sa mata sa usa ka bata ang kalay-on sa pagpasagad
sa iyang mga ginikanan dili niya magakos, iyang inaton ang
kahiubos og iyang sukdon ang kalayo sa duha ka bukid
pinaagi sa iyang duha ka gagmayng mga kamot.
Layo kaayo ang iyang inahan sama sa iyang mga bukton
nga iyang gitakdo diha sa duha ka kilid sa pultahan.
Gitigom niya ang kapungot sa iyang amahan
og kon imo siyang pangutan-on kon unsa kadaghan
moingon siya nga ang iyang dughan usa ka sungka
nga napuno na sa tanang mga sigay. Gani nangahulog
na sa iyang mga tiil, tungod sa kadaghan.
Dili niya maihap.Apan iyang matudlo ang mga buak.
ang nakaparat lang, kay dili sama sa uban, og sayod ka
niana, ang bata motan-aw lang paingon didto sa layo
nga morag nanaginot sa kalit nga pagkawala sa bangaw
nga nasang-at sa usa ka panganod. Dili na gayod kana
siya motingog, bisan og imo pa siyang bunalan.
kay sa mata sa usa ka bata, ang pagpasagad sa usa
ka inahan og amahan, dili gayod niya masabtan nga
kini duladula lang. Motapot kana kaniya morag ulat
sa iyang bitiis. Dili gayod niya malimtan.
No comments:
Post a Comment