sagbot

sagbot nga tugsoy sa panganod

morag mga dila morag labaw pa sa dila



sa atong dili matagbaw nga kaulag

sa atong mga damgo kabahin sa mga sagbot



sagbot sa higdaanan diin kita gahubo

diin ako nagpagahi sa akong mga bukog



sagbot sa atong mga hunahuna sa atong

mga buhok nga nangabwagsa sa atong



pagbirabira sa atong mga kahinam sa

sulod sa lawak nga nagdilaab sa mga kalayo



sa atong mga unod. Sagbot ang atong mga

kasingkasing nga dagkog mga ugat nga



naglikos-likos sa atong mga pagbati morag

mga bagon sa punuon sa dakong kahoy nga



balite. Sagbot sa atong mga tungatunga.

Sagbot sa atong mga ilok. Sagbot nga morag



mga tudlo nga nanghipos ug mga kaguliyang.

Pagkahuman sa dakong sunog sa mga sagbot



didto sa kaumahan sa atong pagbati, magpa

bilin ang mga abo. Sagbot usab ang mokaon



niini. Tabonan lang gihapon sa mga sagbot.

Sagbot ang tanan. Apan pagkaanindot kon



tan-awon sa layo ang mga sagbot. Pagkalun

haw. Pagkamalinawon. Pagkabugnaw baya.