hustisya

duna'y nagmaisogon nga miingon
nga kadto kunong
mipatay sa 57 ka tawo apil na
niana ang mga bata og mga babaye
og mga mabdos
og mga magsisibya og magsusulat
og bisan gani kadtong mga wala'y labot
nga igo lang milabay

pagatadtaron og 57 ka piraso
og ihatag sa mga tagtungod
isip bayad
aron makab-ot ang hustisya

kon tinud-on og bayad
sa tinood lang
kulang pa kanang pagtagod-tagod
sa iyang lawas

kay mismo ang demonyo naulawan
og
nalupigan na sa iyang kadaotan.

sayod na ako niana

sayod na ako niana

sayod na ako niana
walay makaon nga balak
busa ang akong mga balak
wala nako gihimong pan
og bino

mga trapohan lang kini
sa akong mga tiil
mga sagbot lang kining
akong gisilhig
sa matag hapon
mga kogmo lang kini sa
akong ilong
mga muta lang kini sa
akong mga mata
mga dalikdik lang kini
sa akong likod
mga katol lang kini sa
akong palad
mga pangagho lang kini
sa akong kagabhion
mga luwa lang kini nga
akong gituhi
diha sa kilid sa akong
katre og sa bintana

dili ko kini
pakamatyan.

ang gidili

ang gidili

adunay talan-awon.
nakapabukal sa iyang dugo.
mihunat og bomba
ang kasingkasing.
misiga ang iyang mata
morag adlaw sa kwaresma.
mikitiw ang iyang mga tudlo.
ang kamot wala palupig.
nanguot.
ang laway mitulo
ang dila migimok.
wala papiri ang hunahuna
mikayab morag
kurtina sa hayhayan
nga gitaban sa kusog
kaayong hangin.
mibaha ang pagbati.
dunay migahi.
dugay.

dunay miboto nga walay
tingog.
pagkalami.

ang gidili.

ang hukom sa usa ka pahiyom

ang hukom sa usa ka pahiyom

dako ang pader nga
mibulag nianang

mga tinood nga panghitabo
og dili tinood

ang akong kinabuhi
gialihan sa akong mga
mugna

dako kaayo ang kawanangan
nga nagtiwangwang

sa ilang tunga,

ayaw ako'g taksa sa akong
mga balak

wala ka masayod kanako
og wala usab ako sa akong mga balak

lahi ang imong nabasa
og lahi ang akong
gibuhat

nagmugna ako og dakong lanaw sa mga luha
apan wala ako
misalom niini

nadamgohan ko ang tanan
apan sa akong paghimata

gigakos ko ang akong kaugalingon
init ang akong mga kamot
og nag-ulpot-ulpot ang akong kasingkasing

giatubang ko ang samin
gitutukan ko ang akong kaugalingon

nakahukom na ako
sa usa ka pahiyom og dili ko na kini bawion.

wala'y makabuot sa kalipay

wala'y makabuot sa kalipay

wala'y makabuot sa kalipay
kon kinsa'y iyang gakson sa iyang
pag-abot diha sa usa
ka pultahan
diin kini nagpaabot nga nagtindog

nakita nako nga gusto niyang ikaw ang
gakson

apan baga ang akong nawong
og ang akong mga bukton dili gayod papugong

ako siyang gikawhat diha sa imong
dughan

wala usa'y makabuot kanako
kon ako maglipay

kinabuhi ko kini og ako ang magdala niini.
gipili ko ang kinabuhi
ang kalipay
ang katawa og ang paghudyaka

ako ang magbuot. ako lang gayod.
dili ang adlaw, dili ang mga bitoon.

labi na nga dili ikaw.

shariff

shariff

sa airport
nagdula ang iyang "bunso"
guyod-guyod sa dulaang itoy
samtang si shariff
nagtan-aw

mitulo ang luha
kay og wala pa unta siya
malangan sa iyang pag-adto
sa iyang korte sa shariah
nahiapil unta siya
sa mga patay nga
gimasaker
didto sa ilaha

dili pa gayod diay niya
panahon

iyang gihagkan ang iyang
ikaduhang asawa
nga tupad kaniya
nagbitbit og usa ka karton
nga red ribbon nga
iyang pasalubong
sa iyang ig-agaw
nga mangadadato

tungaon

tungaon

tungaon mo ang imong
kaugalingon
sama sa usa ka papel
nga gigisi

ang katunga imo
ang katunga iyaha

kon asa ang bakak og tinood
sa katunga
sulayi og tan-aw
kon asa ang tinuluan
sa dugo sa
iyang kasingkasing
nga samdan

pagkahuman
dili na nimo kinahanglan
pa nga siya
ilailahon

kahibawo ka na
bisan og dili pa ihatag
ang iyang ngalan

pagsalimuang

ang adlaw og ang gabii
makita mo ra
sa iyang nawong nga nag-usab-usab

paglingi niya kanimo
atua mikuyog
ang kagabhion

ang kaadlawon nagpabilin
gihapon diha
sa kaiihion niya nga
pus-on

ang udtong tutok
anaa diha sa
pagpiyong sa iyang
mga mata

nakasamad na kini
sa pipila ka hangin
nga milabay

ulan sa alas dose
kilat sa ala una.

ikaw nga akong gihandom

ikaw nga akong gihandom

nadungog ko ang awit sa mga tamsi
nga nasapawan sa tuktugaok sa mga sunoy
karong buntaga,

dunay kahayag nga misuksuk sa mga giwang
sa bongbong
misulod lapos sa akong lawak,

nadungog ko ang pag-abri sa pultahan sa kusina
og ang mga tunob nga migawas sa balay
ning sayong kabuntagon,

apan sa pagkakaron, bisag sa karon lamang,
dili na una ako mag-ambat,

nindot ang akong damgo bahin kanimo
og dili pa ako andam nga kini akong putlon,

padayon ako sa pagkatulog hangtod na kini
sa kaudtohon,

ikaw nga akong gihandom
gidamgo
gipanamkon

nga akong gisuka og akong
gustong kan-on
pagbalik

sa atong pagtoo

sa atong pagtoo
ang mga gipamatay og mga
nagpakamatay
wala mahiluna

sa atong pangagpas
sila wala'y saktong pinuy-anan

busa kasagaran kanato
og sa ilang mga hinigugma
og bisan mga kaila lamang
og dili gani mga
kaliwat, nagbangotan
nanagbakho, nagsyagit nga unta
makaplagan ang
hustisya og kalinaw
sa dayon

pagkamabaw baya nato
wala ni usa kanila ang mibalik
kay sa akong pagtoo
mas nindot didto og kining lugar ta
dinhi's walog nga luhaan
layo ra kaayo
kon itandi sa ilang nahimutangan

usahay makaingon ko nga sila
baya dagway ang nanghilak tungod
kay ilang naaninaw ang mas sakit
og makalisang pa nga atong dangatan
sa ugma damlag

miabot ako sa usa ka paghukom
nga dili ako mohilak sa ilang kamatayon
nga mas maayo pa nga
ako magpuyo na lamang diha sa
lagkaw sa pagpakahilom

didto's airport sa mactan

sa pagkapaspas nga pagdagan
sa panahon
wala nako maalinggati ang
usa ka tulabong
nga nagtindog sa kilid
sa runway
atbang gayod sa akong
lingkoranan
og sa akong gamay nga
bintana
ngakatinutokay mi
mora bag miingon
nga kaniadto ila kining
lugara og karon
wala na

milupad ang eroplano
nabilin ang tulabong
og ambot og asa na kaha
kini siya mipaingon

didto sa chicago unahan sa turno

" i live alone
i get used to it" bungat ni amando
sa among unang
pagkahibalag sa facebook chat

"you look like
cardinal sin in your outfit"
maoy akong starter
sa conversation

" you're funny" balos niya

"you look more of
a very sinful cardinal"
akong retort

"i am celibate
in the morning" maoy iyang
hint

mi-pick up ko sa iyang
lead

"so how are your
sinful nights?"

sus
nakialam na pod ko

" oh, i like it here"
na-imagine nako
ang iyang
octopus fingers


"don't you get
lonely out there?
i can't live alone
i will die" midrama
ko.

" i die everyday
it's just part of
my art" misungag
ang iyang
pagka-visual artist

"do you write poems?"
nangutana ko

" i don't
though i
know i can" morag
honest answer man sab

medyo misimang
ang sunod nga
conversation
morag dili
man dagway to
para ako

daghan dagway'g
ka chat ang
dili ingon nato

(ha ha ha
ayaw kasuko amando ha)

kalit bang mi-comment
og

"next time use the condom!"

end of the chat.

hinay nga ulan sa sayong kabuntagon

naguba na ang naandan
gisuka na ang karaan

iyang gipamati ang tingog
sa ulan
ning sayong kabuntagon

mibagting ang kampana
namati siya
gilansang ang iyang mga tiil
sa salog

nag-iyak ang itom nga itoy
sa ilalom sa lamesa
tupad sa ok-ok nga mihay-ad
nga patay na

nanuhot suhot ang bagotbot
sa ulan
sa mga kang-a sa iyang buhok
kahulugon ang iyang mga mata
kuyog sa pipila ka lugas
sa iyang mga luha

abi niya og ang kalipay maoy
mahimong bulak sa kagawasan
naunsa ba hinoon
nga nahimo man kining
bukog nga misabod sa iyang tutunlan

ang kalaay

ang blanko nga pader
kon magdugay ka sa iyang tungod
pagbantay kay
sama sa usa ka dakong wanang
suyupon ka

mahimo kang usa ka mural
og ang imong gipaabot nga
jeep paingon sa talamban
igo na lang mga molabay

adunay bata nga molili sa
bintana
manguhit sa iyang nanay
og motudlo kanimo
nga usa na lang ka anino
nga nagbitay sa punoan
sa lumboy didto
sa kilid sa mienteryo

ang balak sa tapulan

walay ilhanan walay hulmahan
walay nawong nga kabutangan sa iyang ilong
walay gigikanan walay padulngan
nagyaka nga mga pulong
nagbilangkad nga mga silaba
mitutok midungo
mihangad nangisog
miiyak mibakho nahilom
gisagpa gihapyod gustong sabton
apan dili masabot
walay utlanan walay labat
dili mangilabot
akong gidakop wala midagan
akong gituok wala molumpat
akong gihagkan walay kaulaw
miawat kay wala matagbaw
akong gikumot maong nagawsan.

sa kalibotan sa mga pasyonista

sa kalibotan sa mga pasyonista

manghagdaw ko
sa basakan nga nangliki ang
mga ngabil
sa tumang kauhaw

manglimas ko og mga
lam-aw nga
walay kisaw

mutungas kos bungtod
mangitag salag
sa manatad

sak-on ko ang kahoy
nga wala'y mga dahon

manguha kog tuway
og saypo sa hunas nga
katunggan

mangayam ko sa lasang
nga upaw
pangitaon nako ang usa
nga walay sungay

baktason ko ang
desyerto nga ilang gihisgutan
nga gikamatyan sa
kadaghanan

akong alimahan ang iro
nga piang
og akong pakantahon ang
tamsi nga amang

akong adtoon ang
payag nga hirig
akong subayon ang
bungtod nga
samdan

mokuyog ka ba kanako
paingon sa dagat
nga gadilaab sa kalayo?

Deutsches Requiem,

Deutsches Requiem,

iya na kunong nasabtan
kaniadto pa
sa daghan na kaayong
milabay nga katuigan
nga ania dinhi sa kalibotan
nagpasad ang mga
lugas sa mga possibilidad
sa Impyerno:
ang hulagway
ang nawong
bisan gani ang pulong
ang kompas
ang tarpaulin
ang advertisement sa sigarilyo
ang baso
ang usa ka sulat

kining tanan makapabuang
sa tawo
kon dili siya makat-on anang
paghikalimot

kon sa matag adlaw
mao na lang kini ang sulod sa
iyang hunahuna....

Borges

Borges

ang uban diha sa ilang
damgo
makaingon nga siya usa
na ka buang
usa na ka tawo nga nagdamgo
nga siya nagsalimuang
apan iya lang gihapong
damgohon ang ilang
panaghigala kaniadto
sa karaan nga lugar
diha sa nawong sa usa
ka sinsilyo

kon ang tanang tawo
magdamgo og dungan
sa matag adlaw og
gabii

asa naman ang matood
ang dili matood?

ang kalibotan ba og
ang pulong lamang?

hingangha

hingangha

moabot ang panahon nga
dili na nako matuhog
ang kamatooran
diha sa gawas sa akong
lawas

mao na kana ang panahon
nga imo akong
sininaan og pakan-on

apan dili ako mahadlok
niana
aduna ra gihapo'y kataposan
ang tanan

magpabilin diha sa akong
pamilosopiya
ang damgo og ang kinabuhi
kuyog kana
bisan asa

mobalik ra gihapon ako
sa yano nga damgo
gikan sa mga naglukotlukot
nga mga panglantaw
sama sa mga balod sa dagat
sa bagyo
og sa mga kusog kaayong
hangin

sa pagsagol sa kasubo
og sa pag-ampo
moabot na ang panahon
sa pagkahibulong

mahingangha ta.

didto

didto

abi nimo og ang mga dayag kaayo
mao ang dunay daghan kaayong gipakita?
sama nianang kahoy nga daghang dahon
nga gihapohap sa mga tudlo sa adlaw
ayoha pagtimbangtimbang
kay mas daghan ako'g nakita niadtong
mga nagpahipi lamang
mas daghan ang akong nadungog niadtong
mga nagpakahikom lamang
mas daghan akong nakat-unan didto
sa wala nako makita og wala sukad-sukad
nako mahikap
mas daghan sila didto mas bibo.
kay sa akong naagian
ang mga dayag usahay mao ang mga bunga
sa mga pagpamakak
og busa dili na kini sila kasaligan.

sa imo inyong paglakaw sa kinabuhi

sa imo inyong paglakaw sa kinabuhi

ayaw og salig nianang
imong nadungog nga ilang gisulti
pamatia ang wala og dili
nila isulti kanimo
kay sagad mao kana ang
tinood

ang gibutang nila sa lamesa
ila na kanang gipili
ang ilang gibutang sa gawas
aron makita sa mga nanglabay
ila na kanang gisala

kon makapanahon ka
kanang dili na sila makabantay
sa panahon sa ilang tingtulog
sulod sa ilang lawak
abrihi ang kaban nga karaan
pagawsa ang ilang gipangpriso didto
og pagkahuman
ayaw na og pananghid
balik sa imong agianan

karon nga nabuhat na nimo ang
angayan nga buhaton
panirado na sa imong pultahan og
mga bintana

magsugod na ang gubat sa duha ka
kalibotan

leverette

leverette

ang kapuol maoy nakahatag niyag
kaisog

kon siya ang masuko
mahiwa jud ang langit

mangliki ang yuta
og nahadlok ko og unsay

dangatan nako mao nga
aron walay samok naka

bungat kog "awesome"
nga iyang nadunggan

og kana maoy
nahimong sinugdanan

sa among panaghigala.
pagkasalbahis gyod diay unta niya.

alif

alif

ako ang aktor
sa maong estorya.
ang nakapait
kay dili ko
tinood didto.
sa pagsugod
nagbakho ko
tungod sa kamatayon
sa usa ka babaye
nakong gipangga

dunay miabot nga
nakigsandurot nako
usa ka magbabalak
nga taas kaayog
panglantaw sa
iyang kaugalingon

naghisgot siyag
usa ka haligi
diin didto nagsugod
ang tanang planeta

kapoy og pamati
sa mga butang
nga dili nato matuhuan
apan aron lang
mahuman ang
tanan akong
gipahulam ang
akong dunggan
akong gidapion
sa iyang dughan

didto didto nadungog
ko ang tanan
didto didto nabati
nako ang
sinugdanan
sa kalibotan

pagpanimalos

iyang gipatik ang imong mga pagbudhi
diha kaniya sud sa iyang kasingkasing

matag adlaw iya kining gilalik sa iyang alimpatakan
og matag lantaw sa iyang mga mata niini dili na siya mohilak

ang mga habol og mga alugnan naa lang gihapon sa sakto
nilang butanganan
wala'y nausob sa paghapnig sa banig og moskitero

sa matag gabii nga ang imong mga kamot mohimas sa iyang lawas
sama sa hangin nga mihapyod sa mga dahon sa kakahoyan

gibati gihapon niya ang imong kainit
kon mohalok ka na kaniya iyang ipiyong ang iyang mga mata

og sa panahon nga hapit na nimo matugkad ang kinailawman sa tinubdan sa himaya
diha sa pagsalimuang nimo dapit sa tungatunga

makasyagit siya sa tumang kalipay
og mabungat niya ang ngalan ni Urai.

tulo ka dili matago

tulo kuno
ang dili matago

ang adlaw ang bulan og ang kamatooran.

gitagoan ko ang ikatulo
sa tibook ko nga kinabuhi og hangtod na kini sa akong ikamatay
tagoon ko lang kini gihapon
sud na kini sa kinailawman og
kinauyokang lawak
sa akong kasingkasing

ako ang unang nakakita niini
og dili ko na gayod kini malimtan
ngil-ad ang iyang dagway og malooy ako kanimo kon ikaw
makakita unya niini

ayaw pamugos
utang buot ayaw intawon pamugos kay basin og na unya kini ang hinugdan
sa imong hinanaling kamatayon

gusto ko nga ikaw mabuhi pa
sa sunod nga usa ka gatos ka tuig
gusto ko nga ikaw
moabot nianang imong pagkahingpit

kon gusto ka nga mahisama kanako
tan-awa ako
nagpahiyom ang mga ngabil apan ang
kasingkasing nagdugo
adunay hubag
apan walay buthanan

walay tawo

walay tawo

sa wali ni fr. agura
didto sa haya ni atty mendoza
nga among silingan
mora kog naigpot sa
iyang punto nga
walay tawo nga gihaya
nga ang gihawiran
sa iyang duha ka kamot
mao ang iyang
bankbook

paghukom

paghukom

ayaw kog ingna nga kitang duha
mahisama sa away sa lubot sa kalaha
og sa abaga sa kaldero
nga naglalis kon kinsay
puti nilang duha?

sa pag-away sa bintana og sa
pultahan
kon kinsa'y dagko nilag mga mata?

sa pagbungol sa halas og sa
uhipan
nga sila puros mga pangag?

ayaw akog hukmi
aron dili ta usab ikaw hukman

ayaw akog kataw-i
kay ang akong buhakhak
dili kamaong
mosukod sa iyang balos
ugma damlag

dear diary,

hayy, nabuntagan na sab kog hinimo og balak.
hilig lang jud.
bisan og miingon na si leonor
nga walay hinunghan
ang akong mga balak,
ok ra na sa ako.
karon naghimo na pod kog balak
kabahin
sa gugmang nagusbat
kabalo kong
walay lami, apan gisulat lang nako
gihapon.

namati ko sa gipsy king
spanish rumba, flamenco ang tokar
sa you-tube

nagchat pog mi ni karla nga
mrs. jayson na sa amerika
nagkita na jud sila sa iyang papa
nga naminyo na og lain
didto sa florida.

sulaton na pod nako ang kabahin
sa mga kaminyoong
nangaguba. hayy, kalooy sab sa mga
anak nga nagkatiwalaag
sa mga mama nga nabilin sa pilipinas
nagsuroysuroy sa
boulevard
nagtan-aw sa pagsalop sa bulan
sa baybayon


gusto unta nakong mobirada
og gitara
apan tag-as naman kaayo kining
akong mga kuko.

wala koy direksyon.
mora kog hangin nga walay kapaulian.

mora kog panganod
naglutawlutaw.

ayaw sabta nga
nagsubo ko.

sige, ugma na pod. sicerely yours.
ako lang gihapon.

nakasabot ko

nakasabot ko

nakasabot ko
nga aduna ka usay kakulba mahitungod sa ugma
bitbit ang duha mo ka mga anak
og ang imong asawa
diha sa maryland

lisod ang trabaho
nihit ang panginabuhi
diha sa lugar sa mga puti

nakasabot ko
nga kapoy ang magsigi og balhin-balhin
ang kakapoy
ang kalapoy sa lawas nga magsigig hakot
sa mga butang
pahaluna og pagkaugma-damlag
balhin na usab
sakay sa trailer
subay sa taas kaayo nga dalan og
sa walay klarong padulngan

nakasabot ko
niining tanan og gipasaylo ko na ikaw nganong
wala ka na maghimo og mga balak


nakasabot ko nimo
gikan na ko diha og dugay ko nang
gipapas ang akong mga tunob
mao nga dili mo
na kini makita

pakighimamat sa usa ka bongbong samtang nalibang

pakighimamat sa usa ka bongbong samtang nalibang

nindot ang imong nawong
bisag walay mata og walay ilong

mora bag
dili ka kamaong manghilabot

samtang ako ania
nalibang

nagdiskarga sa akong
gikaon

giwagtang mo
ang dili ko ganahang makita

didto sa gawas
sila nga sama kanako wala na

magtug-an sa matood sila nga
mitago sa ilang mga kasub-anan

diha sa kusog kaayo nga mga
buhakhak

og katawa og pakighimamat
nga kunuhay

gimingaw apan wala baya
nga kunuhay naghandom

nga unta ang tanan maharuhay.
migawas ra gayod ang dakong tubol

sa akong lubot. Ang sunog kong
tangtangon mao

ang bukog sa akong
tutunlan.

maypaka bongbong
kay wala kay tutunlan
wala kay lubot.

nobyembre 1

nobyembre 1

wala ko kadayon og
inom sa akong kape

nakita ko ang kalendaryong
wala mapaksi ang bulan sa

oktubre, og morag dili
ko mahigop ang kainit sa

kape samtang dili
ko magisi ang miaging bulan.

pagkapaspas gayod sa
mga adlaw og bulan og akong

nabati nga ako nabilin sa
usa ka giagop-op na nga panahon

sa natay-an na nga mga pagbati
sa mga gilumotan na nga mga

handurawan.
mora bag ang akong usa ka tiil

gitangag sa usa ka buaya
didto sa suba nga lubog og karaan

samtang ang akong usa ka tiil
mikaratil og dalagan

nakita ko ang lubi sa
likod sa among kusina nga

gitanom ko kaniadto
nga diin ako pa ganing gihikot ang

akong itoy ga si Koykoy
nga kanhiay rang gibitik sa

mga palahubog sa barangay Uno.
pagkadaghan na sa lahing

adunay usa nga napadpad
sa kilid sa pensa gitugkan na

og mga dahon.
adlaw sa mga kalag karon

modagkot kog kandila apan
sa dili ko pa kana buhaton

imnon ko una ang kape nakong
kalit rang nabugnaw

kon nasayod ka lang

kon nasayod ka lang

kon nasayod ka lang
andam na ako
dugay na kaayo bisan pa gani sa imong paghinanok
giandam ko na ang
paghubo sa akong mga handurawan

andam na ang akong kaugalingon sa mga pulong
nga dili nimo isulti kanako
akong dawaton ang imong pagpangyam-id
og dili na ako magpalimos pa sa
mga katin-awan

wala ako'y sala
kon ako mamahimong ako.
dugay ra akong giinitan sa akong mga sapot.
gibahoan sa akong karsones.
dugay ko nang gustong ibton kining mga butones.
dugay ko nang gihandom nga kining mga liston sa akong sapatos
ako na nga pagatangtangon
ang akong mga medyas gilumutan na pag-ayo.

wala ako'y labot kanimo og sama nga ikaw wala'y labot kanako.
dili ako mangayo sa mga bulak sa imong pagsabot.

gikapoy na ako, og gusto na nakong lakwon ang akong
paingnan.
sakit na ang akong mga abaga sa pagpas-an niining
bug-at kaayo nga kamatooran
mikurog na ang akong mga tiil
og samdan na ang akong mga kamot niining mga gapos
sa akong kapalaran
daghan nang kawras ang akong utok.

pagkakapoy ba sa kinabuhi sa iring
diha sa nagbaga nga atop sa udtong tutok.

daghang salamat sa imong pagpangga.
sa imong pag-amoma, sa mga tasa sa kape nga atong giinom
niadtong imo pa akong gihigugma.

dili ko ikaw mabasol. si bisan kinsa sa imong gipuy-an
alimootan gayod. Bisan gani og ako.

daghang salamat. sa pipila ka tuig, wala kay angay nga sabton.
wala ako'y angay nga ipasabot kanimo.
Ikaw nga buta. Og ako nga nagpakabungol.Ako nga amang.
og ikaw nga angol.

kon nasayod ka lang unta.
wala ko na lang unta ikaw higugmaa.

alot mahay

alot mahay

morag gi-lawn mower
ang kilid sa ulo sa bata
gitangtang ang bangs
gipapuok ang pagputol
sa iyang taas nga buhok
manghod na gamay sa upaw

kaiyakon na gyod ang bata
nga nagtan-aw sa samin
sa iyang dagway apan ang
iyang amahan ang nagbuot
sa tanan: sa style sa iyang
alot

og sa tanan tanan gayod
lukop na kana sa iyang
gugma og panginabuhi

ako nga naglingkod sa usa
ka bangko sa kilid sa
barberohan
nagpaabot sa akong turno
nakaingon og

mao na seguro kana ang
gitawag og alot mahay
sa usa ka
palpak nga amahan

puhon aduna na usa'y
bayong-bayong nga
molayas
mag-adoy-adoy
bukog sa tutunlan
usa ka lubi nga buang
diha sa pungpong

og puhon
aduna na usa'y tigulang
nga amahan nga
mamatay og sayo
sa dili na makaya
nga kunsumisyon

hayy,
balikan ta ang larawan
sa alot mahay:

nagmug-ot ang bata
gipaak ang dila
nagpatulo og luha
midagayday
diha sa iyang lagom
nga aping

diha sa gagmayng mga ugat sa dahon

diha sa gagmayng mga ugat sa dahon

sa usa ka lugas kuno
sa balas
makita ta ang
kalibotan

gani kon wala
ako masayop
malantaw
ang uniberso

gisulayan ko
ang lantaw ang
gagmayng mga ugat
sa dahon

gipangita ko
kon asa ko dapit
makita ang
matood nga gugma

misamot
ang akong kalibog

S.P.E.D.

S.P.E.D.

mao kini ang iyang gipakita kanako
nga drawings sa iyang mga gitudloan
nga mga itom nga retarded og emotionally
disturbed kids sa Alabama

ang toong kamot , upat ang mga tudlo
ang wala dunay tulo
morag tiil sa iring

ang usa ka bata morag iring
nga gibidli

gisapotsapot si Ms. Gracia G.
ang most outstanding teacher sa
ZN High School nga karon
nangita intawon og mga dolyares
nga iyang ibayad sa iyang
mga habog nga damgo diri sa
Pilipinas

iyang plano
magtukod og tulo ka storeys
nga balay

sa ubos ang dako kaayo nga
living room
sa ikaduhang floor
ang iyang mama og papa
og ang ikatulong floor mao
ang iyang lawak

duol duol na sa mga bitoon
nga iya unyang kab-oton
og hikap-hikapon

ang kataposang nabasa
nako sa iyang Facebook
mao ang iyang

" I hate this apartment
This is not the place i wanna be!"

og dayog hilak
bakho
og sa akong mga pangagpas
gusto na siyang mouli
balik sa Pinas
aron gakson ang iyang
pinalanggang
Mark-mark.


" sa zodiac, Leo ko kuya
sa chinese Ox" maoy iyang pasalig
kanako
nga siya ok ra kaayo

nga siya dili moatras
anang stress stress
kaya

kaya jud niya ang
tulo ka itom nga estudyante
nga og siya
pa "equivalent to forty students
diha sa atoa"

all in the name of the
mighty dollah!

sayang pod
mas nindot unta og diri
lang siya sa Pinas
apan wala
na siya dinhi

sama sa kadaghanang dunay mga dagko og nindot nga mga damgo
dili kini
makaplagan sa atong mga isla
atua kini sa America

alas 6 sa buntag
palong pa ang mga suga sa ilang gipuy-an
ang iyang mga kauban
sa ilang apartment
naghagok pa

nanaginot sa pahulay
nanaginot sa damgo

"kuya gtg
mag breakfast pa ko"

"bye"

ania pod ko.
naghimo og balak
kabahin sa
damgo sa wala pa ang
akong hagok
sa kagabhion.

mister

mister

kaniadto sa didto pa kita sa sulod
niadtong dako kaayong pader nga
mas habog pas duha ka tawo nga
isumpay, pagkalumo mong tan-aw
on.

hinayon, morag dili makapatay og
langaw, himasa sa mga obra ni Ti-
llich, og ni Plato, lalom kaayo ang
imong panghunahuna og nahadlok
gani ko nga dili ka nako matugkad
busa kon magkakuyog gani ta gikan
sa ateneo, samtang ikaw ang magma
neho sa kagang kagang natong tama-
raw, dili na lang gyod gani ko motin
gog basin og madisturbo nako ang
imong pagpangita sa kamatooran
basin og ako lang unya ang maka-
babag sa imong mga laraw.

ang kataposang nadungog nako nga
ikaw usa na ka pari didto sa mga priso
sa munti, nabalhin sa cebu aron pag
maymay sa mga priso nga inyong gi
tudloan anang paghimo og mga humot
nga kandila.

nakahinumdom ko nagkita ta didto sa
baguio, nagkatagbo ta nga nagjogging
sa karsada nga gatuyoktuyok paingon
sa grotto sa lourdes

Father R. C. ka na, og pagkanindot
bation nga sa atong batch duha lang
kamong napari, dili sa ingon nga palpak
ming mga wala mapari, mga "fallen
mannah from heaven" og ikaw pa'y
pasultion, isip joke, apan alang sa akong
kaugalingon, naa lang koy nakitang bikil
sa sulod didto sa pader,

duna ko'y nabati nga tingog nga nag-ingon
kanako, gawas, gawas diha, palayo, palayo
kanila, duna koy nakita nga kahayag nga
lahi sa kahayag nga gikan sa mga kandila
sud sa simbahan,

og tuod man, miginhawa ko og lalom, miaswat
anang bug-at kaayong kaisog sa pagsunod
sa sugo sa akong kasingkasing, migawas ko
milupad nga morag tamsi nga gisulod diha sa
hawla nga uway,

karong gabhiona, gi-search nako imong ngalan
sa facebook,
naunsa ba nga wala naman ang Fr. sa imong
ngalan, Mr. na man lang,

karon pa ko kabalo, milupad ka usab, sus ginoo,
nakita mo ba usab ang kahayag?

sa akong paglupad, abi gani nako og mahimo kong
kwaknit,
nahadlok ko sa una, apan karon anad na ako sa akong
kahimtang

nga gawasnon.
ayaw lang ko pangutan-a kon malipayon ba ako karon.

kon mangutana ka, basta ang akong tubag, mao lang kini.

gawasnon na ko bay, hagbay ra, bisan gani og gipanggapos kita
didto sa sulod sa ngiob kaayo nga
seminaryo.

Deutsches Requiem,

Deutsches Requiem,

iya na kunong nasabtan
kaniadto pa
sa daghan na kaayong
milabay nga katuigan
nga ania dinhi sa kalibotan
nagpasad ang mga
lugas sa mga possibilidad
sa Impyerno:
ang hulagway
ang nawong
bisan gani ang pulong
ang kompas
ang tarpaulin
ang advertisement sa sigarilyo
ang baso
ang usa ka sulat

kining tanan makapabuang
sa tawo
kon dili siya makat-on anang
paghikalimot

kon sa matag adlaw
mao na lang kini ang sulod sa
iyang hunahuna....

Borges

Borges

ang uban diha sa ilang
damgo
makaingon nga siya usa
na ka buang
usa na ka tawo nga nagdamgo
nga siya nagsalimuang
apan iya lang gihapong
damgohon ang ilang
panaghigala kaniadto
sa karaan nga lugar
diha sa nawong sa usa
ka sinsilyo

kon ang tanang tawo
magdamgo og dungan
sa matag adlaw og
gabii

asa naman ang matood
ang dili matood?

ang kalibotan ba og
ang pulong lamang?

hingangha

hingangha

moabot ang panahon nga
dili na nako matuhog
ang kamatooran
diha sa gawas sa akong
lawas

mao na kana ang panahon
nga imo akong
sininaan og pakan-on

apan dili ako mahadlok
niana
aduna ra gihapo'y kataposan
ang tanan

magpabilin diha sa akong
pamilosopiya
ang damgo og ang kinabuhi
kuyog kana
bisan asa

mobalik ra gihapon ako
sa yano nga damgo
gikan sa mga naglukotlukot
nga mga panglantaw
sama sa mga balod sa dagat
sa bagyo
og sa mga kusog kaayong
hangin

sa pagsagol sa kasubo
og sa pag-ampo
moabot na ang panahon
sa pagkahibulong

didto

didto

abi nimo og ang mga dayag kaayo
mao ang dunay daghan kaayong gipakita?
sama nianang kahoy nga daghang dahon
nga gihapohap sa mga tudlo sa adlaw
ayoha pagtimbangtimbang
kay mas daghan ako'g nakita niadtong
mga nagpahipi lamang
mas daghan ang akong nadungog niadtong
mga nagpakahikom lamang
mas daghan akong nakat-unan didto
sa wala nako makita og wala sukad-sukad
nako mahikap
mas daghan sila didto mas bibo.
kay sa akong naagian
ang mga dayag usahay mao ang mga bunga
sa mga pagpamakak
og busa dili na kini sila kasaligan.

sa imo inyong paglakaw sa kinabuhi

sa imo inyong paglakaw sa kinabuhi

ayaw og salig nianang
imong nadungog nga ilang gisulti
pamatia ang wala og dili
nila isulti kanimo
kay sagad mao kana ang
tinood

ang gibutang nila sa lamesa
ila na kanang gipili
ang ilang gibutang sa gawas
aron makita sa mga nanglabay
ila na kanang gisala

kon makapanahon ka
kanang dili na sila makabantay
sa panahon sa ilang tingtulog
sulod sa ilang lawak
abrihi ang kaban nga karaan
pagawsa ang ilang gipangpriso didto
og pagkahuman
ayaw na og pananghid
balik sa imong agianan

karon nga nabuhat na nimo ang
angayan nga buhaton
panirado na sa imong pultahan og
mga bintana

magsugod na ang gubat sa duha ka
kalibotan

managlahi

managlahi na ang panglantaw nato sa atong tagsa-tagsa ka kinabuhi.

nangibot ka sa salibotbot
gitagsatagsa mo pagkuha ang sakit sa imong mga mata.

nagsakaysakay ko sa duyan
namati sa huni sa hangin gikan sa baybayon

mitaghoy ko
nanghayhay ka

wala ka kaantos miduol ka kanako og
miingon nga "hayy, pagkamingaw ba niining kahaponon dinhing dapita!"

milantaw ka sa dakong wanang
og miiyak ka kay wala pa sukad sa imong kinabuhi nga ikaw dili na makadungog
sa tingog sa hagunos sa mga taxi og sa kusog kaayong
mga sing-al sa videoke

giduyan ko ang akong kaugalingon
sakay sa akong mga damgo

lahi ang akong nakita dinhing dapita
dili kamingaw kon dili
kalinaw.

madungog na nako ang mga timos
nga nag-ambak ambak sa amor secos

ang mga naghinunghungay nga mga hulmigas
og nabati na nako ang kahumok sa mga gapas.

Langlang

• nakuratan ang bulan
• sa duha mo ka mga mata
• niadtong gabhiona
• nga miratsada ka
• nahimong duha ka bola
  
• sa pingpong
• 
  
• ang imong mga ngabil
• morag pula nga
• kalachuchi
• 
  
• ang imong korona
• morag cobra ni cleopatra
• 
  
• ang ang imong mga perlas
• nga milibod sa imong
• liog latas sa imong dughan
• hangtod na sa imong bilbil
• morag mga hamog
• sa kaadlawon nga wala
• pa matagbaw
• sa kabugnaw sa
  
• kagabhion
• 
  
• wala na ang gamay
• nga Langlang kaniadto
• nga dili gani motingog
• bisan og matumban
• ang mga tiil
• 
  
• ang akong nakita
• lahi na kaayo
• ang akong nadungog
  
• mao na ang " Tse ka lang!"
• ''bungiao ya!!
• numa rabya rebusaw vez!
  
• ahahaha"

• "bolong ta ulit. hahahahaha"
  

• maoy panamilit

• sa imong barkada.

• bitaw Lang
• ako'y nakulbaan kay morag ako baya
• ang nabiyaan sa
• pagkapaspas modagan niining
• akong panahon
• nga pagkasalawayon
• nalubong ang akong
  
• mga tiil sa lapok
• og ang akong mga kamot
• diha sa tagok sa nangka
• mitapot
  

ang mito ni sisifus nga aliwang

sa tibook niyang kinabuhi
mao ray iyang
gikalingawan og bitbit
alsa og balhin balhin
niaanang mga lugas
sa bugas para
sa iyang rayna

lahi kang sisiphus nga
tawo nga nagsulti
nga ang kinabuhi walay
kahulugan
walay katuyuan
walay bili og walay padulngan

kay alang sa hulmigas nga
aliwang
obligasyon lang kining tanan
og walay
personalay

nga og buot kwentahon
kalipay baya
gihapon.

ang mga anthurium

naglaray ang mga anthurium
nga walay mga sanga og mga dahon

asa kaha ang sa akong mama
og sa akong ate og sa akong asawa?

unsang klase kaha nianing mga anthurium
ang sa akong lola og sa akong iyaan?

pagsulbad sa labad

kataw-anan nga hunahunaon
nga ang byuda de alegre
nga tigulang nga karnera
nakigkunboya baya
sa iyang dalagitang anak
nga karnera usab
aron pagpangita sa ilang
macho de sebo nga
karnero aron masulbad
ang ilang mga labad sa ulo.

alang sa balak ni kandis nga gusto unta nakong masabtan

ang anino sa taas nga lubi
sa kilid sa sapa
dili gayod maanod sa baha

ang adlaw nga misilaw
wala baya magkumbitay
nakita ko kini nga naglutaw
apan sa tinood lang
kita baya ang mipanaw

ang mga bato usab
bato lang gihapon
wala kini nako gililok
gahi lang gihapon ang
ilang mga panglantaw

ang mga pader
nagpabilin nga pader
nga daghang gitagoan
sa sulod sa ilang mga
tig-a nga balatian
wala kini mga mata
apan kon makatutok
makapatay og limatok


ang mga utlanan
nagmatinod-anon og ang
ilang mga ilhanan
nagpunay og awit
sa ilang kagikan

wala milubad ang
kangitngit
mao lang gihapon kini
ang bulingon nga turong
sa akong kagabhion

ang sunoy nga jolojano

ang sunoy nga jolojano

duha ka himongaan ang naa sa among tugkaran
ang usa abohon ang usa itomon

sa dihang nangitlog na ang duha ka mga himongaan
ang sunoy nga jolojano milayat sa among paril

og mitugtugaok kini pagkaoran-oran
sud sa koral sa among silingan tupad na usab sa puti nga himongaan

ayaw og basaha kining akong balak

ayaw og basaha kining akong balak

inday unsa may pulos ining akong mga kamot
og mga bukton

kon ang imong mga paa wala na
unsa pa usa'y pulos sa akong dila kon ang imong baba wala na

unsa pa'y pulos ning akong kinabuhi kon ikaw wala na
kon ikaw dili ko na matandayan sa akong mga paa

inday, palihog ayaw og basaha kining akong balak sa atubangan sa imong bana.

tambag sa kangitngit diha sa kahayag

tambag sa kangitngit diha sa kahayag

makabuta ka
higala ko nga kahayag

mahimo ba nga mopiyong
ka sa makadyot
aron imong makita
ang akong
pagkaanindot?

mahimo ba nga ang
mga mata una
sa imong kasingkasing
ang imong
gamiton sa paglantaw
kanako?


ayaw ako husgahi
ayaw ako kasilagi

kay puhon-puhon
mopahulay baya kamo
sa akong kagabhion

mga mata

tan-awa ang tanang makita
hikapa ang ilang mga lawas
dili ko mabasol kon ikaw diha
motoo kanila

ayaw kabalaka
moabot ra ang mga dili nimo makita
mosangpit ang imong kalag
moawit og makigduyog
sa ilang mga sayaw

adunay panagbangi
apan sa pipila ka gutlo lamang
mopiyong ang imong mga mata
mobalak ang imong kasingkasing
moisa ang imong mga kamot
hawid sa langit
moabri ang imong mga palad
aron paghatag sa imong mga halad
moampo og mohapa ang lawas
mopahiyom ang kalag
ibilin ang hingpit nga kahilom

pamasin

pamasin

kon moabot na ang panahon nga ang mga balak
dili na makatambal sa mga samad sa akong kalag

pasagdan ko na lang kining magdugo, hangtod kini mauga
og kon maayo man ugaling tungod sa mga milagrong wala diri og wala didto
ako na lang usab nga ihalad ang tanang mga kugang ngadto sa Ginoo.

mga pangutana alang kanimo

mga pangutana alang kanimo

mag-unsa na lang kon
wala nay dugos ang mga ligwan

kon ang mga aninipot wala na'y
kahayag

kon ang mga dahon sa kabuntagan
wala na'y hamog

kon ang dagat wala na'y mga isda
kon ang mga kahoy wala na'y mga sanga
og dahon

mag-unsa na lang kaha ang
langit kon wala na ang adlaw

kon wala na ang bulan sa kagabhion
og ang mga bitoon

mag-unsa na lang usab kaha ako
kon wala ka na sa akong kiliran?