sphinx

ang tigmo sa kinabuhi

mao ang mga pangutana

nga ikaw lamang ang nahibalo

sa saktong mga tubag

sa human ko ug basa kang

oedipus naghinuktuk ako

sa among beranda: mas

maayo pa unta ug wala niya

tubaga ang pangutana sa Sphinx

mas maayo pa unta ug wala

na lang siya mangutana

mas maayo na lang unta ug

nagpuyo na lamang siya sa

usa ka dakong bakak didto

sa iyang palasyo kauban ang

iyang nanay nga iyang napangasawa

ug ang larawan sa iyang tatay nga iyang gipatay

mas hayahay pa unta ug wala na lang siya

mopanaw sa laing dapit aron lang unta paglikay

sa iyang sakit nga kapalaran. Mas maayo pa unta

ug nagpaabot na lang siya sa iyang dangatan.

tan-awa unsa ba ang nahitabo kaniya?

hari nga nabuta, nagpakilimos sa kadalanan

nag-inusara, nagpunay ug pangayo ug

pasaylo sa mga sala nga unta wala niya mabuhat

mas maayo pa unta ug gibuhi na lang ang Sphinx

gilawgan sa mga bakak, sa mga pasalig

kay usahay, sa kamubo niining atong pagpapakabuhi

mas maayo pa unta ang bakak kay sa tinood

kon ang kamatooran mao ang mopatay kanako

ari na lang ako sa bakak nga makabuhi kanimo

pagbantay sa akong kamatooran patyon ka niini

ug ang imong mga bakak akong lawgan sa laing

pang mga bakak, aron lamang kita mabuhi

kitang duha, kan-on ta ang tanan. Tunlon.

kay unsa pa ba ang bili sa kamatooran kon

patay na kita? kumpay alang sa patay nga kabayo?