mY secreT ponD

Lantawa ang alibangbang nga mibatog sa bulak

Lantawa pag-ayo ang alibangbang
Nga mibatog sa usa ka Amarillo nga bulak.

Inata ang imong mga panglantaw
Inata pa, patas-i ang imong mga pangandoy
Sa imong hamubo nga kinabuhi

Palupara ang imong imahinasyon
Sugod sa tumoy sa pako nianang alibangbang
Palangoya ang imong hunahuna
Isumpay kanang mibatog nga alibangbang
Ngadto sa ikaduha nga alibangbang

Piloa sa makaduha.Hatagi ug kaluha.
Tan-awa ang akong nakita. Dili ba
Nahimong lingin ang alibangbang? Dili
Ba nga sa pagsumpay nimo sa iyang
Kaugalingong mga pako palibot sa iyang
Tugsoy nga lawas, nahimo na usab kining
Lain nga bulak? Lingin ang tanan. Walay
Tul-id. Tuyok tuyok lang.Timan-i kana.