diha sa paghukom na unya kanato

kon moatubang na kita
sa Dios,

ikaw moingon: wala ako midagmal
sa akong igsoon,
ako ang gidagmalan,

wala ako mangilad kang bisan kinsa
ako ang kanunayng
giilad

wala ako mangawkaw ug salapi
ako ang gikawatan

wala ako mangilog ug yuta sa mga
walay kahimaohan
ako ang giilogan,

ako nga nakadungog
wala katingog.

kalipay, kasakit....

sa adlaw nga ikaw moingon
nga wala ka na'y masudlan sa imong kalipay
kanus-a lang kadto?

di ba bag-o lang
unya karon niining bulan sa hulaw
nga mitayhop ang init kaayong hangin
diha sa imong aping
ikaw karon moingon
wala na'y kasudlan ang imong kasingkasing
sa imong kasakit?

nindot nga lantawon

Duha ka maya
nagtangag ug uga
nga dahon

Naghimo ug salag
sa sanga sa narra.

balak alang kanimo

diha sa kasagbotan diin
kamatyonon ang bulan

sa ngitngit nga lawak
nga nanimahong ok-ok

diha sa kasilyas nga wala ma-plas
diha sa salog nga giughan sa mga ihi

himoa akong
tawo!

ibalik mo kanako ang
akong ispiritu!

ang nasulat ni andrea sa iyang libreta

wa na nako hunahunaa
ang kakusog sa imong ulan
ug ang
kauga sa akong
nataran

kanunayng makililimos

mas gigusto nako nga unta ako
mahimong iring
diha sa kilid sa bintana
nagtilaptilap sa kaugalingong lawas
tiil ug
kamot

limpyado
limpyo
hilom

apan ang kanunayng mahitabo mao man kini:
nga ako usa ka basa nga piso
nagkurog sa katugnaw
kanunayng nag-inosara sa silong
sa dakong
punoan sa narra
nagtago sa kakusog sa
ulan ug baha

dili ko gustong ako ang itoy
nga nagpaabot ug sobrasobrang bukog sa
piniritong pirit

apan ambot ba
sa kanunay
ania dinhi kanako sud sa akong hunahuna
ang gakurog nga piso
ang untoy nga itoy

kanunayng makililimos sa gugma mong
buta
bungol
ug amang

balak alang sa wa mosugot kanako kaniadto sa batan-on pa ako

sa akong kagamay
ginganlan ko nimog tungaw
sa akong pagkamusimos
gidanggaan ko nimog
timos
ug dayon mog katawa
kuyog sa imong
mga higala

ang wa mo lang makita nga ning akong pagkatungaw
ug pagkatimos
kining akong dughan
nagbinbin sa
kinadag-ang gugma sa tibook kalibotan


alang kanimo

panamin daw,
lantawa kanang imong gabudlat nga mga mata

ay! ay! ay! pagkabuta.