Monday, April 19, 2010

Hugyaw ni Aristophanes

Ang mga baki ni Aristophanes
Namalhin na sa Panganod
Diin nagpuyo ang mga disipulo
Ni Plato
Nahugyaw ang Philosophy Department
Og sa Pagkahibalo ni Lysistrata niini
Nangalipay ang tanang mga Lalaki
Nga dagkog Itlog
Karon
Miingon sila
Maundang na gayod ang Pagwalaytingganay
Magsugod na ang laing Gubat
Mabagtok ang mga Pilosopo
Mapak-an ang mga Baki nga Makalimot
Na pag-ambak og pagkokak
Og ang mga Pilosopo makat-on na
Usab unsaon Pag-usap ang mga Pagbati
Magkalibanga ang mga Rason
Mogitib ang mga Emosyon.

Ang kataposan nimong madungog
Nga si Lysistrata naburos naman hinoon
Dili sa iyang Bana.
Ang kuyog-kuyog niyang Tomboy
Namaligya na lang og chicharon
Didto sa Carbon.

ang gipuy-an

ang mga banggiitang Pilosopo
nagpuyo sa mga Panganod

ang mga baki nagpunay og
Remedyohay sa mga sapa

ang mga pulong usahay lahi
ang gipuy-an sa binuhatan

wala'y mga mata ang dunay kaalam
og ang wala'y kaalam puros tiil ang lawas

ang mga balak nagwarakwarak
natingala ang bata nganong wala'y nawong ang mga pulong

sa akong pag-inosara
nawala ang tanang kabilin sa akong katigulangan

ang akong gipuy-an
puro's umaabot

ang balay nga gitukod sa akong kagahapon
hagbay ko rang gisunog

mangutana ka kon asa ang lagkaw sa akong karon?
akong tubag mao ang ilang tubag: gibanlas na sa mga balod sa gibagyong baybayon

dinhi sa isla sa kamingaw
ang nilung-ag pirming mabahaw.

ANG ATONG MGA KAMOT

KON mag-ampo na gani ang atong mga kamot,
kon mohakop na kini sa tubig nga atong ilimnon
sa wala pa ang baso

kon modawat kini sa usa ka gugma
og kon mosukli kini sa mao ra usab nga gugma
diha sa paghapuhap sa aping
kon mohalad kini sa mga bulak
alang sa usa ka gikamingawan

hulmahon niya ang usa ka kasingkasing.

didto ko sa layo na kamo nakita

miulan.

ang ulan nga nahulog sama sa
sa awit
sa pinitik sa akong kasingkasing
gibati ko ang
kahaw-ang sa ulan nga nahulog sa akong
kasingkasing
wala masalod sa akong dughan
lapos sa bulsa sa akong
panit

nakita nako

ang pagkabasa sa uga nga yuta sama sa
natig-a kong mga pagbati
sa namad-an nga sapa sa akong mga hunahuna
kamo nga nanag-una nalingaw
nalamat sa mga sugilanon paingon sa usa ka lungsod
nga bibo
diin ang mga bata nagdakpanay
nagsaka kanaog sa mga hagdan
sa mga kabayo nga ilang gisakyan
gabantay ang ilang mga ginikanan samtang
mituyok ang mga hapuhap sa kahayag


layo na kamo og ako bitbit ang bug-at nga kalag
nagduda, adunay kahadlok kon unsa ang dangatan
niining akong hukom
sa pagpabilin

ang kawili usahay bug-at og lapalapa
tapot ang mga tunob sa lapok sa kalibog
nagtalikod ako sa kangitngit
apan wala usab ako miasdang sa kahayag
ang ulan mao ang nahimong
bongbong nining akong
balayan sa kahingawa.
ang langgam nga maya
langgam nga kalkag na og balahibo
mihay-ad sa dalan
nagtikongkong
tak-om ang iyang sungo
piyong ang iyang mga mata
hait ang iyang mga kuko
wala na'y kukahadlok sa
bahad sa mga hulmigas

wala na'y nangambat
ang mga bata mibiya na
wala na nila usiki pa ang mga
bala sa ilang mga tirador

ang hawla wala na'y pulos
ang mga sabod wala na maghimpos
ang mga pispis wala manawag
sa gibiyaan na niya nga salag

mao kini ang patay nga langgam
dili na gani kinahanglan pa
nga tawgon nato siya'g maya.

mora'g tinood


ang akong iro nga pulahon
nga gibunyagan nako'g Bonbon
kon motutok na gani kanako
human nakog pakaon
sa humba og kan-on
mora ba'g siya ra gayod ang
tinood dinhi sa kalibotan.

inato


kanang taas og itom nga sudlanan
nga taas og liog
og dunay kalo-kalo
mao na'y atong kutiran:

usa ka bol nga tuba nga dili pa bahal
sagolan sa duha ka itlog sa manok nga bisaya
ikutir sa lima ka tableyang ispisoyal

kanang morag pan
bingka ka na nga wala magkulang sa tono
nga saktog liki og saktog kasinaw
humok usapon
dili sapnot sa ngipon og tutunlan

kanang gamay'ng lingin
biasong kana nga atong ipidyat sa ginamos nga mawos
og atong tusnoan sa tibugol
nga bahaw

ang atong isumsom pwede pod
kinilaw nga bulinaw
nga hinagbuan ni Peryong sa
baybay sa Olingan

mas lami baya usab ang kusahos
sa kabaw ni Gorio
nga sobra pa sa karne niya
niadtong pista
sa Santa Felomina

kon mag-inarte ta usahay
mantilan pa gyod ang lamesang-polding
sa malong ni Bering

PAMILOSOPIYA SA USA KA ULAGAN

sa pamilosopiya ang tanan kuno dinhi dili baya tinood.
ania kuno kita sud sa langob og unya ang atong nakita mao lamang ang mga anino.
kitang tanan mga ilusyon lamang hinimo lamang sa atong mga hunahuna
(og gumunhap).


nga og kon wala na ang atong mga hunahuna, wala na usab kita.
makalibog usahay labi na kon ayohon pa nato kini og kutikuti o tuki-tuki.
makalumos man gani seguro kon mosalom pa kita didto sa lalom nga parte.
ang uban nakat-on sa paglabang sa mga utlanan
og sila (kuno) nakakab-ot sa mga prutas sa kamatooran
(wa lang ko kabalo kon balimbing ba o kaymito)

mao kana ang ilang sulti, og namati lamang ako, og nagbasa lang usab ako.
hagiton usahay ako sa layog sa pagduda, usahay mora ako og giluba sa mga linti.
sud sa akong dughan mibuhagay ang mga duga og tagok sa kalibog
og bisan og dili gani

bugnaw kaayo ang kagabhion magkurog baya ang akong bag-ang og morag
mabali ang akong suwang kay wala'y kasandigan ning akong liog nga nagloay
kay gimingaw na nianang pahuway og kahayahay
(kanang maglingkod sa rocking chair sa boracay didto sa Regency: sosyal!)

misulay ako nianang mga pagpamensar, kanang imong giingon nga paghubo sa mga sapot
sa hunahuna, nga mora ko'g usa ka tawong milabay sa akong polo shi(r)t , kamisin,
karsonsilyo og brief, og kumkom-palad ang akong lagay og itlog,
misungsong ako sa dakong

suba sa lalom nga pamilosopiya,
dugay ko didto, tugnaw, kisaw, langoy, sikad, kaway


(dive, butterfly stroke, iniro, initoy,
alligator, og uban pa)

apan sa akong kamingaw didto nga mora na man hinoon ako'g mamatay
mikawas ko oi.

og mihay-ad ko sa daplin
(ihap sa akong halhag nga bolbol)

og nakita ko ikaw, og mitutok ako kanimo ,
og nag-ilis ko

(paspas og kuha sa akong brief
nga bulingon, polo shirt nga baratohon,
pantalon nga gisi ang pondeyo)

gisul-ob og balik ang akong sapot
tungod sa akong kauwaw


mitutok ka og balos kanako,
mipitik ang akong kasingkasing,
(uplot, uplot, blag, blag, pitik, tik tik tik tok tik tok tik tok
as in morag relo sa akong ulohan)

nautgan ko, nagtubod ang akong

laway, migilok ang akong mga paa,
og mikitiw ang akong mga kuyamoy,
mituybo ang akong mga balahibo
migilok ang akong ayoyok

(morag washing machine ang sound)


og akong gilabay ang

akong mga kalibog,
akong gihunong ang akong mga pamensar
kon unsa ang kinabuhi
og kon kinsa ako og tinood ba ang akong nakita,


gigakos ko ikaw,
gihagkan ang imong mga ngabil,
og ga-fencing ang atong mga dila,

hawid sa hawiranan,
hikap sa hikaponon,
bira sa birahonon,
sulod sa sudlonon,
pansak, sampak, huso, duso,

hangtod nga

migawas ang tanang nga angay nga manggawas
ang mga singot sa hwerto
ang nga singgit sa purgatoryo
ang mga agolo sa napulo ka sugo....


pastilan, unsaon na lang,
nawala ang akong kalibog
kon ako tinood ba og ikaw tinood ba usab,


basta ang akong nahibaw-an malipayon ko
(ambot og malipayon ka ba usab)
og nakabungat ko

sa akong kaugalingon,

kini mao ang tinood, og kini ra gayod:
ako,

(ambot og ikaw ba pod?)

ang tinood

basta, segurado na ko, tinood jud ko!

kugita
irga
sam!

eurokong!

tikaw tikaw

kapoy pod baya og tikaw tikaw niining
disyertong mamingaw
pila ka libo ka tuig nga walay ulan
bisan gani anino sa dag-om
wa.

ang bulak dinhi mora kadak-a og
tamstak ang iyang sanga mora lamang
kanipis sa dagom

pulos lang adlaw dinhi
busa ang mga wala ka antos
nanguli balik sa ilang
agi.

nagdahom ko nga dunay mga saad
nga matuman dinhi
sama sa saad sa usa ka prutas nga morag
totoy sa babaye nga ang duga morag
gatas sa inahan

apan pila na ba ka tuig ang milabay
wala'y gidugog nga naburos dinhi
wala gani tawag sa usa ka kasal
dinha sa kapilya
sa mga bonbon

pipila lang ba ang ania dinhi nagtikawtikaw
ako ra man seguro
(og ikaw nga nagpahipi diha sa likod sa mga
bungtod nga balason)

ambot nganong nagdugay ko dinhi
basin, basin, basin pod diay og

gilamian
naanad na sa init nga adlaw
basin pod diay og
nawili sa gilok sa balas nga nausik sa tungatunga
sa akong mga tudlo

basin pod og
duna lang gyo'y katarungan nga hangtod karon
wala pa naaninaw
apan
nindot og sinaw
morag perlas nga nalubong sa
lapok sa lanao.

sa kamatayon ni Jay M.

i

ANG inahan
sa wala pa makahibalo sa panghitabo
nakatulog sa iyang katre nga kawayan
atubang sa kasadpan

nakita niya ang usa ka maya nga mibatog sa iyang bintana
wala kini molihok samtang iyang gidakop

migawas siya sa iyang lawak
naog sa balay nga wala pa mahuman
og iyang gibuhian
ang maong langgam
sa kawanangan

nahilis ang adlaw sa usa ka
kagabhion

ii

sa dihang miabot na ang lungon sa namatay
niyang anak
wala siya moiyak
udto kadto
giloum niya ang tanan

ang iyaan nga mananambal
naghuwad sa duha ka piso
nga nagsigig tuhak sa
pipila ka lusok sa humay
nga gisabwag
sa samin nga
tabon

iii

sa kaadlawon
sa nahikatulog na ang mga nagdula og madyong og tong-its
ang inahan
mibakho, misyagit,
miyaka sa salog
gidakdak ang iyang ulo sa tiil sa iyang katre nga kawayan

iv

nakuyapan ang kabuntagon
mihugot ang dughan sa adlaw nga mao pa'y pagsubang
gihilap ang tiyan sa mga katuigan.

sa mga iya sa mga butang (things-in-themselves)

isulti ko lang ang akong nakita
dili ko maghusga
wala ko'y ihatag nga bulok sa pagbati
kasubo sa itom, himaya sa ube, selos sa amarillo,
dili ko kini hataga sa iyang anino
kon sungo lang nan sungo ra usab
dili na nako kini ngalan og suwang
ang katig sa sakayan nga mibugaw sa mga balod
ang layag sa sakayan nga mikayab sa hangin
ang tigbugsay nga dagkog bukton
og ako nga nagsakay nga
wala na'y antipara

baybayon ang atong kalibotan
wala na ang yuta og ang mga kahoy
ang mga isda haguros na lamang
ang mga bukid
panimhot na lang sa atong mga
ilong

sabta ayaw, lantawa lang
ayaw og sulti, hilom lang

karon nga hubo na kita
magbulag ta og pangita sa utlanan.

orasyon

ning alas otso sa gabii
sugdan na ang orasyon

Dios ko, Ginoo ko,
Amahan, Inahan, Anak

pangoros og katulo
human sa makatulo mong pagpangadye
sa maghimaya ka hari
maghimaya ka maria
og amahan namo og
kapinan pa sa gloria patri

kay ugma sa dili pa
mogawas ang adlaw

mogikan na ang kuhaon
(ay kog ingna nga ikaw?)

Saturday, April 17, 2010

kay na og hunahuna kon unsa ba gayod ang panahon

kapoy nag hunahuna kon unsa ang panahon
ang oras og ang iyang mga kamot
ang adlaw og ang iyang mga tudlo
unsaon ko ba ang ikog sa mga katuigan?
kapoy na og sulbad kon ang panahon babaye
ba o lalaki
labi na kon samdan ka
unsaon ba ang mga panahon sa paghinumdum?
nangutana ka kon ang mga takna
mokuyos ba usab?
nakatawa ko

mas maayo pa
magputos tag balon nga inun-unan
og pipila ka mga puso
sinugbang tuloy og sawsawan nga
suka sa tuba nga gipisatpisatan og sili
mangaligo ta sa suba
mosalom ta didto
mamana ta og haluan og rami

pagkahuman mopatong ta sa dakong bato
magpauga sa atong lawas diha sa adlaw
sa udtong tutok

mas lami pa
kon kita lang duha.

Thursday, April 15, 2010

ang mga sanga

mga sanga sa kahoy
gitubuan sa mga dahon
namutot og dayon
namulak sa pagkadaghan

mga bukton ang tumoy
komo nga miabre
og mga sanga sa mga
tudlo

ang ulo nananga og mga
buhok og ang mga buhok
nananga
nananga usab sa makadaghan
nagbulagbulag
gipul-ungan

ang dila mo usab
nagsanga sama sa bitin
nanghagdaw og daghang
mga pulong nga nananga
og nananga pa gayod
sa daghang tabi

mga sanga sa kahayag nga
gikan sa adlaw
mihapyod sa mga
dahon sa kamingaw
sa mga udlot sa
kasubo

mga hunahuna nga nagsanga
karon ako na kining
putlon
wala ka kasayod kon
asa na kini paingon
wala na usab
akoy direksyon....

nagsanga nga dalan
ako unang pahulayan

Wednesday, April 14, 2010

pagyubit

dugay na kining
anaa dinha
gani sa wala ka pa matawo
anaa na kana
nagbalhinbalhin
usahay mas ganahan siya
nga dili na lang una
makita

apan dugay na kana siya dinhi
og didto
usahay motumaw kana siya
magpahipi
og kon moabot ang iyang gana
mohagsa daw sama sa usa ka
buhawi
makalumos og iya kining gikasakit
gikahadlokan
og busa mas daghan ang panahon
sa iyang pagpapahipi
sama sa usa ka alibangbang
nga miawat sa bulok
sa usa ka dahon
sa nangka

nakita mo na kini siya
apan wala ka kaayo nagpakabana
tungod kay ang iyang
kinaiya
yano lamang
sama ka yano sa ulan
sa bukid
sama ka yano sa balas
sa dagat
sama ka yano sa hangin
nga mokapyot usahay sa imong
buhok

sama sa usa ka katulogon
nga midap-ig sa imong pilok
diha sa naglibog nimo
nga kilay

apan kon gitagaan mo lang unta
kini og gamayng panahon
sama kagamay sa tumoy
sa imong tudlo
unta dugay mo na kining
nahikap

og diha ka na unta motoo
og dayon
imo na kining
mayubit
adunay lakat nga walay kapaingnan
sayod ka
nga walay pulos kining klaseha sa mga tunob
nga wala kasabot
kon mopadayon ba og dili
og kon mopadayon man
daghan ang kataposan

mahulog sa pangpang
human sa usa ka talinis kaayo nga syagit
og dayon mahimong hikalimtan lang dayon
ni bisan sa usa ka pulong
dili na mapahinungdan

mahimo usab nga mahulog kini sa kilid
sa bung-aw nga dagat
og mapapas ang tanan
sama sa usa ka bangaw
kadyot lang
usahay gani dili ka katoo kon
nahitabo ba kini

adunay gugma nga gikapoy
wala na magtikawtikaw
dili na maghisgot
dili na mangalot bisan sa kakatol
sa taliwala sa alimpulos

adunay kamatayon nga dili katagad
sa iyang lungon
nga gibudlayan niaanang nga nobena
sa patay nga
haskang tag-asa

adunay kinabuhi nga wala nay kahulugan
nga bisag imo pa kining balakan
og dulgan o hagkan
dili na kamaong mobalos
wala nay tubag kon dili ang laktod
nga kahilom

adunay kataposan ang tanang pagsugod
sama niini
pananglitan
dahong laya
sa usa ka sagbot sa akong agianan
akong gikutlo
gibulad sa adlaw
akong gilukip sa tungatunga
sa mga dahon
sa akong libro

timailhan sa usa ka
panghitabo nga dili ko gayod mahikalimtan

dahong laya
sa usa ka sagbot sa akong giagian
gitagakan sa usa ka lusok
nga luha
giughan sa dakong sapa
sa akong pagbati
diha kanimo nga patay na sa akong
handurawan

dahong laya nga nahimong anino
abog
panganod
hangin

usa ka taghoy
nga mikuyog sa hangin og wala na gayod madungog
nimo.

ang kataposan

gusto nako untang isulti
apan dunay nagsulti kanako nga mas maayong
dili na lang isulti
kay bason og mas daghan lang ang masakitan
sa maong isulti

gipili ko ang pagpakahilom na lamang
sama sa usa ka limatok
nga nagluko na lamang sama sa usa ka bata
diha sa gamay nga sapa

milalom ang kahilom
nahimo kining hait sama sa usa ka pinuti
migilak kini
sa kahayag sa adlaw
migilak kini sa kahayag sa bulan
og sa matag gabii
gusto na kining makighinabi kanako
kay gusto na kining
mogawas sa langob


ang pulong dili na ang pulong
lahi na
pag-abot sa takna
sa tukmang panahon
ang pulong nahimo na nga usa ka manggiulawon
nga bata
nga dili kasandurot sa mga dumuduong

ang angayan nga isulti dili na mayubit
bisan gani og daklit
nagtinan-away ang nakaila og nakighimamat
nasayod na sila
nasayod na ang tanan sa unsang isulti
nganong isulti pa kini

misapasundayag ang nakita
misayaw
miisia sa iyang mga kamot daw nag-ampo
mikatawa
naninghawak
giyagyag ang mga bato nga iyang gihipos sud
sa iyang bulsa
apil na ang mga balas nga gitugyan sa baybayon
diha sa iyang mga palad

karon mao na kini ang kataposan
dili og dili gayod siya madawat
sa mga kahoy og mga bungtod
bisan gani ang adlaw nga nakasabot sa tanan
gihatagan man siya sa usa
ka pagsalop
bisan man gani ang bulan
gitunol man kaniya ang usa ka dag-om

karon mao kini ang nahitabo
sa kahayag paingon sa kahayag
didto sa kilid sa kapakyasan
siya mogikan.

Tuesday, April 6, 2010

sayod ko sa kasakit nga imong gibati

sa imong pagkalaglag
gikan sa dako kaayong punoan sa kapayas
maayong pagkalagapak ang imong sampot
og ang imong mata natuluan sa tagok sa naipo nga mga sanga

sa kapayas, og ikaw ang nahimong
kapayason, diha sa imong pagkahulog nga dili pa gayod nimo madawat
hapdos nga morag gilaslas sa hait kaayong kutsilyo ang imong panit

milingiw ko sa milabay nga panganod
akong gilingaw ang akong kaugalingon sa nanglabay nga gipalid nga dahon
sa mga bulak sa kalachuchi nga puti og pula
sa nataran sa among balay

ayaw sabta nga kining akong gihisgotan mahitungod lang sa kapayas
aduna pay lalom nga nahitabo
diha sa imong kapakyas
sakit lang gihapon hangtod karon ang mga adlaw og gabii wala gayod katambal niini
wala na ang mga luha
wala na ang mga pagbakho

dinhi sa kahilom sa imong pag-inosara
ako kang biyaan

ikaw lamang ang nasayod unsaon nga maalim ang samad
sud sa pultahan sa imong kasingkasing

og dinhi biyaan ko ikaw
mas lig-on ka pa sa tugas
mas tig-a ka pa kay kanako

ako nga nabayod na
sa pipila ka milabay nga mga
kapakyasan
sa akong kinabuhi

nagsulat ako niini
kay wala ako kaako pagsugid kanimo sa tanan

samin

matunga ang realidad
sama sa usa ka samin

kon unsa ang tinood
mao kana ang dili mapapas

ang sa tubig mawala
mausob malusaw

ang dili sa tubig mao
ang magpabilin nga

bisan og unsaon nimog
piyong sa imong mga mata

og bisan pa og imong katulgan
sa pipila ka gabii

aron lang kini mausob
kawangon ka lamang

magpabilin ang dili sa samin
ang gihulman lamang sa tubig

mga pahimangno alang sa usa ka bisita nga mosulod sa ilang balay

dunay mga ritwal ang maong balay
anaa ang pagsayaw sa kalayo disir manihapon

ginadili ang paghisgot sa usa ka bata nga kamaong motokar sa piano
kon imong kantahon ang usa ka oyayi

mohilak ang atop pinaagi sa pagtulo sa mga ulan gikan sa itom nga langit
og matingala ka ngano

ayaw na og pangutana
kon yubiton mo ang ngalan sa batang babaye nga nagsag-ob og tubig didto sa tubod

mokarag gayod ang haligi
og mangatagak ang mga kwaknit nga nangumbitay diha sa kisame

kon gusto nimo nga magdugay og puyo diha sa ilang balay
tagoi sa imong bulsa ang mga itlog sa maya

ayaw ipagimaw ang balahibo sa kalapati
palopara lang hinoon kini

og lantawa ang paglabay sa mga uhay
ang pagboak sa usa ka baso sa ubos sa imong bilbil

sa imong mga tiil
anaa ang mga bulak sa sampagita og mga pula nga santan

dayon pamatia na lang ang mga nagpingki nga mga baso
ang kusog nga tingog sa kampana sa simbahan dili kaayo halayo sa imong gitindogan

Saturday, April 3, 2010

si Tiago ang anak sa among saop sa Antulanga

didto's bukid sa Antulanga
mas dako pa gihapon ko
kaysa kinadak-ang kabayo
ni Tiago nga anak sa
saop sa akong
Papa

isip tahod sa anak sa iyang
agalon
ako ang gipasakay ni Tiago
sa iyang kinakusgang
kabayo

siya ang nagsunod
naglakaw lamang
kay ang ilang kabayong baye
buros man lagi

mikalit kog lingi sa akong luyo
akong nakita
ang iyang nawong nga
gubot pa's mga bagon
sa kagwangan

kalipay

nanghiwid ang iro
sa kilid sa
pantawan
nga busdik kaayo ang
tiyan
sa kabusog
sa iyang pamahaw
nga tul-an

pagkahuman
nahikatulog dayon

wala na mag-ambat
sa usa ka sunoy
nga mipatong sa
usa ka dumalaga
nga milabay
sa iyang kiliran

nakapahiyom ko
sa akong nakita

kaniadto

langit na namo
ang pagyupyop
sa powder milk
nga giputos sa
papel sa grade one

samtang naglakaw
nga nagtiniil lang
gikan sa eskwelahan
paingon sa among
balay mga tulo
ka kilometro
ulan og init...

kaniadto lami
pamation sa among
mga lapalapa ang
lapok sa basakan
nga among laktoron
gikan sa Bungtod
manguha og manggang
hinog nga wala gani
ganahang mamulak
nagkalata lang
sa silong sa iyang
punoan...

kaniadto lami kaayo
isula sa luto ang
kamay
kumutkumuton
sa palad
himoong gagmay
nga bola...

kaniadto kon mag-ulan
isulod ang tsinelas
sa bag
kay hadlok mahugaw
ang among payong
dahon ra sa saging....

karon lahi na jud
lima ang iyang sapatos
ihatod sa kotse sa
eskwelahan
kumpleto sa raincoat
og payong
paliton na lang ang
mangga sa Mall
hamonada ang
sug-an
mga de lata nga
gatas
ang naka-stock sa
kitchen cabinets...

nalibog ko
nganong dili gihapon
sila malipayon
nalibog ko nganong
sila walay
nahibaw-an

tikarol

abi nimo og namalandong
ang tikarol
nga mibatog
sa sanga sa piapi
sa daplin sa suba?

sayop ka

nag-atang siya
sa iyang pamahaw
nga naglangoy
sa suba

og diha ka
nalupig

kay siya ang unang
nakadagit
sa imong
giatang-atangan
nga nindot
kaayong
haw-an

Thursday, April 1, 2010

para kang WCW

misaka sab ko
sa ibabaw sa balay
milantaw ko
sa gawas
human nako
ablihi ang
bintana

daghang misalig
sa atsa nga
nagtaop
sa giputol
nga punoan sa
mangga

tupad sa
mga lima ka piso nga
nanuktok sa
tiktik sa
mais nga
gisabod sa
bata nga
wala'y karsones
kagabii
samtang naglalis
mo kon unsay
nauna
ang itlog ba
o ang
manok

miuna mi og
katulog

pasayloa kon
ang manok na lang
ang nahibilin

kay iyang
gikaon ang akong
itlog!

mga bakak og ang pagkadunot


sa yanong hulagway
sa usa ka babaye nga
naghawid sa usa ka
hinog nga strawberry

iyang gipakita ang mga
bakak
ang pagkadunot sa
kamatooran

wala giingkit
gitagbo gitakdo
apan wala hagki

gihipos gitagoan
og wala niya damha
nga sa iyang pagtalikod
iyang gilabay

lisod ang kinabuhi
daghan ang dili nato damhon
moabot mobiya
mamatay sa dili pa saktong
panahon
kuhaon gakson sagpaon
igaid lumsan
tagkosan gaposon
bunalan
ilansang

lisod ang kinabuhi
apan asa ba kaha ang kamatayon?

inig abot niya
nanghilom mong tanan
gipadit ka niya
apan midagan ka

lisod sabton ang kinabuhi
nangyawa ka
apan dili ka niya amigo
nameste ka
apan hadlok ka sa ok-ok
wala kay salig sa uhipan
giyawayawa nimo ang halas
imong gipatay sa kawayan

ang mga bakakon
imong gipakaon
og ang mga kawatan
imong gihalaran

ang mga dato
gipasamot nimog kadato
ang mga pobre
imong gipaimpake

ang mga makasasala
imong gihigugma
ang mga walay sala
imong gikondena

lisod gayod sabton ang kinabuhi
mas maayo pa seguro ang kamatayon
apan kinsa ba ang gustong mamatay?

wala miisa sa kamot
og duna man ugaling
kini mangambot

ang mga bakak nahimong tinood
og ang tinood mao na hinoon ang mga bakak!

ang babaye nga mas kurat pa sa lalaki
og ang lalaking nagpailalom sa babaye

ug uban pa
ug uban pa


pangadye sa sayong kabuntagon


pag-abot sa kabuntagon
gihapohap sa mga tudlo sa adlaw
ang mga balahibo sa
tulabong nga walay
pilok-pilok mitutok kaniya

aduna siya'y gisulti
dili ginamit ang pulong
og nasabtan kini sa adlaw
sa way paggamit sa hunahuna

lagyo ang ilang mga kasingkasing
apan naggakos kini
taliwala sa nataran sa kabuntagon
nga ganiha rang milalin

kaharuhay sa pagbinugtong

nasulayan mo na ba ang maghubo
sud sa imong kwarto
unya moligid ka sa imong katre
motihaya dayon mokulob
og molantaw sa imong mga tudlo
dayon bation mo ang bunaw
sa imong kasingkasing
kanang ang imong lawas
mohalad og awit sa usa ka habol...

dinhi nabati mo ba ang kamingaw?
nadungog mo na ba ang kahayahay diha sa pag-inosara?

nasulayan mo na ba ang paghay-ad
atubang sa hilom kaayo nga kisame?



daghang kandila


oo, tinood kana
pagkadaghan sa mga kandila
apan ang ilang ihatag
usa lang ka kahayag.

human sa pagbuak sa iyang kasingkasing

ang wa
niya makuha
sa lawas
iyang gibawi
pinaagi
sa baba

ang paghabhab
maoy
sulbad sa paghikalimot
sa lawas

pancit canton
humba
bam-i
adobong manok bisaya
kan-on
pusit, lengua,
leche flan
puto, biko, budbod,
manggang hilaw
ginamos nga gisilian

usa lang ang iyang
gusto

nga unta siya
mamatay

human niya
gibuak ang iyang kasingkasing