Friday, September 25, 2009

sa ilang mga tambag mao kana ang imong gidangatan

miabot na ang panahon
nga hinog na kaayo og ania
na ako sa pagpamupo sa
mga bunga niini

nahitabo kining paglabong
sa hinay hinay nga pagpatay sa
mga pagbati og sa pagbuhi
sa ilang gitawag nga
saktong panghunahuna

hapsay nga pamuyo
diin ang habol sakto nga pagkapilo
diin ang alugnan
anaa naglutok ang panan-aw
sa mga bongbong
nga walay pintal walay bulok

gipasulod ang hangin
gikan sa pultahan nga kanunayng
giablihan

namati ka sa mga tambag
og imo kining gisunod
karon pamatia ang ilang awit
sa pagdayeg
diha sa imong haya sa imong
wala damha nga
kamatayon

ang mga hunahuna kabahin kanimo

kaniadto
higala ko ang mga hunahuna

gusto kong maghandom
kanunay kanimo

ang imong mga ngabil
og ang imong mga mata

karon
nagbulag na ang akong mga hunahuna
og mga pagbati

simang na ang mga tunob
wala na magkuyog ang mga kamot
og mga tiil
ang mga panglantaw og ang
mga lihok

ang usa gustong makalimot
apan ang usa gusto lang gihapon mahigugma
bisag wala na ang paglaom
bisan og ang gibati dili na lamian
kondi hapdos na lang

nabahin ang mata og baba
samok og wala na ang kahapsay
apan unsa ba ang mahimo?
gawas na lamang nianang
pagkawalay kabana

ania ang mga pulong
nangita og kahusayan
gustong mobalik sa panahon
diin usa lang ang
kangitngit og kahayag

pag-paabot

nahilis na ang ice cubes
sa duha ka baso nga nestea
sa ibabaw sa lamesa
nga gimantilan
og puti

ang usa ka slice sa
chocolate cake gisugdan
na og pang-it
sa duha ka pula nga
hulmigas

napulo na ka upos
sa marlboro ang
nabutang sa
ash tray

daghan nag pinaakan og
lamok ang akong
aping og bukton

nahuman na lang ang ulan
og wala nay kisaw ang
mga motorcab
sa karsada

apan wala pa gihapon ikaw
miabot


panahon na seguro aron
i-delete na nako ang
imong ngalan
sa akong phonebook

Wednesday, September 23, 2009

pagpakalooy

kong taas kuno kaayo
ang garbo
og dili kamaong mangamuyo
o mangayo ba kuno
og pasaylo
og dili kamaong mangaliya
nga ang gusto
ihatag na kaniya

kon dili ka kamaong
magpaubos
nan, ingon siya
demonyo kuno ka.

Tuesday, September 22, 2009

reincarnation

i

morag paya
ang kinabuhi
kulob hayang
busa ayaw
og palabi sa
imong kaguol
pagpaabot lang
kay ugma basin
og ikaw napod
ang hayang og
sila na pod ang
kulob,


ii

sayod ka ba
nga kanang
imong panday
sa balay
mao kana ang
agalon nako
kaniadto?

iii

kon wala ka pa
masayod
pamatia ako
kay ako
ang imong
hari kaniato
og ikaw
mao ang akong
kabayo

iv

kon mahimo lang
kon makadungog
ka pa kanako
karon
ipalihog noon kog
balhin nako
bi diha dapit
sa landong
nga kakahoyan
kay init na kaayo
ang kaodtohon
og gilangaw na
pag-ayo ang akong
ikog og
dalunggan

una hirundo non facit ver

ang usa ka
maya wala nagtimailhan
sa pag-abot
na sa ting-ani

dugay nang nagpaabot
ang gugma
sa pipila ka tuig
namintana ang imong
kasingkasing
sa abog kaayo nga
kalsada

og miabot ang gugma
og nalipay ka
abi nimo og ikaw ang
iyang tuyo.

dili baya.

ut sit finis litium

aron lang matapos ang
tanan
akong gihuman ang
inyong nasugdan
og kon mangutana ka
kon giunsa
og ngano
kon anaa na ba ang
hustisya og kaangayan
ako lang kining
gisulayan
sa matinud-anong
paninguha

apan kon wala kini nimo
mabati
wala na ako'y mahimo
ang tanan mosibog
mangalarag og mangahanaw
sama sa usa ka
daotan nga hangin
nga misagpa kanimo
og imong
gikamatay

piskot

naunsa ba kining
hitaboa
nanghinuklog siya
sa ibabaw
sa iyang suwang

nga kining gugmang
walay katumanan
di man gyod hinoon
dali-daling
mahikalimtan...

piskot!
bungtod ang abaga
ang nawong
ang bulan

nga mihalok sa ngitngit
nga kawanangan

mipiyong ang mata
gipangita ang wala

yanong kalipay


maglipay ta
kuhaon ko ang gitara
og kuskoson
ang duyog sa
atong mga kanta

ako og ikaw og si
samsam og si dalila
sa silong sa mga
bitoon
sa bugnaw kaayong
huyohoy sa
hangin sa atong
kagabhion

sayod ka og sayod usab ako


kon mag-away na gani
kitang manag-soon
mahinomduman ko
dayon si nanay

nga sama kanato usab
dili usab magkasinabot
sa iyang mga igsoon
kaniadto

nga sama sa mga tudlo
sa atong kamot
dili gayod kita managtupong
og lain-lain na ang atong
mga tumong

apan dili kana magpasabot
nga dili na kita magkahiusa pa
isip mga tudlo nga
tapot og gikan sa usa
ka kamot nga karaan
og balaan

talimad-an

og nahimong samin ang imong
mga pulong
naaninaw ang ikaw sa mga
silaba
nga misilab sa akong galamhan
sama sa
akong nakita nga hulagway
atubangan sa
kahayag sa mga sagbot og
kahoy
nga atong gidauban
pagkahuman sa pagdap-ig
sa atong mga pus-on
og pagduladula sa atong mga dila

niadtong gabhiona ambot
og natalimad-an mo ba
nga wala ang bulan og ang
mga bitoon
mora bag nahisama sila sa
mga anino
nga nagpahipi na lamang
sa baga kaayong mga
dahon sa punoan sa
mga kahoy
didto sa daplin sa
puti kaayong mga balas
sa baybayon

kon dili na gani kaayo ganahan sa gugma

kon dili na gani kaayo ganahan sa gugma
motumaw ang daghang mga
buluhaton

kay ang baboy wala pa malawgi
ang mga manok wala pa nahukti
ang kabaw wala pa matugway
ang mga pato wala pa mabalik
sa ilang kurungan

kay ang mga balde wala pa mahugasi
ang mga plato wala pa mahipos
ang mga banggera wala pa matrapohi
ang salog wala pa masilhigi

kay ang mga ponda wala pa maalisdi
ang habol wala pa mapilo
ang mga baso nagtuagsa og ang
mga trapo wala pa mahumol

apan kon ganahan na gani
bahala na bisag wala pa'y hugas
bisag wala pay hilam-os

nga bisag wala pa nagaplastar
gusto na nga mopayer...

alang sa akong uyab kaniadto nga naminyo og amerikano

gidala niya ang amerkanong hilaw
sa among balay og iyang gipaila-ila

nga kini si ted hutchington
(dili iyang tinood nga ngalan ha)
usa ka mechanical engineer sa Texas
(dili pod tinood nga lugar ni
to protect privacy lang god)
divorcee og duha ang anak
nga puros na independent

nga nagpuyo na sila karon sa
houston og

well, "very happy"
(qoute unqoute)

namati ko sa iyang mga pulong
nga mora bag nag-ingon

nga

"See! I have my own life now
a happy marriage!"

unya mora bag iya kong gitulisok sa
iyang mga tudlo
og iyang gipasabot nga ako makalolooy
kay nganong
nagpabilin dinhi sa Pilipinas
nga morag bag usa ako ka
"hopeles" nga tawo
nga morag unggoy na jud ko sa iyang
panglantaw

kaming duha wala magkadayon bisan pa
sa mga tam-is nga nanghitabo namong
duha kaniadto didto sa Manila

(nga og dulse pa ming duha na
giayo na jud untad kulipad sa daghan
kaayong mga hulmigas
didto's iyang condo
nga iyang girentehan
kaniadto)


ako unta siyang ingnon nga
ako pod malipayon man sama nimo

nga unta
kadtong tanan ng mga
makatulog laway nga mga
events

(from round one to twenty
da, galot jud)

morag mga damgo na lamang

mga bunga sa among
kabatan-on
mga pagsulay sa kapalaran
sa maong mga kaulag
nga morag mga kalayo sa
impyerno nga walay
pagkapalong
(analogy lang ha
kay wa pa ko kaadto didto)

apan mas malinawon na ako diri
sa akong pagpakahilom tupad sa akong
hinigugma
nga akong gipakaslan

og busa
to tell you the truth and nothing but the
torotot

(kahinumdom ka
nga imo kong)

the truth,
well, " i am also very happy"

in my country
og labi na sa dughan sa akong
pinalanggang
asawa nga nasuko kaayo nga imong
gipadunggan nga

"so what if he is married?"

aksep na lang god inday
nga kitang duha
dili gayod para sa usag-usa.

good luch baby
lipaya ang kano kay dollar ka na
(pero kon
soft as the voice of an angel
na siya

ayaw kabalaka
andam gihapon ako og tagana
sa paghatag kanimo anang

lig-on kaayo nga
hardiflex.

bitaw, good luck baby.
have a nice day, kay alas dose na sa gabii diri's among payag.


aw, good night diay. sleep tight.

kon nasayod ka lang

kon nasayod ka lang
daghang minggitib
sa nataran

sa akong dughan
mga gugmang dili na
maihap
sa kadaghan apan

ako kining tagsa-tagsa nga
gipangkutlo
sama sa mga bag-ong mitubo
nga mga liso
sa nangka sa daplin sa
dalan

nangamatay sila nga
wala makakita sa
kahayag sa adlaw
bisan usa kanila
walay palad

sakit kon imo akong
pangutan-on apan mao gayod
kana ang
nahitabo

kay ang imong giingon
nga angayan nga
atimanon
mao lamang ang akong
gipatubo

midako milabong og
nanahon apan

wala gayod mamunga
bisag usa lang
bisag usa na lang gayod unta

sakit ingnon ta ka
kon unta ikaw nangutana
mao kana
mao kana ang tinood nga nahitabo
kanato

tungod sa usa ka seloso

kon wala pa lang unta'y taas
kaayong sundang
nga iyang gibaid
nga sa kahait nagsinaw
sa kalagot sa atubangan
sa udtong
tutok nga adlaw

nganong dili god kaha kita
magpadayon sa atong
panaghigala?

kasabot ko nga ang selos
wala'y ilong og wala'y mata

busa ania
sa imong luyo lamang ako
nagpahipi
sa imong mga anino lamang
ako nagtakuban

og sa gabii ako kanunay
sa imong bintana
ang imong bulan

gugmang hilabihan nga dili kapugngan

walay bisag unsay kahulugan
ang imong paghawid sa
akong kamot

mora lamang akog usa
ka makililimos nga buta nga imong
giabayan palayo
sa disgrasya

mipasiplat ko
gamay lang
sa imong dagway

ambot unsaon na lang
dili ko gayod kapugngan
kining
gibating hilabihan

kulang lang dagway akog
kaligo
sa hamog sa kaadlawon

pagkalami nga morag
leche flan
pagkahumot nga morag
buko-pandan!

Thursday, September 17, 2009

limatok

adunay mga panghunahuna nga
morag limatok nga motapot sa atong
utok

lisod kaayong tangtangon
nga og kon imong birahon maghatag

noon og labaw pa nga kasakit
apan kinahanglon gayong birahon og

iwakli og ilabay kay og kon dili
kay og kini magpabilin

magpasabot kini sa atong
kamatayon

dunay mitapot kaganiha
labaw pa sa limatok

wala na nako sulayi og
tangtang pa.

daotan nga balita

sa pagdawat sa
maong balita

adunay nahugno
apan dili nako

kini kanimo isulti
dako ra kini kaayo

alang kanimo og
mamahimong ikaw

ang dili makadawat
niini.

walay nay kabatogan

niadtong higayona
wala ko kasabot sa

akong gibati morag
ang akong kasingkasing

mibalhin sa akong lapa-lapa
og ang akong mga mata

morag duha ka langgam
nga nag-iyahay og lupad

paingon sa layo kaayo
nga kabukiran morag

wala na ang mga kakahoyan
og wala na mabati ang kakapoy

bisan og wala nay kabatogan.

usahay

usahay makaingon ka
nga malas ang kinabuhi

nga ang imong mga damgo
wala gayo'y katomanan

nabutaan ka lamang sa
mga tabon sa imong mga

pangandoy og wala na nimo
hunahunaa nga ang ang imong

mga kamot napuno sa mga
prutas sa grasya nga ikaw

nagtungtong baya sa usa ka
dako kaayong bungtod nga

bulawan nga ang imong mga
luha mga perlas nga ang imong

kasingkasing migilak sa kahayag
sa bag-o kaayo nga adlaw

usahay wala nimo makita ang
mga butang nga naghatag kanimog

kalipay nga anaa ra sa tungod sa
imong mga bukton, duol ra kaayo

og dili na gani kinahanglan kab-oton.

fickle

sa sayong kaadlawon
nadungog na nako ang bagting
sa kampana sa
daang simbahan ning
among lungsod
nag-aghat kanako sa
pagsimba karong
adlaw sa Domingo
apan nagpatigkong ko
og sahi sa
akong naandan nga buhaton
miabre ko sa akong computer
nagbasa sa balita karong adlawa
kabahin sa tambag ni Binay
kang Noynoy nga unta
kon molansar man gayod siya
pagkapresidente sa pilipinas
undangan na niya ang
pagpanigarilyo
magtoon siya unsaon pagtindog
og paglakaw og tarong
sama sa usa ka katahaan nga leader
og dili na unta siya
mag-ubo sa iyang pagsulti
og kini ang labing importante
nga unta siya
magminyo na kay kiwa kuno ang
usa ka presidente nga walay asawa
kay kini nagpaila lamang
nga siya
fickle-minded.

didto ko nahunong og dugay
sa pulong nga
fickle.

morag dunay laing tumong si Jejomar
apan sa laing bahin
bisag dunay tunong nasina gamay o
dili ba pungot nga sagol
biay-biay
(ako ra pod ni)
apan duna baya siya'y punto.

satol siya og si noynoy basin
fikol.
paghisgot kabahin sa
gamayng bato
kadtong mutya nga
gamhanan
kadtong makahimo
natog tagolilong

sultihi ko nga kini tinood
nga kon akong tunlon
mahimo akong gamhanan
makalupad sa
kapunaw-punawan
og sa mga pusil
dili na ako madutlan
og ako kusgan
og ako dili na gani
mabasa sa ulan diha sa
maong mutya
anaa ang
panagang anang
mga sakit og hapdos

tugoti nga kanang mutya
nga ilang gihisgotan
maangkon nako bisan
og kadali lang kay

dili ko na maantos
ang mga paglutos kanako
sa mga gaway sa
halas nga kapalaran

mantra


Dios nga gamhanan
Dios nga manggiloy-on
Dios nga matood
Dios nga akong agalon
Dios nga dalaygon
Dios nga dili limtanon
Dios nga manggihatagon
Dios nga Amahan
Dios nga Anak
Dios nga Ispiritu Santo
Dios nga Timaan
Dios nga balaan

Akong Dios
nga Nagmugna kanako
Ikaw na ang bahala
kon asa ako isangko

non sequitor

mikinto siya
nagsuot pa gani og
taas kaayong
sapatos
mitungtong
sa bangko
og miisa pa
sa iyang kamot
aron lang unta
niya makab-ot
ang tingog
ni whitney houston.

didto sa dakong suba
sa Dicayo
hagbay rang nangawagtang
ang mga isda

ang mga mamasolay og
mamubuhay kaniadto
hagbay ra usab
nga nangamatay og ang
ilang mga anak

nga gitawag nilang mga
bag-ong tubo
og mga salingsing
wala na maghandom anang
mga siwil og mga rami og
mga haw-an

sila na ang mga mamalahay
og mga graba
mga balas
sila na ang nagsapsap sa mga
pangpang

samtang ang nanuhol kanila
nagtindog lamang
og nag-ihap sa ilang mga
ginansya

kon unsa man ugaling ang dangatan
sa kinabuhi sa Dicayo
kibir
unsa ba god kuno'y ilang labot?

nauwat

nauwat ang
sayawsayaw
sa iyang kaugalingong
panagway
sa samin
iya kining gibanggaan
sa usa
ka kusog kaayong
paghadyong paglupad
og mao
kini ang iyang
gikamatay

ang pagkapuol

na tan-awa
miabot ra gayod ang
imong pagkapuol
sa pagsunod-sunod
sa akong mga
tunob
kay seguro abi
nimo og aduna kay
makita sa unahan
kay abi nimo
og aduna ako'y
padulngan
og hantongan

dugay ko na ikaw
nga giingnan
nga wala ako'y
padulngan
og wala usab ako'y
gisundan og wala
usab ako labaw sa
tanan
nga sumdanan

buta ako nga
naghimo sa akong dalan
nagdampas sa
baga og daghan
kaayong kasagbotan
naghawan
nanglimpyo

bungol ako
og wala ako'y nadungog
sa mga tanghaga nga
nakigsulti kanako

amang ako
sa akong gibati
og bisan pa man seguro
og duna'y mga pulong
nga namugna sa
baba sa akong
kasingkasing
dili og dili ko gayod
kini isaysay kanimo

miabot na ang
pagkapuol
og busa ania ako
nagpasalamat
pag-ayo kanimo

Wednesday, September 16, 2009

kining balaka alang kini kang Tasing (og sa tanang mga Tasing ning atong kalibotan)

dili og dili ko gayod
makalimtan si Tasing
ang sangay sa akong
lola nga hagbay rang
mipasing,

morag pugon ang
baba ni Tasing
gianoos ang mga
wait
giagit-it ang
mga ngipon
sa pagpunay og
pagapanigarilyo,

og kon makasulti
si Tasing
mora bag siya na
lang ang bugtong
nga buhi niining
kalibotana
siya ang mas nasayod
kon unsa
ang angayan buhaton
siya ang mas
gamahanan kon
pag-usab na gani
ang atong hisgotan
kabahin sa atong
katilingban,

mora bag
wala na gayod
kita'y ikatampo
mora bag
wala na kita'y
katungod sa
pagbungat
og sa pagtingog,

amigo niya si Mar,
katsika niya si
korina
kaseko niya si Chiz
og kakunsaba
niya si gloria
imbitado siya sa
adlawan ni
osmena og
ka-golf niya si
manny
katribo niya
si bayani

sa ka-busy ni pasing
wala na niya
mabantayi ang
pagkunot sa
baga kaayong
panit sa iyang

agtang
ang paglup-og sa
iyang likod
nga morag
sanga sa bayabas
nga nabalikog
ang pagkahulog sa
iyang duha
ka mga abaga

ang pagkahiyos
sa iyang baga
nga morag mga
kahoy nga wala
na makakaplag
og adlaw

namyahok ang mga
aping ni Tasing
nakalimot na
sa mga halok
sa usa ka
tinood nga nahigugma
kaniya

sa pagpunay

og bilar
midaot si Tasing


sa matag gabii
nagpyano
(mahjong ba)
sa matag kaadlawon
nagpatapot
og nikotina sa
upat ka mga
bongbong sa iyang
balay
nga walay mga bintana,

dili ko gayod
mahikalimtan ang
sama kang Tasing
nga diin ang tanang
planeta
nagtuyok-tuyok
palibot kaniya

siya ang rayna
sa mga intriga
siya ang nasayod
sa mga bag-ong
balita sa
radyong bagon

og karon nga patay
na siya
ambot og sakto ba
ako
apan morag
mas nagmalinawon
ang among
gubot nang daan
nga kalibotan

alang sa usa ka babayeng nagpahukhok sa usa ka lalaki nga batan-on


wala na ang kainit
sa iyang mga bukton
og busa
ang imong gidaginot
mao na lamang ang
kainit gikan sa oling
nga nagbaga pa
sud sa usa ka puthaw
nga plantsa nga kabilin
gikan sa imong mama.
ang kapakyasan
aduna'y kataposan
dili kini
molungtad
dili kini sama sa
paglaom
nga sud sa akong
dughan
walay kamatayon

duha ka talan-awon

ang pinil-an
sa iyang mga gihay
sa gakalayo
nga bulok sa
usa ka pangadlaw

makapahinumdom
kanako
kabahin kanimo
didto sa tunga
sa imong
higdaanan nga
gidan-agan
lamang sa kahayag
sa bulan

nindot kaayong
lantawon
og ang kalipay nga
akong gibati
dili nako ikapanugid
kang bisan kinsa


ang mga kamot sa mga
pulong dili makagunit
niini

nindot gayod
pag-ayong
balikbalikan
sa hapyod
sa hunahuna

ilabi na ang
hingpit nga
pagbukhad
usa ka kagabhion
niana

apan mas nindot
ang talan-awon
usab ang tumoy
sa usa ka sakayan
nga misulod sa
baba sa bukana
og hinayhinay
nga midunggo
sa linaw kaayong
lapyahan
sa sayo kaayo
nga kaadlawon

kusog nga sulog

ang mga adlaw
nangahilis morag
ice
sa imong mga panglantaw
nagtulo ang
mga oras
og ang mga minuto
og segundo
wala na mahawiri sa
imong mga tudlo

gibarogan ko ang
akong mga saad
apan wala ka na ikaw
mitoo
ikaw nga gianod sa kusog
kaayong
sulog sa kabangis
sa dakong
suba sa kapalaran

managlahi na

kaniadto
mao na lamang kita
og karon
wala na bisan na
lang man gani
og sa mga hagwa
na lamang sa mga
anino

dili ko ikaw mabasol
tungod kay ang
atong mga kalibotan
managlahi na

mihunong ang akoa
morag kote nga
natumba apan ang
imoha
nagtuyok pa
mora bag walay
pagkakapoy morag
wala kay
kamatayon
samtang ang imong
mga katawa
gisuyop sa kusog
kaayong hangin

de minimis non curat lex

ang balaod
dili mangambat sa
ginagmay
kaayong mga butang
sama
sa mga pinitik
sa atong kasingkasing

dili niya madungog
ang atong mga
paghigwaos
sa atong mga gugmang
wala matuman

buta ang balaod
sa sama kanatong
nanghambog nga
wala na kitay
mga pagbati

damnum absque injuria

kon nahigugma ka kanako og wala ako mangambat kanimo tungod kay aduna na akoy kabilinggan sa akong kinabuhi og kon ikaw nagpakamatay tungod og alang kanako hunahunaon ko kana nga garbo alang kanako nga usa lamang ka yanong sigbin niining gamay kaayong nataran sa mga gugmang nangaguba unsa ba'y akong sala? og kon nagun-ob ka man og nasunog og nahimong abo balik sa imong gigikanan wala na ako'y labot niana.
kay kinsa ba ako nga imong
higugmaon?
usa lamang ako ka walay
puangod nga tiguwang nga Adan
nga wala na magpatintal
sa lata na kaayong
mansanas ni Eba

og ang walay batasan nga bitin
nagbitay sa sanga
og haskang lanoga sa
makabungog nga buhakhak
sa iyang katawa.

kabahin sa talandogong butang sa kasingkasing

kon napagkong ba ang itlog
o namalasado ba
diha sa lapad natong
lamesa

wala na kaayo ako
mangilabot niini
kay daghan akog mga
butang nga gihunahuna
sud sa opisina
og nahimo nang kumplikado
ang akong kinabuhi

wala na akoy
panahon pa sa mga talandogong
butang kabahin
sa kasingkasing

biyaan ko una kana
kapoy na
hapdos na og samdan
na ako

tungod kanimo
wala nay pulos ang gugma
alang kanako

magtiayon

nagtoo ka
nga wala ko mitoo nimo
og mitoo ko
nga wala ka mitoo kanako
og samtang
nagdungan tag pamahaw
wala nato gipadayag
ang atong mga pagtoo
og wala pagtoo

nagpabilin kitang
nagkauban sa atong
kinabuhi
sumala sa atong mga
saad
og mga pasalig nga
kitang duha ra gayod
hangtod
sa kahangtoran

bisan og wala ka na
mitoo kanako
og ako usab wala na
mitoo kanimo
og sa kataposang
pasalamat
og pangaliya
sa kahitas-an
pagkahuman natog
pamahaw
nagtoo kitang duha
nga maayo lang
gihapon ang lakat
sa atong kinabuhi
nga ang tanan
nagsubay lang
gihapon sa
mga lagda

tungod kay
walay bukog sa isda
ang

misabod
sa atong mga
tutonlan
og walay mumho
nga nausik
sa silong sa lamesa
sa atong mga salog
nga haskang
sinawa

og wala na nato
mabati ang
paak sa mga lamok
sa atong mga
bitiis nga hagbay
rang andam nga
molakaw aron
paghuman sa
atong mga tagsa-
tagsa ka tuyo
karong adlawa
og sa umaabot pang
mga adlaw
sa atong kinabuhi
isip
magtiayon

mas lalom nga kamingaw

mas sayo kong
mimata karon
nag-ilis og sapatos
aron
molakaw

bagtas sa kaadlawon
tagbo sa bugnaw
kaayong hangin
sa septembre

daghang mga hunahuna
nga nagdug-ot sud
sa akong utok

unsa kaha kon
kini na lang ang akong
buhaton?
pero mas maayo baya
usab kadtong
akong gihunahuna
kagabii
samtang layo pa
kaayo ang sakayan nga
bulan sa
mga palotpot nga mga
bitoon

nindot ang maglakawlakaw
daghang
bag-ong moabot nga
lamdag
og ang kangitngit
usahay buntugon
sa kahayag

midag-om kalit
og nangitom ang
mga panganod
og miulan og midagan
ako paingon
sa silong sa usa ka kahoy

mikusog ang ulan
og mibalhin ako silong
sa gym
tupad sa oval
nga akong gilibotlibotan

adunay tigulang nga
naglingkod
dili kaayo layo kanako
taas kaayo ang iyang
bungot
og layo kaayo ang iyang
mga panglantaw
lapos sa ulan
og kabukiran sa
unahan
nga hanap na kaayo
tungod sa
mga gabon

wala kami
nagsukliay og mga pulong
nagpatigbabaw
ang kusog kaayo nga
haguros sa ulan
og hangin

dugay dugay usab
og nabati ko
ang dili na maagwanta
nga kamingaw

nalinga ko
nawala na ang maong tigulang
una segurong milakaw
kaysa kanako

nalingaw man god
ko sa mga
tamsi nga nagkumpayot
sa punoan sa
mangga
sa kilid sa kalsada

kahinam

pag-abot nako
sa cebu
mideretso ko sa
YMCA

Ako lang
usa

nagdali ko
nga naghubo
sa akong
polo
og karsones
og brief

og dayon
nako og
kaligo

gisabonan
nako og
doro
ang imong
gusto

og akong gihunahuna
mao
ang sunod
nga mahitabo
unya

ako lang usa

nakamata ko
sa tungang gabii
og karon
pa nako namatikdan
nga ako
na lang usa
dinhi sa akong
katre

usahay
maka-guilty nga
hunahunaon
nga mora man
hinoon kog
mas malipayon
kon
wala ka.

kapoy huna-hunaon

kapoy huna-hunaon
nga yano lang man
unta kaayo
ang mga butang
og panghitabo

sama sa pagkahulog
sa mga dahon
nga walay daghang
kisaw

sama sa pagkauga
sa mga sapa sa
miaging hulaw
nga walay
samok walay nadungog
nga syagit
bisan sa usa ka
dili pa unta madawat
nga kamatayon

yano lang ang tanan
og malinawon nga
nanglabay sa
akong atubangan

wala ang kukabildo
sama sa pagtipak sa
akong ngipon sa
atubangan samtang
nag-inom ko sa
bugnaw kaayong tubig
pagkahuman
nagkape

yano lang man unta
ang tanan
apan nganong ako
man gyod nga
himoong
kumplikado?

KURAT

ang iyang
katapusang libro
naghisgot
sa mga butang nga
dili mapalid
sa hangin

kurat nga
balakero

ang iyang patay
nga lawas
nakit-an
tupad sa usa ka
botelya nga
tanduay og
kwarenta'y singko
kalibre nga
pusil
niadtong
mil nwebe sintos
otsenta'y kwatro


argumentum ad baculum alang sa mga batang wala pay buot

i

kon dili ka matulog
og sayo
na kan-on ka gayod
sa wakwak

ii

kon maligo ka
sa sapa nga wala'y
klarong pananghid
na birahon ka
sa ukoy

iii

kon magsugba ka
og isda
sa mahal nga adlaw
talumtumon
ang imong nawong

iv

kon dili ka magpatuli
magniwang ka
og magdaut

v

kon tunlon nimo
ang liso sa santol
motubo ang
dakong kahoy
diha sa imong agtang

vi

ang dili motoo
pwes masunog sa
kalayong walay pagkapalong
didto sa
impyerno

Monday, September 14, 2009

mahigugmaon

batan-on ka
og ako usahay makahinoklog
kon asang dapita ko
ikaw tagboon

kon kanus-a og
kon unsaon ko pagtawag sa imong
ngalan

aron lang unta kita magkasinabot
kon unsaon natong duha paggama
og kalipay

mikatawa og miingon nga kining
mga butanga makat-onan
bisan og dili
na tudloan

ang bata sa usa ka
dili pa kaayo tigulang apan
mahigugmaon

duet

nindot paminawon
kon kitang duha

manganta

lalom ang imo
og taas ang akong

tingog.

a posse ad esse

kay imong
gipanamkon
pwes
imo kanang
anakon

ang imong
gihandom
mao ang
magadumdom

ang imong
gusto dili na kana
nimo
mabalibaran

og sa pagbalikbalik
mo sa maong
hitabo
og sa umaabot
pa nga mahitabo
ikaw ang nahimong
ikaw
og ako ang nahimong
ako

nagkita kita
nga walay sutaon
walay tul-iron
igo na lamang
kitang
mikatawa sa atong
mga hitsura

a caelo usque ad centrum

tungod kay
mibutho ka man
nan ako ka
gikan sa tumoy sa
imong buhok
hangtod sa tumoy
sa imong
kuko diha sa
imong mga kumagko
og ayaw og balibad
kay sumala sa
mando sa
lohiko
kanang tunga
ako gayod usab
kana

Friday, September 11, 2009

ikaw


kay dili man makab-ot
ako ka na lang gilantaw
sa langit
tupad ka sa mga bitoon
og bisan og layo
ka kaayo kanako
igo na kining nakapaawit
sa akong
kasingkasing

subo kaayo nga awit
apan
nagmakanonayong
buhi

dag-om


dag-om
and sud sa imong
hunahuna

og sa kabug-at
sa imong
gibati

nahulog ang mga
luha

ang tanan
nahug sa
tig-a ko nga pagbati

gipangita mo
ang akong kasingkasing

dugay ra kining
nawa

awit alang sa kahaw-ang

mibakante na usab ang lawak
nagsugod na og abot ang mga abog
nga mopuli pagpuyo
diha sa kilid sa mga bintana

abre nga pultahan
gisirad-an

mga tunob nga mipalayo
dili na mobalik
sa kagabhion nga pagkangitngit
motayhop ang hangin
og wala ka na'y mabati nga mga tingog

hakop

dili na nako mahakop ang tanan
og ang mga tam-is nangahulog
sa akong tiilan


ayaw na ako pangutan-a
sayod ka na
kon unsa ang dangatan

ang labong pagapul-ungan
ang mga laya nga dahon mangahulog
og mangapalid
ang mga patay nga sanga
pagaputlon

ang mga gamot sa ilalom sa yuta
dili nato makita
kon buhi pa kini o patay na
siya lang ang nasayod

nindto kaayong lantawon ang paglupad
sa tulabong
paingon sa kabukiran

wala ako masayod kon asa ang ilang mga salag
kon asa ang paghigugma ako kaha nasaag?

bakak

kon sakit man diay
ang tinood

sulayi ang bakak,
basin
og matambalan ra
ang imong
mga samad

sa mga pasalig nga
morag hangin
sa mga saad nga morag
mga dahong nangahulog

kong mabuhi ka sa
mga bakak
nganong dili god nato kini
sulayan?

mas labaw ang kinabuhi
bahala na

sex

sa imong paghunahuna
nawala ang
lami sa
sex...

lahi ang kalibotan sa
lamian
kon sex sex lang
wala na ang hunahuna
gipatay
sa kalami sa nahitabo natong
duha

mao nga sakto sila
ulahi ang
pagbasol
pero ok lang

nakatilaw na ko
og sakto na kana alang kanako..

mubo lang ang kinabuhi
aron magdili ako sa akong kaugalingon

mamakak ako
og mamakak pa gihapon hangtod
na kini sa akong
kamatayon

naanad na ako niini og sa akong konsyensya
nawala na ang inyong
giingon og gikalisangan nga mga sala og
ang mga silot nga kuyog niini

miabot na ako sa akong kalibotan
nga puro gugma
wala'y sad-an walay silot
ang tanan
nindot.

nag-atang ang
dakong baba sa dagat
nga motulon kanimo
ikaw nga
hubo na sa kamatooran

sa hamubong panahon
milingi ka sa
misalop nga adlaw

napalong ang imong
panan-aw
sama sa pag-abot
sa tumang kahilom
sa makausa pa
lantawon ko ikaw

nahisama ka sa
kagabhion nga
sa makausa pa
gidan-agan sa
bulan

gugmang wala
matuman
milayat
sa kapunawpunawan

kutob ra sa paghandom
patay na ang paglaom

sa makausa pa
mananghid ako kanimo
sudlon ko na
ang pultahan
sa hingpit nga kalimot

kadtong miingon ka nga dili ko na ikaw mailad pa og otro

kaganiha misulod ako
sa lawak
og nadungog ko ang imong
tingog

bisan unsaon ko pa og tuali
ang mga lingkoranan
ang mga lamesa
og bisan og unsaon ko
pa pagbungkag
ang tanan nakong mga
libro

dili ko na gayod ikaw
makita pa
bisan kanus-a....

hisgot sa usa ka bana nga gibudhian sa usa ka asawa

(alang kang Eddie)


tupad ko ang kangitngit

gipungkoan ko ang samang kangitngit
gipugngan ko ang akong mga kamot
sa angay unta nakong buhaton

dugay na nakong tupad ang kangitngit
nga naghunghong kanako sa angay
nakong buhaton diha kaninyo
sa nadungog kong agik-ik diha sa dulom

wala nako mabuhat ang angay buhaton
gihapuhap ako sa sa mga kamot sa gugma
walay sama sa usa ka pagpasensya
sa usa ka pagpasaylo og dayon sa usa
ka pagpalayo

daghang salamat
walay mantsa ang akong kasingkasing
walay sala ang akong mga kamot
gaan ang akong dughan
nga mosugat sa akong ugma

si Li Po samtang naglantaw sa bungtod

si Li Po
nagtungtong sa bato
atubangan sa usa ka dakong bukid

misaka siya og
misandig sa dako kaayong pangpang

samtang ang usa ka asul kaayo nga panganod
milabay sa iyang kilid

wala pahikap
gadali kining mikuyog sa hangin

ingon siya
wala kuno sila pul-i og tinutukay

siya og ang panganod.

ako, ang gipul-an apan
wala ako'y mahimo.