MGA YAMAYAMA

MGA YAMAYAMA SA USA KA BANA

SUD SA KWARTO SA KAMINYOON

SA IKA-DOSE KA TUIG SA ATUBANGAN

SA BULAN UG MGA BITOON SA USA

KA GABII NGA MABUDHION

Wala nako gilukip

Ang imong picture

Sa page 69

Sa libro ni Erica Jong

Kadtong Fear of Flying.

Ako unta kining buhaton

Aron nimo mahibaw-an

Ang kamatooran.

Apan sayod ako nga

Dili mo kini masabtan.

Kanang zipless fuck

Kanang brotsa de papaet

Nga walay labot ang

Kasingkasing.

Dili mo kini masabtan

Kay ikaw

Sama sa usa ka matood

Nga gugma

Wala diha sa imong kasingkasing

Ang pagduladula

Sa pagbati

Wala diha ang pagdula ug

Step step

Jackstone o rayaraya

Kanang tagotago

Dakopdakop

balaybalay

Ako naanad na sa ilang mga

Larawan

Kanang plastar kanang hubo

Kanang hinikapay sa kaadlawon

Nga sa pagmata sa buntag

Morag wala lang

Usahay ibilin ko kanimo ang akong

Kasingkasing

Itugyan sa imong mga kamot

Dalhon ko ang akong lawas

Sud sa akong karsones

Sa mga gabii nga manginit

Ang akong duha ka dunggan

Pwede nimo akong patyon

Apan maningkamot ako nga

Mabuhi

Didto sa ilang mga larawan

Ug mga ngabil

Manginabuhi ako

Pinaagi lang sa akong lawas

Sulod sa akong brief

Ug sa akong lalom ug ugdo

Nga sampot ug bulsa.

Imo na ang akong kasingkasing

Ikwadro ikwarto kana

Pasagdi una ako nga malipay

Sa ilang mga larawan sud

Sa akong pitaka

Bisan lamang gani ug kini sud sa

Pipila ka gutlo lamang

Sa mga gabii nga ako magtutok

Sa mga kisame

Tungod kay nawala ka na sa

Akong panumduman.

Kinsa ba ang makaako sa pagsulti

Nga ang mga panganod dili na

Ganahan magpaulan sa mga sagbot

Nga natabunan na sa daghang

Mga bato ug abog ug laya nga

Mga dahon ug mga patay nga

Sanga ug mga natungi na nga

Mga pagbati?

2

Walay magminyo nga mosaad

Nga ugma damlag magbulag ta.

Ang saad nga inyong mabati

Sa tunga sa katawhan ug

Atubangan sa pari, kadto gayong

Inyong gustong madungog:

Unungan ko ikaw, sa katimawa

Ug kahamugaway, sa kalisud

Ug sa kalipay, sa kapiskay ug

Kasakit, hangtog nga bulagon

Kita sa kamatayon

Apan sayod ka nga daghan na

Kaayong namakak kabahin niini.

Ang uban bisag wala pa magbulag

Tungod na lamang sa mga anak

Ug sa mag natigom nga bahandi

Wala na nagtingogay wala na

Nagminahalay wala na nagtandugay

Sa ilang mga lawas og kalag

Apan nag-ipon lang gihapon silong

Sa ilang mga atop

Nagdulog lang gihapon sa ilang

Katre bisan sa kalapad sa

Kalaay suds a init ug baga nilang

Mga habol

Ibabaw sa mga bedsheet nga

Makapaslot na sa ilang mga likod

Ug makapaigting sa ilang mga tikod

Kita kaha sa atong pagpuyo isip

Magtiayon: lantawa ako, unsa ang

Imong nabasa sa akong mga mata?

Pangitaa ang balak alang kanimo.

Kagahapon gipadaplin mo ang akong

Mga libro sa uluhan sa atong katre.

Nangutana ka kon unsa ba ang akong

Relasyon sa maong mga libro, kon unsa

Ba ang anaa nila nga wala kanimo kon

Ngano ba nga mas daghan pa ang

Gidulot ko nga panahon kanila kaysa

Kanimo? Karong buntaga sayo ka nga

Naligo, namulbos, nagpahumot, nag-

Pinta sa imong nawong, nagpabaga sa

Imong kilay. Duna kay bout ipasabot

Sayod ako niana. Apan gituyo ko ug

Lahi ang akong pangutana: Asa ka ba

Paingon? Unta makasabot ka nga ako

Usab dunay laing ipasabot kanimo.

Magpakabutabungol kita. Dili nato

Kaya nga bungkagon kining dako

Nga bungtod sa atong atubangan.

Kining edipisyo nga atong gipuy-an

Dili nato kaya nga gub-on. Busa

Ikaw usab mitubag: Duna lang koy

Sayo nga adtoon. Wala na ako

Mangutana ug sumpay. Duna akoy

Nakita nga morag luha nga nahulog

Sa imong mata. Mikampat sa imong

Make-up.Morag dunay mantsa ang

Imong nawong.Wala nimo trapohi.

Wala sab ko miaghat. Wala na akoy

Labot niini. Daghan pa akog libro

Nga basahon. Hangtod na kana

Sa kagabhion. Tulo ka larawan ang

Nalukip didto. Sayod ka usab niini.

Adunay mga balak nga dili pa humanon.

Apan kini akong humanon karong

Hapon, sa dili ka pa moabot.

3.

Dose ka tuig. Dose na katuig nga

Ikaw mibilangkad kanako ug ako

Mikapa-kapa sa imong dughan ug

Bilahan. Kong imong gisalud ang

Ulan sa baril, pila na kaha kalibo

Nga baril ang napuno?

Dose na ka tuig. Puol na. Kagabii

Nagbilangkad ka sa katre. Apan

Wa ka nay gana nga ako mokapa

Kapa ibabaw kanimo. Giinitan

Ka lang. Nagbagotbot nganong

Dili pa alisdan ang aircon nga

Dose ka tuig na man usab kana.

Dili na kaayo bugnaw. Dili na

Tingog sa hangin sa daplin sa

Lapyahan sa dagat ang imong

Madungog.Lahi na gadyo. Morag

Tingog sa imong typewriter

Nga guba. Morag tingog sa

Motor nga walay silencer. Morag

Tingog sa martilyo nga nagpansak

Ug mga lansang sa tugas nga kahoy.

Nagbagotbot ka gihapon

Nganong wala pa ako mopalit

Ug bag-ong Venetian blinds

Kadtong color violet kay gipul-an

Ka na sa berde, sakit na sa imong

Mga mata. Sakit. Sakit. Sakit.

Dose ka tuig na. Wala

Na nimo lantawa ang pag-abot

Sa ika-trese ka tuig nga umaabot.

Boring na. Puol na. Kapoy na.

Ug ako, sa imong pagsulti

Feeling guilty: Wala ko ma-bored

Sa mga boring kantada. Sa mga

Engkantong bag-o sa akong kinabuhi.

Sa mga white ladies sa akong balkon.

Andam ako sa ika-trese nga tuig.

Walay puol. Malup-og ako sa katre

Nga paplitihan. Kapoyon ako ug

Kapakapa sa laing mga dughan.

Ablihan ko ang mga bag-ong bilahan.

Sila mga mobilangkad.Kadtong

Nagbilin sa ilang mga kasingkasing

Sud sa mga kaban sa ilang tagsa-tagsa

Ka mga balay didto sa ilang kapobrehon.

Magpadayon kita sa pagdulog nga ang

Magtagbo mao lamang ang atong mga

Sampot. Bugnaw na kaayo ang atong mga

Simod. Bag-o na ang aircon. Violet na pud

Ang mga Venetian blinds sa tanang bintana.

Makita ko sa glass window ang bulan ug

Mga bitoon. Didto ang akong mga damgo

Kanila. Daghan ang akong mga balak karong

Gabhiona alang sa ikatrese katuig sugod karon.

Ug dili na kini kabahin kanimo o kanako o

Kanatong duha. Bahin na kini kanila ug

Kadtong mga estrangherong sakay ug

Mosakay pa sa atong nilayagan nga sakayan.

Dili kini malunod bisan sa kagamay bisan

Sa kadagko sa balod. Mamidpid kini sa

Isla sa mga damgo. Daghan kini ug katig

Sa mga kawayan nga wala sapsapi ug mga

Paglaum. Kuyog sa mga hangin nga asgad

Sa bakak ug hoyohoy sa pagpakaaron-ingnon.

Ingon ana gayod kana. Sayod ka sa imong buhat.