Monday, April 26, 2021

KAPYOT

 


 mokapyot kos imong abaga

mosandig kos imong dughan

mogamot kos kalibotan


nawa ang akong kahadlok nga

mapalid kos kusog nga hangin

Sunday, April 25, 2021

niluyang nga saging, sagol sa kamay nga morado ug lubi nga kinagod

 


 ang paghimo sa niluyang nga saging

nga sagad natong kan-on matag hapon

sa ilalom sa punoan sa buongon, magsugod

gayod sa pagkuha sa alho ug lusong.


lung-agon nato una ang hilaw nga saging

dayon panitan nato kini, unya ang panit sa

saging ato kining ibutang sa lusong dayon

sugdan na ang pag-alho aron malimpyo kini

mosinaw, magbasa, ayha pa nato ilunod ang

saging nga init, kuyog sa kamay nga morado

ug sa kinagod nga lubi, ayha na dayon ang

pagpunay kog alho sa tanang samog niini.


sinaw na kaayo, basa na kaayo ang alho 

dayon nahimo na ang lamian nga produkto.

Saturday, April 3, 2021

ANG AKONG LUGAR NGA GIMUGNA

 


 ANG imong lugar napuno sa

tawo, 

nanagsulti sila, 

ang uban nanag-awit,

ang uban

hilom nga naglantaw

sa tanang

nahitabo ug manghitabo

nahadlok ko

busa mipahawa ko

nagpalayo

naghimo ug akong kaugalingong

payag

sa ibabaw sa bungtod

nakighimamat sa gabon ug

mga panganod.


malinawon ako dinhi

namati usab

sa daghang namuyo sulod

sa akong kasingkasing

ang akong hunahuna nagbantay

naglantaw

namati pag-ayo kon unsa

ang akong sunod nga

buhaton.


sama kaninyo gipangita ko

usab ang agianan sa 

kalipay: kanang linaw nga

lanaw,

lalom, lagom,

diin pati ang adlaw ug bulan

manamin.

SA BALAY

 miadto kos imong balay

wala ka man nangambat

nangaway ko dapit sa imong

tugkaran kilid sa labat

ang imong mata naglirawliraw

akong pahiyom intawon gibaraw


busa ania ako mibalik sa akong

balay karon nakapahulay

lami baya usab ang akong sikwate

init pa ang akong budbod nga

sakto sa tuno, tam-is, gasinaw, 

ug kon imong kan-on, pilit.


makpahiubos usab diay kining

kon kita manumbalay unya 

giiway ra pod bitaw sa usa ka

panulay, busa mopauli kita sa

atong balay, wala pay away.


KAPYOT

 mokapyot kos imong abaga

mosandig kos imong dughan

mogamot kos kalibotan

nawa ang akong kahadlok nga

mapalid kos kusog nga hangin

Tuesday, November 27, 2018

GAWASNON NGA HUNAHUNA

mao pa lang
ang akong pag-abot ning
inyong kalibotan

tanan dili ko kaila
bisan sa usa ka butang
wala ako'y
nahibaw-an.

dili ko kaila ang akong
inahan
wala ko pa nahimamat
ang akong amahan
kinsa ba ang akong igsoon
kinsa ba ang akong kadula
naa ba ako'y silingan?

pagbisita

wala ka baya
nako kalimti
ania ako mibalik
na usab
aron pakigharong
kanimo

molamano pa ba ang
kamot sa patay
sa buhi nga
ania ang kamot usab
nagsalimuang?

Saturday, October 27, 2018

SEPALOK

ang pagbuswak sa
pyous sa kahayag
ang pagbukhad sa
payong sa ulan
ang pagpangabli sa
bentana
ang pagdagkot sa mga
suga
karong gabhiona

didto sa sulod sa lawak
humot ang dama de noche
napalong ang kandela
sa altar sa hangin

ang pagkuha sa pugong
sa imong buhok
ang pagkahulog sa imong
tapis sa salog

ang kahinam nga hilabihan
ang kinabuhi nga walay kataposan

diha sa imong pagbilangkad
ako misulay sa pagtugkad.