hunahuna

sabta ang hunahuna

ilailah una siya:unsa ang iyang ngalan?

unsay iyang pangita? tagadis-a ang hunahuna?

sa dihang miabot siya

nakaamgo ako nga dili lang diay ako usa

sud sa akong lawas

daghan ko ug hunahuna

usahay samok.dili masabot.

kulasaw ang mga hunahuna.

molingkod ko sa bangko

dili ko moyawit. dili ko mohubit

aron pagdakop sa akong hunahuna

kanang malinawon.kanang kami rang duha

sa akong hunahuna.

unsa ba gayod ang hunahuna?

kon idibuho ko kini unsa man?

awaton ko ang kang Rodin.

ang hunahuna usa ka ulo sa babaye

nga nagduko, nagpiyong, walay kibo.

walay lihoklihok.

puti nga bato nga babaye

ulo lang.

walay lawas. mao ba kana

ang hunahuna? walay lawas ba ang

hunahuna?

hunahunaon ko ang hunahuna

mora kog migakos sa akong gakos.

mihalok sa akong halok.

makighilawas sa akong lawas.

apan ang hunahuna walay lawas,

unsaon ko pakighilawas?

walay kamot. unsaon ko paggakos?

walay ngabil.unsaon ko paghalok?

ang hunahuna usa ka importanting

bisita sa akong galamhan.

abiabihon ko. molakaw ra kini siya

unya. samtang ako magpabilin.

magpaabot sa laing dumuduong

sa akong ulo. ang mga barko didto

moabot, molarga, usahay wala gani

bosena.mao kana ang akong hunahuna.

ikaw, hunahunaa kuno kon unsa

ba gayod kuno ang hunahuna?