Sunday, December 21, 2014

pasko

mao kini ang pasko
sa duha ka bata nga pinasagdan sa inahan

ang batang babaye nanimaho nang suka
sa kawalay ligo
ang batang lalaki baga na kaayo ang
kiki sa iyang ngipon

usa gustong tagaan og monyeka
ang usa eroplano

gitagaan kog duha ka baso nga binignit
nangabusdik ang ilang mga tiyan sa kabusog

gusto nakong kalimtan na nila ang monyeka
og eroplano kay dili kini makabusog kanila

mihangyo lang gihapon, eroplano lagi, monyeka lagi.
gusto nakong ihatag si Kristo, ang bata sa pasungan

apan monyeka lagi, eroplano lagi,
mao lang gayod kuno ang makalipay nila

nanimahong suka ang batang babaye
baho ug gininhawa ang batang lalaki

sayo pa, dili pa gihapon masabtan
kon unsa ang pasko, ug kon kinsa ako.


bisita


ning akong lawak
usa lang ang lingkoranan
ang katre nga uway
igo lang sa akong lawas
gamay lang ang balay
usa lang ang kaldero
ang dapogan usa lang
usab ang sug-ang
duha lang ka bintana
ug duha lang usab ang
pultahan nga maghatag
kanako ug duha ka kapaingnan
una ang pagsulod ug ang
ikaduha ang paggawas
namisita lang ako dinhi
og dili ko ganahan nga magdugay

alang kang M


ayaw hikalimti ang mga
makita
samtang ikaw nag-inosara
diha sa gamayng balay
sa kilid sa bungtod
sa Bitoon

kadtong kalaw nga
nagtug-an kanimo sa oras
sa kahaponon
ang aw-aw sa iro sa pikas
bungtod
nga naghisgot kabahin sa
kagutom
ang kaligotgot sa mga unggoy
nga nagpaulit sa mag-uuma
nga kanunayng nagbantay sa
iyang kamaisan
ang kanunayng pagsulod guwa
sa hangin
nga mihagit sa imong aping
ug sa imong ngabil
ayaw palabya ang mga makita
mo sa bukid
ang awit sa tamsi
ang tingog sa gangis
ang hagawhaw sa kagwangan
ang kanaas sa ginit sa kilid sa
lubi nga gibisitahan na usab
sa dakong bakokang
unta anaa ako diha
aron makigtupad kanimo
dayon mohawid sa imong
kamot
mohapohap sa imong buhok
motubay sa imong
pagpulaw
ning mingaw nga kalibotan

RECESSION


mibarato ang
lana
gibati na ang
kasakit sa
kusi
ni Algeria

introvert

abi kog lahi
ra kaayo ko
kaniadto
namasol ko sa
suba

ako lang
unya sa kahilom sa sapa
migimaw ang baba sa
isda
nakita ko ang iyang mga
mata
samtang naglutaw
siya sa tubig
giisa ko ang akong
pasol
gipalayo ang taga
di nako
gustong kubiton
ang tumang
kaanindot

Thursday, December 18, 2014

uyab
wa siya mitoo
nako nga ako siyang
gidala sa ngitngit nga
lugar
aron lang unta
makita ang tibuok nga
kahayag
sa bulan
adtong gabhiona
medyas
duha ka medyas
ang gibitay sa pultahan
wa katulog ang
duha gahunahuna kon
unsa kahay
sulod sa duha ka medyas
inig-abot
sa kabuntagon
ingon ani: ang usa ka medyas
gisudlan og
tai sa kanding
ang usa puno sa
dulce nga senyorita
kahinumdom ka pa
ba sa kabaho sa imong
kamot?
niadtong miaging
pasko
sila lang gihapong
duha sa iyang
asawa
nangaog
noche buena

karong paskoha
mao ra gihapon
ayaw ingna nga
mingaw sila
wa sila kaila anang
mingaw
ang ilang nailhan
linaw.
adtong
atong kabatan-on
kadtong gagmay
pa kaayo ta
sa tinod-anay lang
matag pasko
layo ra kaayo nga
gahunahuna nga
ang batang
kristo natawo
kay mao kini ang
naa sa atong hunahuna:
bakasyon na usab
puros dula ang
giatubang
puros kaon,
puros regalo,
di gani makuntento
sa dies pesos nga
gihatag ni
ninong
sa taraktarak nga
giputos ni ninang
sayang
walay bisikleta
halok
gakos
mao kini
ang dili
mapalit
sa mall

kon dili
ka mahilig
sa baratohon
mao kini
ang akong
gasa diha
kanimo
paspas baya kaayo ang
panahon
kita hinay kaayog mga tikang
busa nabyaan
ang uban mikuyog sa kapaspas
sa panahon
uban nakaupat na, naay uban
nakalima pa gani
kadtong atong kaila nga hilomon
suska, nakatuhog na og kaunom
nangapo na sa tuhod ang atong silingan,
nakahimo na ug siyam ka atabay
nakalayat na sa usa ka gatos nga pangpang
nakatabok na ug dos syentos ka mga lawod
kita hinay lang gihapon, usa ray balay,
usa ray sakyanan, usa ray nataran
apan ayaw ka, bulahan ang mga hinayon
kay sila kuno ang mga langitnon.

Tuesday, December 16, 2014

ang wala gisulti apan nahibaloan

ang nanay sa bride
lahi na og pinangga
ang tatay sa bride
mao usa
apan bisag unsa
pa ang nahitabo
og mahitabo
anaa gihapon sila
silong sa samang
atop sa ilang balay

driver sa habal-habal
ang uyab sa nanay
mao usab ang tatay

apan bisan unsa pa'y
nahitabo og mahitabo
pag-usab
anaa silang duha
wala nay tingogay
silong sa maong atop
sa ilang kaminyoon

ang sulti sa kamagngawan

dako ang among
balay nga karaan
didto namatay si
nanay og tatay

daghan kaming
magsoon
didto kami
manganta
mosayaw
didto kami
bisag makausa lang
sa matag tuig
magsalo sa pagkaon
maghandom sa
nanglabay
mangatawa
mangiyak

didto, didto sa
balay nga karaan
nga dako ug haw-ang
nga kabilin ni
nanay og ni tatay

didto ang among mga
gamot
didto ang among mga
sanga
didto ang among mga
dahon

didto ang among
kabuntagon
didto ang among
kahaponon

komentaryo sa ikaunom nga igsoong babaye

onse kami ka
magsoon
lima ang babaye
unom ang lalaki

ang akong anak
unom
wala kini sila magdako
kanako
kay nagkugi ako pagpangita
og kwarta aron
sila mabuhi,
makaeskwela
hangtod nga sila
makatindog rag
ilaha
pag-abot sa panahon
nga ako
mawala na ning
kalibotana


nagdako silang tanan
sa ilang lola og lolo
nga maayong moakatar
kanila

naminyo na ang lima
daghan na akog mga apo
sa matag kasal nila
wala ko batia ang kamngaw
wala ako miiyak
sa kasubo man o kalipay
lagyo nang daan ang
among mga kasingkasing

ang akong kamanghorang
lalaki
bayoton
og kini siya karon
ang akong
kaipon.

hisgot sa nanay kabahin sa iyang anak nga lalaki nga gikasal

bugtong
ko kining akong
anak

magkita lang
kami
kausa matag tuig
kay lagi
usa man siya ka
seaman

close kami
kaayo niining bataa
matag biya niya
sa dihang
nag-eskwela pa siya
sa cebu
matag biya niya nako
sa Calatrava
modangoyngoy gayod
kini siya og
iyak

busa naglikay ako
sa paghatod kaniya
didto sa pantalan

ugma puhon
ako na lang usa
ang magtikawtikaw
sa among balay

lahi na ang iyang
kalibotan
lahi na usab ang
akoa

sa barko kagabii
paingon dinhing
dapita
gihulog ko ang akong
mga luha
sa kalipay
didto sa lawod
sa dagat

kasal

babaye nga kaniadto
hilomon
karon tig-ibot na
sa ngipon

ang iyang naparis
nga lalaki ang kaniadto
kusog modangoyngoy
matag gikan niya
biya sa iyang nanay nga
magtago na intawon
aron dili na mobaha pa
ang mga luha
karon maayong moluto
og pancit canton og siya
ang tigtimon sa barko
paingon sa
ulohan

kasal nila karon
og ang akong tambag
aron magdugay sila
sa ilang kaminyoon
kon mokusog na ugaling
ang balod
mahimong tulogtulogan
lang usa
dayon inig abot sa pantalan
sa kaadlawon
bitbiton nila ang ilang
tagsatagsa ka mga
pinutos
sa ilang mga abaga

mensahe sa tatay sa iyang babayeng anak nga gikasal

mae og fredie
nakita nako sa inyong mga mata
nga nagminahalay kamo
busa wala ako misupak

ipadayon ang inyong
pagminahalay
ang kalayo sa gugma
ipadayon diha
sa pagdilaab
ipadayon kana hangtod
sa kahangtoran

kon unsa man ang suliran
ayaw ninyo paugmai
sa dili pa mosalop ang adlaw
human sa pagatubang
niini
ibugkos pagbali ang
nahilos nga hukot diha sa
inyong pagsalig sa
inyong gugma sa usag-usa

freddie, kon ugaling puhon
mahitabo nga ikaw dili na makaangay
kang mae
ayaw lang intawon siya pasakiti
mahimo mo siyang iuli
kay andaw gihapon kaming
modawat kaniya

sa dihang nawala ang metapora

emcee: aduna ba'y kahulugan sa gidak-on sa slice sa cake nga itunol sa groom ngadto sa bride?
ninong: ah, ayaw palabii og kadako nga siya matuk-an, ayaw pod palabii og kagamay nga siya mabitin.mas maayo gayod kanang igo-igo lang....
(mipakpak ang namati)
emcee: well, wa jud nay significance. cake lang na oi.
(giatay! nawa na hinoon ang metaphor)

kon ngano nga ang ulan nayabag

sa una
sa bag-o pa ang ulan
nindot ang
iyang sonata
morag cascading waterfall
sa paa
sa pangpang

apan sa kadugayan
dihang nagbulag na
siya sa iyang
palangga nga nakakit
na og lain
nga mas adunahan

nausob ang iyang
panglantaw sa ulan
mora na kinig
yabag nga babayeng
buang nga nagsigig
syagit sa daplin sa
dalan unya ang
mga bata nagsigig
sunod kaniya
nga nanora
unya ang mga tawong
matagboan
naglikay kaniya

yabag ang ulan
bugnaw ang panahon
baho ang mga kanal
nagpasad ang mga
basura
unya ang mga iro nga
walay
tag-iya
naglatagaw

tambag sa higalang depressed

ang matag
adlaw interesante

ayaw palabya
ang bata nga dili mo kaila
ayaw palabya ang
iyang pahiyom
tutuki
sa iyang kabulingon
nagpahipi ang
santo ninyo
sa iyang
kasipat

ayaw palabya ang
panahon

kon sa imong kasubo
gusto mo lamang nga ang
adlaw og gabii
molabay diha sa pagpunay
mog katulog
hangtod nga ikaw malimtan
sa kinabuhi

pamatia ang hunghog sa
bongbong
lantawa ang kihat sa kisame
ang pagpamilok sa
bombilya
ang pagsayaw sa kahayag
diha sa kurtina
ang paghapit niini sa salog
diha sa kiblat
nga kalit

kon nasayod ka lang
kon unsa ka ka bililhon
matugkad mo unta kon unsa
ang pagpasagad

ayaw palabya
hawid, hapit, duol,
pakisusi
iapil ang imong mga
kakulba, kasuko, kahiubos
diha sa
pagkawala sa yabe sa pultahan
sa pagkaligid sa sakyanan
didto sa pangpang diin
napulo ang namatay
ang pag-ambush sa bus diin
baynte dos ka mga estudyante
ang napudpod sa bomba
pakisusi kon asa na ang ilang
mga tiil
ang ilang ulo ug mga tudlo

pakiglambigit sa dakong kaguol
sa kalibotan
ayaw kini palabya
kulang pa ang syagit
kulang pa ang pagbakho
pag-iyak
aron unta kita madungod
sa dunggan sa
kinabuhi

ayaw pagpakahilom sa
imong lawak
ablihi ang bintana
ug pultahan
pamatia ang paglabay
sa panahon
langoy sa iyang unos
hangtod sa kamatayon

Sunday, December 14, 2014

ang hinanaling kamatayon
sa iyang asawa
maoy nakawala sa iyang
kahadlok bahin sa kamatayon
ang kataposan mao
ra gayod diay ang akong
pag-inosara
karon nga miabot na
kini wala na kanako
ang kahadlok

diha diay sa pagdawat anaa
sa bisan unsang moabot
anaa ang kalipay

Saturday, December 13, 2014

ang tawong nagpuyo
kaniadto niining lawaka
gihimo ninyong kiko

kahinumdom ka ba adtong
tawo-tawo sa basakan?
kadtong giingon mo nga
gibutang aron kahadlokan
sa mga maya nga kusog kaayong
madagit sa mga tipasi
sa humay nga alang lang unta
kanato?

unsa ba ang gibati niadtong
usa ka kiko?
ang iyang dili gusto maoy
inyong kanunayng gihimo
kon motingog siya inyong
pahilumon
kon maghilom-hilom siya
inyong ingnon nga kanang amang
usa kana ka buang

hagbay rang namatay ang kiko
nga samdan ang kasingkasing
gilubong siya sa pipila lamang
ka mga pangadye
ang iyang haya mingaw
ug sa dihang gidapa siya sa
iyang lubnganan
pipila lamang ang nanguyog
wa gani madungog ang inyong
mga pinugos nga pagbangutan
taphaw lang ang inyong pagbakho

sa dili pa mamatay ang bag-ong
kiko nga gipuli ninyo sa iyang
lawak

ayaw kabalaka

dili ko sunugon ang balay
diin nagtukaw kanunay ang
lawak
nga uhaw kaayo sa usa
ka gamayng panimalos
ang imong mga higala
dili na nako mga higala
ang imong mga abtanan
mao na ang akong gibiyaan
ang lawak dili na lawak
ang salog wala nay limpyo
sa abog
ang bintana talagsa na
lang pagaablihan
ang pultahan wala nay
tingog

wala na mabuboi ang mga
tanom sa nataran
ang mga dahon sa kahoy
nangahulog na

morag di na nako maantos
ang pagsulat sa umaabot nga
akong isulti pa kanimo

dili ko na kini taposon
dili ko gamiton ang maong gahom
ipasa ko kanimo ang katakos
sa pagtapos ning akong balak

kay ang tanan
anaa ra kanimo
kon andam ka na sa
pagbiya
dili lisod ang pagpanamilit

sayod ka na kon unsa
ang ibilin kon unsa ang
angayan dalhon

unya inig himo nimo sa
matag tikang
palayo
sa maong pinuy-anan
dili nimo matukib ang
kalipay sa kasingkasing

kay ang imong gihunahuna
mao man ang imong adtoan
bisan gani ug masukad
wa ka pa mahidangat didto

ambush sa rural transit

maayong pagkabasa sa
dugo ang
daan nga sapatos
tupad sa gapasad nga
nangabuak nga bildo
sa bintana
ang kataposan mao
ra gayod diay ang akong
pag-inosara

karon nga miabot na
kini wa ko na kini
gikahadlokan

diha sa pagdawat anaa
ang kalipay
kon ang buyog
mas nasayod
unsa na lang kaha
ang nagkaon
nga ulod?

Saturday, November 29, 2014

miabot ra gayod ang panahon
nga di ka ganahan motingog
di gani sab ka ganahan manghilam-os
di ganahan molakaw sa gawas
bisan gani manumbalay
mangumusta sa mga silingan
sandurot sa amigo
di na sab ka ganahan mosuroy
sa baybayon
o balik sa bungtod lantaw sa
mga buwak nga bag-ong mibuswak
nga mora bag di na ka ganahan sa
pagbuhat sa imong naandan
unya nabalaka na silang tanan kon
naunsa ka unya maglisod kag ingon nila
nga miabot na ang saktong adlaw sa
kalipay

unsaon mo kaha pag-ingon nila
nga ang imong kalipay karon anaa
na sa pagpakahilom og sa
pagpahilayo?
aduna kay nakita
hagbay ra kining nagbalikbalik kanimo
gani matag-adlaw man
ila sab kining nakita
gani tanan man nakakita niini
apan

karong adlawa bisag mao lang
gihapon kini
aduna kay nakita sa iyang kasihag
nga nakasiga sa imong mata
hagbay ra man kini
apan naunsa ba nga karon pa man
nimo kini
nakita sa usa ka lahi nga panglantaw

gusto nimong isulti apan dili mo
masulti

ingon ani seguro ang nakita sa usa
ka buta
nga nakapahimo sab niyang
usa ka amang

dili ko usab malitok kanimo
taas ang imong sugilanon
sumpay sumpay ang kutay kutay

abi mo, duna sab koy sugilanon
gikan sa ilalom nako

maong, wa ko namati nimo
apan wa sab ka nanumbaling bahin niini

nindot kining atong kahimtang
ikaw diha, ako diri, tunga nato ang kahaw-ang

Friday, November 28, 2014

ulan
kusog kaayong ulan
ang akong payong
itom
gamay nga payong
nga ako lang
ang maigo
gani nabasa pa man
ang akong abaga
og kamot

misulod na unta ako
sa dakong lawak
apan nakita ko ang mga
karaan kong amigo

upaw, dagko na ug tiyan
sama kadako sa ako
taas, apan hoyhoy na usab
ang abaga

daghan kog mahinumduman
bahin nila
lami silang duolon, dayon
hunong, dayong ugkat sa
kagahapon

apan natiurok ko
layo pa gihapon sila
mibalik ko sa akong agi
bukhad ang gamay nga
payong nga ako lang ang
maigo

balik sa sakyanan
nanirado ko
samtang mikusog ang ulan


sa sud sa sakyanan
pagkamalinawon
gusto na akong mopauli
sa balay
apan wala ko dayon kini
gibuhat

naglingkod, mitutok sa unahan
wala koy gihikap
aron unta mawala ang
kalubog sa samin
heto ang hayop
isang kalabaw
apat ang paa
malaking tenga
at matulis ang
dalawang sungay

heto ang tagapagawa
ng di natin kaya
ang tagaararo, tagahakot,
sinasakyan,
at sa pagtanda
kinakatay, kinakain
hanggang wala nang maiwan
pati mga buto
tinatangay
heto ang isang hayop
mapagsamantala
walang patawad
walang utang-na-loob
at kahit kailan ay
di pa rin mabubusog

Wednesday, November 26, 2014

adunay milungtad
ah, akong giihap dili pinaagi sa akong mga tudlo
dugay, dugay-dugay usab kon ato gayong tinud-on pagsumatotal
labaw sa kawhaan og lima na ka  tuig

apan sayod ka ba nga kini milungtad
nga kini wala gayod milubad sama sa de kolor mong sanina
nga nahumol sa akong puti nga purol

ah, tungod kini sa usa ka paagi
nga wala nimo kaayo maaninaw kanako

kanang wala pag-ambat sa mga lamigas sa ulan og init
kanang ilang pagpunay ug paak, tulod, aswat nianang tiki nga hagbay rang patay
nga gani nanimaho naman diha sa kilid sa pultahan
napiit sa dihang imo kining
kalit nga gisirad-an
gisulayan ko baya upod pagtugkad
ang tanghaga
sa atong duha ka kinabuhi

kay ikaw lagi nagpunay man lang og
lutaw-lutaw diha nga morag dunay lain nga gipaabot
og ako nga giinitan na kaayo sa adlaw
og sa dihang wala kasabot

unya gustong sabton ang tanan kon unsa gayod
ang naa sa ilalom

mitiglom ko
gisulayan ko ang tanghaga kon unsa gayod ang
mabati diha sa pag-utong

kanang gusto kang mabuhi apan
wala na nimo ang paglaban sa hangin
kanang gusto nimo ang ilang kalibotan kay
nakita mo ang mga anindot diha kanila

apan wala ka nagpadayon kay lagi
ako nabalaka man kanimo kon asa ka na kaha
gipadpad sa unos
didto sa ibabaw
wa ako nagpahibalo kon asa na ako

apan kagahapon sa alas singko sa hapon
gamay na lang ang mianha sa menteryo
miercoles man god

nihit ang mga kandila sa kilid sa mga pantyon
gilabyan ko si Jingjing
kadtong namatay sa kanser sa matres (nga ingon ka
basig nagabaan kay ang iyang uyab
kadto mang tambok nga pari nga gisumpayan pa nimong
ginganlag monster sa imong maestro kaniadto sa
koleheyo)

ania ako nagtindog sa lubnganan sa akong
mga ginikanan

gisulayan ko pagsumpay-sumpay ang mga petsa
sa ilang kamatayon og pagkatawo
diha sa ilang mga krus og mga bitoon

hangtod karon wala pa gihapon nako
makita ang mga nangawala kanako

usa pa gihapon ako ka buak nga baso
hait nga mga buak nga kon matumban sa wala magbantay
segurado gayod nga makasamad

Thursday, November 20, 2014

hinay hinay lang

isulat ang tinood, apan

hinay-hinay lang basin
makum-ot, busa ayoha una pag

papahaluna ang mga pulong
hinay-hinay lang ug hirit morag bag

mga baraha sa atong piyat-piyat aron
dili masipyat diha sa pangandoy nga

unta modaog kita sa kaulahian, isulat
ang tinood, apan

kon mohatag kinig kasakit kon
hisgotan na gani, hinay-hinay lang

ayoha paghapnig, kanang nindot siya
lantawon diha sa kilid sa imong tiilan

sa ibabaw sa imong kiting morag irong
bisag imong gisipa anaa mikitoy ang

ikog, mipahiyom, miduol kanimo dayog
tila sa imong tiil sa imong mga kamot.

Tuesday, November 18, 2014

kapobrehon

gabiing
mamingaw

uhaw
nga kasingkasing

mga tudlo sa kamot
nga gilaayaan

mikitoy mikitoy
gustong mosuroy

kadyot lang
ayaw sa ug lakaw




hinumdumi
ang kanhiayng
kalisod
diha sa kagutom
diha sa walay
masima

kalimti ang
kamingaw

kutoy nga tiyan
kaniadto
baliki

kurog nga mga
tudlo
mga matang liraw
tiil nga lapokon
aping nga
giap-ap

gusto mo pa
ba?

ang kabilya sa pantalan

ang mga luha sa
kabilya

taya nga gisalod
sa

dagat nga
 daghan kaayo  og  mga dila

usa ka estranghero

kon mogahi na gani ang
imong ulo

sahay molantaw ko nimog
dugay

unya makapangutana ko
kon kinsa ka?

kay morag ang akong
gikapuyo sa pipila ka tuig

nga dili na mopatoo kanako
usa naman ka
estranghero
 
tagadis-a ka ba?
kinsa ka ba gayod sa akong kinabuhi?

kalibotan

dili nako
mahakop ang kalibotan

ang iyang mga dalan
nagsanga-sanga

unya wala may
kataposan

ang iyang dagat
pagkalapad

bisan gani ug ania ako
diri tupad sa mga panganod

wala gihapoy mga utlanan
kining lingin nga
kalibotan

uwat

pagkadagko gayod
sa gipili nga mga kasag

nalipay ka nga naghandom
unya sa ilang mga unod
diha sa dakong lawas og
paak

baye ang imong gipili
nagtubod ang imong laway
sa mga aligi

pagkagabii diha sa pagpangaon
dili nako mahulagway ang
imong nawong sa
kasuko

pagkadagko sa mga balayan
nga walay sulod
pagkadaghan sa mga tipaka
nga walay unod

usa ka panghitabo sa kalibotan

nagbagotbot ang kalibotan
diha sa dalugdog
nasuko kini diha sa iyang
mga linti

nag-iyak ang mga panganod
diha sa ilang mga ulan
walay hunong pipila na kaadlaw
walay pugongpugong

midagayday ang tubig gikan sa
aping sa mga kabukiran
nahulog sa mga suba ug mga sapa
nagpadayon ang ilang panaw diha
sa kusog nga baha

sa kilid sa bungtod atua ang mga
nag-undok nga  mga balay
ang mga inahan naglung-ag sa pamahaw
ang mga amahan nagtustos sa ilang
nilikit nga lomboy
nagpahulay, nagpungko
nagpaabot sa paghunong sa ulan
adunay batang giduyan sa magulang
nanaghoy ang manghod nga lalaki
misayaw ang anak nga tunga-tunga
sa higdaanan

miabot ang dakong baha ug gidagit
silang tanan
gilaknit sa payag
nadungog ang kusog nga mga syagit dayon
mibanos ang lalom nga kahilom


nawagtang ang aso gikan sa dapog
misutoy sa langit
morag nangamuyo
nagpadayon gihapon diha sa paghilak ang mga
panganod

usa ka daklit

ang pipila ka tuig sama sa mga habol nga nagsapawsapaw sa higdaanan.
gum-ot
nanimaho na gani
kon hikapon baga ang abog
mabati mo nga kini
morag
gilomotan,

sulod gawas ta ning lawak. pagkadaghang gihunahuna.
nagpasad ang bulahaton alang sa mga ugma
gilabaylabayan na ang mga panghitabo nga nanglabay
wala na ang tutok
puros na lang mga daklit, pasiplat,
usa ka daklit
igo na kini
wala na ang pagbarena kon unsa kadto ug unsa kini
ug ngano
daklit lang ang paghisgot
dayon balhin sa lingkoranan, tindog kadyot, lantaw sa unahan
pamati diri, balik sa kilid sa bintana
pahungaw, wala na ang pagbulhot sa sigarilyo
human na ang pagsalig sa aso

usa lamang ka daklit nga paghisgot
dayon ilubong ang wa mauyoni sa kalimot
sama sa mga habol nga nagsapawsapaw nga walay laba nga nanimaho diha sa higdaanan

wala na kitay panahon alang niini
layo pa ang panaw, mogikan na usab kita

maong asa ba ang panagbangi?
wala. asa na ba ang atong pagahisgotan dayon awayan?
wala.

o di ba? di ba malipayon tang duha?

Tuesday, November 4, 2014

dili jud papiri
kini si rosannie
edad 47
trabaho beautician
taga argao
status single
EQ grade 4
tatay demetrio kargador sa pier
nanay narcisa plain housewife
brothers demetrio jr., narciso, gorgonio
sisters juliana, narcisa, desideria, francisca

travel light humag dagkot sa kalagkalag
didtos menteryo sa dohinob
pauli sa ilang balay
manicure bag ray dala
sud ang usa ka pula nga panty
og itom nga hair brush
naka sunglass heavy ang tint
bahala na og last trip basta front seat.
sa wa pa
sa wa pa nato sugdi ang
pagtilap sa ice drop adtong gagmay pa ta
sa pa tay buot
nga ipasabot sa atong gustong tilapan
ato usang gisabotan nga ilis ilis ta nianang pagtilap
sa usa ka ice drop
nga atong paspasan kay init kaayo ang panahon kanato
nga unya basig wa pa kita matagbaw sa pagtilap
unya nahilis na ang ice drop unya ang nabilin mao na
lamang ang stick
nga gikan sa gahi nga kawayan
ang bungol
nakakita
ang buta
nakadungog
ang bungi
nakalakaw
ang bakol
miawit
ang buktot
nakatulog
ang amang
mipahiyom
ang bugo
nagwali
ang bata wala
magdula
ang tiguwang
naglingkod

undangi na
anang pagsunod
ning akong mga
linya
wala diri ang imong
gipangita nga
milagro

Saturday, November 1, 2014

walay ibilin

kasagaran ang pagpili mao ang
pagputol

dili man god kuno mahimong
sa pagpili pilion ang tanan

duna gyoy dalhon duna say ibilin
dunay kuhaon pwes dunay biyaan

alas syite sa buntag samtang namahaw
gipili ko ang duha: kutsara og tinidor

wala koy gibilin: chorizo og sinanlag
gitilok ang nilat-ang tiil sa baboy og
gihigdaang lata sang mongos.

ikaw og silang tanan, ania man sa sulod
sa akong kasingkasing. Akong hutdon.

Thursday, October 30, 2014

sa among panaghibalag

si digoy naupaw na
apan lagi kay sige man lang sulod sa iyang lawak
naputi ang iyang pamanit

si andres nalup-og, namyahok,
morag bisiklitang guba nga giparking sa kilid sa
kamalig

kanhiay nanagkuyog kami sa panaw didto sa
kabatan-on
si digoy tupad sa iyang mga botelya sa tanduay
si andres nga nagsuot sa iyang medyas nga bahong tuway
sa tungang gabii milanog ang mga yabag nga kanta
sa beegees
samtang ang among tigbantay nagdumot sa tumang
kalagot

karon si digoy naupaw na
nag-alagad na sa simbahan
si andres bulag na sa iyang duha ka asawa
unya nabalaka sa iyang anak nga dalaga nga kagahapon lang
naglaslas sa iyang bukton

maglipay ta, maoy akong haw-ag
kay ang mga kapakyasan wala kadulot sa kabaga sa atong nawong
diha sa kanunayng pagpakabuhi

ang mga ihalas nga kabayo sa bukid sa malindang

ang gusto lang ni tony
nga sakyan lang bisag ang usa lamang sa
napulo ka mga ihalas nga kabayo
ning dapita

ganahan siyang nagtan-aw sa gipalid
nilang mga buhok
ang hangin nagpakita sa ilang kalipay
diha sa kagawasan

kon masakyan niya ang usa niini
mahimo na siyang mamatay
bisag ihagbong pa siya sa kilid sa bungtod
aron maligid ngadto sa ubos sa
patag

wala siya'y laraw nga iya kining dakpon
hiktan
og himoong ulipon

kay ang hangin sa kabukiran kanunayng
nagpakita sa ilang kalipay diha sa tumang
pagkagawasnon

Tuesday, October 28, 2014

ang atong kahimtang
lahi,
ug sa kalahi niini, wala nato
kini gipanugilon
dili pod nato kini ikaulaw
labaw na nga dili sab ikapanghambog,
sa pag-abot unya sa panahon
gisugdan nato ang pagpanaw
kanang ikaw lang
unya ako ra pod,
sila nga nagduda kabahin
sa matood
og kadtong nakahibalo
buot magpabalon sa ilang
daghang kalooy
nga atong gibalibaran kay sa
tinood lang
wala nato kini kinahanglana

abi nila og dili na kita kamaong
mopasilong kon
mobusdak ang kusog nga ulan
abi nila dili na kita magdala ug
payong kon ting-init na kaayo ang
panahon
sayop baya sila.
naghandom ba gihapon kita sa
pagbuswak sa antulanga
gibati pa gihapon nato ang
kabugnaw sa hangin matag kaadlawon
gusto unta nato silang sultihan
nga sa atong pagpili sa kahilom
anaa lang gihapon nagpahipi
ang kalipay sud sa atong
dughan.
nga kita mapasalamaton lang gihapon
diha sa pagdagan sa mga kamot sa
orasan nga mihapyod sa kahomot sa atong
buhok
nga misaas lang gihapon sa mga umaabot
didto sa unahan.
gihandom pa baya gihapon nako ang
hinog nga bayabas
nga nahulog
unya wala matunong sa akong
baba
hinoon, kon aduna may pagbasol
og kon kinsa man ang basolon
wala nay lain kondi ako lang.
ako lang ug ako lang gayod gihapon.
sayod kong gikalipay kini ni Huwan.
apan gikalipay ko usab kini kay kon nahulgan pa
og hinog nga bayabas ang akong baba
dili pod gayod unta nako masulat kining maong
balak.

pasalig




dawata ang
mga butang nga dili para imo
dawata nga adunay mga para dili gayod
nimo
ayaw kahiubos
dili lang ikaw
gipaluhod
sa monggos
gisilian ang
baba
gipadupa ug
pila ka oras
atubangan sa
altar
galutok ang mata
nga mitutok
sa santo kristo
miagas ang luha
nga morag lusok sa mais
human sa pila ka tuig
giduol ka sa imong nanay
miingon" kon wa ka paludha,
molampos ka kaha?"

KAPOY


gipaibog ka lang
pero
nungka nga patilawon
nagtupad mo
pero ang iyang giagbayan
lain
morag ingon ana
gihukad ang kan-on ug
ang lechon manok
sa lamesa
apan lain ang gitawag
nga pakan-on
mora kog isdang
nahaylo sa kahayag sa bulan
unta gadinanghag
nga nakatulon sa imong paon
ug karon
ania naglumpat-lumpat kon
ansaon
pagtangtang sa akong kaugalingon
diha sa imong
taga.

ALANG KANG EVELYN


ang atong kahimtang
lahi,
ug sa kalahi niini, wala nato
kini gipanugilon
dili pod nato kini ikaulaw
labaw na nga dili sab ikapanghambog,
sa pag-abot unya sa panahon
gisugdan nato ang pagpanaw
kanang ikaw lang
unya ako ra pod,
sila nga nagduda kabahin
sa matood
og kadtong nakahibalo
buot magpabalon sa ilang
daghang kalooy
nga atong gibalibaran kay sa
tinood lang
wala nato kini kinahanglana

abi nila og dili na kita kamaong
mopasilong kon
mobusdak ang kusog nga ulan
abi nila dili na kita magdala ug
payong kon ting-init na kaayo ang
panahon
sayop baya sila.
naghandom ba gihapon kita sa
pagbuswak sa antulanga
gibati pa gihapon nato ang
kabugnaw sa hangin matag kaadlawon
gusto unta nato silang sultihan
nga sa atong pagpili sa kahilom
anaa lang gihapon nagpahipi
ang kalipay sud sa atong
dughan.
nga kita mapasalamaton lang gihapon
diha sa pagdagan sa mga kamot sa
orasan nga mihapyod sa kahomot sa atong
buhok
nga misaas lang gihapon sa mga umaabot
didto sa unahan.
inig tingog sa tuko
sa kilid sa among balay
sugdan sab nakog
ihap kon unsay
dangatan sa akong
kapalaran

bisan gani ang tuko
wa lang gyod gihapon
magkadimao.

pasalig

dawata ang
mga butang nga dili para imo

dawata nga adunay mga para dili gayod
nimo

ayaw kahiubos
dili lang ikaw

KAPOY

gipaibog ka lang
pero
nungka nga patilawon

nagtupad mo
pero ang iyang giagbayan
lain

morag ingon ana
gihukad ang kan-on ug
ang lechon manok
sa lamesa

apan lain ang gitawag
nga pakan-on

Sunday, October 26, 2014

sa dihang mihangyo ka nga tudloan unsaon pagsulat og balak

matudloan kaha ang kasingkasing?

mahimong tultulan mo kini
sa lasang
sulod didto
kuyog ang kabalaka
kon makagawas pa ba unya
kita sa iyang kangiob
kuyog sab ang kahadlok kon
mabuhi pa ba kita
didto's ilang kaguliyang
kay daghan na baya ang
gidungog nga namatay didto
ug gilubong lang dayon
sa mga anino sa kagabhion

matudloan mo kaha ang kasingkasing
kon kinsa ang imong higugmaon?

mahimong gakson mo sa imong mga bukton
ang dili nimo gusto
apan ipiyong mo gayod ang imong mga
mata
dayon magpabilin ka diha sa kahilom
dayog bisibis sa mga luha
sama sa mga panganod nga nabug-atan
na sa iyang gihambin nga
dag-om

abi mo
ang balak naa ra man sud sa imong kasingkasing
busa dili na ikaw matudloan nako
kabahin niini

ugma dagan sa kalsada
silong sa mga panganod ug adlaw
kon mag-ulan
pasingulan
kon anaa pa ang bitoon sa kaadlawon
lantawa pag-ayo

nindot di ba? gibati mo ba kini?

wala mo na kinahanglana ang mga libro
ang ilang gipanugilon
ug ang akong isulti wala nay bili alang
kanimo

kay sa tumang kalipay
mobalak ka
og sa tumang kasakit usab
bisan ikaw wala'y mahimo
mobalak ka gayod

wala nay makabanban sa tingog diha sulod
sa imong kasingkasing
mora kinig bata nga sa dihang giluwa na sa
bilahan sa iyang inahan

kalit kining moiyak
litok sa pulong nga bisan siya
wala man gani makasabot
way dag-anan ang
kasilag
nahaylo ra gihapon
sa kataposan
anang gugma

way dag-anan ang
kasamok
nahilom kini pag-abot
sa kasakit

way dag-anan ang
kahakog
silang tanan
nadala

gidagit sa kamatayon.
ang alibangbang  mibatog sa imong buhok


unya wa ka na milihok
tungod sa imong gibitbit nga kataha

ah, dili lang kataha
gihambin mo lang gayod  ang
tumang kalipay!
ang kabuntagon nga walay
baba
miawit diha sa mga
tamsi ug
uwak

ang kaudtohon sa iyang
mainiton nga kamot
giduyan sa hangin paingon
sa baybayon

ang kagabhion nga hagbay
rang nagpaabot kanato
didto sa higdaanan
nakasabot sa atong pagpanilap
sa katam-is sa iyang
kabugnaw og kangitngit

hangtod nga ang bulan
miabot og milandag sa atop
sa atong balay
milutaw sa langit
nagpahipi sa kilid sa atong
bentana

samtang kitang duha nagsalo
sa atong mga kahilom

Saturday, October 25, 2014

pilipinas

karon
mas gibati mo nga
mas mahal mo siya
sa dihang mitugpa
na ang
imong gisakyang
eroplano
gikan sa dubai

dili katugbang ang
kataas sa
burj khalifa
sa kamubo sa imong
gamay nga kagoran
nga sahay maoy
imong malingkoran
didto's kusina
samtang gakagod
kag lubi
para sa imong
nangka tinunoan

layo ra ang burj al arab
sa imong
gihimong papel nga
tabanog
nga imong gitugpo didto
sa Bandera
diin galapos lapos
ang hangin sa
kabungturan

ang kaanindot kuno sa
souk mabinat
di malabwan samtang
gahitit kag shisha?

ah, mas lami ra ang kinilaw
nga diwit-diwit didto's
merkado sa katipunan
nga gisawsaw sa dili pa kaayo
aslom nga tuba kagahapon

balas 3

dili mo mahakop ang
tanan
bisag unsaon

kon palapdan
mo pa ang paghawid
gamay na lang
ang
maimo

balas 2

kadtong balas
nga nakalingkawas
sa imong
paghawid

mao ang
nagmalimayon
ipon
sa bonbon

balas 1

kadtong
balas nga wa
mahulog
gikan sa imong
palad

maoy imong
tinood

Saturday, October 11, 2014


ang kalabera sa dugay ng patay
nga pwede nang habwaon aron
pulihan sa bag-ong miabot nga
batan-on

wala nay sulod

kaniadto daghan pa kining
tingog, sama sa awit sa uwak
agik-ik sa mga kikik
pangulipas sa bugsay didto
sa giagiang busay
kanaas sa kampay sa kataw

karon mora na lang kinig
kampana nga walay dila

tilaok na lang nga walay
kalembang

lahi na kaayo kaysa kaniadto

 


lahi ang atong paglubong
kanila
lahi sa ato nga pinahayang
sila gatindog
unya ang ilang mga kamot
ginapos

dili buwak ang gilabay
dili sab bato 
didto sa ilang lubnganan

mga tunok man
ug mga lansang
dunay usa
gilabay ang buak nga bildo
sa bintana

dili piyong ang ilang mga mata
simag
morag duna silay gikahadlokan
disir 
gipatay

ang gikudkod nga bata sa 
inahan nga
ganiha rang gabakho
nagsiging pang-it sa iyang tudlo

pula ang ngabil nga morag
sagol dugo

paghuman sa maong lubong
sa dihang namauli na ang mga miduyog
sa kasub-anan
nagbabotbot ang mga
tigkalot

gamay ra man god kuno ang
bayad sa ilang 
dugay nga paningkamot

 


Di tinood nga wa pa nako
nasikop ang saktong pulong sa akong gibati

nakit-an ko na
nasakpan
nahiwaran ko na ang maong pulong
ako na gani untang litokon

bag-o ko lang kining gibutang
tupad sa tasa sa akong kape nga nabugnaw
diha sa bukton sa balay sa veranda

kalit mang nawa

nakabantay kog uwak nga milabay
dunay gituhik
ug dayog lupad palayo kanako

maayo untag iyang iluwa kadto
diha sa imong tiilan
bahalag maalaan mong iyang
iti lamang

Friday, October 10, 2014

ang pagbuhat sa balay
kon unsay bintana og pultahan
apil na ang dapogan
ila nga gisabotan
kon ang bintana dili hiwi
unya kon ang pultahan dili balit-ad
unya kon ang hagdan
dili magtapot
moingon sila, dili kana ang balay nga
atong gisabotan
busa ila gayod kanang ipaguba
kay og dili
magtagay sila sa ilang gipuy-an
nga mga panganod
og dayon nilag pangatawa og
panaway
natiguwang na ko
ang akong nahibaw-an na mas nindot
kon tukoron ko ang balay
nga akong gidamgo
walay haligi
walay atop
di na ko ganahan sa mga bintana
kay gikapoy na kog pamintana
di na pod ko magbuhat ug hagdanan
ug pultahan
kurog na man god ang akong mga kamot
ug mga tiil
ako lang ang nakakita niining balaya
og bisag tukuron ko kini
sa inyong atubangan dili gayod kini ninyo
makita
wala ka usay tingog sa mga martilyo ug
gabas o tigib nga imong madungog
ako lang ang magpuyo niining balaya
ako lang ang magtukod niini
og kon mokatawa ka sa wala nimo makita
og mahikap
o mapuy-an masukad-sukad
na ikaw na gayod usab ang akong matawag
nga buang
apan dili ko ikaw angay kataw-an

Monday, October 6, 2014

ayay,
dili baya katol ang
akong likod,
katol ba ang imong
likod?
ayaw kalota ang akong
likod
kay dili kini katol
apan kon gusto ka
magpakalot ko
aron lang usab dili ko
mataha
nga mokalot sa imo.
giawat ko ang ang adlaw
ang kahayag gihimo kong usa ka
tulumanon
matag buntag

ang kangitngit gihimo kong
dawatonon
nga kon dili ko kini dawaton
mahimong ako
usa ka mabudhion

wa ko na gihipos ang mga bitoon
sama sa akong
pagbakho kaniadto

ang hangin, ang mga panganod
dili kana sila maako
busa sama sa akong kinabuhi nga
hinatag lamang

gipaanod-anod ko sa dakong wamang
sama sa usa ka dahon
diha sa dakong baha
sa kapalaran
ang kaanindot niana
naa sa dili pa masabtan nga
tanghaga

gisulti ko ang dili mo
maangkon
gipalupad ko ang dili
mo gayod
madakpan
gibuhian ko ang dili
mo na masakop
hangtod
sa kahangtoran

niining paagiha
mingawon ka sa langgam
magpanglingo ka sa kaidlas
sa manatad
adunay imong nahawiran og
abi mog imo na unta
apan
nakalingkawas kini sa imong
mga kamot
sama sa usa ka danlog nga
haw-an

maamgohan mo unta human
sa pipila ka
kagabhion
ang kabahin kanato

Saturday, October 4, 2014

ang tabanog sa langit
nga gibitad-bitad sa bayong-bayong
og ang tawo-tawo sa basakan
nga gilabyan sa hanging amihan
ang banog nga nagpasiplat
sa nasaag nga piso
sa inaang nangakha sa basa
nga yuta
og ang wati nga mitago sa
ilalom sa bato nga buhi
ang pagmugna
pagbati baya
ang paghunahuna
og lalom usa ka pagsalom
diha sa
pagbuhat

ang pagmugna mao ang
imong gibati nga imong
gipakita diha sa mga panganod
nga imong gitagik diha
sa langit
mahimong mawala ka diha
sa pagmugna
og dili ka makatultol balik sa
imong agianan
paingon sa imong
kaugalingong ganghaan
ayaw kabalaka
kay sa mata sa naglantaw
nga mibati
mas matahom hinoon
kana
ang kalinaw ning lugara
gitugaw karon sa dakong lagubo
sa mga tambol
gadahunog ang mga tambotso
samtang nagpagawas kini sa itom nga aso
halad sa sayong kaudtohon

ang mga bata nagpadaplin sa kalsada
lantaw sa mga misayaw ug mikiay
pahinungod sa usa ka pista.
giingnan mo ang bukid
nga haskang habuga
ang dakong dagat sa
unahan nga misangkad
sa tibouk kalibotan

ang pangpang nga
gikahadlokan sa hangin
" wa ko mahadlok!
dako akong buhi!"

Wednesday, October 1, 2014

tinapulan

pamub-anay
sa saya



pahamisay sa
panit sa
paa


pakitaay sa
bulog

lumba dayon
nianang pagtulon sa
kaulaw

kabugnaw sa usa ka panaglambigit

kaadlawon
kusog ang ulan
walay hangin

ang kurtinang
seda
wala gayod
tandoga

ang mga iro diha kanimo

wala na kapugngi ang
imong kapalaran sa

panahon nga ang imong
lima ka iro nga ang kagikan

mao ang mga kalsada
o mga dapit nga hilit

anaa na sa imong kan-anan
og sa imong higdaanan

nagyampungad og ikaw
miingon nga kini sila bisag

mga hugawan og badlungon
mao na man hinoon ang

naghatag kanimo sa dakong
kalipay. Sila usab, walay kasakit.

agipo

kanunay tang
dagkotan ang mga
misteryo

kinahanglan nga ang
mga kalayo niini
dili gayod
mapalon


padilaabon ta ang mga
kainit pasangkoon ta kini
kanunay sa langit
kon mahimo abton ta ang
walay kahangtoran

ayaw ug lantaw diha sa
atong mga tiilan
hapdos baya gihapon ang
mga agipo

Tuesday, September 30, 2014

kalooy

manamin kita sa
adlaw


walay daghang
drama

sa iyang pag-abot
ug pagpahawa

trabaho lang
walang personalan

ikaw ang gatanga
kalooy baya

nagpahipi lamang

nakita ka ikaw nga
gaduyan sa kilid sa balay

dapit sa bintana diin
sulod-gawas ang hangin

nakita ko ang buwak
sa kalachuchi dapit sa unahan

nakita ko ang miabot nga
imong gipaabot

siya,siya ang imong
gihigugma

pagkawala

mihangad ang nahulog nga
dahon

sa dakong kahoy nga iyang
ginikanan

hanap na ang langit og
ang hangin init

gidawat na ang pagkalaya
gibati na ang pagsugod

diha sa pagkalata diha
sa pagkawala

pangandoy

kon mapugngan ko lang
unta ang hangin

ang kahaponon
sa iyang pag-abot

kon langan-langanon
lang unta sa makadyot

ang kagabhion, unta,
basin pa unta kon ako

mahimo pang imong
mahalon

Sunday, September 7, 2014

gikabuangan

wa ko kahadloki ang
kaadlawon

sa pipila ka gabii
nga ang katulugon
gadumot kanako

wa ko mabati ang
kaharuhay sa matang
gianay

wa ko kahadloki ang
kaadlawon

ako kining gikatulgan
didto sa kasagbotan

tupad sa babayeng
imong gikabuangan

pusoy

ang akong bugoy
ako na unang bugoy
apan kaunsang aguroy
nga ang akong bugoy
wa man kataghoy

ang akong bugoy
nga unta ako sang ipatuli
aron motubo ug dali
apan unsang kaaguroy
nga ang akong bugoy
usa man ka pusoy


nanimahong patay

ang akong iring
nga amigo nga usa ray
mata ang kolor niini

kahil, dili sama kahumot
hinoon sa kahil

sa iyang kagutom pati
patayng balagtok iyang
kaonon

layo pa siya
ang iyang pag-abot
matantiya ko na

kay ang balay namong
gabok na
manimahong patay.

ang panimalos sa kamatis nga hubag

ang panimalos sa kamatis
dili baya masayon sa dihang
nahinog na kinig mihubag
ug wa pa gyod nimo pupoa
kay pahinggon pa hangtod
nga kini niadtong gabii
sa silingang walay puangod
iya na hinoong gikawat laktod.

daghang salamat

manong matadero
nga dagkog bukton
papalita kog bukog
balig dos sientos sais
para ipakaon sa akong
unom ka irong bisdak.

Saturday, September 6, 2014

paghinumdom sa akong katigulangan

niadtong adlaw sa
iyang pag-iyak kay wala niya
makuha ang iyang
mga damgo

akong nakita nga kaming duha
pareho rag kagamyon

gani sa akong kaulaw miduko ako
isip usa ka ulipon

niadtong adlawa giingnan ko ang
akong kaugalingon:

patas lang diay
unya ang pangidaron
dili maoy ulohan
ang mga nangagi
dili agianan
daghang sagbot apan
dili kini makita
ang timbangan naa
diha sa atong tungatunga

SA AKONG TANTIYA

inamigo lang ang
panghitabo

kay imo mang gikalot
ang iyang likod
bayad lang usab niya
kanimo ang imong
kadaogan

sa matag adlaw nga
siya moawit
didto daplin sa baybayon
ikaw ang omang nga
mogawas sa imong
balayan

og sa matag gabii nga ikaw
mahimong bitoon
siya ang kinatumyang bongtod
nga imong patongan

ingon ana gayod kana
iluom ang kasuko
gamitag maskara ang
kasina
sayaw sa kuskos sa
gitara
bisag yabag hala birada.

kataposang tambag

ang anino sa kahon
ang magsulti kanimo sa saktong
higayon

kon kanus-a mo gayod siya
katkaton

sa imong nahimotangan karon
tantiyaha ang pisi
ug ang imong kabug-aton

Saturday, August 30, 2014

ang makililimos

gikamingawan mo sila
matag gabii gihandom mo ang
sunod nga panagkita

malipayon ang mga umaabot
nga adlaw
midungaw kas bintana
mihangad sa langit matag
gabii nga puno sa
mga bitoon

miabot ang adlaw sa panagkita
sila lang ang nagkasinabot sa
ilang pinulungan sama sa mga
tamsi og ikaw ang tikarol nga
nag-inosara sa sanga atubang
sa lim-aw samtang gilantaw ka
sa isdang puyo nga naghipos
sa iyang katawa diha sa bula
sa iyang gininhawa

kon makasulti pa lang unta
siya mao kini ang iyang gustong
ipasabot kanimo: ikaw lang ang
gimingaw ug ikaw lang ang
gihimong tanga

hadlok ka man god nga
mabyaan
sa urog sa panahon
nahimo kang makililimos
sa tagsa ka dako nilang
pangambat

nasayop ka karon sulsihan mo na ang nagising sinina

gipauyonan ka lang
gisakyan

gikuyugan ka
sa imong gustong
adtoan

pag-abot sa unahan
iya kang giatubang
ug gikataw-an

nasayop ka
karon sulsihan mo
na ang
nagising sinina

gisagol mo man god ang kagalot ug ang botbot

sa pagpangita sa
kinalamian
wa noon kay
bisag usa
nga natilawan

sa paghandom
mo sa kinakusgang
balak
wa ka na man hinoo'y
bisag usa nga
nasulat

gisagol mo man
god ang kagalot ug
ang botbot

Friday, August 15, 2014

ayaw palabi anang
kasubo

nga kanunay mong
gisukod matag
gabii unya imong isulat
ug isangyaw nga kini

mas bug-at
mas lapad
mas taas kaysa uban

wa ko maghisgot sa
ako
usa ka dakong kamalig
unya ikaw
naa sulod didto

ang akong kasubo
ako lamang
dili ko na kini
isugid kanimo

gisulat ko kini
og nanghinaut ako nga unta
dili mo kini mabasa

Thursday, August 14, 2014

ang kalipay
lahi ang bunga

dili tam-is
dili sab mabulukon
nga mga buwak
sa kilid
sa dalan

gani dili na kini
makaon

buyagon ko unta
ikaw sa paghambin
sa daghang
kalipay

mangausik lang kini
kay dili mo man kini
tanan magakos o
gani mahawiran

hangin ang kalipay
lumalabay
bation mo ang kabugnaw
sa giigang mong
kagaw

pagkahuman sa pipila
lamang ka gutlo
biyaan ka niini

kon dili mo kini sayo
dawaton
kwidaw, hilantan ka
og ikaw magsalimuang
sa pagpunay ug damgo
sa dili angay kanimo

ang kalipay kon moabot
usa lamang ka alibangbang
nga mibatog sa imong
palad

ayaw hawiri
mabali ang iyang pako
ayaw ilabay
kay basin unya ug mapiang

pasagdi lang
dawata ang iyang pag-abot
unya kon mopahawa na siya
pabaloni ug gamayng
pahiyom
igong pasalamat sa iyang
pagtugdong

hatod kawat

gihatod sa hangin ang
pulong
nga gibilin diha sa kilid
sa imong dalunggan
nahikatulog ka
sa tumang kakapoy
ug wala mo maambat
ang kahigwaos
sa nagpaabot

gisapot ang kabuntagon
kay wala na ang
pulong

gikawat sa kaadlawon
nga naghibulos intawon
gasakit ang tiyan sa
tumang kaaslom

ang artist

kay artist lagi kuno siya
gibutangan niyag dakong oten sa igorot
ang ubos sa pus-on sa santo kristo
og iya kining gibitay sa kilid sa
ilang pultahan aron makita gayod
sa bisan kinsang mosulod
nga bisita sa iyang panimalay

ang iyang mga lingkoranan sa
sala puros mga driftwood nga iyang
gipamutol, gilansang, gisilakan,
og gisumpay-sumpay nga morag
mga tawong nanggiluko,
nagbuyon, nanghinambid
og kon molingkod ka mora kag
batang gamay nga iyang gisapupo
sa iyang bilahan

daghan pa siyag mugna nga kon
dili ka maanad
muigking gayod ang imong dunggan
o dili ba mamula ang imong nawong
o dili ba morag gipabugnawan pag-ayo
ang imong itlog hangtod nga kini
mokulo nga morag limatok nga wala
pa kasupsop ug dugo sa bitiis sa
way alamag nga naligo sa
suba nga lubog kaayo

ang akong mga mata naglirawliraw
samtang iyang gipasabot kanako nganong
siya mahimong usa ka respetadong
pintor, iskultor og manunulat

gusto niyang basahon kanako ang balak
nga iyang gisulat kagabii samtang
siya nag-inosara nga galingkod sa iyang
veranda sumad sa paglayas sa iyang
anak nga adoy-adoy

og sa iyang pagkahibalo  nga gikalingawan
sa iyang asawa ang ilang sulugoon nga
suban-on hangtod nga milayas kini
ug wala na mibalik

mingaw ang iyang kinabuhi nga giduyugan
sa pagbudhi, sa kalisod, sa mga panghitabo
nga dili pa niya madawat

ingon siya, kon mahimo unta
mamati ako samtang basahon niya ang
maong balak kabahin sa kasakit

apan akong gipasgang ang iyang
pangamuyo
gibalhin ko ang hisgotanan,

" bugnaw kaayo ang panahon dinhi
mahimo bang manginom una kita ug kape?"

busa kaming duha nanglingkod
sa iyang driftwood nga lingkoranan
nanginom ug kape
nahisgot sa mga kaagi namo sa gagmay pa kami

kadtong namasol kami sa suba
dayong pangaligo
kadtong namupo kami ug manggang hinog
sa bungtod
kadtong nanakay kami ug kabaw
balik sa among balay gikan sa basakan

og ako siyang gidagit gikan sa islang mamingaw
gikan sa subo nga suba
ngadto sa kabulakan, ngadto sa naglupad nga kalamgaman

nangandoy ako nga unta ang kristo nga iyang gihuboan
ug gibutangan ug dakong oten sa igorot ang atubangan
butangan unta niya ug bisag bahag na lang
aron matabunan ang kangil-ad sa atong mga kaulag

kay alang kanako ang matuod nga artist
maoy maghulip sa maot nga realidad
maoy tighapsay sa dalan nga tunukon
maoy tighipos sa mga basurahan aron dili na kini
masimhot ug makita sa mga lumalabay
maoy tigpamilo sa mga habol matag buntag sa atong pagmata
pagpahaluna sa banig
paghapsay sa mga kum-ot nga alugnan
paghipos sa mga bulingon ngadto sa bukag nga uway
pagtrapo sa mga abog
pagpangluwa didto sa gawas sa bintana


pagpainom ug kape sa mga gitugnaw
pagdalit ug maayong hisgotanan sa mga nagmingaw
pagpakatawa sa mga nagsubo
tighatag ug panyo sa mga nag-iyak

tighupay sa kasakit
tigpakatulog sa bata nga gihadla sa kahadlok sa mga dili ingon nato

ang nanay nga naghawid sa kamot ni neneng
samtang silang duha molabang sa usa ka karsada nga gidagandaganan
sa mga sakyanan nga naglumba kon kinsa'y unang makaligis
sa dangag nga pedestrian....

Tuesday, August 12, 2014

gisunod sunod kos
akong mga tunob

milingkod ko sa
makadyot sa kakapoy

mihunog usab kini
ug mitutok kanako

gusto unta nakong
ilailahon pag-ayo

apan mora kinig
nasuko ug wala mitingog

ako sab nga taas ug
garbo, nanglood

ug sa akong kaugalingon
miingon: dili ko kamo angkonon
ang gipangandoy mong
bitoon
karon nasikop mo na
ug imong gihipos sa imong
palad
gikumkom mo kini
ug gibati ang kainit
sa kadugay sa panahon
sayran taka
kon dili mo kini buhian
sa langit nga angayan niyang puy-an
mapaslot ang imong palad
ug kon dili gihapon nimo kini buhian
masunog ang imong kamot
ug kon gahi gayod kaayo ang imong ulo
masunog ang imong lawas
magdilaab ang imong kalag
kay ang bitoon dili kini para kanato
para lang gayod kini sa langit
ug kita igo lang gayod sa paglantaw
sa iyang kaanyag: gawasnon diha sa pagilak

Friday, August 1, 2014

nakatawa ko
abi kog kinsa kining gasunod sunod kanako

anino ko ra man diay

abi kog kinsa na gayod akong sikata
nga sunodsunoron

haskang sipyata
anino ko ra man diay

abi kog kinsa kadtong tunob nga
kanunay misunod kanako


sa akong tsinelas ra man diay


Thursday, July 31, 2014

luag baya ang
kalibotan

nganong
ato mang awayan

kining gamayng
luna nga gipuy-an

sa usa ka
bonhok
lamang?

Wednesday, July 30, 2014

nindot ang
maglutawlutaw maoy
ingon sa balahibo
sa himongaan

walay kapaingnan
walay saktong adtoan

apan ambot ug ngano ba
nga hayahay man
ang pamati

labi na ug kusog ang
hangin
unya layo kaayo ang
giabtan

wa mahulog
wa mabusdak

Monday, July 28, 2014

giatubang ko ang gamhanang leon
wala ako mitingog

gibabagan ako sa dakong tigre
apan  wala ako milihok

gilikosan ako sa dakong sawa
apan wala ako misyagit sa pakitabang

gipasulabi ko ang kahilom
gipatig-a ko ang akong kasingkasing
gipatay ko ang akong hunahuna
gilabay ko ang akong mga damgo

ug busa wala ako mahadlok
wala ako mamatay

ako ang buhing kalag nga karon
nagpuyo sa mga panganod sa kalangitan

naglantaw sa ubos
nagpanglingo-lingo sa akong ulo
mipaak sa akong dila ug ngabil
miundang na ug tabang ang
usa ka hagdanan
misandig lamang kini sa kilid sa
balay ug natulog hangtod nga
nakat-on kini sa kadugayon sa
kagabhion nga nagsaysay kaniya
bahin sa agianan paingon sa langit

miingon ang kagabhion
dili hagdan ang gamiton paingon
sa langit
ug lahi usab ang naandan mong
agianan

gihunahuna mo ang mga nangaging
hagdan sama kanimo
kadtong tul-id, kadtong lig-on
kadtong ang mga tiil dili mahadlok
mahulog

mikataw ang langit
unya misamot kahilom ang kangitngit
ang bulan nga midan-ag
miamot sa usa ka pahiyom nga
kahayag
kon patyon mo ang usa ka
alibangbang
ayaw balia ang iyang duha ka
pako

patya siya nga dili kini masakitan
gamita ang imong naandan
nga paghikalomot lamang kaniya

pasagdi ang iyang mga pako mga
molupad palayo kanimo
pasagdi nga sa unahan mahilis siya
o dili ba hunahunaa lamang nga siya
nagmalipayon sa dihang gikaon siya
sa dakong bakunawa
abi mo
nindot ang pag-abot sa panahon nga
ikaw wala nay bation

ingon ang tiguwang
mao na kuno kana nga mahingpit na
ang atong kaugalingon

kana bang
ang kalipay dili na kalipay
og ang kasakit dili na usab kasakit
kay kuno sa lugar nga iyang naabtan
nga wala na usab siya'y planong
mobalik sa iyang gigikanan

wala naman ang pulong
wala na usab ang balatian

basta
tuhoi siya
basta bisag wala na nato siya igkita
ato lang gihapon siyang
handomon isip usa ka tigmo nga
wala gayod nato masulbad

apan kon moabot na ang kagutom
unya wala na kita'y kan-on
unya ang kusina wala'y mahatag kanato
aron madawdaw

mahimo usab nga kataw-an ta lang
ang tanan
kalimtan ba kaha
o wagtangon ta ang tanang
kagutom o kabusog
kalipay o kasakit

basin og niining panahona
kita usab mahimong
hingpit sama
kaniya

siya nga hangtod karon
wala gihapon mailhi kon kinsay
ngan
og dis-a gikan
kon imo akong
gihigugma

mahimo na akong mangutot
sulod sa akong habol
sulod sa atong lawak
sulod sa imong kasingkasing

unya ikaw usab mahimong
moingon kanako nga
ako walay pamatasan
nga ako wala nay kaikog
nga ako
bisan sa imong pagpamalikas

nahigugma lang gihapon
kanimo

kana kon ako usab tiunay
nga nahigugma kanimo

diha kita sa baho sa atong mga utot
magtigi

ecce homo

kahinumdom ka man kaha
niadtong giingnan ka nga ugma matapos na
ikaw

nga iyang nakita didto sa lawak sa langit
nga ang imong kandila hapit na maupos
nga kulang na lang kini sa usa ka
tayhop sa hangin
ug dayon mapalong

kahinumdom ka man kaha sa imong
gibuhat

kahinumdom ka man kaha sa dihang miingon ka
nga kamubo ra gayod sa panahon
kaidlas sa mga pako sa kalipay
kadanlog sa mga pangandoy

apan kon mao na man gayod kaha
pwes miingon ka

nan dawaton ko
sa walay paglanganlangan
sa walay kasuko
sa walay pagmahay

kay lagi ang imong sapatos hinulman man lang
kay lagi ang imong balay gubaon na usab
kay lagi ang imong sud-an kanunay man sang ginamos ug bulad

maong, nakaingon ka, unsa bay kawilihan?
pwes, kon mahitabo man lang

dako lang gihapon ang imong kalipay.
nagkalami
ang nagkadugay
nagkalalom ang
nagkaduhigay

mikusog ang ulan
misamot man hinoon kaanindot
ang atong sayaw

milanab ang balay
ang nataran
lami na man hinoong isakay
sa gakit tang
saging

nagkalami
ang kasakit
nagkatam-is
ang kahiubos

ah, ingon ana diay
kon ang paglaom mobiya
kanato
kon ang kinabuhi
mobalibad na
kon ang kahaponon
moampo na
sa diosa sa
kagabhion

Sunday, July 27, 2014

ayaw ayaw intawon
pasumanginli ang mga bitoon
kabahin sa pait mong
kapalaran

mao pa lang gani ilang
pag-abot aron manghayhay
sa ilang kahayag sa
gadulom mong langit
lisod gayod ikapuyo
ang balhiboog kamot

bisan ug mas mat-an
ka pas pinya

makakawat jud bisan
pag dunay password

ang imong laton
makalusot lang gihapon

Tuesday, July 22, 2014

sa langit sa kagabhion diha sa puros ngitngit nga kalibotan

miginhawa ako apan sama sa wala ako
miginhawa
oo, gihigugma ko ikaw apan sama ako sa
kahoy nga wala mahigugma sa iyang mga
dahon
natulog ako apan sama da gihapon sa wala
ako matulog kay ang akong mata diri sa
ilalom sa akong kalimutaw nagmata man
lang gihapon
nangita ako sa wala diri og wala didto
gihandom ko ang kaniadto apan sama ra
gihapon sa wala ako\y gihandom

ingon ana, ingon ana ang akong gibuhat
sa matag-adlaw
nagpakabuhi ako apan sama sa gihapon nga
ako wala mabuhi

kay mao kini ang akong kulob-hayang nga paya
sa kinabuhi
nga bisan unsaon ug kayab diha sa mga pangagho
hukad higop sa mga ania dinhi
halad sa mga aso sa init kaayong bag-ong
nilung-ag diha sa usa ka dakong bandihado
wala gihapon ako mabusog wala gihapon ako
mahupong

niing kulob-hayang nga paya sa akong
kinabuhi
atubang sa langit sa kagabhion
diha sa puros ngitngit nga kalibotan

sa dihang napapas na ang mga bitoon didto sa langit?

kon monaog ka gikan sa habog mong balay
haskang lipaya baya sa mga sagbot
gipakisama nilang karon makighiusa na ang
imong mga lapalapa diha kanila gani ang mga
bonhok didto sa ilalom sa balay nga nagtago
sa ilalom sa mga ugdo nga mga agbon naghandom
man usab sa imong pagkaraw balik kanila
kaniadtong usa ka pa lamang ka bata nga
walay buot ug siging katawgan sa imong inahan
nganong naghugawhugaw ka na usab sa imong
mga palad

sayod ka nga daghan kaayong nagbantay sa imong
gipili nga lihok sama nianang pagkanaog saka sa
hagdanan hangtod na gani sa pagbalikbalik bagtos
nimo didto sa kilid sa veranda

unta kon nasayod lamang sila apil na kadtong mga
uk-ok nga nagpahipi ug paniid kanimo didto sa
kilid sa mga dingding nga minaog ka lamang
aron mabati mo ang kabugnaw sa yuta apan wala
ka nay laing pang buhaton didto kay dugay mo na
kining mga butanga nahukman

wala kaha sila makabantay nga bisan ug buntag na
mihangad ka man lang gihapon sa dihang napapas
na ang mga bitoon didto sa langit?

Sunday, July 20, 2014

nasakitan man gayod siya

dunay wala gayod
makalimot sa imong gisulti

nga bisag dili ka na niya makita
nagyawyaw pa gihapon siya
gamit ang imong
mga pulong

bisag puhon kon magtagbo kamo
unya wa ka na makaila kaniya
litokon gihapon niya ang imong
mga gisaysay

bisag wa na usab siya makaila kanimo
bisag gani ug wala na kamo dinhi
dalhon gayod kini niya gihapon bisag asa

tungod lagi kay
nasakitan man gayod siya

Monday, July 14, 2014

estorya sa usa ka kinabuhi sa driver sa taxi, sa politiko nga iyang nabanggaan ug sa pulis nga nagsulat sa blotter

 i

ang driver sa taxi nga akong
gisakyan gikan sa mactan airport
paingon sa jones
pagkamaayong mihan-ay sa iyang
sugilanon sa iyang kinabuhi
saksak-sinagol ang
binisaya iningles

nga gidayandayanan sa iyang asawang
maayo kunong moluto og inun-unan
 ug sa tulo niya
ka tsikiting nga inig abot niya
matag gabii humag pamasada morag
pista sa Carcar ang mga
pangumustang nagkaguliyang diha sa
ilang talad kan-anan
nga gibutangan sa pansit kanton ug
barbekyong baboy

ii

nadakpan kuno siya sa pulis
kagahapon sa tungatunga sa
nagsipok nga traffic jam
 tungod kay nasayop
siya sa iyang
pagpadagan nga nakabangga ug
mahalong montero sa usa ka inilang
politikong taga dapit sa South
nga  hamis kaayog aping
unya ang bungot morag kanding
ni Marcelo H. Del Pilar

ii

unya didto daw sa presinto
diin gisugdan na pagsulat ang blotter
mahitungod sa panghitabo
ug sa pagtapos na unta  sa traffic accident
report or sketch
gipaningot ug balugbog ang police
nga galisod ug han-ay sa iyang pipila ka
iningles


labaw na ang pagsulat niini
sa usa ka bondpaper nga haskang
hamisa usab
sama sa iyang kamot nga puti ug
palad nga walay kubal unya ang
iyang mga kuko
gasinaw nga morag
makabuta nga kahayag sa adlaw

sa lawod sila kamao na usab nga molangoy

gisulayan mo na usab
ug paningkamot nga lumsan
ang mga kasakit nga
milanding sa pantalan sa
imong kasingkasing

dakong taob ang usa ka
basong tanduay
dakong gapnod ang mga
aso sa sigarilyo gikan
sa duha ka ganghaan sa
pugon mong ilong

makamao na moasdang
ang mga kaguol
diha sa gitagoan mong
mga ganghaan sa
hunahuna

bisag unsaon dili mo gayod
kini sila malumsan
sa karon sa ilang kahanas
na usab diha sa paglangoylangoy

bersyon dos

gikalipay mo
ang usa ka nagtikaw-tikaw
sa pikas bintana
atbang nimo nga nanambo
ning bag-ong
pag-abot sa kangitngit
ning adlaw
sa lain na usab nga
kasubo

abi mog laing
silingan
abi mog dili ka na
mag-inosara
bisag karong gabhiona
lamang

ang imong anino
dili motingog

panahon sa pagsukod

miabot na ang panahon sa
saktong pagsukod

ang duha ka magtiayon
nagkuyog sa simbahon ning
sayong kabuntagon

wala na maghawiran ang ilang
mga kamot

wala na ang angkla sa abaga
ug wala na ang baha matag ulan

dapit sa merkado wala na usab
nila bantayi ang ilang iro nga wala

na'y kaligo nga malipayong
mikatkat sa dakong baril nga

gisudlan sa basurahan nga wala
pa makuha sa mga hingtungdan

pagpanumbaling sa gilabyan

upat ka baki ang napidyat
ang ilang mga dila milugwa
sa ilang baba

usa ka tambubuan nahug gikan
sa sanga sa kamanse
ug mihalok kini sa yuta

naughan ang sapa sa kilid ning
dalan nga batoon

unya ang mga panganod nagpunay
ug panamin sa tin-aw nga tubig sa
basakan nga kagahapon mao pa'y
pagkahuman ug tortol.


usa ka pangutana samtang mipauli kos balay human sa klase sa law school

ang duha ka tiguwang
namaligya ug tangkong
sa daplin sa karsada sa
Sta. Felomina

nakatulog ang usa sa
kalalom na sa kagabhion
unya kadtong babaye
naglutok ang mata
nga gihayagan sa suga
sa poste sa ZANECO

asa na man diay ang mga
anak nilang duha?

Sunday, July 13, 2014

Alang kang enrile


Kay lagi wa may aso
Nga makumkom
Ug kon ugomon man
Ugaling
Puhon-puhon
Iutot mo gayod gihapon
FLORES DE BOCA
giunsa kaha ni calabs
ang iyang pagsaka paingon
sa langit?
usa ka dakong balay sa
woodridge
unom ka kotse
bakasyon grande sa helsinki
usa ka restawran tupad sa
North zen
nga ginapangalan niya sa iyang
duha ka anak
ang iyang tubag: flores de boca
ingon si monique mao kana ang
gikinahanglan sa canada
aron ka mosaka sa
kalangitan
o bisan asa dinhi ning
langit sa daplin sa kalibotan
bola-bola paminsan
sa laing bahin
good pr lang
o kanang
gitawag tag
maayong pamatasan
Samtang namahaw ta
Gikanta nila ang dandansoy
Kahinumdom noon kos
Atong pagkatuba laloy
Tam-is, pait, aslom,
Bisag bahal na, bukal pa gihapon

Sunday, July 6, 2014

ang usa potot nga pution
ang ikaduha taas lagi apan morag hinay man modagan
ang ikatulo dako ug tiyan unya upaw
ang ikaupat dako ug bagtak dayon
bako

upat silang nagdula ug basketball
adunay usa ka bata nga gustong moapil
apan wala nila panumbalinga
sa taas sa gubaong atop sa gym adunay kalapati
nga nagbakho
dungog nako kaayo kini
nagtinan-away mi sa bata ug miingon kini
nga "nangitlog na gyod siya sir"

2013

dili na niya gustong
 hinumduman pa
kadtong tuiga diin
gitantang ang dila
sa iyang kampana ug
busa naamang siya

gitunton ang iyang  pagtoo
sama sa usa ka
pisi
ug wa kini kaabot sa pusod sa
atabay
ug busa nawad-an siyag
pagsalig sa
iyang kaugalingon

giputol ang mitubo sa iyang ulo
ubos sa iyang mata
ug nahalap siya

giputos ang iyang kasingkasing
ug ang tun-og niadtong sayong
kabuntagon
wala na gayod makaila
kaniya

wala na man god ang siya
nga pagkasiya

ang miabot sa kagabhion
lahi na
ngitngit na kaayo ang
nawong
unya ang gininhawa nanimahong
patay

didto sa balay sa mga G....

sa ilang panimalay
patay ang oras

ang ilang nilihokan
maihap mo sa hinay nga
paglitok sa mga
pulong

miadto ka ug miingon
kanako nga pagkabulahan
gayod nila

timpla timpla sa kape
hisgot hisgot sa mga bag-ong
baho
pahumot sa kaugtohon
pahulay matag gutlo
duyan duyan sa hangin sa
lagwerta
dayon kanunayng mamati
kon anaa na ba ang bag-ong
tuktok sa pultahan

kabahin kanato
ingon ka
alaot kita nga gigukod kanunay
sa usa ka tigre nga orasan
sigi kitang galihaylihay
apan bisan unsaon
kanunay kitang masakpan sa
panahon

matikangkang naman
o dili ba matikongkong

sa akong pagtimbang-timbang niini
wala ako masina kanila
hipos ang akong utok
unya ang akong kasingkasing
kanunayng abtik diha sa
pagbalintongbalintong

oo, masakitan, kanunayng gadali,
apan anaa pa gihapon ang pagkaharuhay
sa likod sa mga takna
ubos sa mga pangulipas
kilid sa klaro pa gihapon nga
mga pangandoy.

sa pagpangadye

adunay gisi gamay
pwes gisulsihan kini
adunay nawala pwes
pagahulipan
aduna sobra pwes putlan
gahi ra kaayo, unya,
nganong dili man nimo
kini pahumukon?

gabukal pa gihapon ang
imong mga pagbati
ug nianang mga butanga
ako kanunay ang
nangadye

selos

sa dihang
nakita mong naghalok ang
buwan ug ang
adlaw

da, maayo gyong
pagkagun-ob
ang imong kalibotan

nangabuak ang mga bitoon
ug pino kining
mitapon sa dagkong balod
sa dagat

ang mga tamsi ug ang uwak nga nagmingaw

gusto unya sa uwak nga
makigsandurot sa mga tamsi

ligoy-liboy lang unta diha
sa libot suroy
libod sa mga labod sa
kuyog sa balod
 sa hangin

apan ang mga tamsi giluod
unya gibaid ang mga sungo
kay kon moduol kini kanila
bisan diha sa panaghigala
ila gayod kining tuhakon

unsaon ba nila paghikalimot
ang nahitabo kaniadto?
kadtong gipuril ang ilang mga
salag
kadtong gitusak sa uwak ang
ilang mga pispis
kadtong gidagit ang ilang mga
itlog ug dayog hulog niini
didto's bung-aw sa kalimot

si Linda

kahinumdom ko's
kalipay ni Linda

kadto lang baya
ang dramang Flor de Luna

ug wa na panumbalinga
ang gadampuog nga labada

si Ramon

kadtong
gisugbang buhi
didto sa
pugon

tungod lamang
sa napago nga
balarite

diha sa tumang
kahubog

si Lola Mameng

sa edad nga
nobenta
natikay-ang si
Tikya

ug maayong
pagkasulod sa iyang
sampot didto's
bukag

naligid gikan sa
hagdanan sa kusina
hangtod
na sa lapokan nga
alad sa
baboy

nakuyapan
apan wala lang gihapon
namatay

og tungod kay wala
na lagi intawo'y
buot

sa dihang nakit-an
na siya
nagpunay kinig
pahiyom
ug gusto ka niyang
gakson

samtang gadugo ang
pangos sa
iyang bukton

si Takyo

karon sayod ka na
kon nganong nagsigig
hubog-hubog si
Takyo

hangtod karon
gaduhaduha siya kon siya
ba ang
amahan sa iyang
kamanghoran

apan kay tungod lagi
kay gwapo ang maong
bata ug
hait ang panabot

gipamugos gayod niya
gihapon ang
iyang kaugalingon

ang kasilag ni Lukring

gipatay si Panit
sa iyang kaugalingong
anak

gipasaylo sa inahan
ang anak


apan ang amahan niini
gikasilagan
gayod niya

nagdagkot siyag kandila
sa altar matag gabii

alang sa kalinaw
alang sa dakong pagpasalamat

si Simo

tigbugha ug
kahoy si
Simo nga dili
makamaong
mobasa

apan ang kalendaryo
sa balay
kanunay niyang
gipaklid paklid

nga mora bag giihap
niya kon kanus-a
matapos
ang iyang adlaw

kon kanus-a mahabol
ang iyang atsa

kon kanus-a mahurot
ang tanang kahoy
sa iyang kalibotan

si Coring

sayong nabyuda si
Coring tungod
sa dinamita

gibinlan ug suyod sa
iyang bana

ug tungod lagi kay
wa na'y laing
panginabuhian kay lagi
di naman usab siya
dawaton sa iyang Nanay
didto sa Panay

nagpabulan na lang siya
sa usa ka magtiayon nga
walay anak didto's
Olingan

buhat sa kalooy
bisag ug gilood nagpadayon
ang magtiayon sa
pagtulon sa ilang pamahaw
samtang
nagpahid is Coring sa
igit sa iyang anak nga
nagkalibanga agig kinaon
ug hinog nga saging

si Lolo Gidong

nindot lantawon
ang iyang
sinaw nga sapatos nga
itom

terno sa iyang buhok
nga gitina

unya bagets kaayo
siyang lantawon sa iyang
sunglass
terno sa iyang buhok

unya puti ang tanan niyang
gisuot
nga amerkanang
seda

gamhanan gayod ang
kaulag
apan wa kini kapanalipod
sa pag-ilad  kaniya
si Adela

nga kon mohalok
morag suso ug kon
mokapyot
labaw pang motapot
sa karaang tuko