Kagawasan, kadaugan
Paniti ang saging. Ilabay ang panit sa basurahan.
Panit na lang sa saging.
Sa imong mga kapildihon. Ayaw kalimti.
Makabusog kana.
Buhii ang kanding nga gihiktan. Apil na ang sunoy.
Pati ang mga pisi nga naghikot sa kabaw ug kabayo.
Putla ang pisi. Hubara ang mga hikot.
Putla ang mga kadena nga naghikot sa liog
Sa imong iro. Pamuhii silang tanan.
Mao kana ang paglingkawas sa mga hikot
Sa imong kinabuhi. Buhii ang imong kaugalingon.
Dili angayan nga dunay lakra sa hikot ang imong
Mga kamot. Hawiri ang kagawasan.
Hubara ang mga hikot sa kapungot
Kalisang, kahadlok, kawili, kahingawa.
Ablihi ang hawla sa imong salapati.
Dili kini angayan sa sulod nga maghinuktuk
Kay basin ug mahikalimtan na niya unya
Sa dayon ang gahom sa iyang mga pako
Nga pirming gitikyop, morag mga payong
Nga imo lang ablihan kon adunay ulan.
Palupara ang salapati.
Puti nga salapati ang para sa Hangin.
Mao kana ang imong kalag. Palupara
Ayaw kawili. Ayaw pagduhaduha.
Gikan sa gamayng hulmigas hangtod sa
Dako nga kabaw. Magmadaugon sila.
Kay dili baya sa kadako o kagamay
Sa kakusgan o sa kahuyang nga maangkon
Ang kadaogan ug kagawasan.
Anaa kana sa mga kamot nga nagpunay
Ug hago. Kadtong mipusta sa tanan tanan gayod.
Walay kalisang nga mihatag sa tanan.
Ang tanan ug tanan gayod.
Palupara ang tanan.Buhii ang tanan.
Kana ang tinood nga kadaugan.
No comments:
Post a Comment