Ang lumot nga sa bato mitapot

Ang lumot dako gayod ug gugma

Sa bato, kay bisan pa kini ug tig-a

Gahi ug ulo, bisan pa sa pagkawalay

Pagbati niini, tapot lang siya gihapon

Sa bato. Wala mangambat ang bato

Sa lumot. Apan ang lumot sa makanunay

Naghandom sa bato. Bisan pa ug

Moligid ang bato, sa sugo sa baha sa

Suba, sa mando sa tubig ug linog sa

Yuta, ang lumot nagpabilin nga

Nagpauraray sa iyang lawas, sa iyang

Paa, sa iyang bukton. Ang lumot ang

Tinood nga nahigugma. Dili malingla

Sa tambag sa gamut sa kawayan.

Dili kabalo magtoon

Sa gibuhat sa lapok nga mikuyog sa

Pag-anod sa mga bali nga sanga ug lata nga dahon.

Dili mausob sama sa dagan sa sapa.

Dili makiskis sama sa taya sa barko.

Dili malisang sama sa kuyabog.

Sa bato nga iyang gitaptan lumot ang

Gugma. Gilumutan na. Sa kadugay sa

Panahon, makadakin-as sa mga umang nga

Nagbalhin-balhin ug iyang balayan.