nahisama ka sa usa ka punuan sa manga

nahisama ka sa usa ka punoan sa manga
nga aron mamunga ug daghan
kinahanglan pa nga paasohan matag hapon
abonohan, spray-han, pugson sa pagpabulak
puston ang mga gagmayng bunga
aron dili uluron, langawon ug mangatagak
sa dalan, ug dili mangahinog

ngano ba? nga aron ka mamunga hagoan
pa kita nianang mga ritwal sa pagpabunga?
ngano ba? nga aron mangahulog ang imong
mga hinog nga bunga uyugan pa ang imong
mga sanga? ngano ba nga nagkinahanglan
ka pa ug mga gimmick ug drama aron ka
mamukhad sa imong mga bulak aron ka
mamunga ug manghinog ug mangahulog?

obligasyon nato ang pagpamunga, mao kana
ang mando sa kinaiyahan, kay ug dili, kita
baya sa ginaingon sa kapalaran, kita pagaputlon
ilabay sa buho, ug pagadauban.