Thursday, October 31, 2013

ang pag-una ug dagkot sa mga patay


gauna kog
dagkot sa akong
tulo ka kandila
alang kang tatay
nanay og
lolo,

gibutang ko ang
buwak sa kilid sa
ilang mga
lapida

maglibog kog
unsay buhaton kon
matagboan ko ang
mga buhi
nga hagbay ko rang
gipatay
sa akong
panumduman

karong mga orasaha
nahikatulog pa sila
sa ilang
kahubog
ug kalaog
kagabii.

sa mga lubnganan


wala na ang
mga puting alibangbang
patay na usab ang mga
pulang buwak nga
nag-alirong
ning mga lubnganan
sa akong
gihigugma ug gikamingawan

matag kilid
ang atubangan ug ang
mga tiilan

pulos na man
mga batong
gilumutan.

Wednesday, October 30, 2013

pagpangabre sa duha ka kamot


hinay nga moabre ang mga tudlo sa palad
kay pipila usab kini ka tuig nga nanirado diha sa duha ka kumo
sakit ang kahayag
giangkon kini sa mga mata gikan sa iyang kagabhion
ayaw una ablihi ug dako ang mga bintana
kay ang kasakit nagpaniid pa lamang

huwata nga ang baybayon moawit diha sa iyang pino nga hangin
gikinahanglan sa palad ang kabugnaw
aron ang buwak diha sa sulod sa iyang lawak
dili daling malaya.

ang amahan ug anak


sa matag sugilanon
sa matag kita sa duha ka gusto unta magsuod
diha sa tunga-tunga sa panghangpanay
kamao ang hunahuna kon kanus-a kini niya putlon
bisag ang kasingkasing
molumpat nga morag batang patulugon sa kaudtohon

ania ang hunahuna nga nagbarog nga usa ka amahan
sa kasingkasing nga nagpabiling bata nga walay buot

gahi ang ulo sa maong bata
busa mikuha ang amahan sa sanga sa bayabas ug
iya kining gilatos

misyagit ang bata nga morag kanding nga gipatay
giantos kini pagpamati sa amahan
gialsa kini niya ug gidala sa iyang higdaanan ug gipakatulog
nalabhag ang paa, naglanab ang luha sa iyang aping
hangtod nga nakatulog kini sa kahiubos ug kakapoy

disir  milakaw ang amahan
kay gaulan man ang langit ug bugnaw man ang panahon
gihabolan ang bata
ug gihagkan ang iyang duha ka aping.

ANG ITOY NGA NAHINANGOP SA IMONG PAG-ABOT


gahalhal ang dila sa itoy nga nagpaabot kanimo
diha sa kilid sa labat nga kaways  sa imong balay nga bungalow

sa kiwil sa iyang ikog ( kay wala na man kini inahan nga gihimong sumsuman
sa mga palahubog sa itago tang ngalang barangay dapit  sa bukana)
morag ang kamingaw niya diha kanimo daw labaw pas hilabihan

layo ka pa morag pulo pa ka dupa o kinse ba kaha
midagan kini paingon kanimo aron iya  kang hangpon sama sa usa
ka amo nga wala makauli sud usa ka semana

pagkaanindot sa maong itoy: puti ug hamis ug baga ang balahibo, 
lingin ang lawas nga morag nangka, dagko ang mga tiil nga morag palwa sa lubi,
gabitay ang duha ka dalunggan mga morag duha ka dahong laya  sa saging kadisnon
taas ang dila nga morag paypay nga dahon sa lantipay,
kusog kining miaw-aw nga morag nanghambog sa silingan nga siya na ang
pinakaswerteng itoy sa kalibotan sa mga iro

ikaw nga hubog sa imong pagkaikaw
dako ang ulo ug ang sulod gitahapan nga puros bakukang
mga kamot nga ang nakat-unan mao lamang ang paghawid sa hait nga itilikbas nga sundang
matang talinis ug tinan-awan samasusa ka bangkaw

naglibog ko, nganong diha sa usa ka nindot nga itoy nga mihangop kanimo
gibalosan mo man sa usa ka dakong sipa sa imong tiil nga morag dagkong pala

pagkalooy sa itoy, nalabay nalabay intawon gikan sa kalsada paingon sa labat nga kawayan
misyagit sa kasakit, mibahag ang kiwil nga ikog,  ug ang lingin nga lawas
maayong pagkabun-og

sakit nga pamation nga kini karon
atua sa ilalom sa dapog sa kusina
nagkurog, gigakos ang kaugalingon,
 nagtago
morag nagpalaban sa mga uga
nga sugnod
diha sa giluom nga
kahilom.

ang walay bunga

tuod man
wala'y bunga

imong gibiay
biay

ang iyang gahom
wa ka masayod

mao ang iyang
mga gamot

nga dili mo
makita kay

kini gipangga
man sa yuta

sa tunaan sa kabaw

dugay pa

dugay ko pang
matun-an kon unsaon ko paglabay

ang dyamante
sa tunaan sa kabaw

atua pa kini sa singko
brazas

sa kaban ni tatay
apan hapit na

hapit ko na magakos ang
tinood kong ikalipay

ang paglabay sa
sa mga sining
kahan

kadtong dyamanting
makamatay ang
gilak

ugma
basin ugma

ilabay ko na gayod
sa tunaan sa
kabaw.

mingaw nga malinawon

blanko
blankong kabuntagon

sa gawas
walay mga bitoon

walay bisag usa ka langgam
ang mga kahoy

walay buwak ang
dama de noche

walay tawo ang
plaza

blanko
blankong kabuntagon

mingaw
malinawon

Tuesday, October 29, 2013

ang gugma sa kaugalingon



humot ang  baho
sa akong ilok

tam-is asgad pod
ang akong singot

kanunay gikamingawan ko
ang  baho sa akong purol

ang kugang sa akong samad
nga akong gitangtang

sa ibabaw sa akong palad
lami lang gihapon lantawon.

ang itom nga langgam nga nagsalag sa akong atop


adunay itomon nga langgam
nga pula ug ikog ug taas ug sungo
nga nagsalag sa kilid sa atop sa
akong balay

kon mosyagit ko mosyagit sab siya
bisag unsay akong isulti iyang awaton

usahay aron kunuhay
dili nako siya tawgon nga awatan
ang akong mga pulong
iyang balibalihon

sa akong kalagot akong gibuno ug bato
ug akong gikawat ang iyang salag
nga walay itlog

sa kaulahian gibati kog kalooy
samdan man diay ang iyang dughan
ug bali ang usa ka pako
maong dili na siya makalupad.

boluhaton

dako kaayo ang imong
ilong tungod kay gamay
man god ang imong nawong

dako kaayo ang imong
kahiubos
kay gamay ra man god pod
kaayo ang imong
kapilian

dako kaayo ang imong
kasingkasing
kay wa kamay gibalibaran
kay ang tanan
imo mang girespetaran

padak-an ang pasensya
kay nahurot na ang kwarta
patas-an ang panahon
kay wala nay klaro kon
anaa pa bay moabot.

Monday, October 28, 2013

ang dakong bakak

ikaw ang
akong natagboang
nindot

nagdamgo ko
gabii nga aduna
kita'y mga pako
ug gitaral mo
ako sa paglupad

sa dihang nagkuyog
ta sa mga panganod
mibuswak ang adlaw
samas usa ka buwak

nakamata ko
ug tuod man dunay
buwak ang akong
ulo

adunay pipila ka
buhok nga natagak
sa akong alugnan

mitindog ko ug
nanamin
nanglawom ang akong
mga mata

ikaw ang
nahimong dakong bakak
sa akong kinabuhi
ug wala nay bisag usa
nga mitoo kanako.

gubot ba o kalinaw?

sayong buntag
milakaw ko aron
mohanggab sa lunsayng
hangin

nalabyan nako ang
usa ka military truck
nga puno ug mga sundalo

sa unahan
dapit sa kahoy nga akasya
sa kilid sa plaza
nanganaog silang tanan

nalingaw ang ilang
kumander
sa pagsigig cellphone


nakapangutana ko
kon unsay moabot karon,

gubot ba
o kalinaw?

Sunday, October 27, 2013

ang atubangan


ang atubangan sa iyang nawong
usa ka taas nga pahiyom

nga sa kainit sa gawas misulod
sa ilang balay ngadto sa iyang

lawak nga ngitngit gamay ug
pagkahumag panirado sa pultahan

ug bintanang gabansiwag sa
daghang katawhang nanglabay

humag lingi sa wala ug sa too
gialsa ang sayal paingon sa iyang

mga mata ug dayog bakho
durong pabaha sa iyang morag

lusok sa mais nga mga luha.
 

kaminyoon


ingon si Tibor gikan na siya diha
kita niya ang bukog sa diwit 
ang ikog sa pagi
og nasimhotan na niya ang patayng bagtok nga wa makit-i sa
upat ka adlaw

ingon siya gahikog daw siya
wa siya'y kalibotan
wa gyod niya damha

dugang niya ang ubang mosulod mahimong 
kataw-anan gayod sa mga nanggawas

ako intawon, dia pa sa sulod
bisag grade six na
nanglampaso pa gihapon
sa sapnot nga salog.

dulom


sa layo pa ang bagang dag-om
batia pag-ayo kon unsa ang dulom

sama sa usa ka dulom nga kaugmaon
sa wala ka human

unya samtang gamaneho ka sa imong sakyanan
paingon sa dulom

giseguro mo nga serado ang tanang mga bintana
unya mopadayon ka

silong sa kusog kaayo nga ulan unya sama sa imong
sakyanan

bisag unsa kabugnaw sa gawas bisag unsa ka kusog ang hangin
ug ulan
bisag unsa ka daghan sa dahon nga mangahulog ug sanga nga
mangabali sa mga kahoy sa kilid sa bungtod
ug daplin sa imong agianan

wa ka nay bation.
 

Saturday, October 26, 2013

ang komedya bahin sa tanga nga asawa

lahi ang iyang
komedya

karon madungog mo
unya molakaw ka
tabok sa karsada

pag-abot nimo sa
usa ka balay
modagan ka sa
kalsada

sakay sa dyip ug
sulod sa simbahan
manguros
mangumpisal ka
pagkahuman
moapil sa misa
mangalawat

ug pagbalik sa inyong
balay
hapon na
magluto ka pa
ug sud-an ug kan-on
alang kanilang
moabot na gikan
sa ilang mga trabaho

inig human nimong
panghugas sa plato
ug hipos sa sobrang
sud-an
ug panarapo sa
lamesa

mohigda ka
sa imong katre
ug di ka makatulog
kay ang iyang
komedya
mobalik man
kanimo ug silang
tanan mabati pa
nimong kusog
kaayong mibuhakhak
ug katawa

karon pa nimo
hisabti
apan gibati mo
ang kasuko

dili kataw-anan
nga ikaw diay ang
iyang gipasabtan.

paghinuklog

naghinuktok ko
karong Domingo

gipangita nako
ang paypay

kay ako usa
lamang ka ginhawa
kay ako usa lamang
ka aninong milabay

ug ang akong gipuy-an
diay usa lamang ka
abog sa dakong lawod
sa daghang ug di
maihap nga  mga
kawanangan

naghinuktok ko
nganong ania pa ako
dinhi


patas lang

dali ra kong makalimot
ugma kon magkita ka
mangutana ko kon kinsa ka
kon asa ka ug unsay imong
tuyo nako

medyo bakakon sab ko
human nakog pangutana
nimo bisag wa pa ka katubag
moingon ko nga ganahan
ko nimo,dayon nakog lakaw

dalidali kay naay pa koy
nalimtan ug naa pa sab koy
kitaon aron akong ihatag
ang pasaylo nganong
gibakakan ko ug nganong
gipangutana ko kon kinsa
ko ug nganong iya kong
kinahanglang igkita.

kitik sa kinabuhi

salig sa panahon
ayaw pagdalidali
baliki ang nalimtan
ayaw palabi sa kaguol
taas pa ang dalan
paingon diri paingon
didto, ayaw pagdali
hapit sa,lingkod,
tindog-tindog,
hangad, hayang,
kinto-kinto, ayaw
sag lakaw, magtabi
ta kadyot, pamalandong
bisag panalagsa,

sa imong kaugalingong
kamot ayaw
 pagdalidali ug
kuha sa  imong
kinabuhi,

kay kon
magdali ka, ikaw lang,
pagkahuman,
wa nay mahinumdom
wa nay maghisgot
bahin nimo,
kami nga magpabilin
kami nga wa magdali
ania, gitaral-taral sa
panahon morag
tarak-tarak,
gilinog sa kitik
sa kinabuhi.

dili lang ang pagtoo nga aghop

moingon ta
gihigugma nato ang atong mga asawa
ang atong mga anak

bilib tas atong mga katigwangan
saludo sa atong mga lolo ug lola
apil na gani ang atong mga
lagyong kagikan

nagtoo tag Ginoo
luhod tas mga santos
pati gani
sa gobyerno
too ta

pati gani sa hangyo sa kapitan
magduhaduha tag
balibad

kining tanan
naa nagpahipi ang mga kahadlok
basin ug unsay
dangatan kanato

ug sagol ang mga kabalaka
nga basin naa
ang mga kapakyasan

miampo ta.

LUPAD, ang pung ni nanay sa dihang nag-away ming tatay

paabota ang panahon
nga ang imong panit makamao nang
magpadaghan ug balahibo
sama sa tamsing gikan sa iyang
pagkapispis
katulog lang sa
palabya ang hangin diha sa imong
mga damgo
kon moabot na ang kabuntagon
ug kon pagkikap  mo sa imong kilid
nga aduna ka nay pako
himoa ang angay sa mga langgam
o dili ba kaha sa mga
anghel

hala, lupad!

pagklaro

pagklaro, ayoha,
kon imo kong hikapon
pagtarong, ug kon dunay
duha-duha, ayaw na lang
kay basig inig hikap nimo
ug unya
mahinaykan ko,
unya, mabag-ohan ka,
mokurog ka, ug
mokurog sab ko,
basig, pareho tang
mangabuak, nga morag
basong
nagpasad diha sa
sementadong salog.

Thursday, October 24, 2013

kita nga nangalumos didtong dapita


busa
misalom ta
gitukad nato ang
salog sa dagat
sa dugay nga mga
gutlo
wa ta moginhawa
aron lang
makita ang
balas
aron lang mabati
kon unsa ang
kabugnaw
didto
ug sa makausa pa
mopatim-aw kita
sa adlaw
apan bisan wa
magsabot
wala ta manugilon nga
didto
nangalumos ta
ug karon nakat-onan
na nato ang
paginhawa ug balik
ang atong
gipiling
pagkabanhaw

daghan kitag
katarongan
nga dili na nato
kinahanglang
ipanugilon

nakakita ka na ba sa patayng nawong ug lawas sa hangin?


ang hangin
gisulod nato sa
dughan
gisulayan natog
hipos
apan dili mahimo
mogawas kini
aron
moginhawa usab
sama
kanato

kay ang hangin
sama kanato
buhi usab nga ug
dili makalangyaw
sa laing dughan
sa laing baga
mamatay usab
sama kanato

nakakita ka na
ba sa patayng nawong
ug lawas sa
hangin?

talan-awon ganihang buntag


kaganihang buntag
nagbalikbalik kanako ang
usa ka hulagway

hamtong nga lalaki
nga nag-aswat sa iyang
bahin nga usa ka bakid
 sa inani nga humay

abaga nga lapad
ug buli nga kawo
gilukot nga pulang
sinina ug
lapokon nga purol

nag-unag dagan ang
iyang irong
pution nga kon modagan
morag kabayo
paingon sa kalsada
nga molahos paingon
sa tindahan sa
komprador nga insik

kalooy ba sab


sa iyang ika bentesingkong
adlawan
gipili niya ang pag-inosara
kuno

sakay sa cebu pacific
pacebu, posing sa stewardess
nga hamis ug aping ug gamayg
mata,

iyang gihandom nga unta
uyab silang duha

ngano ba? panahon na gayod
sa engkwentro
diha sa pagtugkad nga bisan
sa kaharuhay
magsubo lang gihapon ang
dughan

walay ulo nga midap-ig
sa mga bukton
ug mga kamot nga
 walay buhok nga hapohapon

hubag nga walay buthanan


adunay hubag nga walay
buthanan
sa akong kalag nga bisag
unsaon nakog
kumot di gyod matandog

ang iyang kangutngot lapos
sa bukog sa akong
lawas

ang unod naanad
ang kasakit pamahaw paniudto
ug panihapon

wagas


ug miingon kanako ang
Tingog

"gisilotan ko ikaw sa
pagsulat
ug dili mo kini mabuhat
mamatay ka"

"ang magbasa nimo
mahimong mga adik-adik
walay busganan
ang ilang pagyupyop"

"magpabiling
walay tumong ang
inyong mga kinabuhi
mora kamog
mga patayng dahon
diha sa lilo
sa kusog nga
hangin"

gipaabot ko ang
paghuman sa
silot

samtang ginantang
ang akong mga
tudlo
gipasagdan

sila ang akong
manluluwas
kon makawiris-wiris
wagas.

Wednesday, October 23, 2013

sa pag-abot sa linog


nagyagaw ang mga tamsi
yabag ang ilang mga awit
ang mga iro nanagan
paingon sa kalsada
siging uwang nga walay
hunong
dayon ang tubig sa akong
baso
mibalod nga mora bag
dunay isdang mikisaw
apan dili makita

gilamoy sa yuta


 kusog ang syagit sa  inahan
miapil ang  amahan sa pagbakho
nga morag batang gikawatan
ug dulaan

ug kadtong miabot aron lang unta
sa pagtunol sa tabang
mitakilid aron paghulbot sa ilang
mga panyo
nga nangalimtan

tulo ka mga bata ang nangawala
sa daplin sa sapa kay adtong
adlawa maligo unta
apan
gilamoy man hinoon
silang tanan  sa yuta

panagbulag


sayang
nganong moabot man kamo
sa panahon
sa akong pag-ampo?

isakripisyo ko na ba
usab ang akong mga halad
diha sa panahon
nga akong
inat-inaton?

pasayloa, apan panahon
na usab sa
akong paglakaw
paingon sa
pagkabalaan

sayod ako nga dili kamo
makapaabot
kay kamo kanunayng gadali
busa
wala ako'y mahimo
magbulag usa kita sa atong
mga agianan

ari ko diri
ug kamo adto sab didto

ugma sa kaadlawon
basin ug
magtagbo na usab kita
diha sa
atong mga pulong
dinhi sa lawak
sa akong haw-ang nga
kasingkasing

kulitog kulitog

gikulitog ang dunggan
sa tukog

gipadanlogan sa
lana

lami-lami nga
sakit-sakit

gilok-gilok nga
danlog-danlog

kulitog-kulitog
kulitog-kulitog

wa ka miabot noh?
nahuman na lang ko.

Sunday, October 20, 2013

gutom nga kulansyang atbang sa akong bintana


adunay kulansyang
mibatog sa usa ka hinog
nga saging
sa atbang sa bintana
nga akong gihinuktukan

itom ang iyang mga balahibo
pula ang mata
ug hait ang sungo
sa maong kawatan

adunay bato sa akong kamot
nga unta ibono ko  kaniya
aron siya mopahawa
apan wala ko kini buhata

nalingaw ako sa awit sa iyang
kagutom
ug nalimtan ko ang akong
laraw
sa pagsilot kaniya.

buntag na diay


mas nindot ang kaadlawon
kay diha sa iyang kahilom ug kalinaw
mas dahunog ang tingog
sa mga panghitabo nga wala
magkinahanglan ug mga pulong

pagkaoran-oran
mabati ko ang pag-abri sa pultahan
sa kusina
kuyog ang agik-ik sa upat
ka bisagra

pagkahuman niini mosulod
ang irong pution nga ang
ikog
nagsigig kiwil
dilang naghalhal
mga tiil nga misayaw
ug mga matang migilak
tungod ug alang
sa buntang nga
masanagon.

la lang god

gitina ni doktor-pintor ang iyang buhok
og bulawan

kalit nakong nakita, pasayloa dok,
si marilyn monroe,

busa nakaingon kog, "ay, pagkagwapa!"
ug sa kalit sab mibwagsa ang iyang buhok
nga may pagka joseph estrada,

mi-comment ang usa, "gosh, girly keyo!"
ang akong gikalibgan nganong nasuko

ka man, nga unta, di ka man yotba.
hmm, wa damha, ako nagduha-duha.

sultihan ta ka


sa dihang nahinumdoman
nako ang pinakasubo nga
nahitabo kanako, unya,
nakaya ra, bisag kayamukat,
sultihan ta ka, nga kining linoga
dulaan ta, kitang duha,
sultihan ta ka, padayonon
ko na lang, kining akong
panaw nga mamingaw.

yagayaga


ang pagpanghugas kuno sa mga plato
dili angay sa lalaki.
labi na ang pagpanglaba sa panty
sa asawa, kon makit-an ka,
kataw-an ka gayod, ug sa maong
salawayong buhat tawgon kang
bayot.

abi mo, kagabii, nanghugas kog plato.
unya, pagkabuntag, nanglaba ko sa
panty sa akong asawa.

ayawg katawa. Saon ta man nga
nanganak man siya.

M.

sa atubangan
sa samin
inig abot sa
gabii

iyang lawayan
ang iyang
tudlo
dayon iyang
ihinod sa iyang
buhok

inig human
tilapan na usab
niya ang
maong tudlo
dayog gawas
sa balay

siging
panaghoy

handumon


sa mga panahon nga layo kita
sa kamatayon

niadtong mga bata pa kitang
kapyot-kapyot sa sanga sa mangga
dayog labyog paingon sa suba
dayog kapakapa tupad sa saging
nga natumba nga naglutaw sa
katin-aw diin kita kaayo ang
mga puyo ug haloan nga
nanibasib sa mga lumot sa kilid
sa kanipaan

human sa pipila ka linog ug baha
ug ginagmayng gubat sa mga isla

pagkaanindot gayod kadtong
nga hitaboa, handumon.

iyagak


maayo unta kon ang imong gugma
nahisama sa tugtugaok sa mga manok
nga motultol gayod sa pagtingog
matag abot sa kabuntagon

apan dili ko ikaw mabasol

kay ako usab nahisama na man lang
sa kalsadang sementado
nga dili na madutlan sa kabugnaw
ug kakusog sa ulan
sa kainit ug kadugay sa mga hulaw

apan dili ko usab mabasol ang akong
kaugalingon

gisunod ko lang ang lakat sa mga pagbati
nga dili na gustong mamakak

inig abot na sa kahaponon
maandan na nato ang paglingkod sa
kilid sa sibay sa atong balay
aron lantawon na lamang ang
nagtinga nga kahayag

di na man gani ta kahihumdom kon unsaon
pagsugod ang tininood nga pag-iyagak

pagkahuman sa linog


nahulog ang ulan
ning sayong kabuntagon
gikuyugan
ang pag-abot sa
naandang kahayag

gipanghulog usab
sa punoan sa ilang-ilang
ang iyang mga bulak
kagahapon

ang mga tamsi sayong
nangita sa mga mumho
sa atong gipanglawog
sa iro kagabii

nagduyog ang mga tingog
sa kalumo sa hinay nga
taligsik sa ulan ug sa
kahinay nga pag-abot
sa mga tunob sa kahayag

hilom ang mga bulak
nga nahaluna na sa tiilan
sa kahoy

abtik ang mga tamsi
diha sa iyang gaan kaayong
pako ug mga tiil
apan wala ka'y mabati
sa ilang mga kasikas

linaw na ang kalibotan
karon
human sa pipila ka
pagtay-og.

ang musika sa binatil nga duha ka dagkong itlog sa bebe


gitadtad na ang lawas
ug dahon sa sibuyas
gipanitan ug gidukdok
ang gagmayng bisayang
lima ka lusok sa  ahos
gihiwa ang pula ug
bus-ok ug baga'g panit
nga kamatis
gibuak ang duha ka dagkong
itlog sa bebe nga giliboran
sa usa ka pignit og kusi
sa hait ug pino nga asin
ug gibatil na sa
usa ka silver nga tinidor

nalagnaw ang duha ka itlog
nga morag utok nga nalibog
samtang
gipahiluna ang kalaha
nga morag rayna na 
sa lingkoranang kalayo

 ug gihuwaran sa
sa tungag baso nga mantika
sa lubi
ug sa dihang nakab-ot na
ang saktong kainit nga wa na
maglagiit
gihuwad ang gabula
nga binatil sa lansang
itlog sa bebe nga
giasoy ko kanimo
kaganiha

nindot pamation ang
tingog sa pagprito sa binatil
nga duha ka dagkong itlog
sa bebe
dungan sa kahumot sa mga
panakot nga gigisa sa
mantika nga karon sa
 akong ilong
nanuhotsuhot

Saturday, October 19, 2013

kitang mga dangag sa gugma



ikaw ang akong samin
ug makita mo ako nga
gahubo
sa imong kwadro
nga panglantaw

nindot akong lantawon
sa banag-banag
sama kanimo nga mas
maanyag usab
diha sa kangitngit

magtinutukay kita
ug pagkaunya mahimo
kitang mga irong
nabuang sa pagdakop
sa ilang mga ikog

nagtuyok-tuyok kita
sa sidsid sa atong mga
damgo

ako ang di kaantos ug
nagpunay ug sunod-sunod
kanimo
wa ko kini damha
nga akong gihawiran ang
imong nawong ug akong
gitunol ang akong dila
ug akong gihalad ang
akong mga kamot diha
sa imong dughan


pagkaoran-oran nasinati
nato kon unsa ang pagkatumpag
sa mga alili
kon giunsa pagdagsa sa mga tubig
ngadto sa dagat gikan sa mga sapa
nga nahimong mga suba
kon nganong mikalit ug baha
dinhi sa mga kanipaan


sa atong pagpahulay pagkahuman
nakahisgot ta kabahin sa panaw sa
duha ka mga gagmayng sakayan didto
sa lawod nga mga walay katig ug
walay mga timon
og gani, nalimtan pa man ang mga
bugsay didto sa baybayon
nga malipayon

ako ang


halas
nga misutoy ug kamang
paingon sa kakahoyan
gipangita ang udlot o
panit o gamot sa usa ka
kahoy nga iyang makitkit
og mausap
aron mamaayo lamang
ang iyang samad
sa dughan

damgo sa kaadlawon kabahin sa milupad nga tawo


ngitnit ang simbahan
misulod siya sa lawak diin
si Fr. S.
nagpaabot kaniya
alang sa iyang
confession nga
milungtad og usa ka
oras,
gihatag ang sentensya
sa pipila ka amahan namo,
maghimaya ka maria,
ug gloria patri,
ug iya kining gilitok
sa pagluhod ug
pangaliya
nga dili na siya mousob
ug dayon
gilatas niya ang taas kaayong
agianan sa simbahan
paingon sa pultahan
nga iyang giabrihan
ug iyang gibati ang kagaan
sa iyang lawas
ug paglutaw sa iyang mga
tiil

gabii na kadto
nanirado na ang mga
tindahan
ug wala nay mga tawo
ang kiosko

didto siya sa ibabaw
sa akasya
naglutaw
nagpalabay sa iyang
nakaplagang
lahi nga kalipay

Friday, October 18, 2013

karaan ug lahotay

dili sa tanang panahon nga ang gugma usa ka patag
diin ang mga baka ug mga kabaw malipayong misabsab sa labong nga kasagbotan
diin ang kahayag sa adlaw malumong mipahamis sa panit sa kadahonan

adunay panahon ning atong panaw nga kita mokatkat sa kabungtoran
ug unya magdungaw kita sa mga pangpang nga morag mosuyop kanato sa atong pagkahulog
paingon sa kaalautan
diin ang mga pispis nangamatay sa tumang kainit
diin ang mga sapa naughan sa ilang mga tubig
diin ang mga bato nahimong baga ug makapaso sa atong mga tunob

usahay anaa ra kini kanato
ug unsaon pagtubag ang mga pangutana

sa akong kabahin, malipayon akong manghimakak.
aduna ako'y daghang larawan diin kini naghawiray sa atong mga kamot
ug ang atong mga pahiyom morag gilak sa usa ka aryos nga bulawan
diha sa imong dalunggan

karaan, lahotay.

ang kalipay sa itoy

ang akong kalipay nahisama sa itoy nga
dugay mo nang gibyaan tungod sa imong mga lagyong lakaw
nga unya inig abot mo dapit sa labat nga kawayan
bisag dili mo pa ako masitsitan
samtang gisulayan mog abri ang pultahan
atua na ako mikaratil ug dagan paingon kanimo
aron hagkan ang imong tiil
ug unya kini
tilaan

ang akong kasubo

wa nako
mahigop ang kainit sa kilid sa imong dalunggan
wa nako maaninag kon unsa ang imong kalag ug lawas sa lawak nga atong gitagboan
akong gisulat ang
kasubo nga hangtod karon dili ko gayod ipabasa kanimo
kay sayod ko
nga bisag mabasa mo pa kini
samtang ako maligo dinha sa banyo
dili mo gayod gihapon
kini masabtan

katolugon

kaniadto
gihambin sa akong dughan
ang kahayag
mikunsad kini sa akong mga
mata
milapos sa mga buhok
kong tanod

kaniadto
wala kanako ang kahilom
kay lami ang kisaw diha
sa pagsalom

sa nahitabo tali kanato
ug sa akong pagbiya ug sa imong
pagpalayo usab

gibuhian ko ang kahayag
sama sa usa ka pulong sa akong
alingagngag
gihuptan ko ang kahilom
aron masabtan ko ang tanan
gisukad ko kini sa talad-kan-anan
sa altar nga ampoan
sa akong higdaanan
diha sa pinilo pang mga habol
sa mga alugnan
nga karong gabhiona
akong dat-olan sa akong
mga damgo
hapnig sa akong
gihandom nga laing
nindot nga katulogon

alang sa among sulogoon nga sayong momata

ang iyang mga kagabhion
nagpalingpaling sa iyang lawak
diin ang hangin
nagdalag kainit

iya kining gipadayag sa mga
hagdan ug bongbong
matag buntag samtang gitak-ang
niya ang nilung-ag

samtang gitrapohan niya
ang mga lingkoranan ug
lamesa
aron dili na mahikapan pa
ang mga abog

samtang gisilhigan niya ang
mga salog
aron mosinaw kini sa
tibook adlaw

sa iyang pagkaubos nga
sulugoon
kinsa ba ang mamati kaniya?

layo ang iyang bana ug tulo
ka mga anak
ug ang iyang payag
sa kamingaw namayagpag


ang mangtas sa katalagman

kon kanus-a
gadahunog ang pag-abot
sa mga tingog
ambot ug nganong
mao man usab ang
oras sa pagbagting
sa kampana sa simbahan
ning mingaw nga lungsod
ug diha sa maong
kalangkalang
gihagit ako
sa kanunay nga
pagsimba
ug pagyukbo diha
sa kahadlok
nga basin kami na
ang sunod
nga duawon
sa gikalisangan
nga mangas sa
katalagman

asul nga asul lang gayod gihapon

asul nga asul
lang gayod gihapon
ang mga asul
nga langit
sa akong
kabatan-on

asul ang mga
awit
sa mga it-it
nga nanglupad
sa langit
sa akong
kabatan-on

asul nga asul
lang gayod gihapon
ang akong
makita
sa akong mga adlaw
karon

lalom nga dagat
diha sa imong
mga mata

asul nga mga
pagbati
sa atong mga
kasingkasing

pagdawat

aduna ako'y tingog nga
nadungog
sa kaadlawon
wala kini migamit
ug pulong

gipaminaw ko usab
kini
sa wa pagamit sa
akong dunggan

kay bisan ang akong
mga kamot
wa pa sukad makadawat
niini

Thursday, October 17, 2013

dagayday

ang matag lami
akong giukit ug nahisama
ako sa maya
nga sa matag ukit sa uhay
giluwa ang tahop
nga sa yuta
midagayday
dayog lupad palayo
kuyog ang saad
sa pagbalik

mawa ang kasakit
sa laing gihimong kasakit
ug ang kalipay
nahimong mga paypay
nga siging pamaypay
aron mahupay

ang panahon
siging gihurot
pagkahuman
diha sa kamingaw.

ang larawan nga dili nimo pahimoan ug balak


gamay ang dila ni maria nga
namintana sa iyang baba

 nahisama sa usa ka dalaga sa payag didto sa bukid

unya ang imong kamot nga mihawid sa iyang abaga haskang dakoa

morag lima ka sapa nga nagtagbo sa
dakong suba paingon sa dagat

mora sag udlot sa bayabas nga imong giusap
alang sa gamayng bata nga bag-o lang gituli

mora sag kamot ni tatay nga mihipos sa gamayng tingog
sa katabang nga gustong mogawas sa moskitero aron mosyagit ug unta manawag ug tabang
sa mga anghel sa langit

daghang parehas niani
ug busa gisulat ko kini

kay walay aso nga makumkom
walay tunod nga dili matultulan

ikaw nga nagtoo nga mabaw lamang ang akong panglantaw kabahin
sa gamayng dila ug dako nga kamot
mao ang naghandom nga unta dili na lang kini sulaton

 isip usa ka balak

ayaw basoli


ayaw basoli ang pagkabuak
sa garapon

niadtong higayona
giganahan ka usab sa tingog

sa dihang nabuak ang baba
niini sa salog nga

gahi ug sinaw ug gikalipay
mo ang mga bildong nagpasad

MELANIA


mihangad si
melania

nangagho ug
miingon"pagkadako sa
kahoy....pagkamingaw"

ug ngadto sa
balay sa kilid
sa bungtod
midugang siya
sa pagpanghupaw
"pagkadako sa balay
apan
walay tawo"

mga pangagho


UNANG PANGAGHO

gibasolan sa kabatan-on ang
pagpupo sa hilaw nga bayabas
hamis ang panit, apan pagkapait
ug pagkagahi sa unod

IKADUHANG PANGAGHO

ang imong gipili dili mao
gihawiran mo ang pagkahayahay
apan ang imong kasingkasing
walay tumong ang lakat


IKATULONG PANGAGHO

wala mo mahuman ang imong tahas
apan gitawag ka na sa hangin
ug ang dagat nagkisikisi na sa
iyang mga balod

IKAUPAT NGA PANGAGHO

ang mga lubong wala mo madalhi
sa mga buwak alang kanila
ang mga kandila nangapalong
ug nangapakpak na ang mga putli

pauraray


inig ka domingo
gihimo ko ang akong bag-ong
kalibotan

diha sa duyan
ako mohay-ad
ug ang hangin sa dagat
moginhawa diri
kanako

ang akong baga mao
ang mga kahoy
ug ang iyang mga sanga
mao ang akong
mga ugat

ug diha sa duha ka
kamot sa orasan
ako
mopauraray

panaw


manamin ako kanimo
diha sa imong mga mata

ako lang ang imong
makita
ug ang imong laway
unya magtabisay

pagkaunya
duha kita ka irong
nabuang sa atong
mga ikog

ang imong dila
mopatong sa akong
dila

mabati nato
ang kakusog sa bunok
sa tubig sa
duha ka sapa

kini ang panaw
sa duha ka sakayan
nga walay katig

walay timon
walay layag.

sa karon nga wa say sima

plantsado na ang tanan, unta,
inig abot, panihapon sa sumosam,
sashimi ug maki, ug hot green tea,

matug sa crown, ug sayo pagkaugma
lakaw-lakaw sa abellana, simba sa sto. niƱo, then
buffet breakfast sa Park Lane,

molapos sa Mani, then sun and sea sa malapascua,
giplano ang overnight didto,

pilgrimage sa Simala, then adtoon sab
ang Birhen sa Udlot sa Carmen,

balikan ang butanding sa oslob
tabok sab sa sumilon

dinner sa xiamen restaurant sa mango
pwede sab sa Persian resto,

wa damha, gilinog man ang  tanang plano
sa ikaduhang adlaw, buntag sayo
mikurog mi, wa kasabot, di matugkad ang
tumang kahadlok

sunod sunod ang mga aftershocks
sulod guwa sa hotel
nga nangliki ang bongbong
nabuak ang samin sa CR

haskang paita.

Kining kalibotana nadamgohan ko na
bato patong sa laing bato, patong patong
nga bisag sa usa ka kuhit lamang
mangahapla ang tanan

way klaro, dili gayod tataw
kining atong panaw
ang ugma di na matagna
sa karon nga wa say sima.


Saturday, October 12, 2013

tarzan 101

nakit-an ko ang
lugar diin ikaw matuod
didto

gusto ka nakong
dalhon
aron makita mo
ikaw

nasuko ka.

katultol ka apan
gilikayan mo
kuyugan ko unta
ikaw
apan milugnot ka

managsama ang
atong dagway
morag gitunga nga
avocado

naapil og kabuak
ang liso
ug sama kanimo
pait sab ako

adunay lugar kanako
nga tinood ko
apan sama sa kabayong
idlas
milugnot sab ko

ang kagawasan
nahisama sa lasang
nga dili na
nato gustong balikan pa

kay di na kitang
kamaong mogunit
sa bagon
mokapyot sa sanga
ug masuntok sa
atong kaugalingong
dughan

pangadlaw

Mikatay sa tumoy
sa punoan sa lanzones
ang idlas nga
pangadlaw

namuwak kinig
maayo ning
bulan sa oktubre
tigre ang bulok
sa iyang
mga pyuos

siya ang nakaankon
sa tibuok adlaw
siya ang nagmadaugon
sa iyang kahilomon.

SABUNGERO SA KATIPUNAN

ning sayong buntag nakita ko
ang bayongbayong nga lalaki
nagdala ug duha ka manok
pangsabong unya ang iyang
buhok morag inawat sa The
Last of the Mohicans.

dala ang packbag nga itom sa
iyang likod, gipaningot ang
dughan nga walay tabon unya
gisi ang iyang maong nga
pantalon.

tingsabong na. walay hilam-os
lapok ang tiil, daan ang tsinelas.
Gabugdo ang bulsa. Andam na
ang tinigom nga pusta.

Friday, October 11, 2013

kay kon ikaw pa unta nganong kinahanglan pa mang litokon?

ambot
mikurog man ang akong ngabil
mikagot ang akong ngipon
wa nako malitok ang
usa lang unta ka pulong
alang sa tanang katuigan
sa tanang panghitabo
sa usa ka pulong lamang
unta nga akong litokon
ug aron
na unta mahuman ang tanan
sama sa usa
ka tuldok

ambot
nganong wa ug dili ko gayod kini malitok
diha kanimo

gihunahuna nako sa pipila ka higayon
ah, basin ug dili gihapon ikaw
ah, basin ug dili kadto para kanimo

karon nasabtan ko na
wala pa ang hinog nga higayon

kay kon ikaw pa gyod unta
nganong kinahanglan pa mang litokon?

Wednesday, October 9, 2013

alang sa akong amigo nga taga-Galas nga nagsundalo unya wa na igdongog

asa ka namang dahon
sa saging
karon mipasilong?

ang gisalod ko nga
lusok sa ulan
wa sugod mauga
sa akong
palad nga samdan

wala pa gayod gihapon
maputol ang atong duha
ka pusod

matag ulan
mabati ko ang kabugnaw
nga karaan

madungog kog balik ang
atong mga katawa
nga dili binayran

unta magtagbo ang atong
mga dalan
unta moulan pag-usab
sa atong gigikanan
unta magtupad na usab
kitang duha

kay ang atong kalibotan
wala ang kabalaka
ang atong mga handurawan
walay bisag usa ka lusok
nga kahadlok

paghinumdom kang Friedrich Wilhelm Nietzsche

Ayaw'g katawa
migawas ko sa balay
aron mamukot ug isda
sa plaza

ayaw'g katingala
nganong ang akong
dagat dili mo makita

ang akong sakayan
tabanog nga naglutaw sa
panganod

ayaw'g pangutana
nganong gipasiga ko ang
mga suga
sa tunga-tunga sa
kaudtohon

tuhoi ako
ngitngit na kaayo ang
kalibotan
unya ang mga isda
nanglangoy na sa
hangin
ug ang dagat
ania na
mibanaw sa plaza

MALALAG

miingon ka nga ang kalipay anaa
sa Malalag
busa among gisubay

mitungtong mis dakong bato
ang akong nakita ang patag
misaka mi sa balay sa kilid
sa pangpang ang akong nakita
mao ang pulang pangadlaw
sa kilid sa bintanang gabok
mipanaw mi paingon sa patag
nakita namo ang mga gagmayng
balay nga nanugid kanamo sa
kalisod, kapobrehon ug sa
pagpamahawa sa mga batan-on

wala ang kalipay sa Malalag.
wala ka usab didto. Mibiya kami
nga gutom ug subo. Gabii na kadto
ug walay mga bitoon.

ngano ba?

usahay
mabasol ko ang akong kaugalingon

 nganong nangita kog
tubig diha sa dako, layo, ug lapad
kaayong disyerto?

ang nakaparat pa gyod
kay ako rang usa.

soulmate

wa sugod magkita
apan kon magtagbo
bisag masiplatan lang
magsigig lingi, lingi,
balik ug lingi, nga
mora bag dugay na
kaayo silang
nagsuod  kaniadto pa
sa ilang mga nanglabay
nga karaang naagiang
kinabuhi, unya kon
mohunong ang usa
sa makadyot aron
motutok, mobalik
sab ang usa ug dayog
gakos, kanang way
makasalik-ot bisag
usa ka dagom,
mohilak, mahinangop
bisag wa na sila kaila
sa ilang mga ngalan.

ang kabahin sa panagtagbo sa panganod ug sa dagat

naglipak ang kakurat
sa duha sa dihang nagtagbo
na sila

sige na man unta kining
nahitabo ambot ug ngano
nga maglinti
pa man sila ug magkilat

naglibog ko kon anaa ba
ang gugma o
ang kasilag

Monday, October 7, 2013

duha ka sweet nga lovebirds

mas nindot lantawon ang duha ka langgam
nga nagtupad patong sa puthaw nga rehas sa bintana sa simbahan
kaysa nawong sa pari nga nagwali kabahin sa mga demonyo nga kuno usahay mosulod sa atong mga lawas
ug makagabok niini

natintal kong namati sa ilang mga awit
kaysa mga pagpanghadlok nga giyawit ni Father nga kuno kadtong dili magbag-o sa ilang mga binuhatan
sunugon gayod ngadto sa mga kalayong walay pagkapalong nianang iyang gibansiwag nga impyerno

kaming mga unggoy



oo, mahimong
wa koy madungog
wa koy masimhot
wa koy makita

apan ayaw ka
kon magpadayon
kining imong
kalihokan kaming
tulo ug uban pang
akong mga kauban
mangapyot ug
mag-ambak-ambak
sa mga kakahoyan
uyugon ang mga sanga
samokon ang mga
bagon
pamotlon ang mga
gaway
usapon ang mga
udlot
hangtod nga
mopahawa ka

ayaw palihog

luspad gihapon ang kaadlawon
nga miabot gadala sa iyang pagkamadudahon
kabahin sa kamatod-anon sa umaabot nga
kabuntagon

kon giunsa siya pagmatuto sa kagabhion
kon unsa ang nahitabo kaniadtong mga kahaponon nga mihapohap kaniya
nganong nagmasakiton siya? nganong napuno gihapon siya sa kabalaka bisag
sa iyang kabatan-on

dili baya tanang kabatan-on masaaron
dili baya tanang kaadlawon mabuhion
 aduna'y mga kaadlawon nga wala kabuswak sa  kahayag
tungod sa bagang dag-ong sa mga kahingawa
tungod sa kusog kaayong ulan sa kahadlok

ayaw, palihog ayaw, hikawi ang kaadlawon sa iyang
maayong adlaw.
ayaw, sirad-i ang pultahan ug ang mga bintana aron unta niya
masilip ang saad sa mainiton kaayong kahayag sa mga umaabot.

alang kang J. D. nga karon naupaw na

dako ang oras nga imong
gigahin
alang lang sa paghinumdom
kaniya

"wala ang agape" maoy imong
gibutyag

sud sa baynte ka tuig nga
sulat-sulat walay kuha ang
mga tinta sa papel

daghang nausab, ikaw, siya,
anaa na ang mga balod sa dagat
sa imong aping
ug siya nawala nga morag
usa ka tayhop sa hangin

ang wala mausob mao ang pipila
ka baso sa beer
lamian lang gihapon ang mga bula
niini

gilantaw ko ang lawak ug balik
tua si james dean, si al pacino
adunay usa ka kwadro nga puno
sa pusil
ug ang musika nga kanunay gitugtog
mao ang gisabayan sa agong
ug kulintang

daghan kag nainom ug gusto nimong
moiyak, mobakho ba kaha
apan lalom na ang gabii ug
wala na akoy panahon kabahin
sa kasubo sa imong kasingkasing

kapoy na usab ug pamati niaang
mga bakak sa panahon
ug pagbati pag-usab sa kabugnaw
sa kagabhion

natapos na ang drama ug ako
mao lang gihapon
tigbayad, tigpamati kunuhay,
tigtapos sa dili mahuman

alang kang J. M. nga karon haskang tamboka na kaayo

itom nga long sleeve
kotse nga abohon
itom usab nga pantalon

usa ka botelyang beer
usa ka mexican taco
ug siging pasiplat sa
relo: usa lang ka oras
usa lang gayod ka oras
ang tagal sa pagpamati
sa bakho ni J.D.

ang kabahin kang J. R.
walay tagal. Hala buga
ug kalayo! Hala, pabula
sa laway pagkahuman

gugmang gitay-an
kulang na sa lana
pagbating giahak
ug giatay. Kinsa
pa ba kaha ang motoo
kabahin niini?

usa lang usab ka oras
ang akong antoson
gipunsisok ang 20 ka
tuig sa usa ka oras lamang
nanghinaot nga unta kini
maigo ug dayon
sirad-an ang botelya
sa paghinumdom dayon
ilabay kini sa dagat
aron mapunitan ug
basahon sa isla diin
unya kini idagsa.

pagkawalay pulos
sa usa ka panagkita.
ako mismo, dili na
ganahan nga kini
usbon pa. Kadena
de amor, nahimong
amor seco, nga
laming putlon, paughon
ug dayon sunugon.

sa namatay nga wa kabantay

sa kakusog sa pagdagan sa panahon
adunay tawo nga iyang nabati nga siya milupad
misaka sa panganod ug iyang nakita ang iyang
lawas nga nabilin unya wala man gani
mikaway kaniya

gisuyop siya sa lilo sa kapalaran
wala kapanamilit ug wa na gayod igkita

ang ylang-ylang

sa kangitngit sa kagabhion
naaninaw ko pa gihapon ang
baga nga buwak sa
ylang-ylang

ang iyang kahumot bisan sa
kakusog sa ulan
nanglapos sa akong duha
ka dalunggan

kabahin sa kawat sa pahiyom



ang imong gikawat nga
pahiyom nga gidayandayanan ug mga
dahon sa dagat
mobalik pag-usab kanimo

magdala kini ug kusog kaayong
ulan ug hangin
ug ikaw paliron paingon sa
dakong kalimot

ang imong gikawatan magpabalon
kanimo sa iyang kasuko
ug kadtong nahibalo na karon niini
ihumol ka sa aslom nga
suka ug lutuon ka sa ilang
mga kaulaw

Tuesday, October 1, 2013

pagbati human sa usa ka daotang binuhatan kagabii

sa usa lamang ka
binuhatang dili mao ug dili mo basta lamang malimtan
tungod kay gusto nimong
limpyohon ang tanan sugod sa imong
nawong
ambot ug nasulayan mo ba ang pagbati nga
bisan ug ginagwayng wisik sa tubig sa imong
mata ug ilong mora ka mag lumsan niini
ug kadtong miagas sa imong aping
makapaso man ang kabugnaw
ug kadtong misabod sa imong wait
mora mag mga hulmigas nga namaak
sud sa imong baba ug nakapangotngot pa
man gani sa imong dila
nga mora kag giluasan
ug mabati mo nga ang imong bungot
haskang bagaa na
ug daghan kaayong kuto nga nangumpayot
sa matag tumoy niini
ug sa dihang mibuka ang imong mga mata
aron lantawon mo ang imong dagway pag-usab
haskang maota na man
kaayo nimo nga mora bag ikaw
usa na ka hingpit nga demonyo?

alang kang L.

palabra de honor
wala ako kahinumdom nga gitagaan mo ako niini
bisan unsaon ko pa
ug puga ang akong hunahuna kon kanus-a
wala gayod ako'y
mahinumduman kon asa, kon ikaw, mihatag ba
niini kanako

kaniadtong ang akong kalibotan giinat-inat lamang
niadtong mga lastiko sa akong mga kamot
sa tirador nga akong gihimong bahandi sa akong
lawak
sa mga tanzan nga akong gihimong bililhon kaysa akong
mga libro ug mga komiks

karon, gipangita mo ang palabra de honor?
asa ko man kini kuhaon aron ihatag balik diha kanimo?
asa ba? asa ba?

ang balaod sa kinabuhi magpabilin
kon unsa ang imong gitisok, mao lamang kini ang motubo
kon unsa ang imong gipahulam, mao lamang kini ang kuhaon mo ug balik
ang wa mo mahatag, sukad-sukad
dili mo kini mahimong tukibon bisan ug sa pulong lamang

ginagmayng pudyot sa kalipay ni Tom Juns

sa mga pangutana
ang tubag mao ang mga buga
sa pipa

anaa ang aso
alang kini kanimo
dakpa

hakpa ang mga dili klaro
apan makalipay kanimo

gaksa ang dili angay
tawga ang anghel mong sangay

tali kaninyo mao ang kahanap
nga bisag nasayran mo na kini kaniadto pa

gibalewala mo
pudyot, pudyot sa ginagmayng kalipay
ginagmayng pudyot sa asin
alang sa manggang hilaw

pagkapino sa mga adlip
sa kaaslom diha sa wait mong giugahip

hala buga, buga, buga,
hangtod magawsan ka.


tanlag

usa ka krang
lamang
moandar na dayon
ang motor nga
imong gihulman
sa imong silingan

usa ka krang
lamang
nahimo ang sala
nga wala
damha

usa ka krang lamang
gilamian ka
sa pagsakaysakay
tuyok-tuyok
angkas-angkas
balik-balik
sa tulin nga panaw

pagkahuman
moandar ang makina
sa imong
tanlag
daladalahon ka niini
buntag ug gabii
walay hunong-hunong
walay tulog-tulog
walay preno
walay klaro kon asa
ka dalhon
ug kon kanus-a ka
panaogon niini

maghapdos ang imong
mga mata
kapoyon ang imong
kalag
samdan
mahapla ang lawas
sa katreng
tunukon

en persona sa byudang gahigwaos

nainsaktohan ang bayot
nga manunulat sa dihang misulod kini
sa lawas sa byudang gahigwaos

sa maong persona nakabirada siyag
manuroyay ug balot didto sa tersena:

bus-ok ang lawas, taas ug tudlo, baga ug
nawong, gahi kaayo ug ulo apan
ang ilong kwidaw ka
kahumok kaayong
birabirahon bisag asa.

walay malisya

yano lang nga gihubo ni tatay ang iyang
karsones, karsonsilyo ug kamisadentro
dayog kumkom sa iyang buhi
ug pagkahuman salom didto sa dagat

ug tungod kay tin-aw man kaayo ang dagat
niadtong sayong kabuntagon
motimaw motiglom ang iyang
tinagoang tuyom

kaming mga bata nga naglantaw kaniya
durong pangatawa samtang nagsigig pataas sa
among gihimong tore nga balas

kanser

gihikap niya ang iyang totoy
ug siya
nagsubo kabahin niini

nagyampungad siya sa kagabhion
nag-inosara sa sigig pangutana ngano
nga siya pa
ug nganong wa na lang kini mitugpa
sa mas bug-at pang nahimong salaod
kaysa kaniya

gipanugilon kini niya sa mga dagkog
mga tilaok
ug siya gikataw-an lamang

alayon sa ilang mga kabalaka ug mga kahadlok
nagpahipi ang tinagoang kalipay
nga silang tanan diay
naahan niini


nag-atong

sa mga butang nga wa na makatugaw
sa akong kalinaw
daghang salamat

sa mga butang nga makapahugyaw pa
kanako
palihog maayo unta ug moabot kamog sayo
kay kining inyong ubos nga sulugoon
ania nagmingaw nga nag-atong sa mga aso
sa mga tambutso sa karaang mga sakyanan
nga ani pa dinhi sa among tugkaran
kay wa pa gipapas sa atong mga
kagamhanan

witwit

nabihag ang akong mga mata
sa duha ka langgam nga naghagwaay
sa rehas nga bintana sa simbahan

mas natintal ko sa ilang mga witwit
kay sa pagpamati sa wali ni Fr. Jun
kabahin sa mga demonyo kuno nga
misulod sa utok ni Jean Napoles
samtang nagsigi kinig pangawat
ug mga kwarta sa kaban sa atong nasud
kakutsaba ang mga senador
ug uban pang mga kongresman

sa likod sa duha ka langgam mao ang
mga palmeras nga morag giganahan ug
sayaw sa bugnaw nga hangin sa
kabuntagon ning unang mierkoles
sa bulan sa Oktubre.