mY secreT ponD

Ang mga libro nga imong gipanghambog

Nanghambog ka sa kadaghan sa
Mga libro nga imong nabasa
Mora bag imo akong gipasabtan
Nga sa kahabog ug kabaga
Dili ko na ikaw masabtan ug kon
Makigsulti ako kanimo
Imo lamang akong gihimo nga
Kataw-anan sa imong eklusibo
Nga katilingban.

Ayaw lang ug kasuko
Nga ako moingon nga kanang imong
Mga libro lubnganan kana sa mga
Nangamatay na nga mga hunahuna.

Mga bukog, Mga kalabera. Mga abog.
Mga natikig nga mga unod ug utok.
Sulayi ug pukaw ang imong nga
Nahikatulog nga diwa. Hagki ang
Ilang mga ngabil. Hawiri ang ilang
Mga kamot. Patinduga ug dalha
Didto paingon sa lawod sa dagat.

Salom didto. Tan-awon ta kon kabalo
Ka bang molangoy sa imong kaugalingong
Mga tiil ug kamot.Tan-awon ta kon dili
Ka ba magkapakapa nga morag
Itoy nga giitsa sa tinood nga mga
Balod sa kinabuhi. Tan-awon ta kon
Kabalo ka ba moginhawa ginamit ang
Duha ka buho sa imong ilong.
Tan-awon ko kon dili ka ba malumos.

Hagit ko kana kanimo higala.Kay kon dili
Ka gani kamao nga molangoy, kay kon
Ugaling mamatay ka didto, seguro panahon na
Nga sunugon nato ang imong habog
Ug baga nga mga libro. Unsa pa ba ang pulos
Sa ilang mga dunggan ug mga uluhan
Kon ikaw sa imong kahambog, wala na?