si narcissus usa ka lalaki
nga nagpungko sa tin-aw nga sapa.
nagtikongkong. Gaduko.
dili ipakita ang iyang nawong.
gitago ang iyang mga ngabil
aping ug ang mga mata
mora siyag nagbasol
nag-iyak. mitulo ang iyang
mga luha sa sapa.
dili kaayo klaro ang
iyang gitagoan nga kasakit.
sumala pa sa pintor
(tan-awa ang iyang larawan
palihug lang)
si narcissus nahimong
usa ka kunot nga tudlo
naghawid sa usa ka tibogok
nga itlog supak sa kahayag
sa usa ka adlaw
naliki ang itlog
mitubo ang usa ka
bulak nga morag
siwsiw
sa ubos atua ang
irong buang nga
ang iyang dila
naghalhal
sa kilid atua ang
ngiob nga langub
sa layo didto ang
mga nagsadsad
nga katawhan
dili nato madungog
ang ilang
gipanagsultihan
itom ang mga panganod
dunay puti nga estatuwa
dili ko kaila ug kang
si kinsa
dunay salog nga itom
ug puti ug ang yuta
nangliki sa kauga
gibati ko ang paglabay
sa daghang mga abog
nakapamaypay ako
sa kainit ug
kamingaw
gasakit ang akong
dughan pagkahuman
apan mobalik gihapon
ako sa ikaduha ko
nga paglantaw
sa kagahapon sa
sugilanon sa pag-usab
sa lawas ni Narcissus
kadtong nahimong
itlog nga dobok nga miliki
ug diin migitib
ang abohon nga buwak
No comments:
Post a Comment