TIP OF THE ICEBERG

TIP OF THE ICEBERG

tip of the iceberg lang ang tanan. kadtong imong gibasa sud sa usa ka tuig. tip of the iceberg lamang kadto. sa pulo nga akong gisugid kanimo pinaagi sa balak, sa napulo ka linya katorse ang dili tinood. sa usa ka gatos ka mga pulong dos sientos ang dili tinood. tip of the iceberg lang ang akong mga bakak. kadtong kabahin sa simbahan dili kadto tinood. pangotan-a siya. tawagi siya. kadtong puting kabayo nga gisakyan ni papa. dili kadto tinood. kay ang kabayo maoy namatay. gipusil siya ni papa. iya pa ganing gipaambitan ang karne niini sa among mga silingan nga miila sa kalig-on sa among ngalan. kadtong mga babaye sa akong kinabuhi dili gihapon sila tinood. mga wakwak, mga white ladies, mga kalag, mga mito, mga gabon kadto sila. dugay ra silang nangawala. ila akong gibiyaan kay ako ang tinood nga bakakon. silang tanan puros mga bakak. mga tips of the iceberg lamang sila. kay ug gusto ka gayod sa tinood, kadtong tinood, ug tinood lamang, huboa kanang imong baga nga sinina, huboa kanang imong mga lain pang sapot nga nagtapot sa imong lawas nga naghatag kanimo ug kainit huboa ang imong panit ug putla ang imong mga bukog kuyog ka kanako mosalom kita didto sa lawom, didto sa bugnaw kanang matikig kita kanang dili na ikaw ug ako kanang wala na kitay bation bisag unsa pa. tan-awa ang sa ilalom sa akong kalag. kini na ako. dili na kini tip of the iceberg. tan-awa. hikapa. hunahunaa. ilha na ako. ako na kini. ako na ang tinood dinhi.Ayaw kahadlok. Mas dako ako sa ilalom. Mas daghan ka pa ug wala nahibaw-an. Hawid kanako.Ayaw ako ug biyai. Hawid sa akong kamatooran. Palihug lang.