Sunday, May 27, 2012

matag takna sa pagbudhi banosan sa mga saad sa pag-unong

matag adlaw
anaa ang pagbudhi

apan ang kagabhion
naanad na nianang
kangitngit

wa nay kalaay o
kahadlok

siya mao siya
sa matag oras nga
pagbudhi

milalin na ang
mga pagbasol

matag oras sa
pagbudhi banosan

kini sa balikbalik
nga mga saad

sa pag-unong sa
paglitok sa pulong

nga hangtod sa
atong ikamatay

diha sa kinatumyan
sa kahangtoran

ang matag takna
sa pagbudhi nahimong

pamahaw ug panihapon
damgo diha sa katulugon.

subay sa sulog sa dagat nga hunahuna usa ka gabii niana

gikuhaan mo ug hulagway
ang matag suok ning balay

ang nawong sa kisame ang
dughan sa mga salog

ang gitagoan sa mga lawak
ug mga bongbong nagsugod

na ug panghunghong gihadlok
ka sa pag-abot na unya sa

takna sa pagbiya iyagyag kini
sa nigo nga naghambin pa gihapon

sa mga tipasi sa inyong kagahapon
wala ka maghandom nga dunay

mausik wala na nimo damha pa
nga duna kay mahayan

nahinumduman mo ang gipangtaktak
sa gagmayng mata sa basnig nga

buhi pa kaayo, nagkisikisi diha
sa sulod sa tiyan sa kubkuban

gamit ang suga sa bulan
gilantaw mo lang kining tanan

wa kay gidakop og gihikap man lang
gibiyaan mo ang siling halang.

Tuesday, May 22, 2012

dili kamaong mobalak ang tawong malipayon

dili kamaong mobalak
ang tawong
nagmalipayon


sagad dili niya ikapanulti
ang hugot nga gakos
sa iyang uyab
sa iyang dughan
samtang gitamnan og
halok ang
tanan niyang kalawasan

dan-ag ang iyang nawong
sa tanang kabuntagon
balewala niya ang
yabag niyang
awit sa kaadlawon
ang tanan niyang gabii
bulawanon

kon imo siyang ingnon nga
nakasulat kag balak
gabii
maglibog siya
ngano

kon pangutan-on nimo siya
kon gusto ba niyang
basahon nimo ang imong
balak sa iyang atubangan

tubagon ka lang sa usa ka
tam-is kaayong pahiyom
dayog biya
padulong sa hardin
lantaw sa bag-ong
pagpamusyak sa
kabulakan

Monday, May 21, 2012

paingon sa dagat

ang awit sa kagabhion
giduyugan sa kusog kaayong
ulan

miapil ang atop
ug ang mga bato
sa daplin

ikaw lang usa
ang dughan mo
walay kaba

unsa ba'y buhaton?
kuyog ka
 sa bul-og sa tubig
diha sa
suba nga mihubag
gipangita ang
iyang buthanan
paingon sa dagat

tagay sa kagabhion



dili na man kinahanglan nga
maayo ka
wa na kinahanglana ang paglakaw
nga magluhod ka
unsaon ba ang paggamit sa
napaknit  nga tuhod?
dili na tas-on kaayo ang paghinulsol
misalop na ang adlaw
mitaob na ang ang kangitngit
ali na
daghan na ang nagpaabot
sa atong dakpanay sa daplin
sa baybayon
ayaw pagsubo
ayaw na pagsugilon bahin niini
dili na kana nato kinahanglan
lantawa ang mga langgam
namauli na sila
pagkanindot nilang tan-awon
sa pagpapas sa kahayag
dali na
dili maayong magtagad ug dugay
kanato
ang kalipay 
nga atong saluhan sa
atong tagay
lantawa ang bulan
bulawan
nga pahiyom
 

Sunday, May 20, 2012

sa usa ka hugna nga panahon

wala ko'y gustong usbon
ning kalibotana wala sab

ko'y usbon sa akong
kaugalingon kay miabot

ako nga usa ka ginhawa
ug mohawa ako nga usa

ka ginhawa, wala akoy
dalang unod o bukog

ang tanan akong nakita
ug gilantaw ko pag-ayo

wala akoy gisulti sa dihang
nabali ang kahoy sa dihang

namala ang suba sa dihang
nabuak ang bato sa dihang

mingitngit ug mihayag ang
kalibotan wala ako nangilabot

usa lamang ako ka layaw nga
igo lang nga milabay sa usa

ka hugna sa panahon nga dili
ko gayod usab maangkon

sabat

nagkataykatay ang
kamatayon sa
katipunan

morag kadena

nasuko ang akong
asawa
nganong dili ko
mosabat
sa pangadye

akong gilitok
pag-usab ang
sulti ni Tatay

"kay ngano inday
kon mosabat ako
mabanhaw ba ang
mga patay?"

Saturday, May 19, 2012

managlahing kalibotan

mibalak intawon siya
pinili ang mga pulong
gitimbang, saktog kadak-on
nindot, morag mga perlas
ug brilyante
gilak, misamot ka gilak
sa dihang
nahuman na kinig
panday sa iyang
dila

gibasa niya pagkagabii
sa atubangan sa iyang
gimahal,

nga wa gyod mahimuot
sa iyang
gisugyot, kadtong gilak,
mas gilak pa
sa bulan,

way puangod
paghuman ug inom
unya lad-ok
mibiya sa gilingkoran
unya dayog
pabilin sa katapusang
mga pulong,

"gayamayama na pod
kang jawaa ka!

di ta kakwarta ana!"

Thursday, May 3, 2012

salamat O Ginoo sa wala nimo Paghatag

kon di ihatag
tungod kay kini dili para imo
tungod
kay kon maimo na kini
maghatag lang kinig
kasakit puhon
kanimo
ayaw kalimot
ang hunahuna sa Ginoo labaw pa
sa pito ka libo ka tuigan
ang imoha
pito lamang ka segundo
busa
ayaw kaguol
pasalamati ang Ginoo
nga kanunay nagabantay kanimo
kay Siya man
ang mas nasayod
kon unsa gayod
ang makaayo kanimo.


Tuesday, May 1, 2012

hapdos nga kamatooran


 http://images.sodahead.com/polls/000803139/polls_myspacecover_4630_37115_poll_xlarge.jpeg

kasagaran sa
kamatooran
sakit. Ngotngot morag ngipon nga
daot.
mag-agulo ka kasagaran sa
kasakit.
unya walay makatabang
busa
magpakahilom ka na lang
sa daplin.
daog ka.

kini sila
dili mga dayo, dili mga bisita.
nagpuyo kini kanimo
sud sa imong
panit
nga bisan unsaon nimog
lugod
di gayod matangtang

hinginlan mo
morag mga maya nga
bungol

dakpon mo aron imong
tuukon
idlas, danlog
dili mo
mahawiran

kuyog mo  kini kanimo
kanunay
morag anino

dayag kini
morag adlaw sa langit
pagkainit

kon dunay mohisgot nimo
niini
magdugo ang imong
kasingkasing

gusto nimong sumbagon
ang dunay
kaisog nga
mokatawa sa imong
atubangan

abi mo bugalbugal
wala lang god matuyo
ang paghisgot

daghang katuigan ang nausik
sa imong pagbangutan
apan wala na nimo kini
masumatotal

abi mo ug walay pulos kining
mga sakit nga kamatooran
gisulayan na nimo kini og
pagutom
apan wa jud makoryom


sa kataposon wa mo damha
nga kining
mga sakit ug ngotngot nga kamatooran
mao ra usab
diay ang nakapalig-on kanimo
nakahilos sa imong
kahuyang
unya sa dihang miabot ka sa
lugar diin wa nay agianan
silang tanang ang
nakaluwas kanimo

gitunol diha kanimo ang
imong gipangita nga kagawasan