ang pobreng bata sa tunga sa tubig

ang pobreng bata sa tunga sa tubig
nagtan-aw kanato

dili na siya mahadlok
naandan na niya ang kurit sa
iyang nanay
dili na siya sakitan sa bunal
sa bugsay ni tatay
sige na kini
matag adlaw

ang pobreng bata sa tunga sa tubig
nagtindog
wala siya nagpakalooy kanato
wala pa sugod niya nabati kon unsa ang kalooy
sa iyang pagkabata
wala siya kasayod kon unsa ang kalooy

sa tunga sa tubig nagtindog ang bata
moambak siya
dili siya kabalo kon unsay dangatan kaniya
malumos siya
mamatay ug mangiyak ang iyang mga silingan

molupad ang kalag sa bata nga nagtindog sa tunga sa tubig
paingon sa iyang padulngan nga langit

sa tunga sa tubig walay nakatabang kaniya
wala siya kasayod kon unsa ang tabang
kon kinahanglan ba ang tabang

wala mo siya tudloi, kon unsa ba ang tabang
nagpakahilom ka lang
samtang ang bata nga nagtindog sa tunga sa suba

miambak sa suba sa kamatayon
nalumos, namatay, ug milupad sa iyang pahulayan
sama sa usa ka gamay nga langgam
mitugpa sa sanga miluklok sa iyang salag ug
dili na makalupad pag-usab