gingharian sa mga tai

ang paghunong

moabot ang kakapoy
og ikaw mohunong
aron pagtaktak sa mga
abog sa imong mga tiil

molingkod ka una
sa usa ka patay nga kahoy
sa silong sa nangitom na
nga mga panganod

inig-abot sa ulan
dili na ikaw modagan
mohangad ka sa langit
aron dawaton ang tanan

panghupaw sa alas kwatro sa kaadlawon

  1. niining akong paglakaw
  2. sa alas kwatro sa kaadlawon
  3. wala na ako magtan-aw
  4. kon unsa ang akong giagian
  5. dili usab ako segurado
  6. kon asa ako paingon
  7. kay kining akong lakaw
  8. mao lamang ang paglakaw
  9. gabon ang matag kilid
  10. bugnaw kaayo ang panahon
  11. daghan na ang nangahulog
  12. og basin ako na ang sunod
  13. wala na ako mangilabot
  14. kabahin kanako
  15. kon dili pa ako mahulog
  16. dili ko kana tawgon nga swerte
  17. og kon mahulog na man gani ako
  18. dili ko usab kana tawgon nga dimalas
  19. naglatay ako sa tanod
  20. wala man gihapon maputol
  21. gamay kaayo ang akong gilatayan
  22. makalibog nganong wala ako mahulog
  23. wala na akoy gipangandoy pa
  24. sa akong kinabuhi
  25. wala ko usab, pwera buyag,
  26. gipangandoy ang kamatayon

kon nganong nagbagotbot ang dalugdog

  1. ang kilat og ang dalugdog
  2. nagkita sa kalangitan
  3. naglami silang
  4. duha bisan sa kabugnaw
  5. sa makusog nga ulan
  6. daling nagawsan
  7. ang kilat
  8. og ang dalugdog
  9. nagpunay og
  10. bagotbot


gitago ka man kanunay
sama sa usa ka nindot kaayo
nga kangitngit sa
sulod sa langob
gusto ko nga kuhaon ko ikaw
higopon

aron akong angkonon
sud ning akong dughan

apan pagkalisod
gayod nga buhaton
daghan ang mga babag
sama sa mga dagko
kaayong kahoy sa lasang
og mga hait kaayo nga mga bato
sa pangpang
ang mga sawa nga naglikos
sa akong kagawasan


ang akong kahinam
lapas pa sa langit

kalami sa mga hinog nga bayabas

  1. adunay punoan sa bayabas
  2. sa kilid sa habog kaayo nga
  3. pangpang
  4. ang iyang mga sanga
  5. nga nanghitik sa mga hinog
  6. kaayong mga bunga
  7. morag mga dalaga
  8. nga nanambo sa
  9. bintana
  10. ang tamsi
  11. nga bag-o lang mibatog didto
  12. nagpaibog kanako samtang
  13. nagsigi siyag tusik
  14. sa kinadag-an og
  15. kinahinggan nga bayabas
  16. nga og kon mahulog
  17. padulong gayod kini sa ubos
  18. tunong sa hait kaayo nga mga
  19. bato diin ang mga kamot
  20. sa kamatayon nagpunay og
  21. pangamay kanako

Friday, May 29, 2009

ang kalaay

  1. alas diyes na sa gabii
  2. naghaw-ang ang tiyan
  3. gikuhit ka nako nga
  4. ako mokaon, miadto ko sa kusina,
  5. wala na ang mga pagkaon sa lamesa,
  6. giukban nako ang ref
  7. giabrihan nako ang imong
  8. butanganan sa sud-an,
  9. bringhouse sa pista sa Olingan,
  10. humba, inatay, gamayng lechon,
  11. nagkuha ko og bahaw sa rice cooker
  12. gibutang nako sa plato kuyog sa
  13. gipiling sud-an
  14. nagkutaw kog init nga green tea
  15. pahilis sa tambok human og kaon
  16. naglingkod ko atubangan sa tv
  17. mitan-aw sa salida, siging gibalhin
  18. ang channel, mi-decide ko, patyon na
  19. lang, patukar ang radio basin naay
  20. nindot nga music karong orasa
  21. radyo na lang, gipatong nako ang
  22. akong tiil sa bangko, nagkinamot
  23. ko sa pagkaon, lami, kaon, hungit,
  24. usap, pang-it, usap na usab,
  25. inom sa green tea, balik og lamoy
  26. sa humba, morag nabusog na ko
  27. inom sa green tea,
  28. naay ok-ok, gikuha nako ang
  29. baygon, spray sa ok-ok
  30. milupad, sa unahan mikirig,
  31. patay
  32. nanimahong baygon ang
  33. akong palibot,
  34. inom sa nabilin nga green tea
  35. gibutang ang plato og ang bahaw
  36. nga wala mahurot sa banggera
  37. hugas sa kamot, manarapo,
  38. gipalong ang radyo, gibiyaan ang
  39. kusina, sulod sa study room,
  40. abri sa computer, tan-aw sa emails,
  41. open ang YM, invisible ko, kapoy,
  42. basa og poem sa contemporary poets,
  43. balhin sa inquirer, balik sa website
  44. sa supreme court, nothing new,
  45. basa og blogs, tan-aw sa pornographic sites,
  46. wala na may lami, sumo na, balik sa poem,
  47. himo og poem, walay edit-edit, submit,
  48. pahulay ang mga tudlo, tutok sa screen,
  49. basa sa mga poem sa bisdak, balhin sa blog
  50. ni cindy, genica, basa sa mga balak sa
  51. pobreng panglantaw, wala na may
  52. makalingaw, sumo na ang tanan,
  53. morag busog ang tiyan, buhong na
  54. kaayo ang dughan, puno, apan naa
  55. gihapon ang kahaw-ang
  56. mibalik ko sa kwarto, bugnaw na kaayo,
  57. wala nako gi-off ang computer,
  58. nahinanok ka na.
  59. ako? nagtutok sa
  60. kangitngit diha sa kisame.
  61. naghunahuna pa gihapon.

Thursday, May 28, 2009

shifon keyk


tam-is nga shifon keyk
nga giaysingan og bater
banila ang plebor

bawal sa dayabitik
apan kining akong auntie nga
switik nga otrong dayabitik
gitago ang shifon keyk
sa ref

pagkaugma platito na lay
nabilin og ang akong auntie
nga switik
naghisgot sa iyang damgo
nga kuno
duro niyang kaon og
shifon keyk

kalooy sa diyos
wala na ang keyk
kalooy sa diyos
wala na ang switik

advertisement sa shampoo


ang sikat nga balak
ni basho
laming gamiton
nga advertisement
sa shampoo

splassshhhhh!

ang imong mga mugna sa imong kinabuhi

ang nahisulat nahisulat na
ang imong kinabuhi aduna nay mapa
diha nahipatik sa imong palad
ayaw na paghago
ang mga salog moreport diha sa imong mga tiil
ang mga bintana mangabre sa imong mga panglantaw
ang mga pultahan mosira rag ila kon ikaw dili na ganahan

ang nahisulat nahisulat na
ayaw na paghimo og mga katarungan
ayaw na pangitaa ang katin-awan

pagpuyo kay ang kutsara na mismo ang mohongit sa imong kan-on
ang baso na ang magkuha sa imong tubig
ang katre na ang magsugo sa mga habol og mga alugnan
ang imong mga kutsarita ra ang magkutaw sa imong kape

sus, tan-awa! kon giunsa ka pagmahal sa imong mga mugna
bisan dili nimo pangutan-on ang mga bitoon, tubagon ka nila.

sa sulod sa akong balay

dia nagpungko
nagtan-aw sa magandang umaga bayan
naghigop og kape
nagkusnit sa marinated nga bangus
akong sud-an tupad sa akong humot nga kan-on
nga jasmine man kuno ni

wala na nako ambata ang pagkahinay nga
pagdagan sa mga oras
wala koy angay nga dalian ning akong kinabuhi

samtang ang mga semana mihagibis morag
easy ride
og ang mga bulan morag mga abtik og idlas nga
mga manatad
og ang mga katuigan morag PAL jet nga akong
gisakyan kadtong mikagiw ko makadyot
sa macau

ganahan kos punto por punto ni tonying
makalolooy na si de venecia nga gibulagan ni arroyo
nahulog nga morag init nga kamote
init ang ilang issue og si claudio gitawag nga
bakakon pareho sa iyang potot nga bossing

dugay na kong nangita og mga laing pultahan
aron ko mosaka sa taas nga hagdan
apan pirming gisirad-an
dunay mga bintana apan walay klarong luparan
ang akong mga pako nangapiko
og ang dag-om misamot man kaitom
morag duna na usay moabot nga bagyo
og busa dia ay,
naglingkod una ako sa sofa

sa among balay
nagpahayahay

humok ang lingkoranan, bugnaw ang aircon
naay grapes sa akong kilid, naay orange juice
akong balikon og tan-aw ang slumdog millionaire

daghang miingon nga ako dakog kahiubos sa kinabuhi
wala na ko mag-mind niana, sa gawas magpakiangkiang ko
maoy ilang gusto, og sa sulod niining bay nga hayahay
mocha-cha ko, mo-foxtrot ko, ako ra usa, mag-tango-tango.

ang dakong ugdo sa tae sa kabaw

1975

mikatawa kag duro
sa dihang midaog na si maritess
pagka ms. svc atong 1975
kay ang iyang hairdo
morag tae sa kabaw nga gaugdo

1978

samok ang kalibotan
nalimtan nato ang katawa kabahin
sa dakong ugdo sa tae sa kabaw
dakponon tang duha
nakalista sa list of battle
sa military

1981

sa kalooy sa Dios
nakalabang sa college
nagbulag ta sa maayong kabubut-on
daghang botelyo sa long neck sa
tanduay ang nabalintong
naputol ang usa ka kwerdas
sa gitara sa pagkanta anang
turn me loose

1995

nagkakita ta wa tuyoa sa usa ka
spa sa manila
front sa prostitution
gibalikan nato ang atong
gibiyaan
mipabulhot kas aso sa imong
marlboro
og ako nagpunay og
hapyod sa baba sa baso
nga wala nay sulod
anang san mig beer

2009-----

nangamudmod atong nawong
anang dako kaayong ugdo sa tae
sa kabaw
milakra sa akong baba
napilit sa akong bungot
nasirad-an ang duha ka buho
sa akong ilong
mao sab ikaw diha sa imong
lugar

nagchat ta og nangatawa lang
og wala mahisupak sa atong
pangagpas

"lami, humot, ang gaugdo nga tae
sa kabaw nga namudmod sa atong mga nawong!"

kumusta na kaha si maritess sa L.A.?
wala na siguro ang dakong ugdo sa tae sa kabaw
sa iyang ulo




ang karon

gihawiran nimo ang imong baraha
tulo ka buok: ang kagahapon, ang karon,
og ang ugma

gilabay nimo ang kagahapon
gikulob nimo ang ugma
og ang karon imong gidap-ig sa imong dughan
imong gihagkan
og imong gihay-ad
gitahan sa lamesa

ning atong sugal
sa kinabuhi

kalooy sa Diyos
midaog ka
Alang sa mga batan-ong magbabalak

Pagsulat lang
Sa bisang unsang urog nga imong gusto
Daghan na kaayong dugo ang mibanaw sa ilalom sa tulay
Aron ipadayon ang pagtoo
Nga usa lang ka agianan ang husto

Sa balak ang tanan gitugot

Sa usa lang ka kondisyon, Sakto ka
Ang haw-ang nga panid usbawa

(kang Nicanor Parra gihapon ni, ang Ezra Pound sa Chile)

sud sa hawla



sa sud sa hawla anaay pagkaon
dili kaayo daghan, apan naa
sa gawas anaa ang mga lapad nga giinat nga
kagawasan


(hubad sa balak ni Parra)

tigmo

wala nako tagai si bisan kinsa sa katungod
gisimba ko ang usa ka trapohan

naghatod kog mga lungon
naghatod kog mga lungon

wala nako gihatag ang katungod kang bisan kinsa
kataw-anan ko ninyong tan-awon
sa kahayag sa adlaw
gilutos ko sa plaza
kamatyonon kos kapungot

Tabangi ko Palihog

Wa kong kabalog naunsang hitaboa
Nga miabot ko dinhi
Nagdagandagan lang kong
Malipayon
Kontento sa akong kalo nga
Gihawiran sa akong toong kamot
Samtang nagsunod kos asul nga
Alibangbang nga naglupad
Palayo kanako

Sa kalit ngek!!
Nadam-ag ko og wala na ko kasayod
Kon unsay gidangatan sa hardin
Nausob man ang palibot
Sa hingpit

Nagdugo ang akong baba og ilong

Ambot wa na ko kasayod kon naunsa
Tabangi ko palihog og kon gusto ka
Pusila na lang ko nga nagtalikod nimo

(hubad kini sa balak ni Parra, "Socorro")

salawayon

natawo kong salawayon
nadakpan sa akto
nga nangawat og bulak sa silong sa kahayag sa bulan
pangayoon ko ang pasaylo sa tibook kalibotan
apan dili ko moangkon nga ako sad-an

Wednesday, May 27, 2009

panagtagbo

ang mga luspad nga gihay sa bulak
kuyog sa iyang mga higalang hangin
nagpanilap sa utog kaayong
kahayag sa adlaw
nga naghubo
sa sayo pa nga kabuntagon

kaulag

nagpanilap ang dila sa dagat
sa nagbilangkad nga puti kaayong paa
sa baybayon

ang mga kalubian nga dunay gitagong gugma
sa lapyahan
naglantaw lamang
nangahulog ang ilang mga lahing nga bunga
morag mga dagkong lusok sa mga luha

gugmang tiunay

nagbahag ang huyang nga kahaponon
nga nagpaabot sa
hingpit nga gakos sa kusgan nga
mga bukton sa kagabhion

ang katiunay sa ilang gugma
gisaksihan sa nagtukaw nga mga bitoon
pagkadagkong kahoy nila
og kita
mga piso na lamang
sa ilang kalapdon
og katas-on
kon saktong sutaon
ako hulmigas lamang

walay tawo ang hawan
og kita nga nahikatulog
sa atong kagamay
wala na nila maambat
ang ilang mga damgo
dagkong panganod
ang ilang mga pangagho
atong kamatayon

apan bisan pa niini
wala nako gilabay ang
nahisulat nga tumong
sa akong pagkagamay

ang kanunay og wala

mao kini ang kanunay
og wala

wala nga wala
wala nga haw-ang
nga ni bisan usa
ka nipis nga balahibo
sa hangin
wala

ang kanunay
kanang wala
mosipyat
kanang siging
katagak nga
walay pagsaka
kanang kanunay
nga pagtukaw
og dili na mapukaw

ang kanunay nga
adlaw og gabii
nga misalig ka
nga walay sipyat
kay balikbalik lang

ang wala
kanang dili pista sa
langit kanang dili
bunyag og
kwarenta sa patay
o kasal

ang kanunay kong
adlaw-adlaw
nga dili espesyal

kon unsa ang naa
mao ra
wa na koy idugang
kon unsa ang nia dinhi
mao ra gayod
kini

wa na ako maghandom
nga ikaw bisita
busa wala akoy laing
idalit kanimo kon dili
kini lang
unsa ba ang imong
gipangita?

ah, ang kanunay og
wala dili
dali sabton nga ang
imong gipangita
kanang wala dinhi
ang naa mao ang
kanunay nga
sumo og ang
adlaw adlaw nga
naa nga imong
gitalidhayan

mao kana ang kasagaran
ang wala mao
ang pangitaon

tan-awa subo ka
walay molaban kanimo
kay ikaw sa akong tan-aw
mao man
ang bisan unsa lang


Tuesday, May 26, 2009

kagahapon

kagahapon
gibalikan niya ang nahitabo
diin didto sa Dohinob
sa duol sa menteryo
nasuong ang honda wave 125
nga gisakyan sa iyang anak nga babaye
sa ilalom sa ten wheeler nga
truck sa beer na beer

maayong pagkabuak sa ulo
og napidyat ang tinae
naligsan sa makaduha
ang tiyan og maayong
pagkadugmok ang
mga bukog sa iyang
baligkawang

gipunit ang mga pidyot
sa mga nakakita didto sa daplin
sa dalan
samtang ang pulis nag-sketch
sa point of impact
og nagsukodsukod sa kalay-on
sa pagkalabay sa bana sa iyang anak
nga maoy nagdrive niadtong
higayona

gipangutana siya sa iyang abogado
kon unsay iyang gibati sa dihang
nakita niya ang pikas na lang
nga nawong sa iyang anak

miingon siya nga morag mitaklob
kaniya ang kalibotan
og nawala na dayon siya sa passing

mihilom siya nga morag nanukad
dayon og pasuhot sa iyang kusog kaayong bakho
og tungod kay galisod na man
siyag ginhawa
ang stenographer midalidali
og kuha sa usa ka baso
nga bugnaw kaayong tubig

ang nakaligis nagdukoduko
morag akong madungog
ang iyang gibalikbalik
nga mga pulong nga siya
wala gayod kunoy sala

pagduladula sa pulong

naglaray ang mga pulong
morag mga kahoy nga gituyog tanom
sa tul-id kaayo nga dalan

gipili ko ang akong pamutlon
akong gihipos ang akong gamiton

duladulaan ko ang pulong
mora og suga nga siga og palong

maglibog ka kon unsa ba gayod
ang bakak og ang tinood?

maglibog ka kon unsa ba gayod ang
bout ipaibot ang gustong ipaabot

gipangita mo ang saktong panabot
kanang dayag, kanang dili ka malanag

daghang kag makita, madungog apan
walay usa niini ang imong mahikap

wala kay masimhot kay walay hangin dinhi
wala kay mahikap kay walay unod kini

makita mo lang ang mga nindot
kay ikaw man ang nagtabon sa mga laksot

nagduladula ang mga pulong daw mga bata
ayaw badlonga kay sila ang larawan sa grasya

ikaw nga nagtudlo sa gahom sa gugma

gitago mo ang tanan
apan hangtod asa ang utlanan?

nagtudlo ka sa gugma
apan bulag ka sa imong bana

nagtudlo ka sa saktong pagdumala
sa mga anak
sa pagmatoto sa usa ka balaanong pamilya
apan wala kay anak
apan wala kay pamilya

gubot ang imong agianan
daghang buling ang anaa sa imong agtang

mohisgot kag silhig nga daan og gabok
unsaon mo kaha kini pagsilhig?

mipadayon ka sa imong buluhaton
nagpakabutabungol ka sa imong himamaton

misamot og kalayo
ang balay nga gipuy-an sa imong mga pulong

ang kalamboan sa pagtudlo ni mayet sa katekismo

human pagtudlo sa usa ka katekismo
nga ang Ginoo gamhanan
nga ang Ginoo gugma
nga ang Ginoo manggihatagon

gipakita ni Mayet ang kinahanglang
makita og mabati sa mga bata

kay ang Ginoo gamhanan, walay bayad
ang snack og paniudto
kay ang Ginoo gugma man, gipabati sa
mga bata ang tumang pag-atiman
sama sa usa ka inahan
kay ang Ginoo manggihatagon man,
pakapinan anang libring dulaan
og sa naandan
pusil-pusil sa mga lalaki
monyeka alang sa mga babaye

malipayon si Mayet nga nagtan-aw
sa mga batang busog nga karon nagdulag
dakpanay og tago-tago sa nataran
sa kapilya sa San Juan

sa akong kasingkasing malipayon usab ako
apan nagduda ko nga kini maoy sinugdan sa
usa ka sayop nga pagtudlo sa tinood nga pagtoo

unsaon na lang kon moabot na ang kasakit?

kon wala ang magbasa

kon wala ang magbasa
ang mugna
mahimong balewala

ang tanan mahimong
wala
kon wala ka
kon wala usab ako

kon ako lang ang ania
ang akong mugna
mahimong ang
posibilidad
mawala

apan kon ikaw mawala na
sa hangtod
mahimong
ako dili molangtod
isip usa ka
posibilidad

apan ako
ako usab
lahi usab ang akong pagkaako
mahimong
hikalimtan ko usab ikaw
og mopadayon ako
sa akong pagkaako

motupad ako
sa kilid sa akong Ginoo

dugay ko nang giputol ang akong hapos

i

bisan og kalami ra untang

idula og kote
diha sa gamay og hagip-ot
nga tugkaran
akong giputol ang akong
taas nga hapos

nahuman na ang akong
kahinam

dugay na nakong giandam
ang pagtagamtam
anang akong
hapdos nga ugam

ii

paglabay ko sa akong kote
mituyok kini og kadali
dayon kini mitumba
og ako mibuhakhak og katawa

alang kang sir eng

ang katam-is sa asukal
anaa sa usa ka bandihado

kanang baston
kadtong morag itlog
sa pato
ang naandan nga lollipop
halinon lang gihapon
naay gipormang morag
budbod,tiratira
gipapili ka



mga kalipay sa dila
nga ang hilig
mao ang pagtila
og pagtam-os
sa gagmayng mga bata
nga kaniadto
nag-inambitay
nag-ilis-ilis
og tam-os
sa walay paghunahuna
kon sayop ba
kana

wala sa ilang buot
nga sila mahimong sumsuman
sa katilingban
kon sila matawag ba
nga hugawan

nakita ko ikaw nga
nagtam-os sa lollipop
ang imong bungot
walay pul-ong
wala nangilabot ang
imong mga mata
kon unsa ang nahisulat
diha sa pultahan
sa katoliko nga simbahan

ang naandan


bisag unsang halas
nga makit-an
atong bunalan sa kagingking
nga kawayan

ang ang mga halas usab
mogamit usab sa
naandan na nila nga
pagpamaak

bisag kinsang tawhana
sa bisag kinsang halasa

walay gipili ang naandan
morag kadena nga walay putlanan

sa walay igong katarungan
sa walay pangutana kon unsa og asa
ang kinutuban ang nilugdangan
ang dangatan ang kapaingnan

pag-abot sa halok sa usa ka gugmang tiunay

ipabatog mo ang imong mga ngabil
sa iyang hamis og humot nga liog
og siya mohangad
motalidhay mohay-ad
aron mosimhot sa
langit og ang iyang
mga mata mopiyong
aron molantaw sa
nawong sa Dios og ang iyang
mga dalunggan mamati
sa mga awit sa daghan
kaayong mga anghel

panahon


sa magtiayon
wala nay bayad ang kalami
nianang hagwahagwa
sa katreng naandan
gani aduna pa'y daghan
kaayong sukli niaang
hamubo lang kaayong
panahon nga nagasto

ang dili makalimtan
hangtod sa kamatayon

kon gusto nimo nga molungtad kita
ayaw ako og tinuora
ipakisama lamang ako nga usa ka bakak nga lumalabay
kanang bisita lamang sa imong mga kamatooran
sama nianang atong pagtinan-away bisan og makadyot
lamang sa talad-kan-anan
ihatag ang pahiyom og ilailaha ako sa usa ka katawa
kadtong nagkita kita sa atong kabatan-on
diin ang kahinam sama sa usa ka bandihado
nga puno kaayo og init nga luto
ang kahumot misaka didto sa kisame
ang kalami misuotsuot sa atong mga tilaok
atong gitulon og wala'y bisan usa ka mumho nga nausik

unod

sa kilid sa kangitngit
adunay duha ka anino
ang usa uhaw sa gugma
ang usa uhaw sa kwarta
nagkasabot sila
sa usa ka buhaton
nga ang anino paundon

dili baya kadto alang kanimo

ang mga hardin sa akong galamhan
namulak
nanghumot
og ikaw nga nagmingaw mipasiyo
naghandom
nanimhot
adunay mga bulak nga imong gikutlo
dili baya kadto alang kanimo

ang dili maaninaw diha sa kahayag

abi nimo nga og moabot na ang
kahayag
nga dayon makita na nimo ang tanan?

pagkasayop mo

dili tanang makita anaa sa kahayag
kay ang mas hayag pa
dili mo na kini maaninaw

pagbalik

diri sa akong nahimutangan
akong gilantaw ang mga balod sa dagat
nga kanunay nga nagpaingon kanako

bisan gani sila
nasayod sa ilang mga utlanan
diha lamang sila
sa daplin sa baybayon
nga sa paghawid nila sa
mga balas
wala na sila mopadayon

mitan-aw sila kanako
og dayon og panamilit
balik sa ilang
gigikanan

pagpasilong

nakita ko ang duha ka mga bata
nga naghubo og misalom sa dagat

ang mga balod mihapohap kanila
mitunga sila
aron pagsarap sa hangin

ang lima ka punoan sa lubi
nga bahi
mihatag sa ilang pagpasilong

ang ilang mga dahon misayaw
sa paglabay sa hangin
ang ilang mga bunga
wala pa mangahulog sa kalibotan

adunay mga langgam nga maya
nga mitugpa sa sanga sa nangka

milupad og mibatog sa daplin
sa akong bintana

dili nila ako makita
dili nila ako masimhot
adunay salamin ang among
tungatunga

ania ako sa sulod sa akong naandan
sa paglantaw sa mga nanglupad
mingbatog og mipahawa

sa mga nanagdula sa daplin sa baybayon
sa mga butang nga dili nako mahawiran
kadtong mga gawasnon
nga dili sama kanako

sila ang akong gilantaw
og kon unsa man ang ilang gibati nga ( kasubo ba kaha?)
og kalipay

mao kana ang akong gisusisusi
og kon unsa pa man dili na kana nako masulti

pagdulog

nahuman na ang mga misteryo
nga bisan unsaon wa gyod nato matugkad
ang kalalom og
ang kalapad

mopahulay usa ako
maglingkod ko sa hagdan
aron akong tan-awon ang mga dayag

akong hikapon una
ang mga maanyag
akong kan-on ang mga lamian
akong dulgan ang mga
wala makatulog

kon unsa ang romantic nga gihulagway sa akong amigo nga si ariel

ipatukar ang
Always nga giawit ni Marco Sison
og kini pamation

diha daplin sa sapa
ka maglingkod

dayon og kuha nimo sa
gagmayng mga bato
dayon og labaylabay didto

dayon pagkahuman
isunod ang
I Go Crazy
ni Jose Feliciano

undangan usa
ang paglabaylabay
sa gagmayng mga bato

akong gisugyot
ang paglikitlikit
sa kugmo

pagpasaylo

ang paghikalimot
igo na kana nga mahimong pasaylo
nga kon og magkita mo
wala nay hisgotan
pa nga bisan og gamay
nga paghinumdom

magsaylo ang inyong
dalan
mapidpid ang iyang abaga
sa imong abaga
dayon wala ka nay
gibati

nakita nimo ang gamayng
abog sa imong bukton
dayon nimog tayhop
kay gihugawan
ka na

nga og tawgon niya ang imong
ngalan
hilasan ka

managlahi

sa pag-abot sa bulan
naaninag nako ang animo sa mga kahoy
sa silong mipahulay ang usa ka babaye
miawit og nangasubo kaayo ang mga sagbot
nga nangatulog
og ako sa akong pagsugod midap-ig
sa mga likod sa kagabhion
nga bisan og unsaon nakog piyong
ang akong mga mata
dili man gayod manira
ang akong mga pilok
walay trangka
ang mga bato sa daplin nanampiling
mitutok sa akong mga wala masulti
ugma sa sayo sa kaadlawon
mag-iyahay ta
og kumkom sa tumang kahilom
managlahi na ang
atong mga pulong

apasumpay sa kang Akoy

miingon si Bahala
og
Ambot!

og sumala sa ilang
naandan

namahala si Bahala
og si Ambot
Nangambot

misambat ang
segurista

Dios ko Dios ko
Wala ba kamo'y mga plano?

ang Sugarol nga
milabay
mikuha sa iyang burador
og mikuha sa iyang
dakong bato
og lapad kaayo

"kon wala kamo
magdali
ako usang antogon"
maoy iyang pulong

milabay ang kusog nga
hangin
og nanago silang tanan

migawas sila
pagkahuman
og adunay tawo nga
milabay

silang tanan
nangahanaw
pati ang ilang mga
purol
og silang tanan
napolpol

kadtong maong tawo
abogado

mapalid ang tanan

maayo na lang gani
kuno
kon ang molabay bagyo
kay mabinlan pa ka

kay kon ang abogado
na gani ang
molabay
makuha pati imong
balay

kon moawas na gani ang gantangan

sa hinay hinay gibiyaan
ko silang tanan
kay miawas na ang akong
gantangan

kadtong mikitkit
sa akong dila
kadtong mipanit kanako
kadtong mihubo kanako
kadtong mihulam
sa akong sapatos nga
wala nay uli-uli
kadtong miukab sa
akong pitaka
kadtong miabre sa akong
zipper
kadtong nagsigig
padungogdungog kon pila
gayod ang akong
deposito sa bangko
kadtong mihurot og kaon
sa akong macaroni salad
kadtong nanungkab sa
akong kaldero og
gibirahan ang akong bahaw
og inun-onan nga diwitdiwit
kadtong misulod sa akong
kwarto nga dili na manuktok
og dayog abri sa tv
og haw-as sa akong refrigerator
kadtong mikapyot sa
punoan sa bayabas og mibali
sa mga sanga niini
kadtong namupo sa akong
mga mangga nga walay
pananghid og gipuno
ang ilang mga bukag
kadtong magsigig sakay
sa akong Dmax
nga magpakuha pa sa iyang
balay og
unya pag-abot nako didto
patagdon pa ko
kay kuno naligo pa siya
kadtong magsigig pamahaw
paniudto og apil pa ang panihapon
sa among balay unya
puyokpuyokan ka lang
og mga mabaw nga estorya
og libak sa mga silingan
kadtong nakahurot sa akong
snack nga potato chips
og kiss me chocolates
og hot green tea
kadtong nagsigig suyop
sa akong kape nga folgers
kadtong nagsigig katulog
sa akong sofa nga italian leather
kadtong sigig hulam sa akong
laptop
gamit sa internet nga
chargeable sa akong account
kadtong sigig palibre og
buffet sa Kusina ni Manay


nahurot na ang akong pagpaubos
sila nga mga walay pulos
mga mabaw og panghunahuna
mga walay utang kabubut-on
mga bastos
mga mapahimuslanon kanako
mga walay delicadeza
mga users
mga abusers
mga abno
mga para gasto lamang
mga dili kamaong mobalos sa akong
kaayo

sa hinay-hinay akong putlon
ang akong kaikog
akong minos-minosan ang
akong pagkaulog-ulogan
panahon na
nga ako na silang biyaan
ipabati ko na kanila ang
akong tingog nga mitagam
ipakita ko na kanila ang akong
tinood nga bulok
consumatum est
para sa akong mga pests
ang mga parasites
ang mga leeches
ang mga lamok
ang mga alligators
dili ko na sila buhion
kadtong gituboan na og sungay
sa kanding og kabaw
putlon ko na ang nanglabaw
nahutdan na ako sa pailob
og ang akong paya ako na nga gikulob

kay kon dili gihapon sila kasabot
pamusilon ko sila kon akoy maglagot

kanunay (balak alang sa mga badoy sa tibook kalibotan)

ikaw lang
ikaw lang gayod kanunay ang akong gihigugma
og higugmaon
ikaw lang gayod kanunay og hangtod sa kahangtoran
kita lang gayod kanunay
hangtod sa kahangtoran
kita lang gayong duha sa kanunay
gusto nakong hutdon ang akong tibook kinabuhi
diha lang gayod tupad kanimo
kanunay
ihatag kanimo hangtod sa kahangtoran
ang tanan kanako
alang kanimo
kanunay

alang sa usa ka gugma kanhiay

(intro, gitara)

kaniadto adunay gugma
mas lalom sa pa sa mga lawod
kaniadto adunay gugma
nga puno sa katam-is
ato kadtong gugma
gihawiran giamuma
gisaloan gitagayan
sa tibook natong kinabuhi
unta

apan usa ka adlaw niana
mipahawa ka
karon dili na ako kabalong
mabuhi
nag-inosara na lang ako
og wala na kahibawo kon
asa padulong

karon dili na masayon
unsaon pagpadayon
karon naghunahuna ako
kon unsa ang sayop
nga akong nahimo diha kanimo

kaniadto adunay usa ka gugma
og ako nasakitan
kaniadto adunay usa ka gugma
nga ato unta
dili na kita magpakaaron-ingnon

kaniadto lang kadto
kaniadto lang og ako ang nasakitan pag-ayo

(ending: tumba lata)

kalibog

kon moingon ako nga gihigugma ko ikaw
ayaw dayon og too
mahimong namakak lang ako
og moingon ako nga namakak lang ako
mahimong bakak usab kana
maglibog ka
kon asa na ang bakak og ang tinood
ang tanang bakak
sa pagkatinood lang nahimong
bakak tungod ka anaa man ang
mga kamatooran
mag-unsa man god ang kahaw-ang
kon wala usab ang kapuno
ang bulan unsaon mo pag-ila
kon wala ang kangitngit
ang adlaw unsaon mo paghimamat
kon ang tanan kahayag na lang
unsaon mo ang bili sa kamatooran
kon ang tanan kamatooran na lamang
mas nindot kining akong mga bakak
mas lamian
kay kini giyam-iran sa kamatooran
giyatakan gisipasipa gilayog
gisagpa giluba gilansang
gilumping gidaro gibuldos

di ba ikaw kadtong gaingon
nga ang gidaog-daog tabangan?
nga silang gipaubos ipataas?
dili ba mao man kana ang papel
sa mga bakak nga kon imong
makit-an imong layogon
og imong sagpaon?

og ikaw wala ka ba mamakak
masukad-sukad aron ibutang ka
nako isip hari/rayna sa trono sa
kamatooran?

ang bakak og kamatooran
usa ray ginikanan
kitang tanan kay og wala kita
wala usab kana sila

kon magkita ta puhon
ingna ko nga dili ko bakakon

way nahibalo

ang akong paglaom
baso nga nagpakahilom
imong gihulog
kay nahikatulog
nabuak
didto sa atong lawak

ang akong mga damgo
usa ka puti nga panyo
imong gitrapo
sa buling sa imong ulo
imong gimansahan
sa kapakyasan

ang akong ugma
usa ka tuba nga ilimnon
imong gitulon
sud sa imong dughan
og ako naughan

ang akong gugma
usa ka buwak nga pula
bisag wala pa kabukhad
akong gikutlo kay kanimo gihalad

ang akong kagahapon
mao ang akong mga tunob
gipapas na sa mga balod

ang akong pagkaako
wala'y nahibalo