Ang mga tulabong

Kon unsa ang tultol, mao kana

Ang mga puting tulabong sa among

Mga basakan.Panon sila kong

Manglupad ug mutogpa sa likod

Sa mga kabaw.Walay tingog

Walay gubot ang ilang pag-abot.

Nindot kaayong tan-awon ang

Ilang pakigsandurot sa mga

Kabaw. Walay away nga Makita

Sa ilang pagpuyo niining gamayng

Kalibotan sa mga basakan,

Kalapokan ug kasagbotan.

Walay tingog ang mga kabaw.

Nagpunay ug sabsab sa sagbot.

Walay makitang kagubot kuyog

Sa pagdagsang

Sa mga maya nga morag

Mga gagmayng laya nga dahon

Nga nangahulog gikan sa langit.

Dili pa ting-ani karon,

ug dili sab tingtanom.

Walay ulan. Dili kaayo init.

Ug ang hangin

Naglapos-lapos sa mga

Gikwadro nga kaumahan.

Naglingkod ako silong sa kahoy

Sa marang. Sa unahan atua ang

Mga puting tulabong mitugpa

Mitupad. Nakig-unot na usab

Sa mga kabaw. Ug ang mga maya

Nanglupad paingon sa kabayabasan.

Milabay ang iro nga itom, kuyog

Sa iyang amo nga nagsul-ob

Ug pula nga polo nga taas ug

Bukton. Itom ang karsones sa bata.

Ug siya mitaghoy.Bugnaw ang

Hoyohoy sa hangin.Nindot ang

Kaudtohon.Puti nga mga tulabong.

Itom nga mga kabaw. Lunhaw nga

Mga sagbot. Walay mga habalhabal

Dinhing dapita.Mipahulay ako.

Naminaw mianinaw. Madungog ko na

Ang mga tunob sa mga hulmigas

Lakat paingon sa hinog nga bayabas.